| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. கும்மோபமஸுத்தங்
3. Kummopamasuttaṃ
240. ‘‘பூ⁴தபுப்³ப³ங், பி⁴க்க²வே, கும்மோ கச்ச²போ ஸாயன்ஹஸமயங் அனுனதீ³தீரே கோ³சரபஸுதோ அஹோஸி. ஸிங்கா³லோபி 1 கோ², பி⁴க்க²வே, ஸாயன்ஹஸமயங் அனுனதீ³தீரே கோ³சரபஸுதோ அஹோஸி. அத்³த³ஸா கோ², பி⁴க்க²வே, கும்மோ கச்ச²போ ஸிங்கா³லங் தூ³ரதோவ கோ³சரபஸுதங். தி³ஸ்வான ஸொண்டி³பஞ்சமானி அங்கா³னி ஸகே கபாலே ஸமோத³ஹித்வா அப்பொஸ்ஸுக்கோ துண்ஹீபூ⁴தோ ஸங்கஸாயதி. ஸிங்கா³லோபி கோ², பி⁴க்க²வே, அத்³த³ஸ கும்மங் கச்ச²பங் தூ³ரதோவ கோ³சரபஸுதங். தி³ஸ்வான யேன கும்மோ கச்ச²போ தேனுபஸங்கமி; உபஸங்கமித்வா கும்மங் கச்ச²பங் பச்சுபட்டி²தோ அஹோஸி – ‘யதா³யங் கும்மோ கச்ச²போ ஸொண்டி³பஞ்சமானங் அங்கா³னங் அஞ்ஞதரங் வா அஞ்ஞதரங் வா அங்க³ங் அபி⁴னின்னாமெஸ்ஸதி, தத்தே²வ நங் க³ஹெத்வா உத்³தா³லித்வா கா²தி³ஸ்ஸாமீ’தி. யதா³ கோ², பி⁴க்க²வே, கும்மோ கச்ச²போ ஸொண்டி³பஞ்சமானங் அங்கா³னங் அஞ்ஞதரங் வா அஞ்ஞதரங் வா அங்க³ங் ந அபி⁴னின்னாமி, அத² ஸிங்கா³லோ கும்மம்ஹா நிப்³பி³ஜ்ஜ பக்காமி, ஓதாரங் அலப⁴மானோ.
240. ‘‘Bhūtapubbaṃ, bhikkhave, kummo kacchapo sāyanhasamayaṃ anunadītīre gocarapasuto ahosi. Siṅgālopi 2 kho, bhikkhave, sāyanhasamayaṃ anunadītīre gocarapasuto ahosi. Addasā kho, bhikkhave, kummo kacchapo siṅgālaṃ dūratova gocarapasutaṃ. Disvāna soṇḍipañcamāni aṅgāni sake kapāle samodahitvā appossukko tuṇhībhūto saṅkasāyati. Siṅgālopi kho, bhikkhave, addasa kummaṃ kacchapaṃ dūratova gocarapasutaṃ. Disvāna yena kummo kacchapo tenupasaṅkami; upasaṅkamitvā kummaṃ kacchapaṃ paccupaṭṭhito ahosi – ‘yadāyaṃ kummo kacchapo soṇḍipañcamānaṃ aṅgānaṃ aññataraṃ vā aññataraṃ vā aṅgaṃ abhininnāmessati, tattheva naṃ gahetvā uddālitvā khādissāmī’ti. Yadā kho, bhikkhave, kummo kacchapo soṇḍipañcamānaṃ aṅgānaṃ aññataraṃ vā aññataraṃ vā aṅgaṃ na abhininnāmi, atha siṅgālo kummamhā nibbijja pakkāmi, otāraṃ alabhamāno.
‘‘ஏவமேவ கோ², பி⁴க்க²வே, தும்ஹேபி மாரோ பாபிமா ஸததங் ஸமிதங் பச்சுபட்டி²தோ – ‘அப்பேவ நாமாஹங் இமேஸங் சக்கு²தோ வா ஓதாரங் லபெ⁴ய்யங்…பே॰… ஜிவ்ஹாதோ வா ஓதாரங் லபெ⁴ய்யங்…பே॰… மனதோ வா ஓதாரங் லபெ⁴ய்ய’ந்தி. தஸ்மாதிஹ, பி⁴க்க²வே, இந்த்³ரியேஸு கு³த்தத்³வாரா விஹரத². சக்கு²னா ரூபங் தி³ஸ்வா மா நிமித்தக்³கா³ஹினோ அஹுவத்த², மா அனுப்³யஞ்ஜனக்³கா³ஹினோ. யத்வாதி⁴கரணமேனங் சக்கு²ந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங், தஸ்ஸ ஸங்வராய படிபஜ்ஜத², ரக்க²த² சக்கு²ந்த்³ரியங், சக்கு²ந்த்³ரியே ஸங்வரங் ஆபஜ்ஜத². ஸோதேன ஸத்³த³ங் ஸுத்வா… கா⁴னேன க³ந்த⁴ங் கா⁴யித்வா… ஜிவ்ஹாய ரஸங் ஸாயித்வா… காயேன பொ²ட்ட²ப்³ப³ங் பு²ஸித்வா… மனஸா த⁴ம்மங் விஞ்ஞாய மா நிமித்தக்³கா³ஹினோ அஹுவத்த², மா அனுப்³யஞ்ஜனக்³கா³ஹினோ. யத்வாதி⁴கரணமேனங் மனிந்த்³ரியங் அஸங்வுதங் விஹரந்தங் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவெய்யுங், தஸ்ஸ ஸங்வராய படிபஜ்ஜத², ரக்க²த² மனிந்த்³ரியங், மனிந்த்³ரியே ஸங்வரங் ஆபஜ்ஜத². யதோ தும்ஹே, பி⁴க்க²வே, இந்த்³ரியேஸு கு³த்தத்³வாரா விஹரிஸ்ஸத², அத² தும்ஹேஹிபி மாரோ பாபிமா நிப்³பி³ஜ்ஜ பக்கமிஸ்ஸதி, ஓதாரங் அலப⁴மானோ – கும்மம்ஹாவ ஸிங்கா³லோ’’தி.
‘‘Evameva kho, bhikkhave, tumhepi māro pāpimā satataṃ samitaṃ paccupaṭṭhito – ‘appeva nāmāhaṃ imesaṃ cakkhuto vā otāraṃ labheyyaṃ…pe… jivhāto vā otāraṃ labheyyaṃ…pe… manato vā otāraṃ labheyya’nti. Tasmātiha, bhikkhave, indriyesu guttadvārā viharatha. Cakkhunā rūpaṃ disvā mā nimittaggāhino ahuvattha, mā anubyañjanaggāhino. Yatvādhikaraṇamenaṃ cakkhundriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ, tassa saṃvarāya paṭipajjatha, rakkhatha cakkhundriyaṃ, cakkhundriye saṃvaraṃ āpajjatha. Sotena saddaṃ sutvā… ghānena gandhaṃ ghāyitvā… jivhāya rasaṃ sāyitvā… kāyena phoṭṭhabbaṃ phusitvā… manasā dhammaṃ viññāya mā nimittaggāhino ahuvattha, mā anubyañjanaggāhino. Yatvādhikaraṇamenaṃ manindriyaṃ asaṃvutaṃ viharantaṃ abhijjhādomanassā pāpakā akusalā dhammā anvāssaveyyuṃ, tassa saṃvarāya paṭipajjatha, rakkhatha manindriyaṃ, manindriye saṃvaraṃ āpajjatha. Yato tumhe, bhikkhave, indriyesu guttadvārā viharissatha, atha tumhehipi māro pāpimā nibbijja pakkamissati, otāraṃ alabhamāno – kummamhāva siṅgālo’’ti.
‘‘கும்மோ அங்கா³னி ஸகே கபாலே,
‘‘Kummo aṅgāni sake kapāle,
ஸமோத³ஹங் பி⁴க்கு² மனோவிதக்கே;
Samodahaṃ bhikkhu manovitakke;
அனிஸ்ஸிதோ அஞ்ஞமஹேட²யானோ,
Anissito aññamaheṭhayāno,
பரினிப்³பு³தோ நூபவதெ³ய்ய கஞ்சீ’’தி. ததியங்;
Parinibbuto nūpavadeyya kañcī’’ti. tatiyaṃ;
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. கும்மோபமஸுத்தவண்ணனா • 3. Kummopamasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. கும்மோபமஸுத்தவண்ணனா • 3. Kummopamasuttavaṇṇanā
