| Library / Tipiṭaka / ತಿಪಿಟಕ • Tipiṭaka / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi |
೨೨೭. ಕುಸಚೀರಾದಿಪಟಿಕ್ಖೇಪಕಥಾ
227. Kusacīrādipaṭikkhepakathā
೩೭೧. ‘‘ಅಕ್ಕನಾಳಮಯ’’ನ್ತಿ ಇಮಿನಾ ಅಕ್ಕನಾಳೇನ ನಿಬ್ಬತ್ತಂ ಅಕ್ಕನಾಳನ್ತಿ ವಚನತ್ಥಂ ದಸ್ಸೇತಿ। ಮಕಚಿಮಯೋತಿ ಏತ್ಥ ಮಕಚಿಸದ್ದೇನ ಪೋತ್ಥಕಸದ್ದಸ್ಸ ಗನ್ಥಾದಯೋ ಅತ್ಥೇ ನಿವತ್ತೇತಿ। ಮಯಸದ್ದೇನ ಪುರಿಮನಯೇನೇವ ನಿಬ್ಬತ್ತತದ್ಧಿತಂ ದಸ್ಸೇತಿ। ಸೇಸಾನೀತಿ ಅಕ್ಕನಾಳಪೋತ್ಥಕೇಹಿ ಸೇಸಾನಿ ಕುಸಚೀರಾದೀನಿ। ತೇಸೂತಿ ಕುಸಚೀರಾದೀಸು।
371. ‘‘Akkanāḷamaya’’nti iminā akkanāḷena nibbattaṃ akkanāḷanti vacanatthaṃ dasseti. Makacimayoti ettha makacisaddena potthakasaddassa ganthādayo atthe nivatteti. Mayasaddena purimanayeneva nibbattataddhitaṃ dasseti. Sesānīti akkanāḷapotthakehi sesāni kusacīrādīni. Tesūti kusacīrādīsu.
೩೭೨. ತಿಪಟ್ಟಚೀವರಸ್ಸ ವಾತಿ ಇದಂ ದ್ವಿಪಟ್ಟಚೀವರಸ್ಸ ಮಜ್ಝೇ ದಾನಂ ಸನ್ಧಾಯ ವುತ್ತಂ। ತೇಸನ್ತಿ ಸಬ್ಬನೀಲಕಾದೀನಂ। ಕಞ್ಚುಕನ್ತಿ ವಾರಣಂ। ತಞ್ಹಿ ಕಚಿಯತಿ ಕಾಯೇ ಬನ್ಧಿಯತೀತಿ ಕಞ್ಚುಕೋತಿ ವುಚ್ಚತಿ। ವೇಠನೇಪೀತಿ ಉಣ್ಹೀಸೇಪಿ। ತಞ್ಹಿ ಯಸ್ಮಾ ಯೇನ ಸೀಸೇ ವೇಠಿಯತಿ, ತಸ್ಮಾ ವೇಠನನ್ತಿ ವುಚ್ಚತಿ। ರುಕ್ಖಛಲ್ಲಿಮಯನ್ತಿ ಏತ್ಥ ರುಕ್ಖಛಲ್ಲಿಸದ್ದೇನ ತಿರೀಟಸದ್ದಸ್ಸ ವಕ್ಕಲತ್ಥಂ ದಸ್ಸೇತಿ। ವಕ್ಕಲಞ್ಹಿ ನಿವಸನಾನಂ ಅಙ್ಗಪಚ್ಚಙ್ಗಂ ತಿರೋಭಾವಂ ಪಟಿಚ್ಛನ್ನಭಾವಂ ಏತಿ ಗಚ್ಛತಿ ಅನೇನಾತಿ ವಾ ರುಕ್ಖಂ ತಿರೋಪಟಿಚ್ಛನ್ನಂ ಹುತ್ವಾ ಏತಿ ಪವತ್ತತೀತಿ ವಾ ತಿರೀಟನ್ತಿ ವುಚ್ಚತಿ। ಅಭಿಧಾನೇ (ಅಭಿಧಾನಪ್ಪದೀಪಿಕಾಯಂ ೪೪೨ ಗಾಥಾಯಂ) ಪನ ತರೀಟನ್ತಿ ತಕಾರೇ ಇಕಾರವಿರಹಿತೋ ಪಾಠೋ ಅತ್ಥಿ। ಪಾದಪುಞ್ಜನನ್ತಿ ಪಾದೋ ಪುಜಿಯತಿ ಸೋಧಿಯತಿ ಅನೇನಾತಿ ಪಾದಪುಞ್ಜನಂ, ತಾಲುಜೋ ತತಿಯಕ್ಖರೋ।
372.Tipaṭṭacīvarassa vāti idaṃ dvipaṭṭacīvarassa majjhe dānaṃ sandhāya vuttaṃ. Tesanti sabbanīlakādīnaṃ. Kañcukanti vāraṇaṃ. Tañhi kaciyati kāye bandhiyatīti kañcukoti vuccati. Veṭhanepīti uṇhīsepi. Tañhi yasmā yena sīse veṭhiyati, tasmā veṭhananti vuccati. Rukkhachallimayanti ettha rukkhachallisaddena tirīṭasaddassa vakkalatthaṃ dasseti. Vakkalañhi nivasanānaṃ aṅgapaccaṅgaṃ tirobhāvaṃ paṭicchannabhāvaṃ eti gacchati anenāti vā rukkhaṃ tiropaṭicchannaṃ hutvā eti pavattatīti vā tirīṭanti vuccati. Abhidhāne (abhidhānappadīpikāyaṃ 442 gāthāyaṃ) pana tarīṭanti takāre ikāravirahito pāṭho atthi. Pādapuñjananti pādo pujiyati sodhiyati anenāti pādapuñjanaṃ, tālujo tatiyakkharo.
೩೭೪. ಸನ್ತೇ ಪತಿರೂಪಕೇ ಗಾಹಕೇತಿ ಏತ್ಥ ಪತಿರೂಪಕೋ ನಾಮ ಪಕ್ಕಮನ್ತಸ್ಸ ಭಿಕ್ಖುನೋ ಸನ್ದಿಟ್ಠಸಮ್ಭತ್ತೋ। ಇಮಿನಾ ಪತಿರೂಪಕೇ ಗಾಹಕೇ ಅಸತಿ ಅದತ್ವಾ ಸಙ್ಘೇನ ಭಾಜಿತೇ ಸುಭಾಜಿತಮೇವಾತಿ ದಸ್ಸೇತಿ। ಸತ್ತ ಜನಾತಿ ಪಕ್ಕಮನ್ತಉಮ್ಮತ್ತಕಖಿತ್ತಚಿತ್ತವೇದನಟ್ಟಾ ಚತ್ತಾರೋ, ಉಕ್ಖಿತ್ತಕಾ ತಯೋತಿ ಸತ್ತ ಜನಾ।
374.Sante patirūpake gāhaketi ettha patirūpako nāma pakkamantassa bhikkhuno sandiṭṭhasambhatto. Iminā patirūpake gāhake asati adatvā saṅghena bhājite subhājitamevāti dasseti. Satta janāti pakkamantaummattakakhittacittavedanaṭṭā cattāro, ukkhittakā tayoti satta janā.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi
೨೨೭. ಕುಸಚೀರಾದಿಪಟಿಕ್ಖೇಪಕಥಾ • 227. Kusacīrādipaṭikkhepakathā
೨೨೮. ಸಬ್ಬನೀಲಕಾದಿಪಟಿಕ್ಖೇಪಕಥಾ • 228. Sabbanīlakādipaṭikkhepakathā
೨೨೯. ವಸ್ಸಂವುಟ್ಠಾನಂ ಅನುಪ್ಪನ್ನಚೀವರಕಥಾ • 229. Vassaṃvuṭṭhānaṃ anuppannacīvarakathā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಕುಸಚೀರಾದಿಪಟಿಕ್ಖೇಪಕಥಾ • Kusacīrādipaṭikkhepakathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಿಮತಿವಿನೋದನೀ-ಟೀಕಾ • Vimativinodanī-ṭīkā / ಮತಸನ್ತಕಕಥಾದಿವಣ್ಣನಾ • Matasantakakathādivaṇṇanā
