| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[206] 6. குருங்க³மிக³ஜாதகவண்ணனா
[206] 6. Kuruṅgamigajātakavaṇṇanā
இங்க⁴ வட்டமயங் பாஸந்தி இத³ங் ஸத்தா² வேளுவனே விஹரந்தோ தே³வத³த்தங் ஆரப்³ப⁴ கதே²ஸி. ததா³ ஹி ஸத்தா² ‘‘தே³வத³த்தோ வதா⁴ய பரிஸக்கதீ’’தி ஸுத்வா ‘‘ந, பி⁴க்க²வே, தே³வத³த்தோ இதா³னேவ மய்ஹங் வதா⁴ய பரிஸக்கதி, புப்³பே³பி பரிஸக்கியேவா’’தி வத்வா அதீதங் ஆஹரி.
Iṅgha vaṭṭamayaṃ pāsanti idaṃ satthā veḷuvane viharanto devadattaṃ ārabbha kathesi. Tadā hi satthā ‘‘devadatto vadhāya parisakkatī’’ti sutvā ‘‘na, bhikkhave, devadatto idāneva mayhaṃ vadhāya parisakkati, pubbepi parisakkiyevā’’ti vatvā atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ குருங்க³மிகோ³ ஹுத்வா அரஞ்ஞே ஏகஸ்ஸ ஸரஸ்ஸ அவிதூ³ரே ஏகஸ்மிங் கு³ம்பே³ வாஸங் கப்பேஸி. தஸ்ஸேவ ஸரஸ்ஸ அவிதூ³ரே ஏகஸ்மிங் ருக்க²க்³கே³ ஸதபத்தோ, ஸரஸ்மிங் பன கச்ச²போ வாஸங் கப்பேஸி. ஏவங் தே தயோபி ஸஹாயகா அஞ்ஞமஞ்ஞங் பியஸங்வாஸங் வஸிங்ஸு. அதே²கோ மிக³லுத்³த³கோ அரஞ்ஞே சரந்தோ பானீயதித்தே² போ³தி⁴ஸத்தஸ்ஸ பத³வலஞ்ஜங் தி³ஸ்வா லோஹனிக³ளஸதி³ஸங் வட்டமயங் பாஸங் ஒட்³டெ³த்வா அக³மாஸி. போ³தி⁴ஸத்தோ பானீயங் பாதுங் ஆக³தோ பட²மயாமேயேவ பாஸே ப³ஜ்ஜி²த்வா ப³த்³த⁴ரவங் ரவி. தஸ்ஸ தேன ஸத்³தே³ன ருக்க²க்³க³தோ ஸதபத்தோ உத³கதோ ச கச்ச²போ ஆக³ந்த்வா ‘‘கிங் நு கோ² காதப்³ப³’’ந்தி மந்தயிங்ஸு. அத² ஸதபத்தோ கச்ச²பங் ஆமந்தெத்வா ‘‘ஸம்ம, தவ த³ந்தா அத்தி², த்வங் இமங் பாஸங் சி²ந்த³, அஹங் க³ந்த்வா யதா² ஸோ நாக³ச்ச²தி, ததா² கரிஸ்ஸாமி, ஏவங் அம்ஹேஹி த்³வீஹிபி கதபரக்கமேன ஸஹாயோ நோ ஜீவிதங் லபி⁴ஸ்ஸதீ’’தி இமமத்த²ங் பகாஸெந்தோ பட²மங் கா³த²மாஹ –
Atīte bārāṇasiyaṃ brahmadatte rajjaṃ kārente bodhisatto kuruṅgamigo hutvā araññe ekassa sarassa avidūre ekasmiṃ gumbe vāsaṃ kappesi. Tasseva sarassa avidūre ekasmiṃ rukkhagge satapatto, sarasmiṃ pana kacchapo vāsaṃ kappesi. Evaṃ te tayopi sahāyakā aññamaññaṃ piyasaṃvāsaṃ vasiṃsu. Atheko migaluddako araññe caranto pānīyatitthe bodhisattassa padavalañjaṃ disvā lohanigaḷasadisaṃ vaṭṭamayaṃ pāsaṃ oḍḍetvā agamāsi. Bodhisatto pānīyaṃ pātuṃ āgato paṭhamayāmeyeva pāse bajjhitvā baddharavaṃ ravi. Tassa tena saddena rukkhaggato satapatto udakato ca kacchapo āgantvā ‘‘kiṃ nu kho kātabba’’nti mantayiṃsu. Atha satapatto kacchapaṃ āmantetvā ‘‘samma, tava dantā atthi, tvaṃ imaṃ pāsaṃ chinda, ahaṃ gantvā yathā so nāgacchati, tathā karissāmi, evaṃ amhehi dvīhipi kataparakkamena sahāyo no jīvitaṃ labhissatī’’ti imamatthaṃ pakāsento paṭhamaṃ gāthamāha –
111.
111.
‘‘இங்க⁴ வட்டமயங் பாஸங், சி²ந்த³ த³ந்தேஹி கச்ச²ப;
‘‘Iṅgha vaṭṭamayaṃ pāsaṃ, chinda dantehi kacchapa;
அஹங் ததா² கரிஸ்ஸாமி, யதா² நேஹிதி லுத்³த³கோ’’தி.
Ahaṃ tathā karissāmi, yathā nehiti luddako’’ti.
அத² கச்ச²போ சம்மவரத்தங் கா²தி³துங் ஆரபி⁴, ஸதபத்தோ லுத்³த³கஸ்ஸ வஸனகா³மங் க³தோ அவிதூ³ரே ருக்கே² நிஸீதி³. லுத்³த³கோ பச்சூஸகாலேயேவ ஸத்திங் க³ஹெத்வா நிக்க²மி. ஸகுணோ தஸ்ஸ நிக்க²மனபா⁴வங் ஞத்வா வஸ்ஸித்வா பக்கே² பப்போ²டெத்வா தங் புரிமத்³வாரேன நிக்க²மந்தங் முகே² பஹரி. லுத்³தோ³ ‘‘காளகண்ணினா ஸகுணேனம்ஹி பஹடோ’’தி நிவத்தித்வா தோ²கங் ஸயித்வா புன ஸத்திங் க³ஹெத்வா உட்டா²ஸி. ஸகுணோ ‘‘அயங் பட²மங் புரிமத்³வாரேன நிக்க²ந்தோ இதா³னி பச்சி²மத்³வாரேன நிக்க²மிஸ்ஸதீ’’தி ஞத்வா க³ந்த்வா பச்சி²மகே³ஹே நிஸீதி³. லுத்³தோ³பி ‘‘புரிமத்³வாரேன மே நிக்க²ந்தேன காளகண்ணீ ஸகுணோ தி³ட்டோ², இதா³னி பச்சி²மத்³வாரேன நிக்க²மிஸ்ஸாமீ’’தி பச்சி²மத்³வாரேன நிக்க²மி, ஸகுணோ புன வஸ்ஸித்வா க³ந்த்வா முகே² பஹரி. லுத்³தோ³ ‘‘புனபி காளகண்ணீஸகுணேன பஹடோ, ந தா³னி மே ஏஸ நிக்க²மிதுங் தே³தீ’’தி நிவத்தித்வா யாவ அருணுக்³க³மனா ஸயித்வா அருணுக்³க³மனவேலாய ஸத்திங் க³ஹெத்வா நிக்க²மி. ஸகுணோ வேகே³ன க³ந்த்வா ‘‘லுத்³தோ³ ஆக³ச்ச²தீ’’தி போ³தி⁴ஸத்தஸ்ஸ கதே²ஸி.
Atha kacchapo cammavarattaṃ khādituṃ ārabhi, satapatto luddakassa vasanagāmaṃ gato avidūre rukkhe nisīdi. Luddako paccūsakāleyeva sattiṃ gahetvā nikkhami. Sakuṇo tassa nikkhamanabhāvaṃ ñatvā vassitvā pakkhe papphoṭetvā taṃ purimadvārena nikkhamantaṃ mukhe pahari. Luddo ‘‘kāḷakaṇṇinā sakuṇenamhi pahaṭo’’ti nivattitvā thokaṃ sayitvā puna sattiṃ gahetvā uṭṭhāsi. Sakuṇo ‘‘ayaṃ paṭhamaṃ purimadvārena nikkhanto idāni pacchimadvārena nikkhamissatī’’ti ñatvā gantvā pacchimagehe nisīdi. Luddopi ‘‘purimadvārena me nikkhantena kāḷakaṇṇī sakuṇo diṭṭho, idāni pacchimadvārena nikkhamissāmī’’ti pacchimadvārena nikkhami, sakuṇo puna vassitvā gantvā mukhe pahari. Luddo ‘‘punapi kāḷakaṇṇīsakuṇena pahaṭo, na dāni me esa nikkhamituṃ detī’’ti nivattitvā yāva aruṇuggamanā sayitvā aruṇuggamanavelāya sattiṃ gahetvā nikkhami. Sakuṇo vegena gantvā ‘‘luddo āgacchatī’’ti bodhisattassa kathesi.
தஸ்மிங் க²ணே கச்ச²பேன ஏகமேவ சம்மவத்³த⁴ங் ட²பெத்வா ஸேஸவரத்தா கா²தி³தா ஹொந்தி. த³ந்தா பனஸ்ஸ பதனாகாரப்பத்தா ஜாதா, முக²தோ லோஹிதங் பக்³க⁴ரதி. போ³தி⁴ஸத்தோ லுத்³த³புத்தங் ஸத்திங் க³ஹெத்வா அஸனிவேகே³ன ஆக³ச்ச²ந்தங் தி³ஸ்வா தங் வத்³த⁴ங் சி²ந்தி³த்வா வனங் பாவிஸி, ஸகுணோ ருக்க²க்³கே³ நிஸீதி³, கச்ச²போ பன து³ப்³ப³லத்தா தத்தே²வ நிபஜ்ஜி. லுத்³தோ³ கச்ச²பங் க³ஹெத்வா பஸிப்³ப³கே பக்கி²பித்வா ஏகஸ்மிங் கா²ணுகே லக்³கே³ஸி. போ³தி⁴ஸத்தோ நிவத்தித்வா ஓலோகெந்தோ கச்ச²பஸ்ஸ க³ஹிதபா⁴வங் ஞத்வா ‘‘ஸஹாயஸ்ஸ ஜீவிததா³னங் த³ஸ்ஸாமீ’’தி து³ப்³ப³லோ விய ஹுத்வா லுத்³த³ஸ்ஸ அத்தானங் த³ஸ்ஸேஸி. ஸோ ‘‘து³ப்³ப³லோ ஏஸ ப⁴விஸ்ஸதி, மாரெஸ்ஸாமி ந’’ந்தி ஸத்திங் ஆதா³ய அனுப³ந்தி⁴. போ³தி⁴ஸத்தோ நாதிதூ³ரே நாச்சாஸன்னே க³ச்ச²ந்தோ தங் ஆதா³ய அரஞ்ஞங் பாவிஸி, தூ³ரங் க³தபா⁴வங் ஞத்வா பத³ங் வஞ்செத்வா அஞ்ஞேன மக்³கே³ன வாதவேகே³ன க³ந்த்வா ஸிங்கே³ன பஸிப்³ப³கங் உக்கி²பித்வா பூ⁴மியங் பாதெத்வா பா²லெத்வா கச்ச²பங் நீஹரி. ஸதபத்தோபி ருக்கா² ஓதரி. போ³தி⁴ஸத்தோ த்³வின்னம்பி ஓவாத³ங் த³த³மானோ ‘‘அஹங் தும்ஹே நிஸ்ஸாய ஜீவிதங் லபி⁴ங், தும்ஹேஹி ஸஹாயகஸ்ஸ கத்தப்³ப³ங் மய்ஹங் கதங், இதா³னி லுத்³தோ³ ஆக³ந்த்வா தும்ஹே க³ண்ஹெய்ய, தஸ்மா, ஸம்ம ஸதபத்த, த்வங் அத்தனோ புத்தகே க³ஹெத்வா அஞ்ஞத்த² யாஹி, த்வம்பி, ஸம்ம கச்ச²ப, உத³கங் பவிஸாஹீ’’தி ஆஹ. தே ததா² அகங்ஸு.
Tasmiṃ khaṇe kacchapena ekameva cammavaddhaṃ ṭhapetvā sesavarattā khāditā honti. Dantā panassa patanākārappattā jātā, mukhato lohitaṃ paggharati. Bodhisatto luddaputtaṃ sattiṃ gahetvā asanivegena āgacchantaṃ disvā taṃ vaddhaṃ chinditvā vanaṃ pāvisi, sakuṇo rukkhagge nisīdi, kacchapo pana dubbalattā tattheva nipajji. Luddo kacchapaṃ gahetvā pasibbake pakkhipitvā ekasmiṃ khāṇuke laggesi. Bodhisatto nivattitvā olokento kacchapassa gahitabhāvaṃ ñatvā ‘‘sahāyassa jīvitadānaṃ dassāmī’’ti dubbalo viya hutvā luddassa attānaṃ dassesi. So ‘‘dubbalo esa bhavissati, māressāmi na’’nti sattiṃ ādāya anubandhi. Bodhisatto nātidūre nāccāsanne gacchanto taṃ ādāya araññaṃ pāvisi, dūraṃ gatabhāvaṃ ñatvā padaṃ vañcetvā aññena maggena vātavegena gantvā siṅgena pasibbakaṃ ukkhipitvā bhūmiyaṃ pātetvā phāletvā kacchapaṃ nīhari. Satapattopi rukkhā otari. Bodhisatto dvinnampi ovādaṃ dadamāno ‘‘ahaṃ tumhe nissāya jīvitaṃ labhiṃ, tumhehi sahāyakassa kattabbaṃ mayhaṃ kataṃ, idāni luddo āgantvā tumhe gaṇheyya, tasmā, samma satapatta, tvaṃ attano puttake gahetvā aññattha yāhi, tvampi, samma kacchapa, udakaṃ pavisāhī’’ti āha. Te tathā akaṃsu.
ஸத்தா² அபி⁴ஸம்பு³த்³தோ⁴ ஹுத்வா து³தியங் கா³த²மாஹ –
Satthā abhisambuddho hutvā dutiyaṃ gāthamāha –
112.
112.
‘‘கச்ச²போ பாவிஸீ வாரிங், குருங்கோ³ பாவிஸீ வனங்;
‘‘Kacchapo pāvisī vāriṃ, kuruṅgo pāvisī vanaṃ;
ஸதபத்தோ து³மக்³க³ம்ஹா, தூ³ரே புத்தே அபானயீ’’தி.
Satapatto dumaggamhā, dūre putte apānayī’’ti.
தத்த² அபானயீதி ஆனயி, க³ஹெத்வா அக³மாஸீதி அத்தோ²;
Tattha apānayīti ānayi, gahetvā agamāsīti attho;
லுத்³தோ³பி தங் டா²னங் ஆக³ந்த்வா கஞ்சி அபஸ்ஸித்வா சி²ன்னபஸிப்³ப³கங் க³ஹெத்வா தோ³மனஸ்ஸப்பத்தோ அத்தனோ கே³ஹங் அக³மாஸி. தே தயோபி ஸஹாயா யாவஜீவங் விஸ்ஸாஸங் அச்சி²ந்தி³த்வா யதா²கம்மங் க³தா.
Luddopi taṃ ṭhānaṃ āgantvā kañci apassitvā chinnapasibbakaṃ gahetvā domanassappatto attano gehaṃ agamāsi. Te tayopi sahāyā yāvajīvaṃ vissāsaṃ acchinditvā yathākammaṃ gatā.
ஸத்தா² இமங் த⁴ம்மதே³ஸனங் ஆஹரித்வா ஜாதகங் ஸமோதா⁴னேஸி – ‘‘ததா³ லுத்³த³கோ தே³வத³த்தோ அஹோஸி, ஸதபத்தோ ஸாரிபுத்தோ, கச்ச²போ மொக்³க³ல்லானோ, குருங்க³மிகோ³ பன அஹமேவ அஹோஸி’’ந்தி.
Satthā imaṃ dhammadesanaṃ āharitvā jātakaṃ samodhānesi – ‘‘tadā luddako devadatto ahosi, satapatto sāriputto, kacchapo moggallāno, kuruṅgamigo pana ahameva ahosi’’nti.
குருங்க³மிக³ஜாதகவண்ணனா ச²ட்டா².
Kuruṅgamigajātakavaṇṇanā chaṭṭhā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 206. குருங்க³மிக³ஜாதகங் • 206. Kuruṅgamigajātakaṃ
