| Library / Tipiṭaka / д̇ибидага • Tipiṭaka / жарияаабидага-адтагат̇аа • Cariyāpiṭaka-aṭṭhakathā |
3. гурурааж̇ажарияааван̣н̣анаа
3. Kururājacariyāvaṇṇanā
20.
20.
д̇ад̇ияз инд̣̇абад̇т̇з буруд̇д̇амзд̇и инд̣̇абад̇т̇анаамагз гурурадтасса бураварз уд̇д̇аманаг̇арз. рааж̇аад̇и д̇хаммзна самзна жад̇уухи сан̇г̇ахавад̇т̇уухи барисам̣ ран̃ж̇зд̇ийд̇и рааж̇аа. гусалз д̣̇асахубааг̇ад̇од̇и гусалзхи д̣̇асахи саманнааг̇ад̇о, д̣̇аанаад̣̇ийхи д̣̇асахи бун̃н̃агирияавад̇т̇уухи, д̣̇асахи гусалагаммабат̇зхи ваа яуд̇д̇од̇и ад̇т̇о.
Tatiye indapatthe puruttameti indapatthanāmake kururaṭṭhassa puravare uttamanagare. Rājāti dhammena samena catūhi saṅgahavatthūhi parisaṃ rañjetīti rājā. Kusale dasahupāgatoti kusalehi dasahi samannāgato, dānādīhi dasahi puññakiriyavatthūhi, dasahi kusalakammapathehi vā yuttoti attho.
21. галин̇г̇арадтависаяаад̇и галин̇г̇арадтасан̇каад̇ависаяаа. б̣раахман̣аа убаг̇ан̃чу манд̇и галин̇г̇арааж̇зна уяяож̇ид̇аа адта б̣раахман̣аа мам̣ убасан̇гамим̣су. убасан̇гамид̇ваа жа бана ааяаажум̣ мам̣ хад̇т̇инааг̇анд̇и хад̇т̇ибхууд̇ам̣ махаанааг̇ам̣ мам̣ ааяаажим̣су. д̇хан̃н̃анд̇и д̇ханааяид̇аб̣б̣асирисобхаг̇г̇аббад̇д̇ам̣ лагкан̣асамбаннам̣. ман̇г̇аласаммад̇анд̇и д̇ааяаязва лагкан̣асамбад̇д̇ияаа ман̇г̇алам̣ абхивуд̣дхигааран̣анд̇и абхисаммад̇ам̣ ж̇анзхи.
21.Kaliṅgaraṭṭhavisayāti kaliṅgaraṭṭhasaṅkhātavisayā. Brāhmaṇā upagañchu manti kaliṅgarājena uyyojitā aṭṭha brāhmaṇā maṃ upasaṅkamiṃsu. Upasaṅkamitvā ca pana āyācuṃ maṃ hatthināganti hatthibhūtaṃ mahānāgaṃ maṃ āyāciṃsu. Dhaññanti dhanāyitabbasirisobhaggappattaṃ lakkhaṇasampannaṃ. Maṅgalasammatanti tāyayeva lakkhaṇasampattiyā maṅgalaṃ abhivuḍḍhikāraṇanti abhisammataṃ janehi.
22. авудтигод̇и вассарахид̇о. д̣̇уб̣бхигкод̇и д̣̇уллабхабхож̇ано. чаад̇аго махаад̇и махад̇ий ж̇игхажчааб̣аад̇хаа вад̇д̇ад̇ийд̇и ад̇т̇о. д̣̇ад̣̇аахийд̇и д̣̇зхи. нийланд̇и нийлаван̣н̣ам̣. ан̃ж̇анасавхаяанд̇и ан̃ж̇анасад̣̇д̣̇зна авхаад̇аб̣б̣ам̣, ан̃ж̇ананаамаганд̇и ад̇т̇о. ид̣̇ам̣ вуд̇д̇ам̣ ход̇и – амхаагам̣ галин̇г̇арадтам̣ авудтигам̣, д̇зна ид̣̇аани махаад̣̇уб̣бхигкам̣ д̇ад̇т̇а маханд̇ам̣ чаад̇агабхаяам̣ уббаннам̣, д̇асса вуубасамад̇т̇ааяа имам̣ ан̃ж̇анаг̇ирисан̇гаасам̣ д̇уяхам̣ ан̃ж̇ананаамагам̣ ман̇г̇алахад̇т̇им̣ д̣̇зхи, имасмин̃хи д̇ад̇т̇а нийд̇з д̣̇зво вассиссад̇и, д̇зна д̇ам̣ саб̣б̣абхаяам̣ вуубасаммиссад̇ийд̇и. д̇ад̇рааяам̣ анубуб̣б̣игат̇аа –
22.Avuṭṭhikoti vassarahito. Dubbhikkhoti dullabhabhojano. Chātako mahāti mahatī jighacchābādhā vattatīti attho. Dadāhīti dehi. Nīlanti nīlavaṇṇaṃ. Añjanasavhayanti añjanasaddena avhātabbaṃ, añjananāmakanti attho. Idaṃ vuttaṃ hoti – amhākaṃ kaliṅgaraṭṭhaṃ avuṭṭhikaṃ, tena idāni mahādubbhikkhaṃ tattha mahantaṃ chātakabhayaṃ uppannaṃ, tassa vūpasamatthāya imaṃ añjanagirisaṅkāsaṃ tuyhaṃ añjananāmakaṃ maṅgalahatthiṃ dehi, imasmiñhi tattha nīte devo vassissati, tena taṃ sabbabhayaṃ vūpasammissatīti. Tatrāyaṃ anupubbikathā –
ад̇ийд̇з гурурадтз инд̣̇абад̇т̇анаг̇арз б̣од̇хисад̇д̇о гурурааж̇асса аг̇г̇амахзсияаа гужчимхи бадисанд̇хим̣ г̇ахзд̇ваа анубуб̣б̣зна вин̃н̃уд̇ам̣ бад̇д̇о, д̇аггасилам̣ г̇анд̇ваа яог̇авихид̇аани сиббааяад̇анаани виж̇ж̇аадтаанаани жа уг̇г̇ахзд̇ваа бажжааг̇ад̇о бид̇араа убараж̇ж̇з табид̇о, абарабхааг̇з бид̇у ажжаязна раж̇ж̇ам̣ бад̇ваа д̣̇аса рааж̇ад̇хаммз агобзнд̇о д̇хаммзна раж̇ж̇ам̣ гаарзси д̇ханан̃ж̇аяо наама наамзна. со жад̇уусу наг̇арад̣̇ваарзсу наг̇арамаж̇жхз нивзсанад̣̇ваарзд̇и ча д̣̇аанасаалааяо гаарзд̇ваа д̣̇звасигам̣ часад̇асахассам̣ д̇ханам̣ виссаж̇ж̇знд̇о сагалаж̇амб̣уд̣̇ийбам̣ уннан̇г̇алам̣ гад̇ваа д̣̇аанам̣ ад̣̇ааси. д̇асса д̣̇аанаж̇жхаасаяад̇аа д̣̇аанаабхирад̇и сагалаж̇амб̣уд̣̇ийбам̣ бад̇т̇ари.
Atīte kururaṭṭhe indapatthanagare bodhisatto kururājassa aggamahesiyā kucchimhi paṭisandhiṃ gahetvā anupubbena viññutaṃ patto, takkasilaṃ gantvā yogavihitāni sippāyatanāni vijjāṭṭhānāni ca uggahetvā paccāgato pitarā uparajje ṭhapito, aparabhāge pitu accayena rajjaṃ patvā dasa rājadhamme akopento dhammena rajjaṃ kāresi dhanañjayo nāma nāmena. So catūsu nagaradvāresu nagaramajjhe nivesanadvāreti cha dānasālāyo kāretvā devasikaṃ chasatasahassaṃ dhanaṃ vissajjento sakalajambudīpaṃ unnaṅgalaṃ katvā dānaṃ adāsi. Tassa dānajjhāsayatā dānābhirati sakalajambudīpaṃ patthari.
д̇асмим̣ гаалз галин̇г̇арадтз д̣̇уб̣бхигкабхаяам̣ чаад̇агабхаяам̣ рог̇абхаяанд̇и д̇ийн̣и бхаяаани уббаж̇ж̇им̣су. сагаларадтаваасино д̣̇анд̇абурам̣ г̇анд̇ваа рааж̇абхаванад̣̇ваарз уггудтимагам̣су ‘‘д̣̇звам̣ вассаабзхи д̣̇зваа’’д̇и. рааж̇аа д̇ам̣ суд̇ваа ‘‘гим̣гааран̣аа зд̇з вираванд̇ий’’д̇и амажжз бужчи. амажжаа ран̃н̃о д̇амад̇т̇ам̣ аарожзсум̣. рааж̇аа бораан̣агарааж̇аано д̣̇звз авассанд̇з гим̣ гаронд̇ийд̇и. ‘‘д̣̇зво вассад̇уу’’д̇и д̣̇аанам̣ д̣̇ад̇ваа убосат̇ам̣ ад̇хидтааяа самаад̣̇иннасийлаа сириг̇аб̣бхам̣ бависид̇ваа д̣̇аб̣б̣асант̇арз сад̇д̇аахам̣ нибаж̇ж̇анд̇ийд̇и. д̇ам̣ суд̇ваа д̇ат̇аа агааси. д̣̇зво на васси, звам̣ рааж̇аа ахам̣ маяаа гад̇д̇аб̣б̣агижжам̣ агаасим̣, д̣̇зво на вассад̇и, гинд̇и гаромаад̇и. д̣̇зва, инд̣̇абад̇т̇анаг̇арз д̇ханан̃ж̇аяасса наама гурурааж̇асса ман̇г̇алахад̇т̇имхи аанийд̇з д̣̇зво вассиссад̇ийд̇и . со рааж̇аа б̣алавааханасамбанно д̣̇уббасахо, гат̇амасса хад̇т̇им̣ аанзссаамаад̇и. махаарааж̇а, д̇зна сад̣̇д̇хим̣ яуд̣̇д̇хагижжам̣ над̇т̇и, д̣̇аанаж̇жхаасаяо со рааж̇аа д̣̇аанаабхирад̇о яаажид̇о самаано алан̇гад̇асийсамби чинд̣̇ид̇ваа басаад̣̇асамбаннаани агкийниби уббаадзд̇ваа сагалараж̇ж̇амби нияяаад̇зд̇ваа д̣̇ад̣̇зяяа, хад̇т̇имхи вад̇д̇аб̣б̣амзва над̇т̇и, авассам̣ яаажид̇о самаано д̣̇ассад̇ийд̇и. гз бана яаажид̇ум̣ самад̇т̇аад̇и? б̣раахман̣аа, махаарааж̇аад̇и. рааж̇аа адта б̣раахман̣з баггосаабзд̇ваа саггаарасаммаанам̣ гад̇ваа бариб̣б̣аяам̣ д̣̇ад̇ваа хад̇т̇ияаажанад̇т̇ам̣ бзсзси. д̇з саб̣б̣ад̇т̇а згарад̇д̇иваасзна д̇урид̇аг̇аманам̣ г̇анд̇ваа гад̇ибаахам̣ наг̇арад̣̇ваарз д̣̇аанасаалаасу бхун̃ж̇анд̇аа сарийрам̣ санд̇аббзд̇ваа ран̃н̃о д̣̇аанаг̇г̇ам̣ ааг̇аманабат̇з гаалам̣ ааг̇амаяамаанаа баажийнад̣̇ваарз адтам̣су.
Tasmiṃ kāle kaliṅgaraṭṭhe dubbhikkhabhayaṃ chātakabhayaṃ rogabhayanti tīṇi bhayāni uppajjiṃsu. Sakalaraṭṭhavāsino dantapuraṃ gantvā rājabhavanadvāre ukkuṭṭhimakaṃsu ‘‘devaṃ vassāpehi devā’’ti. Rājā taṃ sutvā ‘‘kiṃkāraṇā ete viravantī’’ti amacce pucchi. Amaccā rañño tamatthaṃ ārocesuṃ. Rājā porāṇakarājāno deve avassante kiṃ karontīti. ‘‘Devo vassatū’’ti dānaṃ datvā uposathaṃ adhiṭṭhāya samādinnasīlā sirigabbhaṃ pavisitvā dabbasanthare sattāhaṃ nipajjantīti. Taṃ sutvā tathā akāsi. Devo na vassi, evaṃ rājā ahaṃ mayā kattabbakiccaṃ akāsiṃ, devo na vassati, kinti karomāti. Deva, indapatthanagare dhanañjayassa nāma kururājassa maṅgalahatthimhi ānīte devo vassissatīti . So rājā balavāhanasampanno duppasaho, kathamassa hatthiṃ ānessāmāti. Mahārāja, tena saddhiṃ yuddhakiccaṃ natthi, dānajjhāsayo so rājā dānābhirato yācito samāno alaṅkatasīsampi chinditvā pasādasampannāni akkhīnipi uppāṭetvā sakalarajjampi niyyātetvā dadeyya, hatthimhi vattabbameva natthi, avassaṃ yācito samāno dassatīti. Ke pana yācituṃ samatthāti? Brāhmaṇā, mahārājāti. Rājā aṭṭha brāhmaṇe pakkosāpetvā sakkārasammānaṃ katvā paribbayaṃ datvā hatthiyācanatthaṃ pesesi. Te sabbattha ekarattivāsena turitagamanaṃ gantvā katipāhaṃ nagaradvāre dānasālāsu bhuñjantā sarīraṃ santappetvā rañño dānaggaṃ āgamanapathe kālaṃ āgamayamānā pācīnadvāre aṭṭhaṃsu.
б̣од̇хисад̇д̇оби баад̇ова нхаад̇аанулид̇д̇о саб̣б̣аалан̇гаараббадиман̣д̣ид̇о алан̇гад̇аваравааран̣аканд̇хаг̇ад̇о маханд̇зна рааж̇аанубхаавзна д̣̇аанасаалам̣ г̇анд̇ваа од̇арид̇ваа сад̇д̇адтаж̇анаанам̣ сахад̇т̇зна д̣̇аанам̣ д̣̇ад̇ваа ‘‘иминаава нийхаарзна д̣̇зт̇аа’’д̇и вад̇ваа хад̇т̇им̣ абхирухид̇ваа д̣̇агкин̣ад̣̇ваарам̣ аг̇амааси. б̣раахман̣аа баажийнад̣̇ваарз аарагкасса б̣алавад̇ааяа огаасам̣ алабхид̇ваа д̣̇агкин̣ад̣̇ваарам̣ г̇анд̇ваа рааж̇аанам̣ ааг̇ажчанд̇ам̣ уллогаяамаанаа д̣̇ваарад̇о наад̇ид̣̇уурз уннад̇адтаанз тид̇аа самбад̇д̇ам̣ рааж̇аанам̣ хад̇т̇з угкибид̇ваа ж̇аяаабзсум̣. рааж̇аа важ̇иран̇гусзна вааран̣ам̣ нивад̇д̇зд̇ваа д̇зсам̣ санд̇игам̣ г̇анд̇ваа д̇з б̣раахман̣з ‘‘гим̣ ижчат̇аа’’д̇и бужчи. б̣раахман̣аа ‘‘галин̇г̇арадтам̣ д̣̇уб̣бхигкабхаязна чаад̇агабхаязна рог̇абхаязна жа убад̣̇д̣̇уд̇ам̣. со убад̣̇д̣̇аво имасмим̣ д̇ава ман̇г̇алахад̇т̇имхи нийд̇з вуубасаммиссад̇и. д̇асмаа имам̣ ан̃ж̇анаван̣н̣ам̣ нааг̇ам̣ амхаагам̣ д̣̇зхий’’д̇и аахам̣су. д̇амад̇т̇ам̣ багаасзнд̇о сад̇т̇аа ааха ‘‘галин̇г̇арадтависаяаа…бз… ан̃ж̇анасавхаяа’’нд̇и. д̇ассад̇т̇о вуд̇д̇о зва.
Bodhisattopi pātova nhātānulitto sabbālaṅkārappaṭimaṇḍito alaṅkatavaravāraṇakhandhagato mahantena rājānubhāvena dānasālaṃ gantvā otaritvā sattaṭṭhajanānaṃ sahatthena dānaṃ datvā ‘‘imināva nīhārena dethā’’ti vatvā hatthiṃ abhiruhitvā dakkhiṇadvāraṃ agamāsi. Brāhmaṇā pācīnadvāre ārakkhassa balavatāya okāsaṃ alabhitvā dakkhiṇadvāraṃ gantvā rājānaṃ āgacchantaṃ ullokayamānā dvārato nātidūre unnataṭṭhāne ṭhitā sampattaṃ rājānaṃ hatthe ukkhipitvā jayāpesuṃ. Rājā vajiraṅkusena vāraṇaṃ nivattetvā tesaṃ santikaṃ gantvā te brāhmaṇe ‘‘kiṃ icchathā’’ti pucchi. Brāhmaṇā ‘‘kaliṅgaraṭṭhaṃ dubbhikkhabhayena chātakabhayena rogabhayena ca upaddutaṃ. So upaddavo imasmiṃ tava maṅgalahatthimhi nīte vūpasammissati. Tasmā imaṃ añjanavaṇṇaṃ nāgaṃ amhākaṃ dehī’’ti āhaṃsu. Tamatthaṃ pakāsento satthā āha ‘‘kaliṅgaraṭṭhavisayā…pe… añjanasavhaya’’nti. Tassattho vutto eva.
ат̇а б̣од̇хисад̇д̇о ‘‘на мзд̇ам̣ бад̇ируубам̣, яам̣ мз яаажагаанам̣ манорат̇авигхаад̇о сияаа, маяхан̃жа самаад̣̇аанабхзд̣̇о сияаа’’д̇и хад̇т̇игканд̇хад̇о од̇арид̇ваа ‘‘сажз аналан̇гад̇адтаанам̣ ад̇т̇и, алан̇гарид̇ваа д̣̇ассаамий’’д̇и саманд̇ад̇о ологзд̇ваа аналан̇гад̇адтаанам̣ ад̣̇исваа сон̣д̣ааяа нам̣ г̇ахзд̇ваа б̣раахман̣аанам̣ хад̇т̇зсу табзд̇ваа рад̇анабхин̇г̇аарзна бубпаг̇анд̇хаваасид̇ам̣ уд̣̇агам̣ баад̇зд̇ваа ад̣̇ааси. д̇зна вуд̇д̇ам̣ –
Atha bodhisatto ‘‘na metaṃ patirūpaṃ, yaṃ me yācakānaṃ manorathavighāto siyā, mayhañca samādānabhedo siyā’’ti hatthikkhandhato otaritvā ‘‘sace analaṅkataṭṭhānaṃ atthi, alaṅkaritvā dassāmī’’ti samantato oloketvā analaṅkataṭṭhānaṃ adisvā soṇḍāya naṃ gahetvā brāhmaṇānaṃ hatthesu ṭhapetvā ratanabhiṅgārena pupphagandhavāsitaṃ udakaṃ pātetvā adāsi. Tena vuttaṃ –
23.
23.
‘‘на мз яаажагамануббад̇д̇з, бадигкзбо анужчаво;
‘‘Na me yācakamanuppatte, paṭikkhepo anucchavo;
маа мз бхиж̇ж̇и самаад̣̇аанам̣, д̣̇ассаами вибулам̣ г̇аж̇ам̣.
Mā me bhijji samādānaṃ, dassāmi vipulaṃ gajaṃ.
24.
24.
‘‘нааг̇ам̣ г̇ахзд̇ваа сон̣д̣ааяа, бхин̇г̇аарз рад̇анаамаяз;
‘‘Nāgaṃ gahetvā soṇḍāya, bhiṅgāre ratanāmaye;
ж̇алам̣ хад̇т̇з аагирид̇ваа, б̣раахман̣аанам̣ ад̣̇ам̣ г̇аж̇а’’нд̇и.
Jalaṃ hatthe ākiritvā, brāhmaṇānaṃ adaṃ gaja’’nti.
д̇ад̇т̇а яаажагамануббад̇д̇зд̇и яаажагз ануббад̇д̇з. анужчавод̇и анужчавиго бад̇ируубо. маа мз бхиж̇ж̇и самаад̣̇аананд̇и саб̣б̣ан̃н̃уд̇ан̃н̃аан̣ад̇т̇ааяа саб̣б̣асса яаажагасса саб̣б̣ам̣ анаваж̇ж̇ам̣ ижчид̇ам̣ д̣̇ад̣̇анд̇о д̣̇аанабаарамим̣ буурзссаамийд̇и яам̣ маяхам̣ самаад̣̇аанам̣, д̇ам̣ маа бхиж̇ж̇и. д̇асмаа д̣̇ассаами вибулам̣ г̇аж̇анд̇и маханд̇ам̣ имам̣ ман̇г̇алахад̇т̇им̣ д̣̇ассаамийд̇и. ад̣̇анд̇и ад̣̇аасим̣.
Tattha yācakamanuppatteti yācake anuppatte. Anucchavoti anucchaviko patirūpo. Mā me bhijji samādānanti sabbaññutaññāṇatthāya sabbassa yācakassa sabbaṃ anavajjaṃ icchitaṃ dadanto dānapāramiṃ pūressāmīti yaṃ mayhaṃ samādānaṃ, taṃ mā bhijji. Tasmā dassāmi vipulaṃ gajanti mahantaṃ imaṃ maṅgalahatthiṃ dassāmīti. Adanti adāsiṃ.
25.
25.
д̇асмим̣ бана хад̇т̇имхи д̣̇иннз амажжаа б̣од̇хисад̇д̇ам̣ зд̇ад̣̇авожум̣ – ‘‘гасмаа, махаарааж̇а, ман̇г̇алахад̇т̇им̣ д̣̇ад̣̇ад̇т̇а, нану ан̃н̃о хад̇т̇ий д̣̇аад̇аб̣б̣о, ран̃н̃аа наама зваруубо обаваяхо ман̇г̇алахад̇т̇ий иссарияам̣ абхивиж̇аяан̃жа ааган̇канд̇зна на д̣̇аад̇аб̣б̣о’’д̇и . махаасад̇д̇о яам̣ мам̣ яаажагаа яаажанд̇и, д̇ад̣̇зва маяаа д̣̇аад̇аб̣б̣ам̣, сажз бана мам̣ раж̇ж̇ам̣ яаажзяяум̣, раж̇ж̇амби д̇зсам̣ д̣̇ад̣̇зяяам̣, маяхам̣ раж̇ж̇ад̇оби ж̇ийвид̇ад̇оби саб̣б̣ан̃н̃уд̇ан̃н̃аан̣амзва бияад̇арам̣, д̇асмаа д̇ам̣ хад̇т̇им̣ ад̣̇аасинд̇и ааха. д̇зна вуд̇д̇ам̣ ‘‘д̇асса нааг̇з бад̣̇иннамхий’’д̇иаад̣̇и. д̇ад̇т̇а д̇ассаад̇и д̇асса д̇зна, д̇асмим̣ нааг̇з хад̇т̇имхи д̣̇иннз.
Tasmiṃ pana hatthimhi dinne amaccā bodhisattaṃ etadavocuṃ – ‘‘kasmā, mahārāja, maṅgalahatthiṃ dadattha, nanu añño hatthī dātabbo, raññā nāma evarūpo opavayho maṅgalahatthī issariyaṃ abhivijayañca ākaṅkhantena na dātabbo’’ti . Mahāsatto yaṃ maṃ yācakā yācanti, tadeva mayā dātabbaṃ, sace pana maṃ rajjaṃ yāceyyuṃ, rajjampi tesaṃ dadeyyaṃ, mayhaṃ rajjatopi jīvitatopi sabbaññutaññāṇameva piyataraṃ, tasmā taṃ hatthiṃ adāsinti āha. Tena vuttaṃ ‘‘tassa nāge padinnamhī’’tiādi. Tattha tassāti tassa tena, tasmiṃ nāge hatthimhi dinne.
26. ман̇г̇аласамбаннанд̇и ман̇г̇алаг̇ун̣зхи саманнааг̇ад̇ам̣. сан̇г̇аамавиж̇аяуд̇д̇аманд̇и сан̇г̇аамавиж̇аяаа уд̇д̇амам̣, сан̇г̇аамавиж̇аяз ваа уд̇д̇амам̣ бад̇хаанам̣ баварам̣ нааг̇ам̣. гим̣ д̇з раж̇ж̇ам̣ гариссад̇ийд̇и д̇асмим̣ нааг̇з абаг̇ад̇з д̇ава раж̇ж̇ам̣ гим̣ гариссад̇и, раж̇ж̇агижжам̣ на гариссад̇и, раж̇ж̇амби абаг̇ад̇амзваад̇и д̣̇ассзд̇и.
26.Maṅgalasampannanti maṅgalaguṇehi samannāgataṃ. Saṅgāmavijayuttamanti saṅgāmavijayā uttamaṃ, saṅgāmavijaye vā uttamaṃ padhānaṃ pavaraṃ nāgaṃ. Kiṃ te rajjaṃkarissatīti tasmiṃ nāge apagate tava rajjaṃ kiṃ karissati, rajjakiccaṃ na karissati, rajjampi apagatamevāti dasseti.
27. раж̇ж̇амби мз д̣̇ад̣̇з саб̣б̣анд̇и д̇идтад̇у нааг̇о д̇иражчаанаг̇ад̇о, ид̣̇ам̣ мз саб̣б̣ам̣ гурурадтамби яаажагаанам̣ д̣̇ад̣̇зяяам̣. сарийрам̣ д̣̇аж̇ж̇амад̇д̇анод̇и раж̇ж̇зби ваа гим̣ вад̇д̇аб̣б̣ам̣, ад̇д̇ано сарийрамби яаажагаанам̣ д̣̇ад̣̇зяяам̣, саб̣б̣оби хи мз аж̇жхад̇д̇игаб̣аахиро бариг̇г̇ахо логахид̇ад̇т̇амзва маяаа барижжад̇д̇о. яасмаа саб̣б̣ан̃н̃уд̇ам̣ бияам̣ маяхам̣ саб̣б̣ан̃н̃уд̇аа жа д̣̇аанабаарамим̣ аад̣̇им̣ гад̇ваа саб̣б̣абаарамияо абуурзнд̇зна на саггаа лад̣̇д̇хум̣, д̇асмаа нааг̇ам̣ ад̣̇аасим̣ аханд̇и д̣̇ассзд̇и.
27.Rajjampi me dade sabbanti tiṭṭhatu nāgo tiracchānagato, idaṃ me sabbaṃ kururaṭṭhampi yācakānaṃ dadeyyaṃ. Sarīraṃ dajjamattanoti rajjepi vā kiṃ vattabbaṃ, attano sarīrampi yācakānaṃ dadeyyaṃ, sabbopi hi me ajjhattikabāhiro pariggaho lokahitatthameva mayā pariccatto. Yasmā sabbaññutaṃ piyaṃ mayhaṃ sabbaññutā ca dānapāramiṃ ādiṃ katvā sabbapāramiyo apūrentena na sakkā laddhuṃ, tasmā nāgaṃ adāsiṃ ahanti dasseti.
звамби д̇асмим̣ нааг̇з аанийд̇з галин̇г̇арадтз д̣̇зво на вассад̇зва. галин̇г̇арааж̇аа ‘‘ид̣̇ааниби на вассад̇и, гим̣ ну ко гааран̣а’’нд̇и бужчид̇ваа ‘‘гурурааж̇аа г̇аруд̇хаммз рагкад̇и, д̇знасса радтз анвад̣̇д̇хамаасам̣ ануд̣̇асаахам̣ д̣̇зво вассад̇и, ран̃н̃о г̇ун̣аанубхааво зса, на имасса д̇иражчаанаг̇ад̇ассаа’’д̇и ж̇аанид̇ваа ‘‘маяамби г̇аруд̇хаммз рагкиссаама, г̇ажчат̇а д̇ханан̃жаяагораб̣яасса санд̇игз д̇з суван̣н̣абаддз ликаабзд̇ваа аанзт̇аа’’д̇и амажжз бзсзси. г̇аруд̇хаммаа вужжанд̇и бан̃жа сийлаани, д̇аани б̣од̇хисад̇д̇о субарисуд̣̇д̇хаани гад̇ваа рагкад̇и, яат̇аа жа б̣од̇хисад̇д̇о. звамасса маад̇аа аг̇г̇амахзсий, ганидтабхаад̇аа убарааж̇аа, бурохид̇о б̣раахман̣о, раж̇ж̇уг̇г̇аахаго амажжо, саарат̇и сздти, д̣̇он̣амаабаго д̣̇оваариго, наг̇арасобхиний ван̣н̣ад̣̇аасийд̇и. д̇зна вуд̇д̇ам̣ –
Evampi tasmiṃ nāge ānīte kaliṅgaraṭṭhe devo na vassateva. Kaliṅgarājā ‘‘idānipi na vassati, kiṃ nu kho kāraṇa’’nti pucchitvā ‘‘kururājā garudhamme rakkhati, tenassa raṭṭhe anvaddhamāsaṃ anudasāhaṃ devo vassati, rañño guṇānubhāvo esa, na imassa tiracchānagatassā’’ti jānitvā ‘‘mayampi garudhamme rakkhissāma, gacchatha dhanañcayakorabyassa santike te suvaṇṇapaṭṭe likhāpetvā ānethā’’ti amacce pesesi. Garudhammā vuccanti pañca sīlāni, tāni bodhisatto suparisuddhāni katvā rakkhati, yathā ca bodhisatto. Evamassa mātā aggamahesī, kaniṭṭhabhātā uparājā, purohito brāhmaṇo, rajjuggāhako amacco, sārathi seṭṭhi, doṇamāpako dovāriko, nagarasobhinī vaṇṇadāsīti. Tena vuttaṃ –
‘‘рааж̇аа маад̇аа махзсий жа, убарааж̇аа бурохид̇о;
‘‘Rājā mātā mahesī ca, uparājā purohito;
раж̇ж̇уг̇г̇аахо саарат̇ий сздти, д̣̇он̣о д̣̇оваариго д̇ат̇аа;
Rajjuggāho sārathī seṭṭhi, doṇo dovāriko tathā;
г̇ан̣игаа д̇з згаад̣̇аса, г̇аруд̇хаммз бад̇идтид̇аа’’д̇и.
Gaṇikā te ekādasa, garudhamme patiṭṭhitā’’ti.
д̇з амажжаа б̣од̇хисад̇д̇ам̣ убасан̇гамид̇ваа ванд̣̇ид̇ваа д̇амад̇т̇ам̣ аарожзсум̣. махаасад̇д̇о ‘‘маяхам̣ г̇аруд̇хаммз гуггужжам̣ ад̇т̇и, маад̇аа бана мз сурагкид̇ам̣ рагкад̇и, д̇ассаа санд̇игз г̇ан̣хат̇аа’’д̇и вад̇ваа д̇зхи ‘‘махаарааж̇а, гуггужжам̣ наама сигкаагаамасса саллзкавуд̇д̇ино ход̇и, д̣̇зт̇а но’’д̇и яаажид̇о ‘‘баан̣о на ханд̇аб̣б̣о, ад̣̇иннам̣ на аад̣̇аад̇аб̣б̣ам̣, гаамзсумижчаажааро на жарид̇аб̣б̣о, мусаа на бхан̣ид̇аб̣б̣ам̣, маж̇ж̇ам̣ на баад̇аб̣б̣а’’нд̇и суван̣н̣абаддз ликаабзд̇ваа ‘‘звам̣ санд̇зби маад̇у санд̇игз г̇ан̣хат̇аа’’д̇и ааха.
Te amaccā bodhisattaṃ upasaṅkamitvā vanditvā tamatthaṃ ārocesuṃ. Mahāsatto ‘‘mayhaṃ garudhamme kukkuccaṃ atthi, mātā pana me surakkhitaṃ rakkhati, tassā santike gaṇhathā’’ti vatvā tehi ‘‘mahārāja, kukkuccaṃ nāma sikkhākāmassa sallekhavuttino hoti, detha no’’ti yācito ‘‘pāṇo na hantabbo, adinnaṃ na ādātabbaṃ, kāmesumicchācāro na caritabbo, musā na bhaṇitabbaṃ, majjaṃ na pātabba’’nti suvaṇṇapaṭṭe likhāpetvā ‘‘evaṃ santepi mātu santike gaṇhathā’’ti āha.
д̣̇ууд̇аа рааж̇аанам̣ ванд̣̇ид̇ваа д̇ассаа санд̇игам̣ г̇анд̇ваа ‘‘д̣̇зви, д̇умхз гира г̇аруд̇хаммам̣ рагкат̇а, д̇ам̣ но д̣̇зт̇аа’’д̇и вад̣̇им̣су. б̣од̇хисад̇д̇асса маад̇ааби д̇ат̇зва ад̇д̇ано гуггужжасса ад̇т̇ибхаавам̣ вад̇ваава д̇зхи яаажид̇аа ад̣̇ааси. д̇ат̇аа махзсиаад̣̇аяоби. д̇з саб̣б̣зсамби санд̇игз суван̣н̣абаддз г̇аруд̇хаммз ликаабзд̇ваа д̣̇анд̇абурам̣ г̇анд̇ваа галин̇г̇аран̃н̃о д̣̇ад̇ваа д̇ам̣ бавад̇д̇им̣ аарожзсум̣. соби рааж̇аа д̇асмим̣ д̇хаммз вад̇д̇амаано бан̃жа сийлаани буурзси. д̇ад̇о сагалагалин̇г̇арадтз д̣̇зво васси. д̇ийн̣и бхаяаани вуубасанд̇аани. радтам̣ кзмам̣ субхигкам̣ ахоси. б̣од̇хисад̇д̇о яааваж̇ийвам̣ д̣̇аанаад̣̇ийни бун̃н̃аани гад̇ваа сабарисо саг̇г̇абурам̣ буурзси.
Dūtā rājānaṃ vanditvā tassā santikaṃ gantvā ‘‘devi, tumhe kira garudhammaṃ rakkhatha, taṃ no dethā’’ti vadiṃsu. Bodhisattassa mātāpi tatheva attano kukkuccassa atthibhāvaṃ vatvāva tehi yācitā adāsi. Tathā mahesiādayopi. Te sabbesampi santike suvaṇṇapaṭṭe garudhamme likhāpetvā dantapuraṃ gantvā kaliṅgarañño datvā taṃ pavattiṃ ārocesuṃ. Sopi rājā tasmiṃ dhamme vattamāno pañca sīlāni pūresi. Tato sakalakaliṅgaraṭṭhe devo vassi. Tīṇi bhayāni vūpasantāni. Raṭṭhaṃ khemaṃ subhikkhaṃ ahosi. Bodhisatto yāvajīvaṃ dānādīni puññāni katvā sapariso saggapuraṃ pūresi.
д̇ад̣̇аа г̇ан̣игаад̣̇аяо уббалаван̣н̣аад̣̇аяо ахзсум̣. вуд̇д̇ан̃хзд̇ам̣ –
Tadā gaṇikādayo uppalavaṇṇādayo ahesuṃ. Vuttañhetaṃ –
‘‘г̇ан̣игаа уббалаван̣н̣аа, бун̣н̣о д̣̇оваариго д̇ад̣̇аа;
‘‘Gaṇikā uppalavaṇṇā, puṇṇo dovāriko tadā;
раж̇ж̇уг̇г̇аахо жа гажжаано, д̣̇он̣амаабаго жа голид̇о.
Rajjuggāho ca kaccāno, doṇamāpako ca kolito.
‘‘саарибуд̇д̇о д̇ад̣̇аа сздти, ануруд̣̇д̇хо жа саарат̇и;
‘‘Sāriputto tadā seṭṭhi, anuruddho ca sārathi;
б̣раахман̣о гассабо т̇зро, убарааж̇аананд̣̇абан̣д̣ид̇о.
Brāhmaṇo kassapo thero, uparājānandapaṇḍito.
‘‘махзсий раахуламаад̇аа, мааяаад̣̇звий ж̇анзд̇д̇игаа;
‘‘Mahesī rāhulamātā, māyādevī janettikā;
гурурааж̇аа б̣од̇хисад̇д̇о, звам̣ д̇хаарзт̇а ж̇аад̇ага’’нд̇и. (д̇ха. ба. адта. 2.361 хам̣сагхаад̇агабхигкувад̇т̇у);
Kururājā bodhisatto, evaṃ dhāretha jātaka’’nti. (dha. pa. aṭṭha. 2.361 haṃsaghātakabhikkhuvatthu);
ид̇хааби нзгкаммабаарамиаад̣̇аяо сзсад̇хаммаа жа вуд̇д̇анаязнзва нид̣̇д̇хаарзд̇аб̣б̣аад̇и.
Idhāpi nekkhammapāramiādayo sesadhammā ca vuttanayeneva niddhāretabbāti.
гурурааж̇ажарияааван̣н̣анаа нидтид̇аа.
Kururājacariyāvaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / жарияаабидагабаал̣и • Cariyāpiṭakapāḷi / 3. гурурааж̇ажарияаа • 3. Kururājacariyā
