| Library / Tipiṭaka / তিপিটক • Tipiṭaka / সংযুত্তনিকায (অট্ঠকথা) • Saṃyuttanikāya (aṭṭhakathā) |
৩. কুম্মোপমসুত্তৰণ্ণনা
3. Kummopamasuttavaṇṇanā
২৪০. ততিযে কুম্মোতি অট্ঠিকুম্মো। কচ্ছপোতি তস্সেৰ ৰেৰচনং। অনুনদীতীরেতি নদিযা অনুতীরে। গোচরপসুতোতি ‘‘সচে কিঞ্চি ফলাফলং লভিস্সামি, খাদিস্সামী’’তি গোচরত্থায পসুতো উস্সুক্কো তন্নিবন্ধো। সমোদহিত্ৰাতি সমুগ্গে ৰিয পক্খিপিত্ৰা। সঙ্কসাযতীতি অচ্ছতি। সমোদহন্তি সমোদহন্তো ঠপেন্তো। ইদং ৰুত্তং হোতি – যথা কুম্মো অঙ্গানি সকে কপালে সমোদহন্তো সিঙ্গালস্স ওতারং ন দেতি, ন চ নং সিঙ্গালো পসহতি, এৰং ভিক্খু অত্তনো মনোৰিতক্কে সকে আরম্মণকপালে সমোদহন্তো কিলেসমারস্স ওতারং ন দেতি, ন চ নং মারো পসহতি।
240. Tatiye kummoti aṭṭhikummo. Kacchapoti tasseva vevacanaṃ. Anunadītīreti nadiyā anutīre. Gocarapasutoti ‘‘sace kiñci phalāphalaṃ labhissāmi, khādissāmī’’ti gocaratthāya pasuto ussukko tannibandho. Samodahitvāti samugge viya pakkhipitvā. Saṅkasāyatīti acchati. Samodahanti samodahanto ṭhapento. Idaṃ vuttaṃ hoti – yathā kummo aṅgāni sake kapāle samodahanto siṅgālassa otāraṃ na deti, na ca naṃ siṅgālo pasahati, evaṃ bhikkhu attano manovitakke sake ārammaṇakapāle samodahanto kilesamārassa otāraṃ na deti, na ca naṃ māro pasahati.
অনিস্সিতোতি তণ্হাদিট্ঠিনিস্সযেহি অনিস্সিতো। অঞ্ঞমহেঠযানোতি অঞ্ঞং কঞ্চি পুগ্গলং অৰিহেঠেন্তো। পরিনিব্বুতোতি কিলেসপরিনিব্বানেন পরিনিব্বুতো। নূপৰদেয্য কঞ্চীতি অঞ্ঞং কঞ্চি পুগ্গলং সীলৰিপত্তিযা ৰা আচারৰিপত্তিযা ৰা অত্তানং উক্কংসেতুকামতায ৰা পরং ৰম্ভেতুকামতায ৰা ন উপৰদেয্য, অঞ্ঞদত্থু পঞ্চ ধম্মে অজ্ঝত্তং উপট্ঠপেত্ৰা, ‘‘কালেন ৰক্খামি, নো অকালেন, ভূতেন ৰক্খামি , নো অভূতেন, সণ্হেন ৰক্খামি, নো ফরুসেন, অত্থসংহিতেন ৰক্খামি, নো অনত্থসংহিতেন, মেত্তচিত্তো ৰক্খামি, নো দোসন্তরো’’তি এৰং উল্লুম্পনসভাৰসণ্ঠিতেনেৰ চিত্তেন ৰিহরতি।
Anissitoti taṇhādiṭṭhinissayehi anissito. Aññamaheṭhayānoti aññaṃ kañci puggalaṃ aviheṭhento. Parinibbutoti kilesaparinibbānena parinibbuto. Nūpavadeyya kañcīti aññaṃ kañci puggalaṃ sīlavipattiyā vā ācāravipattiyā vā attānaṃ ukkaṃsetukāmatāya vā paraṃ vambhetukāmatāya vā na upavadeyya, aññadatthu pañca dhamme ajjhattaṃ upaṭṭhapetvā, ‘‘kālena vakkhāmi, no akālena, bhūtena vakkhāmi , no abhūtena, saṇhena vakkhāmi, no pharusena, atthasaṃhitena vakkhāmi, no anatthasaṃhitena, mettacitto vakkhāmi, no dosantaro’’ti evaṃ ullumpanasabhāvasaṇṭhiteneva cittena viharati.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ৩. কুম্মোপমসুত্তং • 3. Kummopamasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. কুম্মোপমসুত্তৰণ্ণনা • 3. Kummopamasuttavaṇṇanā
