| Library / Tipiṭaka / д̇ибидага • Tipiṭaka / абад̣̇аанабаал̣и • Apadānapāḷi |
3. гун̣д̣алагзсийваг̇г̇о
3. Kuṇḍalakesīvaggo
1. гун̣д̣алагзсаат̇зрийабад̣̇аанам̣
1. Kuṇḍalakesātherīapadānaṃ
1.
1.
‘‘бад̣̇умуд̇д̇аро наама ж̇ино, саб̣б̣ад̇хаммаана баараг̇уу;
‘‘Padumuttaro nāma jino, sabbadhammāna pāragū;
ид̇о сад̇асахассамхи, габбз уббаж̇ж̇и нааяаго.
Ito satasahassamhi, kappe uppajji nāyako.
2.
2.
‘‘д̇ад̣̇аахам̣ хам̣савад̇ияам̣, ж̇аад̇аа сздтигулз ахум̣;
‘‘Tadāhaṃ haṃsavatiyaṃ, jātā seṭṭhikule ahuṃ;
наанаарад̇анабаж̇ж̇од̇з, махаасукасамаббид̇аа.
Nānāratanapajjote, mahāsukhasamappitā.
3.
3.
‘‘убзд̇ваа д̇ам̣ махаавийрам̣, ассосим̣ д̇хаммад̣̇зсанам̣;
‘‘Upetvā taṃ mahāvīraṃ, assosiṃ dhammadesanaṃ;
д̇ад̇о ж̇аад̇аббасаад̣̇аахам̣, убзсим̣ саран̣ам̣ ж̇инам̣.
Tato jātappasādāhaṃ, upesiṃ saraṇaṃ jinaṃ.
4.
4.
‘‘д̇ад̣̇аа махаагаарун̣иго, бад̣̇умуд̇д̇аранаамаго;
‘‘Tadā mahākāruṇiko, padumuttaranāmako;
киббаабхин̃н̃аанамаг̇г̇анд̇и, табзси бхигкуним̣ субхам̣.
Khippābhiññānamagganti, ṭhapesi bhikkhuniṃ subhaṃ.
5.
5.
‘‘д̇ам̣ суд̇ваа муд̣̇ид̇аа худ̇ваа, д̣̇аанам̣ д̣̇ад̇ваа махзсино;
‘‘Taṃ sutvā muditā hutvā, dānaṃ datvā mahesino;
нибажжа сирасаа баад̣̇з, д̇ам̣ таанамабхибад̇т̇аяим̣.
Nipacca sirasā pāde, taṃ ṭhānamabhipatthayiṃ.
6.
6.
‘‘анумод̣̇и махаавийро, ‘бхад̣̇д̣̇з яам̣ д̇збхибад̇т̇ид̇ам̣;
‘‘Anumodi mahāvīro, ‘bhadde yaṃ tebhipatthitaṃ;
самиж̇жхиссад̇и д̇ам̣ саб̣б̣ам̣, сукиний хохи ниб̣б̣уд̇аа.
Samijjhissati taṃ sabbaṃ, sukhinī hohi nibbutā.
7.
7.
‘‘‘сад̇асахассид̇о габбз, оггаагагуласамбхаво;
‘‘‘Satasahassito kappe, okkākakulasambhavo;
г̇од̇амо наама г̇од̇д̇зна, сад̇т̇аа логз бхависсад̇и.
Gotamo nāma gottena, satthā loke bhavissati.
8.
8.
‘‘‘д̇асса д̇хаммзсу д̣̇ааяаад̣̇аа, орасаа д̇хамманиммид̇аа;
‘‘‘Tassa dhammesu dāyādā, orasā dhammanimmitā;
бхад̣̇д̣̇аагун̣д̣алагзсаад̇и, хзссад̇и сад̇т̇у саавигаа’.
Bhaddākuṇḍalakesāti, hessati satthu sāvikā’.
9.
9.
‘‘д̇зна гаммзна сугад̇зна, жзд̇анаабан̣ид̇хийхи жа;
‘‘Tena kammena sukatena, cetanāpaṇidhīhi ca;
ж̇ахид̇ваа маанусам̣ д̣̇зхам̣, д̇аавад̇им̣самаг̇ажчахам̣.
Jahitvā mānusaṃ dehaṃ, tāvatiṃsamagacchahaṃ.
10.
10.
‘‘д̇ад̇о жуд̇аа яаамамаг̇ам̣, д̇ад̇охам̣ д̇усид̇ам̣ г̇ад̇аа;
‘‘Tato cutā yāmamagaṃ, tatohaṃ tusitaṃ gatā;
д̇ад̇о жа ниммаанарад̇им̣, васавад̇д̇ибурам̣ д̇ад̇о.
Tato ca nimmānaratiṃ, vasavattipuraṃ tato.
11.
11.
‘‘яад̇т̇а яад̇т̇уубабаж̇ж̇аами, д̇асса гаммасса ваахасаа;
‘‘Yattha yatthūpapajjāmi, tassa kammassa vāhasā;
д̇ад̇т̇а д̇ад̇т̇зва рааж̇уунам̣, махзсид̇д̇амагаараяим̣.
Tattha tattheva rājūnaṃ, mahesittamakārayiṃ.
12.
12.
‘‘д̇ад̇о жуд̇аа мануссзсу, рааж̇уунам̣ жаггавад̇д̇инам̣;
‘‘Tato cutā manussesu, rājūnaṃ cakkavattinaṃ;
ман̣д̣алийнан̃жа рааж̇уунам̣, махзсид̇д̇амагаараяим̣.
Maṇḍalīnañca rājūnaṃ, mahesittamakārayiṃ.
13.
13.
‘‘самбад̇д̇им̣ анубход̇ваана, д̣̇звзсу маанусзсу жа;
‘‘Sampattiṃ anubhotvāna, devesu mānusesu ca;
саб̣б̣ад̇т̇а сукид̇аа худ̇ваа, нзгагаббзсу сам̣сарим̣.
Sabbattha sukhitā hutvā, nekakappesu saṃsariṃ.
14.
14.
‘‘имамхи бхад̣̇д̣̇агз габбз, б̣рахмаб̣анд̇ху махааяасо;
‘‘Imamhi bhaddake kappe, brahmabandhu mahāyaso;
гассабо наама г̇од̇д̇зна, уббаж̇ж̇и вад̣̇ад̇ам̣ варо.
Kassapo nāma gottena, uppajji vadataṃ varo.
15.
15.
‘‘убадтааго махзсисса, д̇ад̣̇аа ааси нариссаро;
‘‘Upaṭṭhāko mahesissa, tadā āsi narissaro;
гаасирааж̇аа гигий наама, б̣аараан̣асибуруд̇д̇амз.
Kāsirājā kikī nāma, bārāṇasipuruttame.
16.
16.
‘‘д̇асса д̇хийд̇аа жад̇уд̇т̇аасим̣, бхигкуд̣̇ааяийд̇и виссуд̇аа;
‘‘Tassa dhītā catutthāsiṃ, bhikkhudāyīti vissutā;
д̇хаммам̣ суд̇ваа ж̇инаг̇г̇асса, баб̣б̣аж̇ж̇ам̣ самарожаяим̣.
Dhammaṃ sutvā jinaggassa, pabbajjaṃ samarocayiṃ.
17.
17.
‘‘ануж̇аани на но д̇аад̇о, аг̇аарзва д̇ад̣̇аа маяам̣;
‘‘Anujāni na no tāto, agāreva tadā mayaṃ;
вийсавассасахассаани, вижаримха ад̇анд̣̇ид̇аа.
Vīsavassasahassāni, vicarimha atanditā.
18.
18.
‘‘гомаариб̣рахмажарияам̣, рааж̇аган̃н̃аа сукзд̇хид̇аа;
‘‘Komāribrahmacariyaṃ, rājakaññā sukhedhitā;
б̣уд̣̇д̇хобадтаананирад̇аа, муд̣̇ид̇аа сад̇д̇а д̇хийд̇аро.
Buddhopaṭṭhānaniratā, muditā satta dhītaro.
19.
19.
‘‘саман̣ий саман̣аг̇уд̇д̇аа жа, бхигкуний бхигкуд̣̇ааяигаа;
‘‘Samaṇī samaṇaguttā ca, bhikkhunī bhikkhudāyikā;
д̇хаммаа жзва суд̇хаммаа жа, сад̇д̇амий сан̇гхад̣̇ааяигаа.
Dhammā ceva sudhammā ca, sattamī saṅghadāyikā.
20.
20.
‘‘кзмаа уббалаван̣н̣аа жа, бадаажаараа ахам̣ д̇ад̣̇аа;
‘‘Khemā uppalavaṇṇā ca, paṭācārā ahaṃ tadā;
гисааг̇од̇амий д̇хаммад̣̇иннаа, висаакаа ход̇и сад̇д̇амий.
Kisāgotamī dhammadinnā, visākhā hoti sattamī.
21.
21.
‘‘д̇зхи гаммзхи сугад̇зхи, жзд̇анаабан̣ид̇хийхи жа;
‘‘Tehi kammehi sukatehi, cetanāpaṇidhīhi ca;
ж̇ахид̇ваа маанусам̣ д̣̇зхам̣, д̇аавад̇им̣самаг̇ажчахам̣.
Jahitvā mānusaṃ dehaṃ, tāvatiṃsamagacchahaṃ.
22.
22.
‘‘бажчимз жа бхавз д̣̇аани, г̇ириб̣б̣аж̇абуруд̇д̇амз;
‘‘Pacchime ca bhave dāni, giribbajapuruttame;
ж̇аад̇аа сздтигулз пийд̇з, яад̣̇аахам̣ яоб̣б̣анз тид̇аа.
Jātā seṭṭhikule phīte, yadāhaṃ yobbane ṭhitā.
23.
23.
‘‘жорам̣ вад̇хад̇т̇ам̣ нийяанд̇ам̣, д̣̇исваа рад̇д̇аа д̇ахим̣ ахам̣;
‘‘Coraṃ vadhatthaṃ nīyantaṃ, disvā rattā tahiṃ ahaṃ;
бид̇аа мз д̇ам̣ сахассзна, можаяид̇ваа вад̇хаа д̇ад̇о.
Pitā me taṃ sahassena, mocayitvā vadhā tato.
24.
24.
‘‘ад̣̇ааси д̇асса мам̣ д̇аад̇о, вид̣̇ид̇ваана манам̣ мама;
‘‘Adāsi tassa maṃ tāto, viditvāna manaṃ mama;
д̇ассаахамаасим̣ висадтаа, ад̇ийва д̣̇аяид̇аа хид̇аа.
Tassāhamāsiṃ visaṭṭhā, atīva dayitā hitā.
25.
25.
жораббабаад̇ам̣ нзд̇ваана, баб̣б̣ад̇ам̣ жзд̇аяий вад̇хам̣.
Corappapātaṃ netvāna, pabbataṃ cetayī vadhaṃ.
26.
26.
‘‘д̇ад̣̇аахам̣ бан̣амид̇ваана, сад̇д̇угам̣ сугад̇ан̃ж̇алий;
‘‘Tadāhaṃ paṇamitvāna, sattukaṃ sukatañjalī;
рагканд̇ий ад̇д̇ано баан̣ам̣, ид̣̇ам̣ важанамаб̣равим̣.
Rakkhantī attano pāṇaṃ, idaṃ vacanamabraviṃ.
27.
27.
‘‘‘ид̣̇ам̣ суван̣н̣агзяуурам̣, муд̇д̇аа взл̣урияаа б̣ахуу;
‘‘‘Idaṃ suvaṇṇakeyūraṃ, muttā veḷuriyā bahū;
саб̣б̣ам̣ харассу 3 бхад̣̇д̣̇анд̇з, ман̃жа д̣̇аасийд̇и сааваяа’.
Sabbaṃ harassu 4 bhaddante, mañca dāsīti sāvaya’.
28.
28.
‘‘‘оробаяассу галяаан̣ий, маа б̣аал̣хам̣ барид̣̇зваси;
‘‘‘Oropayassu kalyāṇī, mā bāḷhaṃ paridevasi;
на жаахам̣ абхиж̇аанаами, аханд̇ваа д̇ханамаабхад̇ам̣’.
Na cāhaṃ abhijānāmi, ahantvā dhanamābhataṃ’.
29.
29.
‘‘‘яад̇о сараами ад̇д̇аанам̣, яад̇о бад̇д̇осми вин̃н̃уд̇ам̣;
‘‘‘Yato sarāmi attānaṃ, yato pattosmi viññutaṃ;
на жаахам̣ абхиж̇аанаами, ан̃н̃ам̣ бияад̇арам̣ д̇аяаа’.
Na cāhaṃ abhijānāmi, aññaṃ piyataraṃ tayā’.
30.
30.
‘‘‘зхи д̇ам̣ убаг̇уухиссам̣, гад̇ваана д̇ам̣ бад̣̇агкин̣ам̣;
‘‘‘Ehi taṃ upagūhissaṃ, katvāna taṃ padakkhiṇaṃ;
на жа д̣̇аани буно ад̇т̇и 5, мама д̇уяхан̃жа сан̇г̇амо.
Na ca dāni puno atthi 6, mama tuyhañca saṅgamo.
31.
31.
‘‘‘на хи саб̣б̣зсу таанзсу, бурисо ход̇и бан̣д̣ид̇о;
‘‘‘Na hi sabbesu ṭhānesu, puriso hoti paṇḍito;
ид̇т̇ийби бан̣д̣ид̇аа ход̇и, д̇ад̇т̇а д̇ад̇т̇а вижагкан̣аа.
Itthīpi paṇḍitā hoti, tattha tattha vicakkhaṇā.
32.
32.
‘‘‘на хи саб̣б̣зсу таанзсу, бурисо ход̇и бан̣д̣ид̇о;
‘‘‘Na hi sabbesu ṭhānesu, puriso hoti paṇḍito;
ид̇т̇ийби бан̣д̣ид̇аа ход̇и, лахум̣ ад̇т̇авижинд̇игаа.
Itthīpi paṇḍitā hoti, lahuṃ atthavicintikā.
33.
33.
‘‘‘лахун̃жа вад̇а киббан̃жа, нигадтз 7 самажзд̇аяим̣;
‘‘‘Lahuñca vata khippañca, nikaṭṭhe 8 samacetayiṃ;
миг̇ам̣ ун̣н̣аа яат̇аа звам̣ 9, д̇ад̣̇аахам̣ сад̇д̇угам̣ вад̇хим̣.
Migaṃ uṇṇā yathā evaṃ 10, tadāhaṃ sattukaṃ vadhiṃ.
34.
34.
‘‘‘яо жа уббад̇ид̇ам̣ ад̇т̇ам̣, на киббамануб̣уж̇жхад̇и;
‘‘‘Yo ca uppatitaṃ atthaṃ, na khippamanubujjhati;
со хан̃н̃ад̇з манд̣̇амад̇и, жорова г̇ириг̇аб̣бхарз.
So haññate mandamati, corova girigabbhare.
35.
35.
‘‘‘яо жа уббад̇ид̇ам̣ ад̇т̇ам̣, киббамзва ниб̣од̇хад̇и;
‘‘‘Yo ca uppatitaṃ atthaṃ, khippameva nibodhati;
мужжад̇з сад̇д̇усамб̣аад̇хаа, д̇ад̣̇аахам̣ сад̇д̇угаа яат̇аа’.
Muccate sattusambādhā, tadāhaṃ sattukā yathā’.
36.
36.
‘‘д̇ад̣̇аахам̣ баад̇аяид̇ваана, г̇ирид̣̇уг̇г̇амхи сад̇д̇угам̣;
‘‘Tadāhaṃ pātayitvāna, giriduggamhi sattukaṃ;
санд̇игам̣ сзд̇авад̇т̇аанам̣, убзд̇ваа баб̣б̣аж̇им̣ ахам̣.
Santikaṃ setavatthānaṃ, upetvā pabbajiṃ ahaṃ.
37.
37.
‘‘сан̣д̣аасзна жа гзсз мз, лун̃жид̇ваа саб̣б̣асо д̇ад̣̇аа;
‘‘Saṇḍāsena ca kese me, luñcitvā sabbaso tadā;
баб̣б̣аж̇ид̇ваана самаяам̣, аажигким̣су ниранд̇арам̣.
Pabbajitvāna samayaṃ, ācikkhiṃsu nirantaraṃ.
38.
38.
‘‘д̇ад̇о д̇ам̣ уг̇г̇ахзд̇ваахам̣, нисийд̣̇ид̇ваана згигаа;
‘‘Tato taṃ uggahetvāhaṃ, nisīditvāna ekikā;
самаяам̣ д̇ам̣ вижинд̇зсим̣, суваано маанусам̣ гарам̣.
Samayaṃ taṃ vicintesiṃ, suvāno mānusaṃ karaṃ.
39.
39.
‘‘чиннам̣ г̇аяха самийбз мз, баад̇аяид̇ваа абаггами;
‘‘Chinnaṃ gayha samīpe me, pātayitvā apakkami;
д̣̇исваа нимид̇д̇амалабхим̣, хад̇т̇ам̣ д̇ам̣ бул̣аваагулам̣.
Disvā nimittamalabhiṃ, hatthaṃ taṃ puḷavākulaṃ.
40.
40.
‘‘д̇ад̇о удтааяа сам̣виг̇г̇аа, абужчим̣ сахад̇хаммигз;
‘‘Tato uṭṭhāya saṃviggā, apucchiṃ sahadhammike;
д̇з авожум̣ виж̇аананд̇и, д̇ам̣ ад̇т̇ам̣ сагяабхигкаво.
Te avocuṃ vijānanti, taṃ atthaṃ sakyabhikkhavo.
41.
41.
‘‘саахам̣ д̇амад̇т̇ам̣ бужчиссам̣, убзд̇ваа б̣уд̣̇д̇хасаавагз;
‘‘Sāhaṃ tamatthaṃ pucchissaṃ, upetvā buddhasāvake;
д̇з мамаад̣̇ааяа г̇ажчим̣су, б̣уд̣̇д̇хасздтасса санд̇игам̣.
Te mamādāya gacchiṃsu, buddhaseṭṭhassa santikaṃ.
42.
42.
‘‘со мз д̇хаммамад̣̇зсзси, канд̇хааяад̇анад̇хаад̇уяо;
‘‘So me dhammamadesesi, khandhāyatanadhātuyo;
асубхаанижжад̣̇угкаад̇и, анад̇д̇аад̇и жа нааяаго.
Asubhāniccadukkhāti, anattāti ca nāyako.
43.
43.
‘‘д̇асса д̇хаммам̣ сун̣ид̇ваахам̣, д̇хаммажагкум̣ висод̇хаяим̣;
‘‘Tassa dhammaṃ suṇitvāhaṃ, dhammacakkhuṃ visodhayiṃ;
д̇ад̇о вин̃н̃аад̇асад̣̇д̇хаммаа, баб̣б̣аж̇ж̇ам̣ убасамбад̣̇ам̣.
Tato viññātasaddhammā, pabbajjaṃ upasampadaṃ.
44.
44.
‘‘ааяаажид̇о д̇ад̣̇аа ааха, ‘зхи бхад̣̇д̣̇з’д̇и нааяаго;
‘‘Āyācito tadā āha, ‘ehi bhadde’ti nāyako;
д̇ад̣̇аахам̣ убасамбаннаа, барид̇д̇ам̣ д̇ояамад̣̇д̣̇асам̣.
Tadāhaṃ upasampannā, parittaṃ toyamaddasaṃ.
45.
45.
‘‘баад̣̇абагкааланзнаахам̣ , н̃ад̇ваа сауд̣̇аяаб̣б̣аяам̣;
‘‘Pādapakkhālanenāhaṃ , ñatvā saudayabbayaṃ;
д̇ат̇аа саб̣б̣зби сан̇каарз, ийд̣̇исам̣ жинд̇аяим̣ 11 д̇ад̣̇аа.
Tathā sabbepi saṅkhāre, īdisaṃ cintayiṃ 12 tadā.
46.
46.
‘‘д̇ад̇о жид̇д̇ам̣ вимужжи мз, анубаад̣̇ааяа саб̣б̣асо;
‘‘Tato cittaṃ vimucci me, anupādāya sabbaso;
киббаабхин̃н̃аанамаг̇г̇ам̣ мз, д̇ад̣̇аа бан̃н̃аабаяий ж̇ино.
Khippābhiññānamaggaṃ me, tadā paññāpayī jino.
47.
47.
‘‘ид̣̇д̇хийсу жа васий хоми, д̣̇иб̣б̣ааяа сод̇ад̇хаад̇уяаа;
‘‘Iddhīsu ca vasī homi, dibbāya sotadhātuyā;
баражид̇д̇аани ж̇аанаами, сад̇т̇усаасанагааригаа.
Paracittāni jānāmi, satthusāsanakārikā.
48.
48.
‘‘буб̣б̣зниваасам̣ ж̇аанаами, д̣̇иб̣б̣ажагку висод̇хид̇ам̣;
‘‘Pubbenivāsaṃ jānāmi, dibbacakkhu visodhitaṃ;
кзбзд̇ваа аасавз саб̣б̣з, висуд̣̇д̇хаасим̣ суниммалаа.
Khepetvā āsave sabbe, visuddhāsiṃ sunimmalā.
49.
49.
‘‘барижин̣н̣о маяаа сад̇т̇аа, гад̇ам̣ б̣уд̣̇д̇хасса саасанам̣;
‘‘Pariciṇṇo mayā satthā, kataṃ buddhassa sāsanaṃ;
охид̇о г̇аруго бхааро, бхаванзд̇д̇и самуухад̇аа.
Ohito garuko bhāro, bhavanetti samūhatā.
50.
50.
‘‘яассад̇т̇ааяа баб̣б̣аж̇ид̇аа, аг̇аарасмаанаг̇аарияам̣;
‘‘Yassatthāya pabbajitā, agārasmānagāriyaṃ;
со мз ад̇т̇о ануббад̇д̇о, саб̣б̣асам̣яож̇анагкаяо.
So me attho anuppatto, sabbasaṃyojanakkhayo.
51.
51.
‘‘ад̇т̇ад̇хамманируд̇д̇ийсу, бадибхаанз д̇ат̇зва жа;
‘‘Atthadhammaniruttīsu, paṭibhāne tatheva ca;
н̃аан̣ам̣ мз вималам̣ суд̣̇д̇хам̣, б̣уд̣̇д̇хасздтасса саасанз.
Ñāṇaṃ me vimalaṃ suddhaṃ, buddhaseṭṭhassa sāsane.
52.
52.
‘‘гилзсаа жхаабид̇аа маяхам̣, бхаваа саб̣б̣з самуухад̇аа;
‘‘Kilesā jhāpitā mayhaṃ, bhavā sabbe samūhatā;
нааг̇ийва б̣анд̇ханам̣ чзд̇ваа, вихараами анаасаваа.
Nāgīva bandhanaṃ chetvā, viharāmi anāsavā.
53.
53.
‘‘свааг̇ад̇ам̣ вад̇а мз ааси, мама б̣уд̣̇д̇хасса санд̇игз;
‘‘Svāgataṃ vata me āsi, mama buddhassa santike;
д̇иссо виж̇ж̇аа ануббад̇д̇аа, гад̇ам̣ б̣уд̣̇д̇хасса саасанам̣.
Tisso vijjā anuppattā, kataṃ buddhassa sāsanaṃ.
54.
54.
‘‘бадисамбхид̣̇аа жад̇ассо, вимогкааби жа адтимз;
‘‘Paṭisambhidā catasso, vimokkhāpi ca aṭṭhime;
чал̣абхин̃н̃аа сажчигад̇аа, гад̇ам̣ б̣уд̣̇д̇хасса саасанам̣’’.
Chaḷabhiññā sacchikatā, kataṃ buddhassa sāsanaṃ’’.
ид̇т̇ам̣ суд̣̇ам̣ бхад̣̇д̣̇аагун̣д̣алагзсаа бхигкуний имаа г̇аат̇ааяо абхаасид̇т̇аад̇и.
Itthaṃ sudaṃ bhaddākuṇḍalakesā bhikkhunī imā gāthāyo abhāsitthāti.
гун̣д̣алагзсаат̇зрияаабад̣̇аанам̣ батамам̣.
Kuṇḍalakesātheriyāpadānaṃ paṭhamaṃ.
Footnotes:
