| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೧೮. ಕುಮುದವಗ್ಗೋ
18. Kumudavaggo
೧. ಕುಮುದಮಾಲಿಯತ್ಥೇರಅಪದಾನವಣ್ಣನಾ
1. Kumudamāliyattheraapadānavaṇṇanā
ಪಬ್ಬತೇ ಹಿಮವನ್ತಮ್ಹೀತಿಆದಿಕಂ ಆಯಸ್ಮತೋ ಕುಮುದಮಾಲಿಯತ್ಥೇರಸ್ಸ ಅಪದಾನಂ। ಅಯಮ್ಪಿ ಥೇರೋ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಅತ್ಥದಸ್ಸಿಸ್ಸ ಭಗವತೋ ಕಾಲೇ ಹಿಮವನ್ತಪಬ್ಬತಸಮೀಪೇ ಜಾತಸ್ಸರಸ್ಸ ಆಸನ್ನೇ ರಕ್ಖಸೋ ಹುತ್ವಾ ನಿಬ್ಬತ್ತೋ ಅತ್ಥದಸ್ಸಿಂ ಭಗವನ್ತಂ ತತ್ಥ ಉಪಗತಂ ದಿಸ್ವಾ ಪಸನ್ನಮಾನಸೋ ಕುಮುದಪುಪ್ಫಾನಿ ಓಚಿನಿತ್ವಾ ಭಗವನ್ತಂ ಪೂಜೇಸಿ। ಭಗವಾ ಅನುಮೋದನಂ ಕತ್ವಾ ಪಕ್ಕಾಮಿ।
Pabbatehimavantamhītiādikaṃ āyasmato kumudamāliyattherassa apadānaṃ. Ayampi thero purimabuddhesu katādhikāro tattha tattha bhave vivaṭṭūpanissayāni puññāni upacinanto atthadassissa bhagavato kāle himavantapabbatasamīpe jātassarassa āsanne rakkhaso hutvā nibbatto atthadassiṃ bhagavantaṃ tattha upagataṃ disvā pasannamānaso kumudapupphāni ocinitvā bhagavantaṃ pūjesi. Bhagavā anumodanaṃ katvā pakkāmi.
೧. ಸೋ ತೇನ ಪುಞ್ಞೇನ ತತೋ ಚವಿತ್ವಾ ದೇವಲೋಕಂ ಉಪಪನ್ನೋ ಛ ಕಾಮಾವಚರಸಮ್ಪತ್ತಿಯೋ ಅನುಭವಿತ್ವಾ ಮನುಸ್ಸೇಸು ಚ ಚಕ್ಕವತ್ತಿಆದಿಸಮ್ಪತ್ತಿಯೋ ಅನುಭವಿತ್ವಾ ಇಮಸ್ಮಿಂ ಬುದ್ಧುಪ್ಪಾದೇ ಕುಲಗೇಹೇ ನಿಬ್ಬತ್ತೋ ವುದ್ಧಿಪ್ಪತ್ತೋ ರತನತ್ತಯೇ ಪಸನ್ನೋ ಪಬ್ಬಜಿತ್ವಾ ವಾಯಮನ್ತೋ ಬ್ರಹ್ಮಚರಿಯಪರಿಯೋಸಾನಂ ಅರಹತ್ತಂ ಪತ್ವಾ ಅತ್ತನೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಪಬ್ಬತೇ ಹಿಮವನ್ತಮ್ಹೀತಿಆದಿಮಾಹ। ತತ್ಥ ತತ್ಥಜೋ ರಕ್ಖಸೋ ಆಸಿನ್ತಿ ತಸ್ಮಿಂ ಜಾತಸ್ಸರಸಮೀಪೇ ಜಾತೋ ನಿಬ್ಬತ್ತೋ ರಕ್ಖಸೋ ಪರರುಧಿರಮಂಸಖಾದಕೋ ನಿದ್ದಯೋ ಘೋರರೂಪೋ ಭಯಾನಕಸಭಾವೋ ಮಹಾಬಲೋ ಮಹಾಥಾಮೋ ಕಕ್ಖಳೋ ಯಕ್ಖೋ ಆಸಿಂ ಅಹೋಸಿನ್ತಿ ಅತ್ಥೋ।
1. So tena puññena tato cavitvā devalokaṃ upapanno cha kāmāvacarasampattiyo anubhavitvā manussesu ca cakkavattiādisampattiyo anubhavitvā imasmiṃ buddhuppāde kulagehe nibbatto vuddhippatto ratanattaye pasanno pabbajitvā vāyamanto brahmacariyapariyosānaṃ arahattaṃ patvā attano pubbakammaṃ saritvā somanassajāto pubbacaritāpadānaṃ pakāsento pabbate himavantamhītiādimāha. Tattha tatthajo rakkhaso āsinti tasmiṃ jātassarasamīpe jāto nibbatto rakkhaso pararudhiramaṃsakhādako niddayo ghorarūpo bhayānakasabhāvo mahābalo mahāthāmo kakkhaḷo yakkho āsiṃ ahosinti attho.
ಕುಮುದಂ ಪುಪ್ಫತೇ ತತ್ಥಾತಿ ತಸ್ಮಿಂ ಮಹಾಸರೇ ಸೂರಿಯರಂಸಿಯಾ ಅಭಾವೇ ಸತಿ ಸಾಯನ್ಹೇ ಮಕುಳಿತಂ ಕುಞ್ಚಿತಾಕಾರೇನ ನಿಪ್ಪಭಂ ಅವಣ್ಣಂ ಹೋತೀತಿ ‘‘ಕುಮುದ’’ನ್ತಿ ಲದ್ಧನಾಮಂ ಪುಪ್ಫಂ ಪುಪ್ಫತೇ ವಿಕಸತೀತಿ ಅತ್ಥೋ। ಚಕ್ಕಮತ್ತಾನಿ ಜಾಯರೇತಿ ತಾನಿ ಪುಪ್ಫಾನಿ ರಥಚಕ್ಕಪಮಾಣಾನಿ ಹುತ್ವಾ ಜಾಯನ್ತೀತಿ ಅತ್ಥೋ। ಸೇಸಂ ಸುವಿಞ್ಞೇಯ್ಯಮೇವಾತಿ।
Kumudaṃpupphate tatthāti tasmiṃ mahāsare sūriyaraṃsiyā abhāve sati sāyanhe makuḷitaṃ kuñcitākārena nippabhaṃ avaṇṇaṃ hotīti ‘‘kumuda’’nti laddhanāmaṃ pupphaṃ pupphate vikasatīti attho. Cakkamattāni jāyareti tāni pupphāni rathacakkapamāṇāni hutvā jāyantīti attho. Sesaṃ suviññeyyamevāti.
ಕುಮುದಮಾಲಿಯತ್ಥೇರಅಪದಾನವಣ್ಣನಾ ಸಮತ್ತಾ।
Kumudamāliyattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೧. ಕುಮುದಮಾಲಿಯತ್ಥೇರಅಪದಾನಂ • 1. Kumudamāliyattheraapadānaṃ
