| Library / Tipiṭaka / ติปิฎก • Tipiṭaka / ปาจิตฺยาทิโยชนาปาฬิ • Pācityādiyojanāpāḷi |
๒๒๗. กุสจีราทิปฎิเกฺขปกถา
227. Kusacīrādipaṭikkhepakathā
๓๗๑. ‘‘อกฺกนาฬมย’’นฺติ อิมินา อกฺกนาเฬน นิพฺพตฺตํ อกฺกนาฬนฺติ วจนตฺถํ ทเสฺสติฯ มกจิมโยติ เอตฺถ มกจิสเทฺทน โปตฺถกสทฺทสฺส คนฺถาทโย อเตฺถ นิวเตฺตติฯ มยสเทฺทน ปุริมนเยเนว นิพฺพตฺตตทฺธิตํ ทเสฺสติฯ เสสานีติ อกฺกนาฬโปตฺถเกหิ เสสานิ กุสจีราทีนิฯ เตสูติ กุสจีราทีสุฯ
371. ‘‘Akkanāḷamaya’’nti iminā akkanāḷena nibbattaṃ akkanāḷanti vacanatthaṃ dasseti. Makacimayoti ettha makacisaddena potthakasaddassa ganthādayo atthe nivatteti. Mayasaddena purimanayeneva nibbattataddhitaṃ dasseti. Sesānīti akkanāḷapotthakehi sesāni kusacīrādīni. Tesūti kusacīrādīsu.
๓๗๒. ติปฎฺฎจีวรสฺส วาติ อิทํ ทฺวิปฎฺฎจีวรสฺส มเชฺฌ ทานํ สนฺธาย วุตฺตํฯ เตสนฺติ สพฺพนีลกาทีนํฯ กญฺจุกนฺติ วารณํฯ ตญฺหิ กจิยติ กาเย พนฺธิยตีติ กญฺจุโกติ วุจฺจติฯ เวฐเนปีติ อุณฺหีเสปิฯ ตญฺหิ ยสฺมา เยน สีเส เวฐิยติ, ตสฺมา เวฐนนฺติ วุจฺจติฯ รุกฺขฉลฺลิมยนฺติ เอตฺถ รุกฺขฉลฺลิสเทฺทน ติรีฎสทฺทสฺส วกฺกลตฺถํ ทเสฺสติฯ วกฺกลญฺหิ นิวสนานํ องฺคปจฺจงฺคํ ติโรภาวํ ปฎิจฺฉนฺนภาวํ เอติ คจฺฉติ อเนนาติ วา รุกฺขํ ติโรปฎิจฺฉนฺนํ หุตฺวา เอติ ปวตฺตตีติ วา ติรีฎนฺติ วุจฺจติฯ อภิธาเน (อภิธานปฺปทีปิกายํ ๔๔๒ คาถายํ) ปน ตรีฎนฺติ ตกาเร อิการวิรหิโต ปาโฐ อตฺถิฯ ปาทปุญฺชนนฺติ ปาโท ปุชิยติ โสธิยติ อเนนาติ ปาทปุญฺชนํ, ตาลุโช ตติยกฺขโรฯ
372.Tipaṭṭacīvarassa vāti idaṃ dvipaṭṭacīvarassa majjhe dānaṃ sandhāya vuttaṃ. Tesanti sabbanīlakādīnaṃ. Kañcukanti vāraṇaṃ. Tañhi kaciyati kāye bandhiyatīti kañcukoti vuccati. Veṭhanepīti uṇhīsepi. Tañhi yasmā yena sīse veṭhiyati, tasmā veṭhananti vuccati. Rukkhachallimayanti ettha rukkhachallisaddena tirīṭasaddassa vakkalatthaṃ dasseti. Vakkalañhi nivasanānaṃ aṅgapaccaṅgaṃ tirobhāvaṃ paṭicchannabhāvaṃ eti gacchati anenāti vā rukkhaṃ tiropaṭicchannaṃ hutvā eti pavattatīti vā tirīṭanti vuccati. Abhidhāne (abhidhānappadīpikāyaṃ 442 gāthāyaṃ) pana tarīṭanti takāre ikāravirahito pāṭho atthi. Pādapuñjananti pādo pujiyati sodhiyati anenāti pādapuñjanaṃ, tālujo tatiyakkharo.
๓๗๔. สเนฺต ปติรูปเก คาหเกติ เอตฺถ ปติรูปโก นาม ปกฺกมนฺตสฺส ภิกฺขุโน สนฺทิฎฺฐสมฺภโตฺตฯ อิมินา ปติรูปเก คาหเก อสติ อทตฺวา สเงฺฆน ภาชิเต สุภาชิตเมวาติ ทเสฺสติฯ สตฺต ชนาติ ปกฺกมนฺตอุมฺมตฺตกขิตฺตจิตฺตเวทนฎฺฎา จตฺตาโร, อุกฺขิตฺตกา ตโยติ สตฺต ชนาฯ
374.Sante patirūpake gāhaketi ettha patirūpako nāma pakkamantassa bhikkhuno sandiṭṭhasambhatto. Iminā patirūpake gāhake asati adatvā saṅghena bhājite subhājitamevāti dasseti. Satta janāti pakkamantaummattakakhittacittavedanaṭṭā cattāro, ukkhittakā tayoti satta janā.
Related texts:
ติปิฎก (มูล) • Tipiṭaka (Mūla) / วินยปิฎก • Vinayapiṭaka / มหาวคฺคปาฬิ • Mahāvaggapāḷi
๒๒๗. กุสจีราทิปฎิเกฺขปกถา • 227. Kusacīrādipaṭikkhepakathā
๒๒๘. สพฺพนีลกาทิปฎิเกฺขปกถา • 228. Sabbanīlakādipaṭikkhepakathā
๒๒๙. วสฺสํวุฎฺฐานํ อนุปฺปนฺนจีวรกถา • 229. Vassaṃvuṭṭhānaṃ anuppannacīvarakathā
อฎฺฐกถา • Aṭṭhakathā / วินยปิฎก (อฎฺฐกถา) • Vinayapiṭaka (aṭṭhakathā) / มหาวคฺค-อฎฺฐกถา • Mahāvagga-aṭṭhakathā / กุสจีราทิปฎิเกฺขปกถา • Kusacīrādipaṭikkhepakathā
ฎีกา • Tīkā / วินยปิฎก (ฎีกา) • Vinayapiṭaka (ṭīkā) / วิมติวิโนทนี-ฎีกา • Vimativinodanī-ṭīkā / มตสนฺตกกถาทิวณฺณนา • Matasantakakathādivaṇṇanā
