| Library / Tipiṭaka / திபிடக • Tipiṭaka / பாசித்யாதி³யோஜனாபாளி • Pācityādiyojanāpāḷi |
227. குஸசீராதி³படிக்கே²பகதா²
227. Kusacīrādipaṭikkhepakathā
371. ‘‘அக்கனாளமய’’ந்தி இமினா அக்கனாளேன நிப்³ப³த்தங் அக்கனாளந்தி வசனத்த²ங் த³ஸ்ஸேதி. மகசிமயோதி எத்த² மகசிஸத்³தே³ன பொத்த²கஸத்³த³ஸ்ஸ க³ந்தா²த³யோ அத்தே² நிவத்தேதி. மயஸத்³தே³ன புரிமனயேனேவ நிப்³ப³த்ததத்³தி⁴தங் த³ஸ்ஸேதி. ஸேஸானீதி அக்கனாளபொத்த²கேஹி ஸேஸானி குஸசீராதீ³னி. தேஸூதி குஸசீராதீ³ஸு.
371. ‘‘Akkanāḷamaya’’nti iminā akkanāḷena nibbattaṃ akkanāḷanti vacanatthaṃ dasseti. Makacimayoti ettha makacisaddena potthakasaddassa ganthādayo atthe nivatteti. Mayasaddena purimanayeneva nibbattataddhitaṃ dasseti. Sesānīti akkanāḷapotthakehi sesāni kusacīrādīni. Tesūti kusacīrādīsu.
372. திபட்டசீவரஸ்ஸ வாதி இத³ங் த்³விபட்டசீவரஸ்ஸ மஜ்ஜே² தா³னங் ஸந்தா⁴ய வுத்தங். தேஸந்தி ஸப்³ப³னீலகாதீ³னங். கஞ்சுகந்தி வாரணங். தஞ்ஹி கசியதி காயே ப³ந்தி⁴யதீதி கஞ்சுகோதி வுச்சதி. வேட²னேபீதி உண்ஹீஸேபி. தஞ்ஹி யஸ்மா யேன ஸீஸே வேடி²யதி, தஸ்மா வேட²னந்தி வுச்சதி. ருக்க²ச²ல்லிமயந்தி எத்த² ருக்க²ச²ல்லிஸத்³தே³ன திரீடஸத்³த³ஸ்ஸ வக்கலத்த²ங் த³ஸ்ஸேதி. வக்கலஞ்ஹி நிவஸனானங் அங்க³பச்சங்க³ங் திரோபா⁴வங் படிச்ச²ன்னபா⁴வங் ஏதி க³ச்ச²தி அனேனாதி வா ருக்க²ங் திரோபடிச்ச²ன்னங் ஹுத்வா ஏதி பவத்ததீதி வா திரீடந்தி வுச்சதி. அபி⁴தா⁴னே (அபி⁴தா⁴னப்பதீ³பிகாயங் 442 கா³தா²யங்) பன தரீடந்தி தகாரே இகாரவிரஹிதோ பாடோ² அத்தி². பாத³புஞ்ஜனந்தி பாதோ³ புஜியதி ஸோதி⁴யதி அனேனாதி பாத³புஞ்ஜனங், தாலுஜோ ததியக்க²ரோ.
372.Tipaṭṭacīvarassa vāti idaṃ dvipaṭṭacīvarassa majjhe dānaṃ sandhāya vuttaṃ. Tesanti sabbanīlakādīnaṃ. Kañcukanti vāraṇaṃ. Tañhi kaciyati kāye bandhiyatīti kañcukoti vuccati. Veṭhanepīti uṇhīsepi. Tañhi yasmā yena sīse veṭhiyati, tasmā veṭhananti vuccati. Rukkhachallimayanti ettha rukkhachallisaddena tirīṭasaddassa vakkalatthaṃ dasseti. Vakkalañhi nivasanānaṃ aṅgapaccaṅgaṃ tirobhāvaṃ paṭicchannabhāvaṃ eti gacchati anenāti vā rukkhaṃ tiropaṭicchannaṃ hutvā eti pavattatīti vā tirīṭanti vuccati. Abhidhāne (abhidhānappadīpikāyaṃ 442 gāthāyaṃ) pana tarīṭanti takāre ikāravirahito pāṭho atthi. Pādapuñjananti pādo pujiyati sodhiyati anenāti pādapuñjanaṃ, tālujo tatiyakkharo.
374. ஸந்தே பதிரூபகே கா³ஹகேதி எத்த² பதிரூபகோ நாம பக்கமந்தஸ்ஸ பி⁴க்கு²னோ ஸந்தி³ட்ட²ஸம்ப⁴த்தோ. இமினா பதிரூபகே கா³ஹகே அஸதி அத³த்வா ஸங்கே⁴ன பா⁴ஜிதே ஸுபா⁴ஜிதமேவாதி த³ஸ்ஸேதி. ஸத்த ஜனாதி பக்கமந்தஉம்மத்தககி²த்தசித்தவேத³னட்டா சத்தாரோ, உக்கி²த்தகா தயோதி ஸத்த ஜனா.
374.Sante patirūpake gāhaketi ettha patirūpako nāma pakkamantassa bhikkhuno sandiṭṭhasambhatto. Iminā patirūpake gāhake asati adatvā saṅghena bhājite subhājitamevāti dasseti. Satta janāti pakkamantaummattakakhittacittavedanaṭṭā cattāro, ukkhittakā tayoti satta janā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவக்³க³பாளி • Mahāvaggapāḷi
227. குஸசீராதி³படிக்கே²பகதா² • 227. Kusacīrādipaṭikkhepakathā
228. ஸப்³ப³னீலகாதி³படிக்கே²பகதா² • 228. Sabbanīlakādipaṭikkhepakathā
229. வஸ்ஸங்வுட்டா²னங் அனுப்பன்னசீவரகதா² • 229. Vassaṃvuṭṭhānaṃ anuppannacīvarakathā
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவக்³க³-அட்ட²கதா² • Mahāvagga-aṭṭhakathā / குஸசீராதி³படிக்கே²பகதா² • Kusacīrādipaṭikkhepakathā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / மதஸந்தககதா²தி³வண்ணனா • Matasantakakathādivaṇṇanā
