| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[109] 9. குண்ட³கபூவஜாதகவண்ணனா
[109] 9. Kuṇḍakapūvajātakavaṇṇanā
யத²ன்னோ புரிஸோ ஹோதீதி இத³ங் ஸத்தா² ஸாவத்தி²யங் விஹரந்தோ மஹாது³க்³க³தங் ஆரப்³ப⁴ கதே²ஸி. ஸாவத்தி²யஞ்ஹி கதா³சி ஏகமேவ குலங் பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ தா³னங் தே³தி, கதா³சி தீணி சத்தாரி ஏகதோ ஹுத்வா, கதா³சி க³ணப³ந்த⁴னேன, கதா³சி வீதி²ஸபா⁴கே³ன, கதா³சி ஸகலனக³ரங் ச²ந்த³கங் ஸங்ஹரித்வா. ததா³ பன வீதி²ப⁴த்தங் நாம அஹோஸி. அத² மனுஸ்ஸா பு³த்³த⁴ப்பமுக²ஸ்ஸ பி⁴க்கு²ஸங்க⁴ஸ்ஸ யாகு³ங் த³த்வா ‘‘க²ஜ்ஜகங் ஆஹரதா²’’தி ஆஹங்ஸு. ததா³ பனேகோ பரேஸங் ப⁴திகாரகோ து³க்³க³தமனுஸ்ஸோ தஸ்ஸங் வீதி²யங் வஸமானோ சிந்தேஸி ‘‘அஹங் யாகு³ங் தா³துங் ந ஸக்கி²ஸ்ஸாமி, க²ஜ்ஜகங் பன த³ஸ்ஸாமீ’’தி ஸண்ஹஸண்ஹங் குண்ட³கங் வட்³டா⁴பெத்வா உத³கேன தேமெத்வா அக்கபண்ணேன வேடெ²த்வா குக்குளே பசித்வா ‘‘இத³ங் பு³த்³த⁴ஸ்ஸ த³ஸ்ஸாமீ’’தி தங் ஆதா³ய க³ந்த்வா ஸத்து² ஸந்திகே டி²தோ ‘‘க²ஜ்ஜகங் ஆஹரதா²’’தி ஏகஸ்மிங் வசனே வுத்தமத்தே ஸப்³ப³பட²மங் க³ந்த்வா தங் பூவங் ஸத்து² பத்தே பதிட்டா²பேஸி, ஸத்தா² அஞ்ஞேஹி தீ³யமானங் க²ஜ்ஜகங் அக்³க³ஹெத்வா தமேவ பூவக²ஜ்ஜகங் பரிபு⁴ஞ்ஜி.
Yathanno puriso hotīti idaṃ satthā sāvatthiyaṃ viharanto mahāduggataṃ ārabbha kathesi. Sāvatthiyañhi kadāci ekameva kulaṃ buddhappamukhassa bhikkhusaṅghassa dānaṃ deti, kadāci tīṇi cattāri ekato hutvā, kadāci gaṇabandhanena, kadāci vīthisabhāgena, kadāci sakalanagaraṃ chandakaṃ saṃharitvā. Tadā pana vīthibhattaṃ nāma ahosi. Atha manussā buddhappamukhassa bhikkhusaṅghassa yāguṃ datvā ‘‘khajjakaṃ āharathā’’ti āhaṃsu. Tadā paneko paresaṃ bhatikārako duggatamanusso tassaṃ vīthiyaṃ vasamāno cintesi ‘‘ahaṃ yāguṃ dātuṃ na sakkhissāmi, khajjakaṃ pana dassāmī’’ti saṇhasaṇhaṃ kuṇḍakaṃ vaḍḍhāpetvā udakena temetvā akkapaṇṇena veṭhetvā kukkuḷe pacitvā ‘‘idaṃ buddhassa dassāmī’’ti taṃ ādāya gantvā satthu santike ṭhito ‘‘khajjakaṃ āharathā’’ti ekasmiṃ vacane vuttamatte sabbapaṭhamaṃ gantvā taṃ pūvaṃ satthu patte patiṭṭhāpesi, satthā aññehi dīyamānaṃ khajjakaṃ aggahetvā tameva pūvakhajjakaṃ paribhuñji.
தஸ்மிங்யேவ பன க²ணே ‘‘ஸம்மாஸம்பு³த்³தே⁴ன கிர மஹாது³க்³க³தஸ்ஸ குண்ட³கக²ஜ்ஜகங் அஜிகு³ச்சி²த்வா அமதங் விய பரிபு⁴த்த’’ந்தி ஸகலனக³ரங் ஏககோலாஹலங் அஹோஸி. ராஜராஜமஹாமத்தாத³யோ அந்தமஸோ தோ³வாரிகே உபாதா³ய ஸப்³பே³வ ஸன்னிபதித்வா ஸத்தா²ரங் வந்தி³த்வா மஹாது³க்³க³தங் உபஸங்கமித்வா ‘‘ஹந்த³ போ⁴, ஸதங் க³ஹெத்வா, த்³வே ஸதானி க³ஹெத்வா, பஞ்ச ஸதானி க³ஹெத்வா அம்ஹாகங் பத்திங் தே³ஹீ’’தி வதி³ங்ஸு. ஸோ ‘‘ஸத்தா²ரங் படிபுச்சி²த்வா ஜானிஸ்ஸாமீ’’தி ஸத்து² ஸந்திகங் க³ந்த்வா தமத்த²ங் ஆரோசேஸி. ஸத்தா² ‘‘த⁴னங் க³ஹெத்வா வா அக்³க³ஹெத்வா வா ஸப்³ப³ஸத்தானங் பத்திங் தே³ஹீ’’தி ஆஹ. ஸோ த⁴னங் க³ஹேதுங் ஆரபி⁴. மனுஸ்ஸா தி³கு³ணசதுக்³கு³ணஅட்ட²கு³ணாதி³வஸேன த³த³ந்தா நவ ஹிரஞ்ஞகோடியோ அத³ங்ஸு. ஸத்தா² அனுமோத³னங் கத்வா விஹாரங் க³ந்த்வா பி⁴க்கூ²ஹி வத்தே த³ஸ்ஸிதே ஸுக³தோவாத³ங் த³த்வா க³ந்த⁴குடிங் பாவிஸி. ராஜா ஸாயன்ஹஸமயே மஹாது³க்³க³தங் பக்கோஸாபெத்வா ஸெட்டி²ட்டா²னேன பூஜேஸி.
Tasmiṃyeva pana khaṇe ‘‘sammāsambuddhena kira mahāduggatassa kuṇḍakakhajjakaṃ ajigucchitvā amataṃ viya paribhutta’’nti sakalanagaraṃ ekakolāhalaṃ ahosi. Rājarājamahāmattādayo antamaso dovārike upādāya sabbeva sannipatitvā satthāraṃ vanditvā mahāduggataṃ upasaṅkamitvā ‘‘handa bho, sataṃ gahetvā, dve satāni gahetvā, pañca satāni gahetvā amhākaṃ pattiṃ dehī’’ti vadiṃsu. So ‘‘satthāraṃ paṭipucchitvā jānissāmī’’ti satthu santikaṃ gantvā tamatthaṃ ārocesi. Satthā ‘‘dhanaṃ gahetvā vā aggahetvā vā sabbasattānaṃ pattiṃ dehī’’ti āha. So dhanaṃ gahetuṃ ārabhi. Manussā diguṇacatugguṇaaṭṭhaguṇādivasena dadantā nava hiraññakoṭiyo adaṃsu. Satthā anumodanaṃ katvā vihāraṃ gantvā bhikkhūhi vatte dassite sugatovādaṃ datvā gandhakuṭiṃ pāvisi. Rājā sāyanhasamaye mahāduggataṃ pakkosāpetvā seṭṭhiṭṭhānena pūjesi.
பி⁴க்கூ² த⁴ம்மஸபா⁴யங் கத²ங் ஸமுட்டா²பேஸுங் ‘‘ஆவுஸோ, ஸத்தா² மஹாது³க்³க³தேன தி³ன்னங் குண்ட³கபூவங் அஜிகு³ச்ச²ந்தோ அமதங் விய பரிபு⁴ஞ்ஜி, மஹாது³க்³க³தோபி ப³ஹுத⁴னஞ்ச ஸெட்டி²ட்டா²னஞ்ச லபி⁴த்வா மஹாஸம்பத்திங் பத்தோ’’தி. ஸத்தா² ஆக³ந்த்வா ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா’’தி புச்சி²த்வா ‘‘இமாய நாமா’’தி வுத்தே ‘‘ந, பி⁴க்க²வே, இதா³னேவ மயா அஜிகு³ச்ச²ந்தேன தஸ்ஸ குண்ட³கபூவோ பரிபு⁴த்தோ, புப்³பே³பி ருக்க²தே³வதாய ஹுத்வா பரிபு⁴த்தோயேவ, ததா³பி சேஸ மங் நிஸ்ஸாய ஸெட்டி²ட்டா²னங் அலத்தே²வா’’தி வத்வா அதீதங் ஆஹரி.
Bhikkhū dhammasabhāyaṃ kathaṃ samuṭṭhāpesuṃ ‘‘āvuso, satthā mahāduggatena dinnaṃ kuṇḍakapūvaṃ ajigucchanto amataṃ viya paribhuñji, mahāduggatopi bahudhanañca seṭṭhiṭṭhānañca labhitvā mahāsampattiṃ patto’’ti. Satthā āgantvā ‘‘kāya nuttha, bhikkhave, etarahi kathāya sannisinnā’’ti pucchitvā ‘‘imāya nāmā’’ti vutte ‘‘na, bhikkhave, idāneva mayā ajigucchantena tassa kuṇḍakapūvo paribhutto, pubbepi rukkhadevatāya hutvā paribhuttoyeva, tadāpi cesa maṃ nissāya seṭṭhiṭṭhānaṃ alatthevā’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ ஏகஸ்மிங் டா²னே ஏரண்ட³ருக்கே² ருக்க²தே³வதா ஹுத்வா நிப்³ப³த்தி. ததா³ தஸ்மிங் கா³மகே மனுஸ்ஸா தே³வதாமங்க³லிகா ஹொந்தி. அதே²கஸ்மிங் ச²ணே ஸம்பத்தே மனுஸ்ஸா அத்தனோ அத்தனோ ருக்க²தே³வதானங் ப³லிகம்மங் அகங்ஸு. அதே²கோ து³க்³க³தமனுஸ்ஸோ தே மனுஸ்ஸே ருக்க²தே³வதா படிஜக்³க³ந்தே தி³ஸ்வா ஏகங் ஏரண்ட³ருக்க²ங் படிஜக்³கி³. தே மனுஸ்ஸா அத்தனோ அத்தனோ தே³வதானங் நானப்பகாரானி மாலாக³ந்த⁴விலேபனாதீ³னி சேவ க²ஜ்ஜபோ⁴ஜ்ஜானி ச ஆதா³ய க³ச்சி²ங்ஸு. ஸோ பன குண்ட³கபூவஞ்சேவ உளுங்கேன ச உத³கங் ஆதா³ய க³ந்த்வா ஏரண்ட³ருக்க²ஸ்ஸ அவிதூ³ரே ட²த்வா சிந்தேஸி ‘‘தே³வதா நாம தி³ப்³ப³க²ஜ்ஜகானி கா²த³ந்தி, மய்ஹங் தே³வதா இமங் குண்ட³கபூவங் ந கா²தி³ஸ்ஸதி, கிங் இமங் அகாரணேன நாஸேமி, அஹமேவ நங் கா²தி³ஸ்ஸாமீ’’தி ததோவ நிவத்தி. போ³தி⁴ஸத்தோ க²ந்த⁴விடபே ட²த்வா ‘‘போ⁴ புரிஸ, ஸசே த்வங் இஸ்ஸரோ ப⁴வெய்யாஸி, மய்ஹங் மது⁴ரக²ஜ்ஜகங் த³தெ³ய்யாஸி. த்வங் பன து³க்³க³தோ, அஹங் தவ பூவங் ந கா²தி³த்வா அஞ்ஞங் கிங் கா²தி³ஸ்ஸாமி, மா மே கொட்டா²ஸங் நாஸேஹீ’’தி வத்வா இமங் கா³த²மாஹ –
Atīte bārāṇasiyaṃ brahmadatte rajjaṃ kārente bodhisatto ekasmiṃ ṭhāne eraṇḍarukkhe rukkhadevatā hutvā nibbatti. Tadā tasmiṃ gāmake manussā devatāmaṅgalikā honti. Athekasmiṃ chaṇe sampatte manussā attano attano rukkhadevatānaṃ balikammaṃ akaṃsu. Atheko duggatamanusso te manusse rukkhadevatā paṭijaggante disvā ekaṃ eraṇḍarukkhaṃ paṭijaggi. Te manussā attano attano devatānaṃ nānappakārāni mālāgandhavilepanādīni ceva khajjabhojjāni ca ādāya gacchiṃsu. So pana kuṇḍakapūvañceva uḷuṅkena ca udakaṃ ādāya gantvā eraṇḍarukkhassa avidūre ṭhatvā cintesi ‘‘devatā nāma dibbakhajjakāni khādanti, mayhaṃ devatā imaṃ kuṇḍakapūvaṃ na khādissati, kiṃ imaṃ akāraṇena nāsemi, ahameva naṃ khādissāmī’’ti tatova nivatti. Bodhisatto khandhaviṭape ṭhatvā ‘‘bho purisa, sace tvaṃ issaro bhaveyyāsi, mayhaṃ madhurakhajjakaṃ dadeyyāsi. Tvaṃ pana duggato, ahaṃ tava pūvaṃ na khāditvā aññaṃ kiṃ khādissāmi, mā me koṭṭhāsaṃ nāsehī’’ti vatvā imaṃ gāthamāha –
109.
109.
‘‘யத²ன்னோ புரிஸோ ஹோதி, தத²ன்னா தஸ்ஸ தே³வதா;
‘‘Yathanno puriso hoti, tathannā tassa devatā;
ஆஹரேதங் குண்ட³பூவங், மா மே பா⁴க³ங் வினாஸயா’’தி.
Āharetaṃ kuṇḍapūvaṃ, mā me bhāgaṃ vināsayā’’ti.
தத்த² யத²ன்னோதி யதா²ரூபபோ⁴ஜனோ ஹோதி. தத²ன்னாதி தஸ்ஸ புரிஸஸ்ஸ தே³வதாபி ததா²ரூபபோ⁴ஜனாவ ஹோதி. ஆஹரேதங் குண்ட³பூவந்தி ஏதங் குண்ட³கேன பக்கபூவங் ஆனேஹி, மய்ஹங் பா⁴க³ங் மா வினாஸேஹீதி.
Tattha yathannoti yathārūpabhojano hoti. Tathannāti tassa purisassa devatāpi tathārūpabhojanāva hoti. Āharetaṃ kuṇḍapūvanti etaṃ kuṇḍakena pakkapūvaṃ ānehi, mayhaṃ bhāgaṃ mā vināsehīti.
ஸோ நிவத்தித்வா போ³தி⁴ஸத்தங் ஓலோகெத்வா ப³லிகம்மமகாஸி. போ³தி⁴ஸத்தோ ததோ ஓஜங் பரிபு⁴ஞ்ஜித்வா ‘‘புரிஸ, த்வங் கிமத்த²ங் மங் படிஜக்³க³ஸீ’’தி ஆஹ. ‘‘து³க்³க³தொம்ஹி, ஸாமி, தங் நிஸ்ஸாய து³க்³க³தபா⁴வதோ முச்சிதுகாமதாய படிஜக்³கா³மீ’’தி. ‘‘போ⁴ புரிஸ, மா சிந்தயி, தயா கதஞ்ஞுஸ்ஸ கதவேதி³னோ பூஜா கதா, இமங் ஏரண்ட³ங் பரிக்கி²பித்வா நிதி⁴கும்பி⁴யோ கீ³வாய கீ³வங் ஆஹச்சடி²தா. த்வங் ரஞ்ஞோ ஆசிக்கி²த்வா ஸகடேஹி த⁴னங் ஆஹராபெத்வா ராஜங்க³ணே ராஸிங் காரேஹி, ராஜா தே துஸ்ஸித்வா ஸெட்டி²ட்டா²னங் த³ஸ்ஸதீ’’தி வத்வா போ³தி⁴ஸத்தோ அந்தரதா⁴யி. ஸோ ததா² அகாஸி. ராஜாபி தஸ்ஸ ஸெட்டி²ட்டா²னங் அதா³ஸி. இதி ஸோ போ³தி⁴ஸத்தங் நிஸ்ஸாய மஹாஸம்பத்திங் பத்வா யதா²கம்மங் க³தோ.
So nivattitvā bodhisattaṃ oloketvā balikammamakāsi. Bodhisatto tato ojaṃ paribhuñjitvā ‘‘purisa, tvaṃ kimatthaṃ maṃ paṭijaggasī’’ti āha. ‘‘Duggatomhi, sāmi, taṃ nissāya duggatabhāvato muccitukāmatāya paṭijaggāmī’’ti. ‘‘Bho purisa, mā cintayi, tayā kataññussa katavedino pūjā katā, imaṃ eraṇḍaṃ parikkhipitvā nidhikumbhiyo gīvāya gīvaṃ āhaccaṭhitā. Tvaṃ rañño ācikkhitvā sakaṭehi dhanaṃ āharāpetvā rājaṅgaṇe rāsiṃ kārehi, rājā te tussitvā seṭṭhiṭṭhānaṃ dassatī’’ti vatvā bodhisatto antaradhāyi. So tathā akāsi. Rājāpi tassa seṭṭhiṭṭhānaṃ adāsi. Iti so bodhisattaṃ nissāya mahāsampattiṃ patvā yathākammaṃ gato.
ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ து³க்³க³தோ ஏதரஹி து³க்³க³தோவ, ஏரண்ட³ருக்க²தே³வதா பன அஹமேவ அஹோஸி’’ந்தி.
Satthā imaṃ dhammadesanaṃ āharitvā jātakaṃ samodhānesi – ‘‘tadā duggato etarahi duggatova, eraṇḍarukkhadevatā pana ahameva ahosi’’nti.
குண்ட³கபூவஜாதகவண்ணனா நவமா.
Kuṇḍakapūvajātakavaṇṇanā navamā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 109. குண்ட³பூவஜாதகங் • 109. Kuṇḍapūvajātakaṃ
