| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၇. ကူပင္ဂပဉ္ဟော
7. Kūpaṅgapañho
၇. ‘‘ဘန္တေ နာဂသေန, ‘ကူပသ္သ ဧကံ အင္ဂံ ဂဟေတဗ္ဗ’န္တိ ယံ ဝဒေသိ, ကတမံ တံ ဧကံ အင္ဂံ ဂဟေတဗ္ဗ’’န္တိ? ‘‘ယထာ, မဟာရာဇ, ကူပော ရဇ္ဇုဉ္စ ဝရတ္တဉ္စ လင္ကာရဉ္စ ဓာရေတိ, ဧဝမေဝ ခော, မဟာရာဇ, ယောဂိနာ ယောဂာဝစရေန သတိသမ္ပဇညသမန္နာဂတေန ဘဝိတဗ္ဗံ, အဘိက္ကန္တေ ပဋိက္ကန္တေ အာလောကိတေ ဝိလောကိတေ သမိဉ္ဇိတေ ပသာရိတေ သင္ဃာဋိပတ္တစီဝရဓာရဏေ အသိတေ ပီတေ ခာယိတေ သာယိတေ ဥစ္စာရပသ္သာဝကမ္မေ ဂတေ ဌိတေ နိသိန္နေ သုတ္တေ ဇာဂရိတေ ဘာသိတေ တုဏ္ဟီဘာဝေ သမ္ပဇာနကာရိနာ ဘဝိတဗ္ဗံ။ ဣဒံ, မဟာရာဇ, ကူပသ္သ ဧကံ အင္ဂံ ဂဟေတဗ္ဗံ။ ဘာသိတမ္ပေတံ, မဟာရာဇ, ဘဂဝတာ ဒေဝာတိဒေဝေန ‘သတော, ဘိက္ခဝေ, ဘိက္ခု ဝိဟရေယ္ယ သမ္ပဇာနော, အယံ ဝော အမ္ဟာကံ အနုသာသနီ’’’တိ။
7. ‘‘Bhante nāgasena, ‘kūpassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, kūpo rajjuñca varattañca laṅkārañca dhāreti, evameva kho, mahārāja, yoginā yogāvacarena satisampajaññasamannāgatena bhavitabbaṃ, abhikkante paṭikkante ālokite vilokite samiñjite pasārite saṅghāṭipattacīvaradhāraṇe asite pīte khāyite sāyite uccārapassāvakamme gate ṭhite nisinne sutte jāgarite bhāsite tuṇhībhāve sampajānakārinā bhavitabbaṃ. Idaṃ, mahārāja, kūpassa ekaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena ‘sato, bhikkhave, bhikkhu vihareyya sampajāno, ayaṃ vo amhākaṃ anusāsanī’’’ti.
ကူပင္ဂပဉ္ဟော သတ္တမော။
Kūpaṅgapañho sattamo.
