| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
7. කූපඞ්‌ගපඤ්‌හො
7. Kūpaṅgapañho
7. ‘‘භන්‌තෙ නාගසෙන, ‘කූපස්‌ස එකං අඞ්‌ගං ගහෙතබ්‌බ’න්‌ති යං වදෙසි, කතමං තං එකං අඞ්‌ගං ගහෙතබ්‌බ’’න්‌ති? ‘‘යථා, මහාරාජ, කූපො රජ්‌ජුඤ්‌ච වරත්‌තඤ්‌ච ලඞ්‌කාරඤ්‌ච ධාරෙති, එවමෙව ඛො, මහාරාජ, යොගිනා යොගාවචරෙන සතිසම්‌පජඤ්‌ඤසමන්‌නාගතෙන භවිතබ්‌බං, අභික්‌කන්‌තෙ පටික්‌කන්‌තෙ ආලොකිතෙ විලොකිතෙ සමිඤ්‌ජිතෙ පසාරිතෙ සඞ්‌ඝාටිපත්‌තචීවරධාරණෙ අසිතෙ පීතෙ ඛායිතෙ සායිතෙ උච්‌චාරපස්‌සාවකම්‌මෙ ගතෙ ඨිතෙ නිසින්‌නෙ සුත්‌තෙ ජාගරිතෙ භාසිතෙ තුණ්‌හීභාවෙ සම්‌පජානකාරිනා භවිතබ්‌බං. ඉදං, මහාරාජ, කූපස්‌ස එකං අඞ්‌ගං ගහෙතබ්‌බං. භාසිතම්‌පෙතං, මහාරාජ, භගවතා දෙවාතිදෙවෙන ‘සතො, භික්‌ඛවෙ, භික්‌ඛු විහරෙය්‍ය සම්‌පජානො, අයං වො අම්‌හාකං අනුසාසනී’’’ති.
7. ‘‘Bhante nāgasena, ‘kūpassa ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, kūpo rajjuñca varattañca laṅkārañca dhāreti, evameva kho, mahārāja, yoginā yogāvacarena satisampajaññasamannāgatena bhavitabbaṃ, abhikkante paṭikkante ālokite vilokite samiñjite pasārite saṅghāṭipattacīvaradhāraṇe asite pīte khāyite sāyite uccārapassāvakamme gate ṭhite nisinne sutte jāgarite bhāsite tuṇhībhāve sampajānakārinā bhavitabbaṃ. Idaṃ, mahārāja, kūpassa ekaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena ‘sato, bhikkhave, bhikkhu vihareyya sampajāno, ayaṃ vo amhākaṃ anusāsanī’’’ti.
කූපඞ්‌ගපඤ්‌හො සත්‌තමො.
Kūpaṅgapañho sattamo.
