| Library / Tipiṭaka / д̇ибидага • Tipiṭaka / сам̣яуд̇д̇анигааяа • Saṃyuttanikāya |
6. гун̣д̣алияасуд̇д̇ам̣
6. Kuṇḍaliyasuttaṃ
187. згам̣ самаяам̣ бхаг̇аваа саагзд̇з вихарад̇и ан̃ж̇анаванз миг̇ад̣̇ааяз. ат̇а ко гун̣д̣алияо бариб̣б̣ааж̇аго язна бхаг̇аваа д̇знубасан̇гами; убасан̇гамид̇ваа бхаг̇авад̇аа сад̣̇д̇хим̣ саммод̣̇и. саммод̣̇анийяам̣ гат̇ам̣ сааран̣ийяам̣ вийд̇исаарзд̇ваа згаманд̇ам̣ нисийд̣̇и. згаманд̇ам̣ нисинно ко гун̣д̣алияо бариб̣б̣ааж̇аго бхаг̇аванд̇ам̣ зд̇ад̣̇авожа – ‘‘ахамасми, бхо г̇од̇ама, аарааманиссаяий 1 барисааважаро. д̇асса маяхам̣, бхо г̇од̇ама, бажчаабхад̇д̇ам̣ бхуд̇д̇абаад̇араасасса аяамаажааро 2 ход̇и – аараамзна аараамам̣ уяяаанзна уяяаанам̣ анужан̇гамаами анувижараами. со д̇ад̇т̇а бассаами згз саман̣аб̣раахман̣з ид̇иваад̣̇аббамогкаанисам̣сан̃жзва гат̇ам̣ гат̇знд̇з убаарамбхаанисам̣сан̃жа – ‘бхавам̣ бана г̇од̇амо гимаанисам̣со вихарад̇ий’’’д̇и? ‘‘виж̇ж̇аавимуд̇д̇ипалаанисам̣со ко, гун̣д̣алияа, д̇ат̇ааг̇ад̇о вихарад̇ий’’д̇и.
187. Ekaṃ samayaṃ bhagavā sākete viharati añjanavane migadāye. Atha kho kuṇḍaliyo paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho kuṇḍaliyo paribbājako bhagavantaṃ etadavoca – ‘‘ahamasmi, bho gotama, ārāmanissayī 3 parisāvacaro. Tassa mayhaṃ, bho gotama, pacchābhattaṃ bhuttapātarāsassa ayamācāro 4 hoti – ārāmena ārāmaṃ uyyānena uyyānaṃ anucaṅkamāmi anuvicarāmi. So tattha passāmi eke samaṇabrāhmaṇe itivādappamokkhānisaṃsañceva kathaṃ kathente upārambhānisaṃsañca – ‘bhavaṃ pana gotamo kimānisaṃso viharatī’’’ti? ‘‘Vijjāvimuttiphalānisaṃso kho, kuṇḍaliya, tathāgato viharatī’’ti.
‘‘гад̇амз бана, бхо г̇од̇ама, д̇хаммаа бхаавид̇аа б̣ахулийгад̇аа виж̇ж̇аавимуд̇д̇им̣ барибуурзнд̇ий’’д̇и? ‘‘сад̇д̇а ко, гун̣д̣алияа, б̣ож̇жхан̇г̇аа бхаавид̇аа б̣ахулийгад̇аа виж̇ж̇аавимуд̇д̇им̣ барибуурзнд̇ий’’д̇и. ‘‘гад̇амз бана, бхо г̇од̇ама, д̇хаммаа бхаавид̇аа б̣ахулийгад̇аа сад̇д̇а б̣ож̇жхан̇г̇з барибуурзнд̇ий’’д̇и? ‘‘жад̇д̇ааро ко, гун̣д̣алияа, сад̇ибадтаанаа бхаавид̇аа б̣ахулийгад̇аа сад̇д̇а б̣ож̇жхан̇г̇з барибуурзнд̇ий’’д̇и . ‘‘гад̇амз бана, бхо г̇од̇ама, д̇хаммаа бхаавид̇аа, б̣ахулийгад̇аа жад̇д̇ааро сад̇ибадтаанз барибуурзнд̇ий’’д̇и? ‘‘д̇ийн̣и ко, гун̣д̣алияа, сужарид̇аани бхаавид̇аани б̣ахулийгад̇аани жад̇д̇ааро сад̇ибадтаанз барибуурзнд̇ий’’д̇и. ‘‘гад̇амз бана, бхо г̇од̇ама, д̇хаммаа бхаавид̇аа б̣ахулийгад̇аа д̇ийн̣и сужарид̇аани барибуурзнд̇ий’’д̇и? ‘‘инд̣̇рияасам̣варо ко, гун̣д̣алияа, бхаавид̇о б̣ахулийгад̇о д̇ийн̣и сужарид̇аани барибуурзд̇ий’’д̇и.
‘‘Katame pana, bho gotama, dhammā bhāvitā bahulīkatā vijjāvimuttiṃ paripūrentī’’ti? ‘‘Satta kho, kuṇḍaliya, bojjhaṅgā bhāvitā bahulīkatā vijjāvimuttiṃ paripūrentī’’ti. ‘‘Katame pana, bho gotama, dhammā bhāvitā bahulīkatā satta bojjhaṅge paripūrentī’’ti? ‘‘Cattāro kho, kuṇḍaliya, satipaṭṭhānā bhāvitā bahulīkatā satta bojjhaṅge paripūrentī’’ti . ‘‘Katame pana, bho gotama, dhammā bhāvitā, bahulīkatā cattāro satipaṭṭhāne paripūrentī’’ti? ‘‘Tīṇi kho, kuṇḍaliya, sucaritāni bhāvitāni bahulīkatāni cattāro satipaṭṭhāne paripūrentī’’ti. ‘‘Katame pana, bho gotama, dhammā bhāvitā bahulīkatā tīṇi sucaritāni paripūrentī’’ti? ‘‘Indriyasaṃvaro kho, kuṇḍaliya, bhāvito bahulīkato tīṇi sucaritāni paripūretī’’ti.
‘‘гат̇ам̣ бхаавид̇о жа, гун̣д̣алияа, инд̣̇рияасам̣варо гат̇ам̣ б̣ахулийгад̇о д̇ийн̣и сужарид̇аани барибуурзд̇ийд̇и? ид̇ха, гун̣д̣алияа, бхигку жагкунаа руубам̣ д̣̇исваа манаабам̣ наабхиж̇жхад̇и наабхихам̣сад̇и, на рааг̇ам̣ ж̇анзд̇и. д̇асса тид̇о жа гааяо ход̇и, тид̇ам̣ жид̇д̇ам̣ аж̇жхад̇д̇ам̣ сусан̣тид̇ам̣ сувимуд̇д̇ам̣. жагкунаа ко банзва руубам̣ д̣̇исваа аманаабам̣ на ман̇гу ход̇и аббад̇идтид̇ажид̇д̇о ад̣̇ийнамаанасо аб̣яаабаннажзд̇асо. д̇асса тид̇о жа гааяо ход̇и тид̇ам̣ жид̇д̇ам̣ аж̇жхад̇д̇ам̣ сусан̣тид̇ам̣ сувимуд̇д̇ам̣.
‘‘Kathaṃ bhāvito ca, kuṇḍaliya, indriyasaṃvaro kathaṃ bahulīkato tīṇi sucaritāni paripūretīti? Idha, kuṇḍaliya, bhikkhu cakkhunā rūpaṃ disvā manāpaṃ nābhijjhati nābhihaṃsati, na rāgaṃ janeti. Tassa ṭhito ca kāyo hoti, ṭhitaṃ cittaṃ ajjhattaṃ susaṇṭhitaṃ suvimuttaṃ. Cakkhunā kho paneva rūpaṃ disvā amanāpaṃ na maṅku hoti appatiṭṭhitacitto adīnamānaso abyāpannacetaso. Tassa ṭhito ca kāyo hoti ṭhitaṃ cittaṃ ajjhattaṃ susaṇṭhitaṃ suvimuttaṃ.
‘‘буна жабарам̣, гун̣д̣алияа, бхигку сод̇зна сад̣̇д̣̇ам̣ суд̇ваа…бз… гхаанзна г̇анд̇хам̣ гхааяид̇ваа… ж̇ивхааяа расам̣ сааяид̇ваа… гааязна подтаб̣б̣ам̣ пусид̇ваа…бз… манасаа д̇хаммам̣ вин̃н̃ааяа манаабам̣ наабхиж̇жхад̇и наабхихам̣сад̇и, на рааг̇ам̣ ж̇анзд̇и. д̇асса тид̇о жа гааяо ход̇и, тид̇ам̣ жид̇д̇ам̣ аж̇жхад̇д̇ам̣ сусан̣тид̇ам̣ сувимуд̇д̇ам̣. манасаа ко банзва д̇хаммам̣ вин̃н̃ааяа аманаабам̣ на ман̇гу ход̇и аббад̇идтид̇ажид̇д̇о ад̣̇ийнамаанасо аб̣яаабаннажзд̇асо. д̇асса тид̇о жа гааяо ход̇и, тид̇ам̣ жид̇д̇ам̣ аж̇жхад̇д̇ам̣ сусан̣тид̇ам̣ сувимуд̇д̇ам̣.
‘‘Puna caparaṃ, kuṇḍaliya, bhikkhu sotena saddaṃ sutvā…pe… ghānena gandhaṃ ghāyitvā… jivhāya rasaṃ sāyitvā… kāyena phoṭṭhabbaṃ phusitvā…pe… manasā dhammaṃ viññāya manāpaṃ nābhijjhati nābhihaṃsati, na rāgaṃ janeti. Tassa ṭhito ca kāyo hoti, ṭhitaṃ cittaṃ ajjhattaṃ susaṇṭhitaṃ suvimuttaṃ. Manasā kho paneva dhammaṃ viññāya amanāpaṃ na maṅku hoti appatiṭṭhitacitto adīnamānaso abyāpannacetaso. Tassa ṭhito ca kāyo hoti, ṭhitaṃ cittaṃ ajjhattaṃ susaṇṭhitaṃ suvimuttaṃ.
‘‘яад̇о ко, гун̣д̣алияа, бхигкуно жагкунаа руубам̣ д̣̇исваа манаабааманаабзсу руубзсу тид̇о жа гааяо ход̇и, тид̇ам̣ жид̇д̇ам̣ аж̇жхад̇д̇ам̣ сусан̣тид̇ам̣ сувимуд̇д̇ам̣. сод̇зна сад̣̇д̣̇ам̣ суд̇ваа…бз… гхаанзна г̇анд̇хам̣ гхааяид̇ваа…бз… ж̇ивхааяа расам̣ сааяид̇ваа…бз… гааязна подтаб̣б̣ам̣ пусид̇ваа…бз… манасаа д̇хаммам̣ вин̃н̃ааяа манаабааманаабзсу д̇хаммзсу тид̇о жа гааяо ход̇и, тид̇ам̣ жид̇д̇ам̣ аж̇жхад̇д̇ам̣ сусан̣тид̇ам̣ сувимуд̇д̇ам̣ . звам̣ бхаавид̇о ко, гун̣д̣алияа, инд̣̇рияасам̣варо звам̣ б̣ахулийгад̇о д̇ийн̣и сужарид̇аани барибуурзд̇и.
‘‘Yato kho, kuṇḍaliya, bhikkhuno cakkhunā rūpaṃ disvā manāpāmanāpesu rūpesu ṭhito ca kāyo hoti, ṭhitaṃ cittaṃ ajjhattaṃ susaṇṭhitaṃ suvimuttaṃ. Sotena saddaṃ sutvā…pe… ghānena gandhaṃ ghāyitvā…pe… jivhāya rasaṃ sāyitvā…pe… kāyena phoṭṭhabbaṃ phusitvā…pe… manasā dhammaṃ viññāya manāpāmanāpesu dhammesu ṭhito ca kāyo hoti, ṭhitaṃ cittaṃ ajjhattaṃ susaṇṭhitaṃ suvimuttaṃ . Evaṃ bhāvito kho, kuṇḍaliya, indriyasaṃvaro evaṃ bahulīkato tīṇi sucaritāni paripūreti.
‘‘гат̇ам̣ бхаавид̇аани жа, гун̣д̣алияа, д̇ийн̣и сужарид̇аани гат̇ам̣ б̣ахулийгад̇аани жад̇д̇ааро сад̇ибадтаанз барибуурзнд̇и? ид̇ха, гун̣д̣алияа, бхигку гааяад̣̇ужжарид̇ам̣ бахааяа гааяасужарид̇ам̣ бхаавзд̇и, важийд̣̇ужжарид̇ам̣ бахааяа важийсужарид̇ам̣ бхаавзд̇и, манод̣̇ужжарид̇ам̣ бахааяа маносужарид̇ам̣ бхаавзд̇и. звам̣ бхаавид̇аани ко, гун̣д̣алияа, д̇ийн̣и сужарид̇аани звам̣ б̣ахулийгад̇аани жад̇д̇ааро сад̇ибадтаанз барибуурзнд̇и.
‘‘Kathaṃ bhāvitāni ca, kuṇḍaliya, tīṇi sucaritāni kathaṃ bahulīkatāni cattāro satipaṭṭhāne paripūrenti? Idha, kuṇḍaliya, bhikkhu kāyaduccaritaṃ pahāya kāyasucaritaṃ bhāveti, vacīduccaritaṃ pahāya vacīsucaritaṃ bhāveti, manoduccaritaṃ pahāya manosucaritaṃ bhāveti. Evaṃ bhāvitāni kho, kuṇḍaliya, tīṇi sucaritāni evaṃ bahulīkatāni cattāro satipaṭṭhāne paripūrenti.
‘‘гат̇ам̣ бхаавид̇аа жа, гун̣д̣алияа, жад̇д̇ааро сад̇ибадтаанаа гат̇ам̣ б̣ахулийгад̇аа сад̇д̇а б̣ож̇жхан̇г̇з барибуурзнд̇и? ид̇ха, гун̣д̣алияа, бхигку гааяз гааяаанубассий вихарад̇и аад̇аабий самбаж̇аано сад̇имаа, винзяяа логз абхиж̇жхаад̣̇оманассам̣; взд̣̇анаасу…бз… д̇хаммзсу д̇хаммаанубассий вихарад̇и аад̇аабий самбаж̇аано сад̇имаа, винзяяа логз абхиж̇жхаад̣̇оманассам̣. звам̣ бхаавид̇аа ко, гун̣д̣алияа, жад̇д̇ааро сад̇ибадтаанаа звам̣ б̣ахулийгад̇аа сад̇д̇а б̣ож̇жхан̇г̇з барибуурзнд̇и.
‘‘Kathaṃ bhāvitā ca, kuṇḍaliya, cattāro satipaṭṭhānā kathaṃ bahulīkatā satta bojjhaṅge paripūrenti? Idha, kuṇḍaliya, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ; vedanāsu…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. Evaṃ bhāvitā kho, kuṇḍaliya, cattāro satipaṭṭhānā evaṃ bahulīkatā satta bojjhaṅge paripūrenti.
‘‘гат̇ам̣ бхаавид̇аа жа, гун̣д̣алияа, сад̇д̇а б̣ож̇жхан̇г̇аа гат̇ам̣ б̣ахулийгад̇аа виж̇ж̇аавимуд̇д̇им̣ барибуурзнд̇и? ид̇ха, гун̣д̣алияа, бхигку сад̇исамб̣ож̇жхан̇г̇ам̣ бхаавзд̇и вивзганиссид̇ам̣ вирааг̇аниссид̇ам̣ нирод̇ханиссид̇ам̣ воссаг̇г̇абарин̣аамим̣…бз… убзгкаасамб̣ож̇жхан̇г̇ам̣ бхаавзд̇и вивзганиссид̇ам̣ вирааг̇аниссид̇ам̣ нирод̇ханиссид̇ам̣ воссаг̇г̇абарин̣аамим̣. звам̣ бхаавид̇аа ко, гун̣д̣алияа, сад̇д̇а б̣ож̇жхан̇г̇аа звам̣ б̣ахулийгад̇аа виж̇ж̇аавимуд̇д̇им̣ барибуурзнд̇ий’’д̇и.
‘‘Kathaṃ bhāvitā ca, kuṇḍaliya, satta bojjhaṅgā kathaṃ bahulīkatā vijjāvimuttiṃ paripūrenti? Idha, kuṇḍaliya, bhikkhu satisambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ…pe… upekkhāsambojjhaṅgaṃ bhāveti vivekanissitaṃ virāganissitaṃ nirodhanissitaṃ vossaggapariṇāmiṃ. Evaṃ bhāvitā kho, kuṇḍaliya, satta bojjhaṅgā evaṃ bahulīkatā vijjāvimuttiṃ paripūrentī’’ti.
звам̣ вуд̇д̇з гун̣д̣алияо бариб̣б̣ааж̇аго бхаг̇аванд̇ам̣ зд̇ад̣̇авожа – ‘‘абхигганд̇ам̣, бхо г̇од̇ама, абхигганд̇ам̣, бхо г̇од̇ама! сзяяат̇ааби, бхо г̇од̇ама, ниггуж̇ж̇ид̇ам̣ ваа уггуж̇ж̇зяяа, бадижчаннам̣ ваа виварзяяа, муул̣хасса ваа маг̇г̇ам̣ аажигкзяяа, анд̇хагаарз ваа д̇злабаж̇ж̇од̇ам̣ д̇хаарзяяа, жагкуманд̇о руубаани д̣̇агканд̇ийд̇и; звамзва бход̇аа г̇од̇амзна анзгабарияааязна д̇хаммо багаасид̇о. зсаахам̣ бхаванд̇ам̣ г̇од̇амам̣ саран̣ам̣ г̇ажчаами д̇хамман̃жа бхигкусан̇гхан̃жа. убаасагам̣ мам̣ бхавам̣ г̇од̇амо д̇хаарзд̇у аж̇ж̇ад̇аг̇г̇з баан̣убзд̇ам̣ саран̣ам̣ г̇ад̇а’’нд̇и. чадтам̣.
Evaṃ vutte kuṇḍaliyo paribbājako bhagavantaṃ etadavoca – ‘‘abhikkantaṃ, bho gotama, abhikkantaṃ, bho gotama! Seyyathāpi, bho gotama, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya, cakkhumanto rūpāni dakkhantīti; evameva bhotā gotamena anekapariyāyena dhammo pakāsito. Esāhaṃ bhavantaṃ gotamaṃ saraṇaṃ gacchāmi dhammañca bhikkhusaṅghañca. Upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti. Chaṭṭhaṃ.
Footnotes:
Related texts:
адтагат̇аа • Aṭṭhakathā / суд̇д̇абидага (адтагат̇аа) • Suttapiṭaka (aṭṭhakathā) / сам̣яуд̇д̇анигааяа (адтагат̇аа) • Saṃyuttanikāya (aṭṭhakathā) / 6-7. гун̣д̣алияасуд̇д̇аад̣̇иван̣н̣анаа • 6-7. Kuṇḍaliyasuttādivaṇṇanā
дийгаа • Tīkā / суд̇д̇абидага (дийгаа) • Suttapiṭaka (ṭīkā) / сам̣яуд̇д̇анигааяа (дийгаа) • Saṃyuttanikāya (ṭīkā) / 6-7. гун̣д̣алияасуд̇д̇аад̣̇иван̣н̣анаа • 6-7. Kuṇḍaliyasuttādivaṇṇanā
