| Library / Tipiṭaka / তিপিটক • Tipiṭaka / পাচিত্যাদিযোজনাপাল়ি • Pācityādiyojanāpāḷi |
২২৭. কুসচীরাদিপটিক্খেপকথা
227. Kusacīrādipaṭikkhepakathā
৩৭১. ‘‘অক্কনাল়ময’’ন্তি ইমিনা অক্কনাল়েন নিব্বত্তং অক্কনাল়ন্তি ৰচনত্থং দস্সেতি। মকচিমযোতি এত্থ মকচিসদ্দেন পোত্থকসদ্দস্স গন্থাদযো অত্থে নিৰত্তেতি। মযসদ্দেন পুরিমনযেনেৰ নিব্বত্ততদ্ধিতং দস্সেতি। সেসানীতি অক্কনাল়পোত্থকেহি সেসানি কুসচীরাদীনি। তেসূতি কুসচীরাদীসু।
371. ‘‘Akkanāḷamaya’’nti iminā akkanāḷena nibbattaṃ akkanāḷanti vacanatthaṃ dasseti. Makacimayoti ettha makacisaddena potthakasaddassa ganthādayo atthe nivatteti. Mayasaddena purimanayeneva nibbattataddhitaṃ dasseti. Sesānīti akkanāḷapotthakehi sesāni kusacīrādīni. Tesūti kusacīrādīsu.
৩৭২. তিপট্টচীৰরস্স ৰাতি ইদং দ্ৰিপট্টচীৰরস্স মজ্ঝে দানং সন্ধায ৰুত্তং। তেসন্তি সব্বনীলকাদীনং। কঞ্চুকন্তি ৰারণং। তঞ্হি কচিযতি কাযে বন্ধিযতীতি কঞ্চুকোতি ৰুচ্চতি। ৰেঠনেপীতি উণ্হীসেপি। তঞ্হি যস্মা যেন সীসে ৰেঠিযতি, তস্মা ৰেঠনন্তি ৰুচ্চতি। রুক্খছল্লিমযন্তি এত্থ রুক্খছল্লিসদ্দেন তিরীটসদ্দস্স ৰক্কলত্থং দস্সেতি। ৰক্কলঞ্হি নিৰসনানং অঙ্গপচ্চঙ্গং তিরোভাৰং পটিচ্ছন্নভাৰং এতি গচ্ছতি অনেনাতি ৰা রুক্খং তিরোপটিচ্ছন্নং হুত্ৰা এতি পৰত্ততীতি ৰা তিরীটন্তি ৰুচ্চতি। অভিধানে (অভিধানপ্পদীপিকাযং ৪৪২ গাথাযং) পন তরীটন্তি তকারে ইকারৰিরহিতো পাঠো অত্থি। পাদপুঞ্জনন্তি পাদো পুজিযতি সোধিযতি অনেনাতি পাদপুঞ্জনং, তালুজো ততিযক্খরো।
372.Tipaṭṭacīvarassa vāti idaṃ dvipaṭṭacīvarassa majjhe dānaṃ sandhāya vuttaṃ. Tesanti sabbanīlakādīnaṃ. Kañcukanti vāraṇaṃ. Tañhi kaciyati kāye bandhiyatīti kañcukoti vuccati. Veṭhanepīti uṇhīsepi. Tañhi yasmā yena sīse veṭhiyati, tasmā veṭhananti vuccati. Rukkhachallimayanti ettha rukkhachallisaddena tirīṭasaddassa vakkalatthaṃ dasseti. Vakkalañhi nivasanānaṃ aṅgapaccaṅgaṃ tirobhāvaṃ paṭicchannabhāvaṃ eti gacchati anenāti vā rukkhaṃ tiropaṭicchannaṃ hutvā eti pavattatīti vā tirīṭanti vuccati. Abhidhāne (abhidhānappadīpikāyaṃ 442 gāthāyaṃ) pana tarīṭanti takāre ikāravirahito pāṭho atthi. Pādapuñjananti pādo pujiyati sodhiyati anenāti pādapuñjanaṃ, tālujo tatiyakkharo.
৩৭৪. সন্তে পতিরূপকে গাহকেতি এত্থ পতিরূপকো নাম পক্কমন্তস্স ভিক্খুনো সন্দিট্ঠসম্ভত্তো। ইমিনা পতিরূপকে গাহকে অসতি অদত্ৰা সঙ্ঘেন ভাজিতে সুভাজিতমেৰাতি দস্সেতি। সত্ত জনাতি পক্কমন্তউম্মত্তকখিত্তচিত্তৰেদনট্টা চত্তারো, উক্খিত্তকা তযোতি সত্ত জনা।
374.Sante patirūpake gāhaketi ettha patirūpako nāma pakkamantassa bhikkhuno sandiṭṭhasambhatto. Iminā patirūpake gāhake asati adatvā saṅghena bhājite subhājitamevāti dasseti. Satta janāti pakkamantaummattakakhittacittavedanaṭṭā cattāro, ukkhittakā tayoti satta janā.
Related texts:
তিপিটক (মূল) • Tipiṭaka (Mūla) / ৰিনযপিটক • Vinayapiṭaka / মহাৰগ্গপাল়ি • Mahāvaggapāḷi
২২৭. কুসচীরাদিপটিক্খেপকথা • 227. Kusacīrādipaṭikkhepakathā
২২৮. সব্বনীলকাদিপটিক্খেপকথা • 228. Sabbanīlakādipaṭikkhepakathā
২২৯. ৰস্সংৰুট্ঠানং অনুপ্পন্নচীৰরকথা • 229. Vassaṃvuṭṭhānaṃ anuppannacīvarakathā
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰগ্গ-অট্ঠকথা • Mahāvagga-aṭṭhakathā / কুসচীরাদিপটিক্খেপকথা • Kusacīrādipaṭikkhepakathā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā / মতসন্তককথাদিৰণ্ণনা • Matasantakakathādivaṇṇanā
