| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. கும்மோபமஸுத்தவண்ணனா
3. Kummopamasuttavaṇṇanā
240. ததியே கும்மோதி அட்டி²கும்மோ. கச்ச²போதி தஸ்ஸேவ வேவசனங். அனுனதீ³தீரேதி நதி³யா அனுதீரே. கோ³சரபஸுதோதி ‘‘ஸசே கிஞ்சி ப²லாப²லங் லபி⁴ஸ்ஸாமி, கா²தி³ஸ்ஸாமீ’’தி கோ³சரத்தா²ய பஸுதோ உஸ்ஸுக்கோ தன்னிப³ந்தோ⁴. ஸமோத³ஹித்வாதி ஸமுக்³கே³ விய பக்கி²பித்வா. ஸங்கஸாயதீதி அச்ச²தி. ஸமோத³ஹந்தி ஸமோத³ஹந்தோ ட²பெந்தோ. இத³ங் வுத்தங் ஹோதி – யதா² கும்மோ அங்கா³னி ஸகே கபாலே ஸமோத³ஹந்தோ ஸிங்கா³லஸ்ஸ ஓதாரங் ந தே³தி, ந ச நங் ஸிங்கா³லோ பஸஹதி, ஏவங் பி⁴க்கு² அத்தனோ மனோவிதக்கே ஸகே ஆரம்மணகபாலே ஸமோத³ஹந்தோ கிலேஸமாரஸ்ஸ ஓதாரங் ந தே³தி, ந ச நங் மாரோ பஸஹதி.
240. Tatiye kummoti aṭṭhikummo. Kacchapoti tasseva vevacanaṃ. Anunadītīreti nadiyā anutīre. Gocarapasutoti ‘‘sace kiñci phalāphalaṃ labhissāmi, khādissāmī’’ti gocaratthāya pasuto ussukko tannibandho. Samodahitvāti samugge viya pakkhipitvā. Saṅkasāyatīti acchati. Samodahanti samodahanto ṭhapento. Idaṃ vuttaṃ hoti – yathā kummo aṅgāni sake kapāle samodahanto siṅgālassa otāraṃ na deti, na ca naṃ siṅgālo pasahati, evaṃ bhikkhu attano manovitakke sake ārammaṇakapāle samodahanto kilesamārassa otāraṃ na deti, na ca naṃ māro pasahati.
அனிஸ்ஸிதோதி தண்ஹாதி³ட்டி²னிஸ்ஸயேஹி அனிஸ்ஸிதோ. அஞ்ஞமஹேட²யானோதி அஞ்ஞங் கஞ்சி புக்³க³லங் அவிஹேடெ²ந்தோ. பரினிப்³பு³தோதி கிலேஸபரினிப்³பா³னேன பரினிப்³பு³தோ. நூபவதெ³ய்ய கஞ்சீதி அஞ்ஞங் கஞ்சி புக்³க³லங் ஸீலவிபத்தியா வா ஆசாரவிபத்தியா வா அத்தானங் உக்கங்ஸேதுகாமதாய வா பரங் வம்பே⁴துகாமதாய வா ந உபவதெ³ய்ய, அஞ்ஞத³த்து² பஞ்ச த⁴ம்மே அஜ்ஜ²த்தங் உபட்ட²பெத்வா, ‘‘காலேன வக்கா²மி, நோ அகாலேன, பூ⁴தேன வக்கா²மி , நோ அபூ⁴தேன, ஸண்ஹேன வக்கா²மி, நோ ப²ருஸேன, அத்த²ஸங்ஹிதேன வக்கா²மி, நோ அனத்த²ஸங்ஹிதேன, மெத்தசித்தோ வக்கா²மி, நோ தோ³ஸந்தரோ’’தி ஏவங் உல்லும்பனஸபா⁴வஸண்டி²தேனேவ சித்தேன விஹரதி.
Anissitoti taṇhādiṭṭhinissayehi anissito. Aññamaheṭhayānoti aññaṃ kañci puggalaṃ aviheṭhento. Parinibbutoti kilesaparinibbānena parinibbuto. Nūpavadeyya kañcīti aññaṃ kañci puggalaṃ sīlavipattiyā vā ācāravipattiyā vā attānaṃ ukkaṃsetukāmatāya vā paraṃ vambhetukāmatāya vā na upavadeyya, aññadatthu pañca dhamme ajjhattaṃ upaṭṭhapetvā, ‘‘kālena vakkhāmi, no akālena, bhūtena vakkhāmi , no abhūtena, saṇhena vakkhāmi, no pharusena, atthasaṃhitena vakkhāmi, no anatthasaṃhitena, mettacitto vakkhāmi, no dosantaro’’ti evaṃ ullumpanasabhāvasaṇṭhiteneva cittena viharati.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. கும்மோபமஸுத்தங் • 3. Kummopamasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. கும்மோபமஸுத்தவண்ணனா • 3. Kummopamasuttavaṇṇanā
