| Library / Tipiṭaka / д̇ибидага • Tipiṭaka / т̇зраг̇аат̇аа-адтагат̇аа • Theragāthā-aṭṭhakathā |
5. гун̣д̣ад̇хаанад̇т̇зраг̇аат̇ааван̣н̣анаа
5. Kuṇḍadhānattheragāthāvaṇṇanā
бан̃жа чинд̣̇з бан̃жа ж̇ахзд̇и ааяасмад̇о гун̣д̣ад̇хаанад̇т̇зрасса г̇аат̇аа. гаа уббад̇д̇и? со гира бад̣̇умуд̇д̇арасса бхаг̇авад̇о гаалз хам̣савад̇ийнаг̇арз гулаг̇зхз уббанно ваяаббад̇д̇о хздтаа вуд̇д̇анаязнзва бхаг̇аванд̇ам̣ убасан̇гамид̇ваа д̇хаммам̣ сун̣анд̇о сад̇т̇аараа згам̣ бхигкум̣ батамам̣ салаагам̣ г̇ан̣ханд̇аанам̣ аг̇г̇адтаанз табияамаанам̣ д̣̇исваа д̇ам̣ таананд̇арам̣ бад̇т̇зд̇ваа д̇ад̣̇ануруубам̣ бун̃н̃ам̣ гаронд̇о вижари. со згад̣̇ивасам̣ бад̣̇умуд̇д̇арасса бхаг̇авад̇о нирод̇хасамаабад̇д̇ид̇о вудтааяа нисиннасса маносилаажун̣н̣абин̃ж̇арам̣ маханд̇ам̣ гад̣̇алипалаган̣н̣игам̣ убанзси, д̇ам̣ бхаг̇аваа бадиг̇г̇ахзд̇ваа барибхун̃ж̇и. со д̇зна бун̃н̃агаммзна згаад̣̇асагкад̇д̇ум̣ д̣̇звзсу д̣̇звараж̇ж̇ам̣ гаарзси. жад̇увийсад̇иваарз рааж̇аа ахоси жаггавад̇д̇ий. звам̣ со бунаббунам̣ бун̃н̃аани гад̇ваа абараабарам̣ д̣̇звамануссзсу сам̣саранд̇о гассабаб̣уд̣̇д̇хагаалз бхуммад̣̇звад̇аа худ̇ваа ниб̣б̣ад̇д̇и. д̣̇ийгхааяугаб̣уд̣̇д̇хаанан̃жа наама на анвад̣̇д̇хамаасиго убосат̇о ход̇и. д̇ат̇аа хи вибассисса бхаг̇авад̇о чаб̣б̣ассанд̇арз чаб̣б̣ассанд̇арз убосат̇о ахоси. гассабад̣̇асаб̣ало бана чадтз чадтз маасз баад̇имогкам̣ осаарзси. д̇асса баад̇имогкасса осааран̣агаалз д̣̇исааваасигаа д̣̇вз сахааяагаа бхигкуу ‘‘убосат̇ам̣ гариссаамаа’’д̇и г̇ажчанд̇и.
Pañcachinde pañca jaheti āyasmato kuṇḍadhānattherassa gāthā. Kā uppatti? So kira padumuttarassa bhagavato kāle haṃsavatīnagare kulagehe uppanno vayappatto heṭṭhā vuttanayeneva bhagavantaṃ upasaṅkamitvā dhammaṃ suṇanto satthārā ekaṃ bhikkhuṃ paṭhamaṃ salākaṃ gaṇhantānaṃ aggaṭṭhāne ṭhapiyamānaṃ disvā taṃ ṭhānantaraṃ patthetvā tadanurūpaṃ puññaṃ karonto vicari. So ekadivasaṃ padumuttarassa bhagavato nirodhasamāpattito vuṭṭhāya nisinnassa manosilācuṇṇapiñjaraṃ mahantaṃ kadaliphalakaṇṇikaṃ upanesi, taṃ bhagavā paṭiggahetvā paribhuñji. So tena puññakammena ekādasakkhattuṃ devesu devarajjaṃ kāresi. Catuvīsativāre rājā ahosi cakkavattī. Evaṃ so punappunaṃ puññāni katvā aparāparaṃ devamanussesu saṃsaranto kassapabuddhakāle bhummadevatā hutvā nibbatti. Dīghāyukabuddhānañca nāma na anvaddhamāsiko uposatho hoti. Tathā hi vipassissa bhagavato chabbassantare chabbassantare uposatho ahosi. Kassapadasabalo pana chaṭṭhe chaṭṭhe māse pātimokkhaṃ osāresi. Tassa pātimokkhassa osāraṇakāle disāvāsikā dve sahāyakā bhikkhū ‘‘uposathaṃ karissāmā’’ti gacchanti.
аяам̣ бхуммад̣̇звад̇аа жинд̇зси – ‘‘имзсам̣ д̣̇виннам̣ бхигкуунам̣ мзд̇д̇и ад̇ивияа д̣̇ал̣хаа, гим̣ ну ко, бхзд̣̇агз сад̇и бхиж̇ж̇зяяа, на бхиж̇ж̇зяяаа’’д̇и, саа д̇зсам̣ огаасам̣ ологаяамаанаа д̇зсам̣ авид̣̇уурзнзва г̇ажчад̇и. ат̇зго т̇зро згасса хад̇т̇з бад̇д̇ажийварам̣ д̣̇ад̇ваа сарийравал̣ан̃ж̇анад̇т̇ам̣ уд̣̇агапаасугадтаанам̣ г̇анд̇ваа д̇ход̇ахад̇т̇абаад̣̇о худ̇ваа г̇умб̣асамийбад̇о нигкамад̇и бхуммад̣̇звад̇аа д̇асса т̇зрасса бажчад̇о уд̇д̇амаруубаа ид̇т̇ий худ̇ваа гзсз вид̇хунид̇ваа сам̣вид̇хааяа самб̣анд̇ханд̇ий вияа бидтияам̣ бам̣сум̣ бун̃чамаанаа вияа саадагам̣ сам̣вид̇хааяа ниваасаяамаанаа вияа жа худ̇ваа т̇зрасса бад̣̇аанубад̣̇игаа худ̇ваа г̇умб̣ад̇о нигканд̇аа. згаманд̇з тид̇о сахааяагад̇т̇зро д̇ам̣ гааран̣ам̣ д̣̇исваава д̣̇оманассаж̇аад̇о ‘‘надто д̣̇аани мз иминаа бхигкунаа сад̣̇д̇хим̣ д̣̇ийгхарад̇д̇аануг̇ад̇о синзхо, сажаахам̣ звам̣вид̇хабхаавам̣ ж̇аанзяяам̣, зд̇д̇агам̣ ад̣̇д̇хаанам̣ иминаа сад̣̇д̇хим̣ виссаасам̣ на гарзяяа’’нд̇и жинд̇зд̇ваа ааг̇ажчанд̇ассзвасса, ‘‘ханд̣̇аавусо, д̇уяхам̣ бад̇д̇ажийварам̣, д̇аад̣̇исзна баабзна сад̣̇д̇хим̣ згамаг̇г̇ам̣ нааг̇ажчаамий’’д̇и ааха. д̇ам̣ гат̇ам̣ суд̇ваа д̇асса лаж̇ж̇ибхигкуно хад̣̇аяам̣ д̇икин̣асад̇д̇им̣ г̇ахзд̇ваа вид̣̇д̇хам̣ вияа ахоси. д̇ад̇о нам̣ ааха – ‘‘аавусо, гим̣ наамзд̇ам̣ вад̣̇аси, ахам̣ зд̇д̇агам̣ гаалам̣ д̣̇уггадамад̇д̇амби аабад̇д̇им̣ на ж̇аанаами. д̇вам̣ бана мам̣ аж̇ж̇а ‘баабо’д̇и вад̣̇аси, гим̣ д̇з д̣̇идта’’нд̇и. ‘‘гим̣ ан̃н̃зна д̣̇идтзна, гим̣ д̇вам̣ звам̣вид̇хзна алан̇гад̇абадияад̇д̇зна маад̇уг̇аамзна сад̣̇д̇хим̣ згадтаанз худ̇ваа нигканд̇о’’д̇и. ‘‘над̇т̇зд̇ам̣, аавусо, маяхам̣, наахам̣ зваруубам̣ маад̇уг̇аамам̣ бассаамий’’д̇и. д̇асса яаавад̇ад̇ияам̣ гат̇знд̇ассааби ид̇аро т̇зро гат̇ам̣ асад̣̇д̣̇ахид̇ваа ад̇д̇анаа д̣̇идтагааран̣ам̣язва бхууд̇ад̇д̇ам̣ гад̇ваа г̇ан̣ханд̇о д̇зна сад̣̇д̇хим̣ згамаг̇г̇зна аг̇анд̇ваа ан̃н̃зна маг̇г̇зна сад̇т̇у санд̇игам̣ г̇ад̇о. ид̇ароби бхигку ан̃н̃зна маг̇г̇зна сад̇т̇у санд̇игам̣язва г̇ад̇о.
Ayaṃ bhummadevatā cintesi – ‘‘imesaṃ dvinnaṃ bhikkhūnaṃ metti ativiya daḷhā, kiṃ nu kho, bhedake sati bhijjeyya, na bhijjeyyā’’ti, sā tesaṃ okāsaṃ olokayamānā tesaṃ avidūreneva gacchati. Atheko thero ekassa hatthe pattacīvaraṃ datvā sarīravaḷañjanatthaṃ udakaphāsukaṭṭhānaṃ gantvā dhotahatthapādo hutvā gumbasamīpato nikkhamati bhummadevatā tassa therassa pacchato uttamarūpā itthī hutvā kese vidhunitvā saṃvidhāya sambandhantī viya piṭṭhiyaṃ paṃsuṃ puñchamānā viya sāṭakaṃ saṃvidhāya nivāsayamānā viya ca hutvā therassa padānupadikā hutvā gumbato nikkhantā. Ekamante ṭhito sahāyakatthero taṃ kāraṇaṃ disvāva domanassajāto ‘‘naṭṭho dāni me iminā bhikkhunā saddhiṃ dīgharattānugato sineho, sacāhaṃ evaṃvidhabhāvaṃ jāneyyaṃ, ettakaṃ addhānaṃ iminā saddhiṃ vissāsaṃ na kareyya’’nti cintetvā āgacchantassevassa, ‘‘handāvuso, tuyhaṃ pattacīvaraṃ, tādisena pāpena saddhiṃ ekamaggaṃ nāgacchāmī’’ti āha. Taṃ kathaṃ sutvā tassa lajjibhikkhuno hadayaṃ tikhiṇasattiṃ gahetvā viddhaṃ viya ahosi. Tato naṃ āha – ‘‘āvuso, kiṃ nāmetaṃ vadasi, ahaṃ ettakaṃ kālaṃ dukkaṭamattampi āpattiṃ na jānāmi. Tvaṃ pana maṃ ajja ‘pāpo’ti vadasi, kiṃ te diṭṭha’’nti. ‘‘Kiṃ aññena diṭṭhena, kiṃ tvaṃ evaṃvidhena alaṅkatapaṭiyattena mātugāmena saddhiṃ ekaṭṭhāne hutvā nikkhanto’’ti. ‘‘Natthetaṃ, āvuso, mayhaṃ, nāhaṃ evarūpaṃ mātugāmaṃ passāmī’’ti. Tassa yāvatatiyaṃ kathentassāpi itaro thero kathaṃ asaddahitvā attanā diṭṭhakāraṇaṃyeva bhūtattaṃ katvā gaṇhanto tena saddhiṃ ekamaggena agantvā aññena maggena satthu santikaṃ gato. Itaropi bhikkhu aññena maggena satthu santikaṃyeva gato.
д̇ад̇о бхигкусан̇гхасса убосат̇ааг̇аарам̣ бависанавзлааяа со бхигку д̇ам̣ бхигкум̣ убосат̇аг̇г̇з сан̃ж̇аанид̇ваа, ‘‘имасмим̣ убосат̇аг̇г̇з зваруубо наама баабабхигку ад̇т̇и, наахам̣ д̇зна сад̣̇д̇хим̣ убосат̇ам̣ гариссаамий’’д̇и нигкамид̇ваа б̣ахи адтааси. ат̇а бхуммад̣̇звад̇аа ‘‘бхаарияам̣ маяаа гаммам̣ гад̇а’’нд̇и махаллагаубаасагаван̣н̣зна д̇асса санд̇игам̣ г̇анд̇ваа ‘‘гасмаа, бханд̇з, аяяо имасмим̣ таанз тид̇о’’д̇и ааха. ‘‘убаасага, имам̣ убосат̇аг̇г̇ам̣ зго баабабхигку бавидто, ‘наахам̣ д̇зна сад̣̇д̇хим̣ убосат̇ам̣ гаромий’д̇и б̣ахи тид̇омхий’’д̇и. ‘‘бханд̇з, маа звам̣ г̇ан̣хат̇а, барисуд̣̇д̇хасийло зса бхигку. д̇умхзхи д̣̇идтамаад̇уг̇аамо наама ахам̣, маяаа д̇умхаагам̣ виймам̣санад̇т̇ааяа ‘д̣̇ал̣хаа ну ко имзсам̣ т̇зраанам̣ мзд̇д̇и, но д̣̇ал̣хаа’д̇и бхиж̇ж̇анаабхиж̇ж̇анабхаавам̣ ологзнд̇зна д̇ам̣ гаммам̣ гад̇а’’нд̇и. ‘‘го бана, д̇вам̣ саббурисаа’’д̇и? ‘‘ахам̣ згаа бхуммад̣̇звад̇аа, бханд̇з’’д̇и д̣̇звабуд̇д̇о гат̇знд̇о д̣̇иб̣б̣аанубхаавзна тад̇ваа т̇зрасса баад̣̇зсу нибад̇ид̇ваа ‘‘маяхам̣, бханд̇з, камат̇а, зд̇ам̣ д̣̇осам̣ т̇зро на ж̇аанаад̇и, убосат̇ам̣ гарот̇аа’’д̇и т̇зрам̣ яаажид̇ваа убосат̇аг̇г̇ам̣ бавзсзси. со т̇зро убосат̇ам̣ д̇аава згадтаанз агааси, мид̇д̇асант̇ававасзна бана буна д̇зна сад̣̇д̇хим̣ на згадтаанз ахосийд̇и. имасса т̇зрасса гаммам̣ на гат̇ийяад̇и, жуд̣̇ид̇агад̇т̇зро бана абараабарам̣ вибассанааяа гаммам̣ гаронд̇о арахад̇д̇ам̣ баабун̣и.
Tato bhikkhusaṅghassa uposathāgāraṃ pavisanavelāya so bhikkhu taṃ bhikkhuṃ uposathagge sañjānitvā, ‘‘imasmiṃ uposathagge evarūpo nāma pāpabhikkhu atthi, nāhaṃ tena saddhiṃ uposathaṃ karissāmī’’ti nikkhamitvā bahi aṭṭhāsi. Atha bhummadevatā ‘‘bhāriyaṃ mayā kammaṃ kata’’nti mahallakaupāsakavaṇṇena tassa santikaṃ gantvā ‘‘kasmā, bhante, ayyo imasmiṃ ṭhāne ṭhito’’ti āha. ‘‘Upāsaka, imaṃ uposathaggaṃ eko pāpabhikkhu paviṭṭho, ‘nāhaṃ tena saddhiṃ uposathaṃ karomī’ti bahi ṭhitomhī’’ti. ‘‘Bhante, mā evaṃ gaṇhatha, parisuddhasīlo esa bhikkhu. Tumhehi diṭṭhamātugāmo nāma ahaṃ, mayā tumhākaṃ vīmaṃsanatthāya ‘daḷhā nu kho imesaṃ therānaṃ metti, no daḷhā’ti bhijjanābhijjanabhāvaṃ olokentena taṃ kammaṃ kata’’nti. ‘‘Ko pana, tvaṃ sappurisā’’ti? ‘‘Ahaṃ ekā bhummadevatā, bhante’’ti devaputto kathento dibbānubhāvena ṭhatvā therassa pādesu nipatitvā ‘‘mayhaṃ, bhante, khamatha, etaṃ dosaṃ thero na jānāti, uposathaṃ karothā’’ti theraṃ yācitvā uposathaggaṃ pavesesi. So thero uposathaṃ tāva ekaṭṭhāne akāsi, mittasanthavavasena pana puna tena saddhiṃ na ekaṭṭhāne ahosīti. Imassa therassa kammaṃ na kathīyati, cuditakatthero pana aparāparaṃ vipassanāya kammaṃ karonto arahattaṃ pāpuṇi.
бхуммад̣̇звад̇аа д̇асса гаммасса ниссанд̣̇зна згам̣ б̣уд̣̇д̇ханд̇арам̣ абааяабхаяад̇о на мужжид̇т̇а. сажз бана гисмин̃жи гаалз мануссад̇д̇ам̣ ааг̇ажчад̇и, ан̃н̃зна язна гзнажи гад̇о д̣̇осо д̇ассзва убари бад̇ад̇и. со амхаагам̣ бхаг̇авад̇о гаалз саавад̇т̇ияам̣ б̣раахман̣агулз ниб̣б̣ад̇д̇и. ‘‘д̇хаанамаан̣аво’’д̇исса наамам̣ агам̣су. со ваяаббад̇д̇о д̇аяо взд̣̇з уг̇г̇ан̣хид̇ваа махаллагагаалз сад̇т̇у д̇хаммад̣̇зсанам̣ суд̇ваа бадилад̣̇д̇хасад̣̇д̇хо баб̣б̣аж̇и, д̇асса убасамбаннад̣̇ивасад̇о бадтааяа згаа алан̇гад̇абадияад̇д̇аа ид̇т̇ий д̇асмим̣ г̇аамам̣ бависанд̇з сад̣̇д̇хим̣язва г̇аамам̣ бависад̇и, нигкаманд̇з нигкамад̇и. вихаарам̣ бависанд̇зби сад̣̇д̇хим̣ бависад̇и, д̇идтанд̇зби д̇идтад̇ийд̇и звам̣ нижжаануб̣анд̇хаа бан̃н̃ааяад̇и. т̇зро д̇ам̣ на бассад̇и. д̇асса буна буримагамманиссанд̣̇зна саа ан̃н̃зсам̣ убадтаад̇и. г̇аамз яааг̇ум̣ бхигкан̃жа д̣̇ад̣̇амаанаа ид̇т̇ияо ‘‘бханд̇з, аяам̣ зго яааг̇уул̣ун̇го д̇умхаагам̣, зго имиссаа амхаагам̣ сахааяигааяаа’’д̇и барихаасам̣ гаронд̇и. т̇зрасса махад̇ий вихзсаа ход̇и. вихаараг̇ад̇амби нам̣ сааман̣зраа жзва д̣̇ахараа бхигкуу жа бариваарзд̇ваа ‘‘д̇хаано гон̣д̣о ж̇аад̇о’’д̇и барихаасам̣ гаронд̇и. ат̇асса д̇знзва гааран̣зна гун̣д̣ад̇хаанад̇т̇зрод̇и наамам̣ ж̇аад̇ам̣. со удтааяа самудтааяа д̇зхи гарияамаанам̣ гзл̣им̣ сахид̇ум̣ асаггонд̇о уммаад̣̇ам̣ г̇ахзд̇ваа ‘‘д̇умхз гон̣д̣аа, д̇умхаагам̣ убаж̇жхааяо гон̣д̣о, аажарияо гон̣д̣о’’д̇и вад̣̇ад̇и. ат̇а нам̣ сад̇т̇у аарожзсум̣ ‘‘гун̣д̣ад̇хаано, бханд̇з, д̣̇ахарасааман̣зрзхи сад̣̇д̇хим̣ звам̣ парусаваажам̣ вад̣̇ад̇ий’’д̇и. сад̇т̇аа д̇ам̣ баггосаабзд̇ваа ‘‘сажжам̣ гира д̇вам̣, д̇хаана, сааман̣зрзхи сад̣̇д̇хим̣ парусаваажам̣ вад̣̇асий’’д̇и вад̇ваа д̇зна ‘‘сажжам̣ бхаг̇аваа’’д̇и вуд̇д̇з ‘‘гасмаа звам̣ вад̣̇зсий’’д̇и ааха. ‘‘бханд̇з, ниб̣ад̣̇д̇хам̣ вихзсам̣ асаханд̇о звам̣ гат̇змий’’д̇и. ‘‘д̇вам̣ буб̣б̣з гад̇агаммам̣ яааваж̇ж̇ад̣̇ивасаа ж̇ийраабзд̇ум̣ на саггоси, буна зваруубам̣ парусам̣ маавад̣̇ий бхигкуу’’д̇и вад̇ваа ааха –
Bhummadevatā tassa kammassa nissandena ekaṃ buddhantaraṃ apāyabhayato na muccittha. Sace pana kismiñci kāle manussattaṃ āgacchati, aññena yena kenaci kato doso tasseva upari patati. So amhākaṃ bhagavato kāle sāvatthiyaṃ brāhmaṇakule nibbatti. ‘‘Dhānamāṇavo’’tissa nāmaṃ akaṃsu. So vayappatto tayo vede uggaṇhitvā mahallakakāle satthu dhammadesanaṃ sutvā paṭiladdhasaddho pabbaji, tassa upasampannadivasato paṭṭhāya ekā alaṅkatapaṭiyattā itthī tasmiṃ gāmaṃ pavisante saddhiṃyeva gāmaṃ pavisati, nikkhamante nikkhamati. Vihāraṃ pavisantepi saddhiṃ pavisati, tiṭṭhantepi tiṭṭhatīti evaṃ niccānubandhā paññāyati. Thero taṃ na passati. Tassa puna purimakammanissandena sā aññesaṃ upaṭṭhāti. Gāme yāguṃ bhikkhañca dadamānā itthiyo ‘‘bhante, ayaṃ eko yāguuḷuṅko tumhākaṃ, eko imissā amhākaṃ sahāyikāyā’’ti parihāsaṃ karonti. Therassa mahatī vihesā hoti. Vihāragatampi naṃ sāmaṇerā ceva daharā bhikkhū ca parivāretvā ‘‘dhāno koṇḍo jāto’’ti parihāsaṃ karonti. Athassa teneva kāraṇena kuṇḍadhānattheroti nāmaṃ jātaṃ. So uṭṭhāya samuṭṭhāya tehi kariyamānaṃ keḷiṃ sahituṃ asakkonto ummādaṃ gahetvā ‘‘tumhe koṇḍā, tumhākaṃ upajjhāyo koṇḍo, ācariyo koṇḍo’’ti vadati. Atha naṃ satthu ārocesuṃ ‘‘kuṇḍadhāno, bhante, daharasāmaṇerehi saddhiṃ evaṃ pharusavācaṃ vadatī’’ti. Satthā taṃ pakkosāpetvā ‘‘saccaṃ kira tvaṃ, dhāna, sāmaṇerehi saddhiṃ pharusavācaṃ vadasī’’ti vatvā tena ‘‘saccaṃ bhagavā’’ti vutte ‘‘kasmā evaṃ vadesī’’ti āha. ‘‘Bhante, nibaddhaṃ vihesaṃ asahanto evaṃ kathemī’’ti. ‘‘Tvaṃ pubbe katakammaṃ yāvajjadivasā jīrāpetuṃ na sakkosi, puna evarūpaṃ pharusaṃ māvadī bhikkhū’’ti vatvā āha –
‘‘маавожа парусам̣ ган̃жи, вуд̇д̇аа бадивад̣̇зяяу д̇ам̣;
‘‘Māvoca pharusaṃ kañci, vuttā paṭivadeyyu taṃ;
д̣̇угкаа хи саарамбхагат̇аа, бадид̣̇ан̣д̣аа пусзяяу д̇ам̣.
Dukkhā hi sārambhakathā, paṭidaṇḍā phuseyyu taṃ.
‘‘сажз нзрзси ад̇д̇аанам̣, гам̣со убахад̇о яат̇аа;
‘‘Sace neresi attānaṃ, kaṃso upahato yathā;
зса бад̇д̇оси ниб̣б̣аанам̣, саарамбхо д̇з на виж̇ж̇ад̇ий’’д̇и. (д̇ха. ба. 133-134);
Esa pattosi nibbānaṃ, sārambho te na vijjatī’’ti. (dha. pa. 133-134);
иман̃жа бана д̇асса т̇зрасса маад̇уг̇аамзна сад̣̇д̇хим̣ вижаран̣абхаавам̣ госаларан̃н̃оби гат̇аяим̣су. рааж̇аа ‘‘г̇ажчат̇а, бхан̣з, виймам̣сат̇аа’’д̇и бзсзд̇ваа саяамби манд̣̇знзва бариваарзна т̇зрасса васанадтаанам̣ г̇анд̇ваа згаманд̇з ологзнд̇о адтааси. д̇асмим̣ кан̣з т̇зро суужигаммам̣ гаронд̇о нисинно ход̇и, сааби ид̇т̇ий авид̣̇уурз таанз тид̇аа вияа бан̃н̃ааяад̇и. рааж̇аа д̣̇исваа ‘‘ад̇т̇ид̣̇ам̣ гааран̣а’’нд̇и д̇ассаа тид̇адтаанам̣ аг̇амааси. саа д̇асмим̣ ааг̇ажчанд̇з т̇зрасса васанабан̣н̣асаалам̣ бавидтаа вияа ахоси. рааж̇ааби д̇ааяа сад̣̇д̇хим̣ д̇амзва бан̣н̣асаалам̣ бависид̇ваа саб̣б̣ад̇т̇а ологзнд̇о ад̣̇исваа ‘‘нааяам̣ маад̇уг̇аамо, т̇зрасса зго гаммавибааго’’д̇и сан̃н̃ам̣ гад̇ваа батамам̣ т̇зрасса самийбзна г̇ажчанд̇оби т̇зрам̣ аванд̣̇ид̇ваа д̇асса гааран̣асса абхууд̇абхаавам̣ н̃ад̇ваа ааг̇амма т̇зрам̣ ванд̣̇ид̇ваа згаманд̇ам̣ нисинно ‘‘гажжи, бханд̇з, бин̣д̣агзна на гиламат̇аа’’д̇и бужчи. т̇зро ‘‘ваддад̇и, махаарааж̇аа’’д̇и ааха. ‘‘ж̇аанаамахам̣, бханд̇з, аяяасса гат̇ам̣, зваруубзна бариггилзсзна сад̣̇д̇хим̣ жаранд̇аанам̣ д̇умхаагам̣ гз наама басийд̣̇иссанд̇и, ид̇о бадтааяа во гад̇т̇ажи г̇аманагижжам̣ над̇т̇и, ахам̣ жад̇уухи бажжаязхи д̇умхз убадтахиссаами, д̇умхз яонисо манасигаарз маа бамаж̇ж̇ид̇т̇аа’’д̇и ниб̣ад̣̇д̇хабхигкам̣ бадтабзси. т̇зро рааж̇аанам̣ убад̇т̇амбхагам̣ лабхид̇ваа бхож̇анасаббааязна згаг̇г̇ажид̇д̇о худ̇ваа вибассанам̣ вад̣дхзд̇ваа арахад̇д̇ам̣ баабун̣и. д̇ад̇о бадтааяа саа ид̇т̇ий анд̇арад̇хааяи.
Imañca pana tassa therassa mātugāmena saddhiṃ vicaraṇabhāvaṃ kosalaraññopi kathayiṃsu. Rājā ‘‘gacchatha, bhaṇe, vīmaṃsathā’’ti pesetvā sayampi mandeneva parivārena therassa vasanaṭṭhānaṃ gantvā ekamante olokento aṭṭhāsi. Tasmiṃ khaṇe thero sūcikammaṃ karonto nisinno hoti, sāpi itthī avidūre ṭhāne ṭhitā viya paññāyati. Rājā disvā ‘‘atthidaṃ kāraṇa’’nti tassā ṭhitaṭṭhānaṃ agamāsi. Sā tasmiṃ āgacchante therassa vasanapaṇṇasālaṃ paviṭṭhā viya ahosi. Rājāpi tāya saddhiṃ tameva paṇṇasālaṃ pavisitvā sabbattha olokento adisvā ‘‘nāyaṃ mātugāmo, therassa eko kammavipāko’’ti saññaṃ katvā paṭhamaṃ therassa samīpena gacchantopi theraṃ avanditvā tassa kāraṇassa abhūtabhāvaṃ ñatvā āgamma theraṃ vanditvā ekamantaṃ nisinno ‘‘kacci, bhante, piṇḍakena na kilamathā’’ti pucchi. Thero ‘‘vaṭṭati, mahārājā’’ti āha. ‘‘Jānāmahaṃ, bhante, ayyassa kathaṃ, evarūpena parikkilesena saddhiṃ carantānaṃ tumhākaṃ ke nāma pasīdissanti, ito paṭṭhāya vo katthaci gamanakiccaṃ natthi, ahaṃ catūhi paccayehi tumhe upaṭṭhahissāmi, tumhe yoniso manasikāre mā pamajjitthā’’ti nibaddhabhikkhaṃ paṭṭhapesi. Thero rājānaṃ upatthambhakaṃ labhitvā bhojanasappāyena ekaggacitto hutvā vipassanaṃ vaḍḍhetvā arahattaṃ pāpuṇi. Tato paṭṭhāya sā itthī antaradhāyi.
д̇ад̣̇аа махаасубхад̣̇д̣̇аа уг̇г̇анаг̇арз мижчаад̣̇идтигагулз васамаанаа ‘‘сад̇т̇аа мам̣ анугамбад̇уу’’д̇и убосат̇ам̣ ад̇хидтааяа нираамаг̇анд̇хаа худ̇ваа убарибаасаад̣̇ад̇алз тид̇аа ‘‘имаани бубпаани анд̇арз адтад̇ваа д̣̇асаб̣аласса мад̇т̇агз вид̇аанам̣ худ̇ваа д̇идтанд̇у, д̣̇асаб̣ало имааяа сан̃н̃ааяа свз бан̃жахи бхигкусад̇зхи сад̣̇д̇хим̣ маяхам̣ бхигкам̣ г̇ан̣хад̇уу’’д̇и сажжагирияам̣ гад̇ваа адта суманабубпамудтияо виссаж̇ж̇зси. бубпаани г̇анд̇ваа д̇хаммад̣̇зсанаавзлааяа сад̇т̇у мад̇т̇агз вид̇аанам̣ худ̇ваа адтам̣су. сад̇т̇аа д̇ам̣ суманабубпавид̇аанам̣ д̣̇исваа жид̇д̇знзва субхад̣̇д̣̇ааяа бхигкам̣ ад̇хиваасзд̇ваа бунад̣̇ивасз арун̣з удтид̇з аананд̣̇ад̇т̇зрам̣ ааха – ‘‘аананд̣̇а, маяам̣ аж̇ж̇а д̣̇уурам̣ бхигкаажаарам̣ г̇амиссаама, бут̇уж̇ж̇анаанам̣ ад̣̇ад̇ваа арияаанам̣язва салаагам̣ д̣̇зхий’’д̇и. т̇зро бхигкуунам̣ аарожзси – ‘‘аавусо, сад̇т̇аа аж̇ж̇а д̣̇уурам̣ бхигкаажаарам̣ г̇амиссад̇и, бут̇уж̇ж̇анаа маа г̇ан̣ханд̇у, арияаава салаагам̣ г̇ан̣ханд̇уу’’д̇и. гун̣д̣ад̇хаанад̇т̇зро ‘‘аахара, аавусо салаага’’нд̇и батамам̣язва хад̇т̇ам̣ басаарзси. аананд̣̇о ‘‘сад̇т̇аа д̇аад̣̇исаанам̣ бхигкуунам̣ салаагам̣ на д̣̇аабзд̇и, арияаанам̣язва д̣̇аабзд̇ий’’д̇и вид̇аггам̣ уббаад̣̇зд̇ваа г̇анд̇ваа сад̇т̇у аарожзси. сад̇т̇аа ‘‘аахараабзнд̇асса салаагам̣ д̣̇зхий’’д̇и ааха. т̇зро жинд̇зси – ‘‘сажз гун̣д̣ад̇хаанасса салаагаа д̣̇аад̇ум̣ на яуд̇д̇аа, ат̇а сад̇т̇аа бадиб̣аахзяяа, бхависсад̇и зд̇т̇а гааран̣а’’нд̇и ‘‘гун̣д̣ад̇хаанасса салаагам̣ д̣̇ассаамий’’д̇и г̇аманам̣ абхинийхари. гун̣д̣ад̇хаано д̇асса бурз ааг̇аманаа зва абхин̃н̃аабаад̣̇агам̣ жад̇уд̇т̇аж̇жхаанам̣ самаабаж̇ж̇ид̇ваа ид̣̇д̇хияаа аагаасз тад̇ваа ‘‘аахараавусо, аананд̣̇а, сад̇т̇аа мам̣ ж̇аанаад̇и, маад̣̇исам̣ бхигкум̣ батамам̣ салаагам̣ г̇ан̣ханд̇ам̣ на сад̇т̇аа ниваарзд̇ий’’д̇и хад̇т̇ам̣ басаарзд̇ваа салаагам̣ г̇ан̣хи. сад̇т̇аа д̇ам̣ адтуббад̇д̇им̣ гад̇ваа т̇зрам̣ имасмим̣ саасанз батамам̣ салаагам̣ г̇ан̣ханд̇аанам̣ аг̇г̇адтаанз табзси. яасмаа аяам̣ т̇зро рааж̇аанам̣ убад̇т̇амбхагам̣ лабхид̇ваа саббааяаахааралаабхзна самаахид̇ажид̇д̇о вибассанааяа гаммам̣ гаронд̇о убаниссаяасамбаннад̇ааяа чал̣абхин̃н̃о ахоси. д̇зна вуд̇д̇ам̣ абад̣̇аанз (аба. т̇зра 1.4.1-16) –
Tadā mahāsubhaddā ugganagare micchādiṭṭhikakule vasamānā ‘‘satthā maṃ anukampatū’’ti uposathaṃ adhiṭṭhāya nirāmagandhā hutvā uparipāsādatale ṭhitā ‘‘imāni pupphāni antare aṭṭhatvā dasabalassa matthake vitānaṃ hutvā tiṭṭhantu, dasabalo imāya saññāya sve pañcahi bhikkhusatehi saddhiṃ mayhaṃ bhikkhaṃ gaṇhatū’’ti saccakiriyaṃ katvā aṭṭha sumanapupphamuṭṭhiyo vissajjesi. Pupphāni gantvā dhammadesanāvelāya satthu matthake vitānaṃ hutvā aṭṭhaṃsu. Satthā taṃ sumanapupphavitānaṃ disvā citteneva subhaddāya bhikkhaṃ adhivāsetvā punadivase aruṇe uṭṭhite ānandattheraṃ āha – ‘‘ānanda, mayaṃ ajja dūraṃ bhikkhācāraṃ gamissāma, puthujjanānaṃ adatvā ariyānaṃyeva salākaṃ dehī’’ti. Thero bhikkhūnaṃ ārocesi – ‘‘āvuso, satthā ajja dūraṃ bhikkhācāraṃ gamissati, puthujjanā mā gaṇhantu, ariyāva salākaṃ gaṇhantū’’ti. Kuṇḍadhānatthero ‘‘āhara, āvuso salāka’’nti paṭhamaṃyeva hatthaṃ pasāresi. Ānando ‘‘satthā tādisānaṃ bhikkhūnaṃ salākaṃ na dāpeti, ariyānaṃyeva dāpetī’’ti vitakkaṃ uppādetvā gantvā satthu ārocesi. Satthā ‘‘āharāpentassa salākaṃ dehī’’ti āha. Thero cintesi – ‘‘sace kuṇḍadhānassa salākā dātuṃ na yuttā, atha satthā paṭibāheyya, bhavissati ettha kāraṇa’’nti ‘‘kuṇḍadhānassa salākaṃ dassāmī’’ti gamanaṃ abhinīhari. Kuṇḍadhāno tassa pure āgamanā eva abhiññāpādakaṃ catutthajjhānaṃ samāpajjitvā iddhiyā ākāse ṭhatvā ‘‘āharāvuso, ānanda, satthā maṃ jānāti, mādisaṃ bhikkhuṃ paṭhamaṃ salākaṃ gaṇhantaṃ na satthā nivāretī’’ti hatthaṃ pasāretvā salākaṃ gaṇhi. Satthā taṃ aṭṭhuppattiṃ katvā theraṃ imasmiṃ sāsane paṭhamaṃ salākaṃ gaṇhantānaṃ aggaṭṭhāne ṭhapesi. Yasmā ayaṃ thero rājānaṃ upatthambhakaṃ labhitvā sappāyāhāralābhena samāhitacitto vipassanāya kammaṃ karonto upanissayasampannatāya chaḷabhiñño ahosi. Tena vuttaṃ apadāne (apa. thera 1.4.1-16) –
‘‘сад̇д̇аахам̣ бадисаллийнам̣, саяамбхум̣ аг̇г̇абуг̇г̇алам̣;
‘‘Sattāhaṃ paṭisallīnaṃ, sayambhuṃ aggapuggalaṃ;
басаннажид̇д̇о сумано, б̣уд̣̇д̇хасздтам̣ убадтахим̣.
Pasannacitto sumano, buddhaseṭṭhaṃ upaṭṭhahiṃ.
‘‘вудтид̇ам̣ гааламан̃н̃ааяа, бад̣̇умуд̇д̇арам̣ махаамуним̣;
‘‘Vuṭṭhitaṃ kālamaññāya, padumuttaraṃ mahāmuniṃ;
маханд̇им̣ гад̣̇алийган̣н̣им̣, г̇ахзд̇ваа убаг̇ажчахам̣.
Mahantiṃ kadalīkaṇṇiṃ, gahetvā upagacchahaṃ.
‘‘бадиг̇г̇ахзд̇ваа бхаг̇аваа, саб̣б̣ан̃н̃уу логанааяаго;
‘‘Paṭiggahetvā bhagavā, sabbaññū lokanāyako;
мама жид̇д̇ам̣ басаад̣̇знд̇о, барибхун̃ж̇и махаамуни.
Mama cittaṃ pasādento, paribhuñji mahāmuni.
‘‘барибхун̃ж̇ид̇ваа самб̣уд̣̇д̇хо, сад̇т̇аваахо ануд̇д̇аро;
‘‘Paribhuñjitvā sambuddho, satthavāho anuttaro;
сагаасанз нисийд̣̇ид̇ваа, имаа г̇аат̇аа абхаасат̇а.
Sakāsane nisīditvā, imā gāthā abhāsatha.
‘‘яз жа санд̇и самид̇ааро, яагкаа имамхи баб̣б̣ад̇з;
‘‘Ye ca santi samitāro, yakkhā imamhi pabbate;
аран̃н̃з бхууд̇абхаб̣яаани, сун̣анд̇у важанам̣ мама.
Araññe bhūtabhabyāni, suṇantu vacanaṃ mama.
‘‘яо со б̣уд̣̇д̇хам̣ убадтааси, миг̇арааж̇ам̣ва гзсарим̣;
‘‘Yo so buddhaṃ upaṭṭhāsi, migarājaṃva kesariṃ;
д̇амахам̣ гид̇д̇аяиссаами, сун̣аат̇а мама бхаасад̇о.
Tamahaṃ kittayissāmi, suṇātha mama bhāsato.
‘‘згаад̣̇асан̃жагкад̇д̇ум̣ со, д̣̇зварааж̇аа бхависсад̇и;
‘‘Ekādasañcakkhattuṃ so, devarājā bhavissati;
жад̇увийсад̇игкад̇д̇ун̃жа, жаггавад̇д̇ий бхависсад̇и.
Catuvīsatikkhattuñca, cakkavattī bhavissati.
‘‘габбасад̇асахассамхи, оггаагагуласамбхаво;
‘‘Kappasatasahassamhi, okkākakulasambhavo;
г̇од̇амо наама г̇од̇д̇зна, сад̇т̇аа логз бхависсад̇и.
Gotamo nāma gottena, satthā loke bhavissati.
‘‘аггосид̇ваана саман̣з, сийлаванд̇з анаасавз;
‘‘Akkositvāna samaṇe, sīlavante anāsave;
баабагаммавибаагзна, наамад̇хзяяам̣ лабхиссад̇и.
Pāpakammavipākena, nāmadheyyaṃ labhissati.
‘‘д̇асса д̇хаммз суд̣̇ааяаад̣̇о, орасо д̇хамманиммид̇о;
‘‘Tassa dhamme sudāyādo, oraso dhammanimmito;
гун̣д̣ад̇хаанод̇и наамзна, сааваго со бхависсад̇и.
Kuṇḍadhānoti nāmena, sāvako so bhavissati.
‘‘бавивзгамануяуд̇д̇о, жхааяий жхаанарад̇о ахам̣;
‘‘Pavivekamanuyutto, jhāyī jhānarato ahaṃ;
д̇осаяид̇ваана сад̇т̇аарам̣, вихараами анаасаво.
Tosayitvāna satthāraṃ, viharāmi anāsavo.
‘‘саавагзхи баривуд̇о, бхигкусан̇гхабурагкад̇о;
‘‘Sāvakehi parivuto, bhikkhusaṅghapurakkhato;
бхигкусан̇гхз нисийд̣̇ид̇ваа, салаагам̣ г̇аахаяий ж̇ино.
Bhikkhusaṅghe nisīditvā, salākaṃ gāhayī jino.
‘‘згам̣сам̣ жийварам̣ гад̇ваа, ванд̣̇ид̇ваа логанааяагам̣;
‘‘Ekaṃsaṃ cīvaraṃ katvā, vanditvā lokanāyakaṃ;
вад̣̇ад̇ам̣ варасса бурад̇о, батамам̣ аг̇г̇ахзсахам̣.
Vadataṃ varassa purato, paṭhamaṃ aggahesahaṃ.
‘‘д̇зна гаммзна бхаг̇аваа, д̣̇асасахассигамбаго;
‘‘Tena kammena bhagavā, dasasahassikampako;
бхигкусан̇гхз нисийд̣̇ид̇ваа, аг̇г̇адтаанз табзси мам̣.
Bhikkhusaṅghe nisīditvā, aggaṭṭhāne ṭhapesi maṃ.
‘‘вийрияам̣ мз д̇хурад̇хораяхам̣, яог̇агкзмаад̇хивааханам̣;
‘‘Vīriyaṃ me dhuradhorayhaṃ, yogakkhemādhivāhanaṃ;
д̇хаарзми анд̇имам̣ д̣̇зхам̣, саммаасамб̣уд̣̇д̇хасаасанз.
Dhāremi antimaṃ dehaṃ, sammāsambuddhasāsane.
‘‘гилзсаа жхаабид̇аа маяхам̣…бз… гад̇ам̣ б̣уд̣̇д̇хасса саасана’’нд̇и.
‘‘Kilesā jhāpitā mayhaṃ…pe… kataṃ buddhassa sāsana’’nti.
звам̣бхууд̇ассаби имасса т̇зрасса г̇ун̣з аж̇аананд̇аа яз бут̇уж̇ж̇анаа бхигкуу д̇ад̣̇аа батамам̣ салаагаг̇г̇ахан̣з ‘‘гим̣ ну ко зд̇а’’нд̇и самажинд̇зсум̣. д̇зсам̣ вимад̇ивид̇хаманад̇т̇ам̣ т̇зро аагаасам̣ аб̣бхуг̇г̇анд̇ваа ид̣̇д̇хибаадихаарияам̣ д̣̇ассзд̇ваа ан̃н̃аабад̣̇зсзна ан̃н̃ам̣ б̣яаагаронд̇о ‘‘бан̃жа чинд̣̇з’’д̇и г̇аат̇ам̣ абхааси.
Evaṃbhūtassapi imassa therassa guṇe ajānantā ye puthujjanā bhikkhū tadā paṭhamaṃ salākaggahaṇe ‘‘kiṃ nu kho eta’’nti samacintesuṃ. Tesaṃ vimatividhamanatthaṃ thero ākāsaṃ abbhuggantvā iddhipāṭihāriyaṃ dassetvā aññāpadesena aññaṃ byākaronto ‘‘pañca chinde’’ti gāthaṃ abhāsi.
15. д̇ад̇т̇а бан̃жа чинд̣̇зд̇и абааяуубабад̇д̇иниб̣б̣ад̇д̇анагаани бан̃жорамбхааг̇ияаани сам̣яож̇анаани баад̣̇з б̣анд̇ханараж̇ж̇угам̣ вияа бурисо сад̇т̇зна хздтимамаг̇г̇ад̇д̇аязна чинд̣̇зяяа баж̇ахзяяа. бан̃жа ж̇ахзд̇и убарид̣̇звалогуубабад̇д̇ихзд̇убхууд̇аани бан̃жуд̣̇д̇хамбхааг̇ияасам̣яож̇анаани бурисо г̇ийвааяа б̣анд̇ханараж̇ж̇угам̣ вияа арахад̇д̇амаг̇г̇зна ж̇ахзяяа, чинд̣̇зяяа ваад̇и ад̇т̇о. бан̃жа жуд̇д̇ари бхааваязд̇и д̇зсам̣язва уд̣̇д̇хамбхааг̇ияасам̣яож̇анаанам̣ бахаанааяа сад̣̇д̇хаад̣̇ийни бан̃жинд̣̇рияаани уд̇д̇ари анааг̇аамимаг̇г̇аад̇хиг̇амад̇о убари бхаавзяяа аг̇г̇амаг̇г̇аад̇хиг̇амавасзна вад̣дхзяяа. бан̃жасан̇г̇аад̇иг̇од̇и звам̣бхууд̇о бана бан̃жаннам̣ рааг̇ад̣̇осамохамаанад̣̇идтисан̇г̇аанам̣ ад̇иггаманзна бахаанзна бан̃жасан̇г̇аад̇иг̇о худ̇ваа. бхигку огхад̇ин̣н̣од̇и вужжад̇ийд̇и саб̣б̣ат̇аа бхиннагилзсад̇ааяа бхигкууд̇и, гаамабхавад̣̇идтиавиж̇ж̇огхз д̇арид̇ваа д̇зсам̣ баарабхууд̇з ниб̣б̣аанз тид̇од̇и жа вужжад̇ийд̇и ад̇т̇о.
15. Tattha pañca chindeti apāyūpapattinibbattanakāni pañcorambhāgiyāni saṃyojanāni pāde bandhanarajjukaṃ viya puriso satthena heṭṭhimamaggattayena chindeyya pajaheyya. Pañca jaheti uparidevalokūpapattihetubhūtāni pañcuddhambhāgiyasaṃyojanāni puriso gīvāya bandhanarajjukaṃ viya arahattamaggena jaheyya, chindeyya vāti attho. Pañca cuttari bhāvayeti tesaṃyeva uddhambhāgiyasaṃyojanānaṃ pahānāya saddhādīni pañcindriyāni uttari anāgāmimaggādhigamato upari bhāveyya aggamaggādhigamavasena vaḍḍheyya. Pañcasaṅgātigoti evaṃbhūto pana pañcannaṃ rāgadosamohamānadiṭṭhisaṅgānaṃ atikkamanena pahānena pañcasaṅgātigo hutvā. Bhikkhuoghatiṇṇoti vuccatīti sabbathā bhinnakilesatāya bhikkhūti, kāmabhavadiṭṭhiavijjoghe taritvā tesaṃ pārabhūte nibbāne ṭhitoti ca vuccatīti attho.
гун̣д̣ад̇хаанад̇т̇зраг̇аат̇ааван̣н̣анаа нидтид̇аа.
Kuṇḍadhānattheragāthāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / т̇зраг̇аат̇аабаал̣и • Theragāthāpāḷi / 5. гун̣д̣ад̇хаанад̇т̇зраг̇аат̇аа • 5. Kuṇḍadhānattheragāthā
