| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
10. குமுத³தா³யகத்தே²ரஅபதா³னவண்ணனா
10. Kumudadāyakattheraapadānavaṇṇanā
ஹிமவந்தஸ்ஸாவிதூ³ரேதிஆதி³கங் ஆயஸ்மதோ குமுத³தா³யகத்தே²ரஸ்ஸ அபதா³னங். அயம்பி தே²ரோ புரிமபு³த்³தே⁴ஸு கதாதி⁴காரோ அனேகேஸு ப⁴வேஸு விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஹிமவந்தஸ்ஸ ஆஸன்னே மஹந்தே ஜாதஸ்ஸரே குகுத்தோ² நாம பக்கீ² ஹுத்வா நிப்³ப³த்தோ கேனசி அகுஸலேன பக்கீ² ஸமானோபி புப்³பே³ கதஸம்பா⁴ரேன பு³த்³தி⁴ஸம்பன்னோ புஞ்ஞாபுஞ்ஞேஸு சே²கோ ஸீலவா பாணகோ³சரதோ படிவிரதோ அஹோஸி. தஸ்மிங் ஸமயே பது³முத்தரோ ப⁴க³வா ஆகாஸேனாக³ந்த்வா தஸ்ஸ ஸமீபே சங்கமதி. அத² ஸோ ஸகுணோ ப⁴க³வந்தங் தி³ஸ்வா பஸன்னசித்தோ குமுத³புப்ப²ங் ட³ங்ஸித்வா ப⁴க³வதோ பாத³மூலே பூஜேஸி. ப⁴க³வா தஸ்ஸ ஸோமனஸ்ஸுப்பாத³னத்த²ங் படிக்³க³ஹெத்வா அனுமோத³னமகாஸி.
Himavantassāvidūretiādikaṃ āyasmato kumudadāyakattherassa apadānaṃ. Ayampi thero purimabuddhesu katādhikāro anekesu bhavesu vivaṭṭūpanissayāni puññāni upacinanto padumuttarassa bhagavato kāle himavantassa āsanne mahante jātassare kukuttho nāma pakkhī hutvā nibbatto kenaci akusalena pakkhī samānopi pubbe katasambhārena buddhisampanno puññāpuññesu cheko sīlavā pāṇagocarato paṭivirato ahosi. Tasmiṃ samaye padumuttaro bhagavā ākāsenāgantvā tassa samīpe caṅkamati. Atha so sakuṇo bhagavantaṃ disvā pasannacitto kumudapupphaṃ ḍaṃsitvā bhagavato pādamūle pūjesi. Bhagavā tassa somanassuppādanatthaṃ paṭiggahetvā anumodanamakāsi.
51. ஸோ தேன புஞ்ஞேன தே³வமனுஸ்ஸேஸு உப⁴யஸம்பத்திஸுக²ங் அனுப⁴வித்வா இமஸ்மிங் பு³த்³து⁴ப்பாதே³ ஸாவத்தி²யங் அஞ்ஞதரஸ்மிங் குலே நிப்³ப³த்தோ வுத்³தி⁴மன்வாய மஹத்³த⁴னோ மஹாபோ⁴கோ³ ரதனத்தயே பஸன்னோ ஸத்து² த⁴ம்மதே³ஸனங் ஸுத்வா படிலத்³த⁴ஸத்³தோ⁴ பப்³ப³ஜித்வா நசிரஸ்ஸேவ அரஹா ஹுத்வா அத்தனோ புப்³ப³கம்மங் பச்சக்க²தோ ஞத்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ ஹிமவந்தஸ்ஸாவிதூ³ரேதிஆதி³மாஹ. பது³முப்பலஸஞ்ச²ன்னோதி எத்த² ஸதபத்தேஹி ஸம்புண்ணோ ஸேதபது³மோ ச தீணி நீலரத்தஸேதுப்பலானி ச பது³முப்பலானி தேஹி ஸஞ்ச²ன்னோ க³ஹனீபூ⁴தோ ஸம்புண்ணோ மஹாஜாதஸ்ஸரோ அஹூதி ஸம்ப³ந்தோ⁴. புண்ட³ரீகஸமொத்த²டோதி புண்ட³ரீகேஹி ரத்தபது³மேஹி ஒத்த²டோ ஸம்புண்ணோதி அத்தோ². ஸேஸங் ஸுவிஞ்ஞெய்யமேவாதி.
51. So tena puññena devamanussesu ubhayasampattisukhaṃ anubhavitvā imasmiṃ buddhuppāde sāvatthiyaṃ aññatarasmiṃ kule nibbatto vuddhimanvāya mahaddhano mahābhogo ratanattaye pasanno satthu dhammadesanaṃ sutvā paṭiladdhasaddho pabbajitvā nacirasseva arahā hutvā attano pubbakammaṃ paccakkhato ñatvā somanassajāto pubbacaritāpadānaṃ pakāsento himavantassāvidūretiādimāha. Padumuppalasañchannoti ettha satapattehi sampuṇṇo setapadumo ca tīṇi nīlarattasetuppalāni ca padumuppalāni tehi sañchanno gahanībhūto sampuṇṇo mahājātassaro ahūti sambandho. Puṇḍarīkasamotthaṭoti puṇḍarīkehi rattapadumehi otthaṭo sampuṇṇoti attho. Sesaṃ suviññeyyamevāti.
குமுத³தா³யகத்தே²ரஅபதா³னவண்ணனா ஸமத்தா.
Kumudadāyakattheraapadānavaṇṇanā samattā.
ஸோளஸமவக்³க³வண்ணனா ஸமத்தா.
Soḷasamavaggavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 10. குமுத³தா³யகத்தே²ரஅபதா³னங் • 10. Kumudadāyakattheraapadānaṃ
