| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
6-7. குண்ட³லியஸுத்தாதி³வண்ணனா
6-7. Kuṇḍaliyasuttādivaṇṇanā
187-188. ச²ட்டே² ஆராமனிஸ்ஸயீதி ஆராமங் நிஸ்ஸாய வஸனபா⁴வேன ஆராமனிஸ்ஸயீ. பரிஸாவசரோதி பரிஸாய அவசரோ. பரிஸங் நாம பா³லாபி, பண்டி³தாபி ஓஸரந்தி, யோ பன பரப்பவாத³ங் மத்³தி³த்வா அத்தனோ வாத³ங் தீ³பேதுங் ஸக்கோதி, அயங் பரிஸாவசரோ நாம. ஆராமேன ஆராமந்தி ஆராமேனேவ ஆராமங் அனுசங்கமாமி, ந பா³ஹிரேனாதி அத்தோ². உய்யானேன உய்யானந்தி எத்தா²பி ஏஸேவ நயோ. அஞ்ஞேன வா ஆராமேன பவிஸித்வா அஞ்ஞங் ஆராமங், அஞ்ஞேன உய்யானேன அஞ்ஞங் உய்யானந்தி அயமெத்த² அத்தோ². இதிவாத³ப்பமொக்கா²னிஸங்ஸந்தி ‘‘ஏவங் புச்சா² ஹோதி, ஏவங் விஸ்ஸஜ்ஜனங், ஏவங் க³ஹணங், ஏவங் நிப்³பே³ட²ன’’ந்தி இமினா நயேன இதிவாதோ³ ஹோதி இதிவாத³ப்பமொக்கோ²தி ஏதங் ஆனிஸங்ஸங். உபாரம்பா⁴னிஸங்ஸந்தி ‘‘அயங் புச்சா²ய தோ³ஸோ, அயங் விஸ்ஸஜ்ஜனே’’தி ஏவங் வாத³தோ³ஸானிஸங்ஸங்.
187-188. Chaṭṭhe ārāmanissayīti ārāmaṃ nissāya vasanabhāvena ārāmanissayī. Parisāvacaroti parisāya avacaro. Parisaṃ nāma bālāpi, paṇḍitāpi osaranti, yo pana parappavādaṃ madditvā attano vādaṃ dīpetuṃ sakkoti, ayaṃ parisāvacaro nāma. Ārāmena ārāmanti ārāmeneva ārāmaṃ anucaṅkamāmi, na bāhirenāti attho. Uyyānena uyyānanti etthāpi eseva nayo. Aññena vā ārāmena pavisitvā aññaṃ ārāmaṃ, aññena uyyānena aññaṃ uyyānanti ayamettha attho. Itivādappamokkhānisaṃsanti ‘‘evaṃ pucchā hoti, evaṃ vissajjanaṃ, evaṃ gahaṇaṃ, evaṃ nibbeṭhana’’nti iminā nayena itivādo hoti itivādappamokkhoti etaṃ ānisaṃsaṃ. Upārambhānisaṃsanti ‘‘ayaṃ pucchāya doso, ayaṃ vissajjane’’ti evaṃ vādadosānisaṃsaṃ.
கத²ங் பா⁴விதோ ச, குண்ட³லிய, இந்த்³ரியஸங்வரோதி ஸத்தா² ‘‘எத்தகங் டா²னங் பரிப்³பா³ஜகேன புச்சி²தங், இதா³னி புச்சி²துங் ந ஸக்கோதீ’’தி ஞத்வா ‘‘ந தாவ அயங் தே³ஸனா யதா²னுஸந்தி⁴ங் க³தா. இதா³னி நங் யதா²னுஸந்தி⁴ங் பாபெஸ்ஸாமீ’’தி ஸயமேவ புச்ச²ந்தோ இமங் தே³ஸனங் ஆரபி⁴. தத்த² மனாபங் நாபி⁴ஜ்ஜ²தீதி இட்டா²ரம்மணங் நாபி⁴ஜ்ஜா²யதி. நாபி⁴ஹங்ஸதீதி ந ஸாமிஸாய துட்டி²யா அபி⁴ஹங்ஸதி. தஸ்ஸ டி²தோ ச காயோ ஹோதி, டி²தங் சித்தங் அஜ்ஜ²த்தந்தி தஸ்ஸ நாமகாயோ ச சித்தஞ்ச கோ³சரஜ்ஜ²த்தே டி²தங் ஹோதி. ஸுஸண்டி²தந்தி கம்மட்டா²னவஸேன ஸுட்டு² ஸண்டி²தங். ஸுவிமுத்தந்தி கம்மட்டா²னவிமுத்தியா ஸுவிமுத்தங். அமனாபந்தி அனிட்டா²ரம்மணங். ந மங்கு ஹோதீதி தஸ்மிங் ந மங்கு ஹோதி. அப்பதிட்டி²தசித்தோதி கிலேஸவஸேன அட்டி²தசித்தோ. அதீ³னமானஸோதி தோ³மனஸ்ஸவஸேன அதீ³னசித்தோ. அப்³யாபன்னசேதஸோதி தோ³ஸவஸேன அபூதிசித்தோ.
Kathaṃ bhāvito ca, kuṇḍaliya, indriyasaṃvaroti satthā ‘‘ettakaṃ ṭhānaṃ paribbājakena pucchitaṃ, idāni pucchituṃ na sakkotī’’ti ñatvā ‘‘na tāva ayaṃ desanā yathānusandhiṃ gatā. Idāni naṃ yathānusandhiṃ pāpessāmī’’ti sayameva pucchanto imaṃ desanaṃ ārabhi. Tattha manāpaṃ nābhijjhatīti iṭṭhārammaṇaṃ nābhijjhāyati. Nābhihaṃsatīti na sāmisāya tuṭṭhiyā abhihaṃsati. Tassa ṭhito ca kāyo hoti, ṭhitaṃ cittaṃ ajjhattanti tassa nāmakāyo ca cittañca gocarajjhatte ṭhitaṃ hoti. Susaṇṭhitanti kammaṭṭhānavasena suṭṭhu saṇṭhitaṃ. Suvimuttanti kammaṭṭhānavimuttiyā suvimuttaṃ. Amanāpanti aniṭṭhārammaṇaṃ. Na maṅku hotīti tasmiṃ na maṅku hoti. Appatiṭṭhitacittoti kilesavasena aṭṭhitacitto. Adīnamānasoti domanassavasena adīnacitto. Abyāpannacetasoti dosavasena apūticitto.
ஏவங் பா⁴விதோ கோ², குண்ட³லிய, இந்த்³ரியஸங்வரோ ஏவங் ப³ஹுலீகதோ தீணி ஸுசரிதானி பரிபூரேதீதி எத்த² ஏவங் ஸுசரிதபூரணங் வேதி³தப்³ப³ங் – இமேஸு தாவ ச²ஸு த்³வாரேஸு அட்டா²ரஸ து³ச்சரிதானி ஹொந்தி. கத²ங்? சக்கு²த்³வாரே தாவ இட்டா²ரம்மணே ஆபாத²க³தே காயங்க³வாசங்கா³னி அசோபெத்வா தஸ்மிங் ஆரம்மணே லோப⁴ங் உப்பாதெ³ந்தஸ்ஸ மனோது³ச்சரிதங் ஹோதி. லோப⁴ஸஹக³தேன சித்தேன ‘‘அஹோ வதித³ங் இட்ட²ங் கந்தங் மனாப’’ந்தி ப⁴ணந்தஸ்ஸ வசீது³ச்சரிதங், ததே³வ ஹத்தே²ன பராமஸந்தஸ்ஸ காயது³ச்சரிதங். ஸேஸத்³வாரேஸுபி ஏஸேவ நயோ.
Evaṃ bhāvito kho, kuṇḍaliya, indriyasaṃvaro evaṃ bahulīkato tīṇi sucaritāni paripūretīti ettha evaṃ sucaritapūraṇaṃ veditabbaṃ – imesu tāva chasu dvāresu aṭṭhārasa duccaritāni honti. Kathaṃ? Cakkhudvāre tāva iṭṭhārammaṇe āpāthagate kāyaṅgavācaṅgāni acopetvā tasmiṃ ārammaṇe lobhaṃ uppādentassa manoduccaritaṃ hoti. Lobhasahagatena cittena ‘‘aho vatidaṃ iṭṭhaṃ kantaṃ manāpa’’nti bhaṇantassa vacīduccaritaṃ, tadeva hatthena parāmasantassa kāyaduccaritaṃ. Sesadvāresupi eseva nayo.
அயங் பன விஸேஸோ – ஸோதத்³வாரஸ்மிஞ்ஹி ஸத்³தா³ரம்மணஸ்ஸ வத்து²பூ⁴தங் ஸங்க²பணவாதி³தூரியப⁴ண்ட³ங் அனாமாஸங் ஆமஸந்தஸ்ஸ, கா⁴னத்³வாரே க³ந்தா⁴ரம்மணஸ்ஸ வத்து²பூ⁴தங் க³ந்த⁴மாலாதி³ங், ஜிவ்ஹாத்³வாரே ரஸாரம்மணஸ்ஸ வத்து²பூ⁴தங் மச்ச²மங்ஸாதி³ங், காயத்³வாரே பொ²ட்ட²ப்³பா³ரம்மணஸ்ஸ வத்து²பூ⁴தங் வத்த²தூலகபாவாராதி³ங், மனொத்³வாரே பஞ்ஞத்திவஸேன த⁴ம்மாரம்மணபூ⁴தங் ஸப்பிதேலமது⁴பா²ணிதாதி³ங் ஆமஸந்தஸ்ஸ காயது³ச்சரிதங் வேதி³தப்³ப³ங். ஸங்கே²பதோ பனெத்த² ச²ஸு த்³வாரேஸு காயவீதிக்கமோ காயது³ச்சரிதங், வசீவீதிக்கமோ வசீது³ச்சரிதங், மனோவீதிக்கமோ மனோது³ச்சரிதந்தி தீணேவ து³ச்சரிதானி ஹொந்தி.
Ayaṃ pana viseso – sotadvārasmiñhi saddārammaṇassa vatthubhūtaṃ saṅkhapaṇavāditūriyabhaṇḍaṃ anāmāsaṃ āmasantassa, ghānadvāre gandhārammaṇassa vatthubhūtaṃ gandhamālādiṃ, jivhādvāre rasārammaṇassa vatthubhūtaṃ macchamaṃsādiṃ, kāyadvāre phoṭṭhabbārammaṇassa vatthubhūtaṃ vatthatūlakapāvārādiṃ, manodvāre paññattivasena dhammārammaṇabhūtaṃ sappitelamadhuphāṇitādiṃ āmasantassa kāyaduccaritaṃ veditabbaṃ. Saṅkhepato panettha chasu dvāresu kāyavītikkamo kāyaduccaritaṃ, vacīvītikkamo vacīduccaritaṃ, manovītikkamo manoduccaritanti tīṇeva duccaritāni honti.
அயங் பன பி⁴க்கு² அத்தனோ பா⁴வனாபடிஸங்கா²னே டி²தோ இமானி து³ச்சரிதானி ஸுசரிதங் கத்வா விபரிணாமேதி. கத²ங்? சக்கு²த்³வாரே தாவ இட்டா²ரம்மணே ஆபாத²க³தே காயங்க³வாசங்கா³னி அசாலெத்வா ரூபாரம்மணங் விபஸ்ஸனங் பட்டா²பயதோ மனோஸுசரிதங் ஹோதி, விபஸ்ஸனாஸஹக³தேன சித்தேன க²யத⁴ம்மங் வயத⁴ம்மந்தி ப⁴ணந்தஸ்ஸ வசீஸுசரிதங், ‘‘அனாமாஸப⁴ண்ட³ங் ஏத’’ந்தி அனாமஸந்தஸ்ஸ காயஸுசரிதங். ஸேஸத்³வாரேஸுபி ஏஸேவ நயோ. ஏவங் இமானி வித்தா²ரதோ அட்டா²ரஸ ஸுசரிதானி ஹொந்தி. ஸங்கே²பதோ பனெத்தா²பி ச²ஸு த்³வாரேஸு காயஸங்வரோ காயஸுசரிதங், வசீஸங்வரோ வசீஸுசரிதங், மனோஸங்வரோ மனோஸுசரிதந்தி தீணேவ ஸுசரிதானி ஹொந்தி. ஏவங் இந்த்³ரியஸங்வரோ தீணி ஸுசரிதானி பரிபூரேதீதி வேதி³தப்³போ³. எத்தாவதா ஸீலானுரக்கி²தங் இந்த்³ரியஸங்வரஸீலங் கதி²தங்.
Ayaṃ pana bhikkhu attano bhāvanāpaṭisaṅkhāne ṭhito imāni duccaritāni sucaritaṃ katvā vipariṇāmeti. Kathaṃ? Cakkhudvāre tāva iṭṭhārammaṇe āpāthagate kāyaṅgavācaṅgāni acāletvā rūpārammaṇaṃ vipassanaṃ paṭṭhāpayato manosucaritaṃ hoti, vipassanāsahagatena cittena khayadhammaṃ vayadhammanti bhaṇantassa vacīsucaritaṃ, ‘‘anāmāsabhaṇḍaṃ eta’’nti anāmasantassa kāyasucaritaṃ. Sesadvāresupi eseva nayo. Evaṃ imāni vitthārato aṭṭhārasa sucaritāni honti. Saṅkhepato panetthāpi chasu dvāresu kāyasaṃvaro kāyasucaritaṃ, vacīsaṃvaro vacīsucaritaṃ, manosaṃvaro manosucaritanti tīṇeva sucaritāni honti. Evaṃ indriyasaṃvaro tīṇi sucaritāni paripūretīti veditabbo. Ettāvatā sīlānurakkhitaṃ indriyasaṃvarasīlaṃ kathitaṃ.
காயது³ச்சரிதங் பஹாயாதிஆதீ³ஸு திவித⁴ங் காயது³ச்சரிதங், சதுப்³பி³த⁴ங் வசீது³ச்சரிதங், திவித⁴ங் மனோது³ச்சரிதங். தஸ்ஸ படிபக்க²வஸேன காயஸுசரிதாதீ³னி வேதி³தப்³பா³னி. எத்தாவதா காயஸங்வரவசீஸங்வரேஹி பாதிமொக்க²ஸீலங், மனோஸங்வரேன தீணி ஸீலானீதி சதுபாரிஸுத்³தி⁴ஸீலங் கதி²தங் ஹோதி. ஸகலே பன இமஸ்மிங் ஸுத்தே ஸுசரிதமூலகா ஸதிபட்டா²னா லோகுத்தரமிஸ்ஸகா, ஸத்தன்னங் பொ³ஜ்ஜ²ங்கா³னங் மூலபூ⁴தா ஸதிபட்டா²னா புப்³ப³பா⁴கா³, தேபி ஸதிபட்டா²னமூலகா பொ³ஜ்ஜ²ங்கா³ புப்³ப³பா⁴கா³வ. விஜ்ஜாவிமுத்திமூலகா பன லோகுத்தராவ கதி²தாதி வேதி³தப்³பா³. ஸத்தமங் உத்தானமேவ.
Kāyaduccaritaṃ pahāyātiādīsu tividhaṃ kāyaduccaritaṃ, catubbidhaṃ vacīduccaritaṃ, tividhaṃ manoduccaritaṃ. Tassa paṭipakkhavasena kāyasucaritādīni veditabbāni. Ettāvatā kāyasaṃvaravacīsaṃvarehi pātimokkhasīlaṃ, manosaṃvarena tīṇi sīlānīti catupārisuddhisīlaṃ kathitaṃ hoti. Sakale pana imasmiṃ sutte sucaritamūlakā satipaṭṭhānā lokuttaramissakā, sattannaṃ bojjhaṅgānaṃ mūlabhūtā satipaṭṭhānā pubbabhāgā, tepi satipaṭṭhānamūlakā bojjhaṅgā pubbabhāgāva. Vijjāvimuttimūlakā pana lokuttarāva kathitāti veditabbā. Sattamaṃ uttānameva.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
6. குண்ட³லியஸுத்தங் • 6. Kuṇḍaliyasuttaṃ
7. கூடாகா³ரஸுத்தங் • 7. Kūṭāgārasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6-7. குண்ட³லியஸுத்தாதி³வண்ணனா • 6-7. Kuṇḍaliyasuttādivaṇṇanā
