| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
18. குமுத³வக்³கோ³
18. Kumudavaggo
1. குமுத³மாலியத்தே²ரஅபதா³னவண்ணனா
1. Kumudamāliyattheraapadānavaṇṇanā
பப்³ப³தே ஹிமவந்தம்ஹீதிஆதி³கங் ஆயஸ்மதோ குமுத³மாலியத்தே²ரஸ்ஸ அபதா³னங். அயம்பி தே²ரோ புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ அத்த²த³ஸ்ஸிஸ்ஸ ப⁴க³வதோ காலே ஹிமவந்தபப்³ப³தஸமீபே ஜாதஸ்ஸரஸ்ஸ ஆஸன்னே ரக்க²ஸோ ஹுத்வா நிப்³ப³த்தோ அத்த²த³ஸ்ஸிங் ப⁴க³வந்தங் தத்த² உபக³தங் தி³ஸ்வா பஸன்னமானஸோ குமுத³புப்பா²னி ஓசினித்வா ப⁴க³வந்தங் பூஜேஸி. ப⁴க³வா அனுமோத³னங் கத்வா பக்காமி.
Pabbatehimavantamhītiādikaṃ āyasmato kumudamāliyattherassa apadānaṃ. Ayampi thero purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle himavantapabbatasamīpe jātassarassa āsanne rakkhaso hutvā nibbatto atthadassiṃ bhagavantaṃ tattha upagataṃ disvā pasannamānaso kumudapupphāni ocinitvā bhagavantaṃ pūjesi. Bhagavā anumodanaṃ katvā pakkāmi.
1. ஸோ தேன புஞ்ஞேன ததோ சவித்வா தே³வலோகங் உபபன்னோ ச² காமாவசரஸம்பத்தியோ அனுப⁴வித்வா மனுஸ்ஸேஸு ச சக்கவத்திஆதி³ஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ வுத்³தி⁴ப்பத்தோ ரதனத்தயே பஸன்னோ பப்³ப³ஜித்வா வாயமந்தோ ப்³ரஹ்மசரியபரியோஸானங் அரஹத்தங் பத்வா அத்தனோ புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ பப்³ப³தே ஹிமவந்தம்ஹீதிஆதி³மாஹ. தத்த² தத்த²ஜோ ரக்க²ஸோ ஆஸிந்தி தஸ்மிங் ஜாதஸ்ஸரஸமீபே ஜாதோ நிப்³ப³த்தோ ரக்க²ஸோ பரருதி⁴ரமங்ஸகா²த³கோ நித்³த³யோ கோ⁴ரரூபோ ப⁴யானகஸபா⁴வோ மஹாப³லோ மஹாதா²மோ கக்க²ளோ யக்கோ² ஆஸிங் அஹோஸிந்தி அத்தோ².
1. So tena puññena tato cavitvā devalokaṃ upapanno cha kāmāvacarasampattiyo anubhavitvā manussesu ca cakkavattiādisampattiyo anubhavitvā imasmiṃ buddhuppāde kulagehe nibbatto vuddhippatto ratanattaye pasanno pabbajitvā vāyamanto brahmacariyapariyosānaṃ arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento pabbate himavantamhītiādimāha. Tattha tatthajo rakkhaso āsinti tasmiṃ jātassarasamīpe jāto nibbatto rakkhaso pararudhiramaṃsakhādako niddayo ghorarūpo bhayānakasabhāvo mahābalo mahāthāmo kakkhaḷo yakkho āsiṃ ahosinti attho.
குமுத³ங் புப்ப²தே தத்தா²தி தஸ்மிங் மஹாஸரே ஸூரியரங்ஸியா அபா⁴வே ஸதி ஸாயன்ஹே மகுளிதங் குஞ்சிதாகாரேன நிப்பப⁴ங் அவண்ணங் ஹோதீதி ‘‘குமுத³’’ந்தி லத்³த⁴னாமங் புப்ப²ங் புப்ப²தே விகஸதீதி அத்தோ². சக்கமத்தானி ஜாயரேதி தானி புப்பா²னி ரத²சக்கபமாணானி ஹுத்வா ஜாயந்தீதி அத்தோ². ஸேஸங் ஸுவிஞ்ஞெய்யமேவாதி.
Kumudaṃpupphate tatthāti tasmiṃ mahāsare sūriyaraṃsiyā abhāve sati sāyanhe makuḷitaṃ kuñcitākārena nippabhaṃ avaṇṇaṃ hotīti ‘‘kumuda’’nti laddhanāmaṃ pupphaṃ pupphate vikasatīti attho. Cakkamattāni jāyareti tāni pupphāni rathacakkapamāṇāni hutvā jāyantīti attho. Sesaṃ suviññeyyamevāti.
குமுத³மாலியத்தே²ரஅபதா³னவண்ணனா ஸமத்தா.
Kumudamāliyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 1. குமுத³மாலியத்தே²ரஅபதா³னங் • 1. Kumudamāliyattheraapadānaṃ
