| Library / Tipiṭaka / திபிடக • Tipiṭaka / கதா²வத்து²பாளி • Kathāvatthupāḷi |
22. பா³வீஸதிமவக்³கோ³
22. Bāvīsatimavaggo
(209) 2. குஸலசித்தகதா²
(209) 2. Kusalacittakathā
894. அரஹா குஸலசித்தோ பரினிப்³பா³யதீதி? ஆமந்தா. அரஹா புஞ்ஞாபி⁴ஸங்கா²ரங் அபி⁴ஸங்க²ரொந்தோ… ஆனேஞ்ஜாபி⁴ஸங்கா²ரங் அபி⁴ஸங்க²ரொந்தோ… க³திஸங்வத்தனியங் கம்மங் கரொந்தோ… ப⁴வஸங்வத்தனியங் கம்மங் கரொந்தோ… இஸ்ஸரியஸங்வத்தனியங் கம்மங் கரொந்தோ… அதி⁴பச்சஸங்வத்தனியங் கம்மங் கரொந்தோ… மஹாபோ⁴க³ஸங்வத்தனியங் கம்மங் கரொந்தோ… மஹாபரிவாரஸங்வத்தனியங் கம்மங் கரொந்தோ… தே³வஸோப⁴க்³யஸங்வத்தனியங் கம்மங் கரொந்தோ… மனுஸ்ஸஸோப⁴க்³யஸங்வத்தனியங் கம்மங் கரொந்தோ பரினிப்³பா³யதீதி? ந ஹேவங் வத்தப்³பே³…பே॰….
894. Arahā kusalacitto parinibbāyatīti? Āmantā. Arahā puññābhisaṅkhāraṃ abhisaṅkharonto… āneñjābhisaṅkhāraṃ abhisaṅkharonto… gatisaṃvattaniyaṃ kammaṃ karonto… bhavasaṃvattaniyaṃ kammaṃ karonto… issariyasaṃvattaniyaṃ kammaṃ karonto… adhipaccasaṃvattaniyaṃ kammaṃ karonto… mahābhogasaṃvattaniyaṃ kammaṃ karonto… mahāparivārasaṃvattaniyaṃ kammaṃ karonto… devasobhagyasaṃvattaniyaṃ kammaṃ karonto… manussasobhagyasaṃvattaniyaṃ kammaṃ karonto parinibbāyatīti? Na hevaṃ vattabbe…pe….
அரஹா குஸலசித்தோ பரினிப்³பா³யதீதி? ஆமந்தா. அரஹா ஆசினந்தோ அபசினந்தோ பஜஹந்தோ உபாதி³யந்தோ விஸினெந்தோ உஸ்ஸினெந்தோ விதூ⁴பெந்தோ ஸந்தூ⁴பெந்தோ பரினிப்³பா³யதீதி? ந ஹேவங் வத்தப்³பே³ …பே॰… நனு அரஹா நேவாசினாதி ந அபசினாதி அபசினித்வா டி²தோதி? ஆமந்தா. ஹஞ்சி அரஹா நேவாசினாதி ந அபசினாதி அபசினித்வா டி²தோ, நோ ச வத ரே வத்தப்³பே³ – ‘‘அரஹா குஸலசித்தோ பரினிப்³பா³யதீ’’தி. நனு அரஹா நேவ பஜஹதி ந உபாதி³யதி பஜஹித்வா டி²தோ, நேவ விஸினேதி ந உஸ்ஸினேதி விஸினெத்வா டி²தோ; நனு அரஹா நேவ விதூ⁴பேதி ந ஸந்தூ⁴பேதி விதூ⁴பெத்வா டி²தோதி? ஆமந்தா. ஹஞ்சி அரஹா நேவ விதூ⁴பேதி ந ஸந்தூ⁴பேதி விதூ⁴பெத்வா டி²தோ, நோ ச வத ரே வத்தப்³பே³ – ‘‘அரஹா குஸலசித்தோ பரினிப்³பா³யதீ’’தி.
Arahā kusalacitto parinibbāyatīti? Āmantā. Arahā ācinanto apacinanto pajahanto upādiyanto visinento ussinento vidhūpento sandhūpento parinibbāyatīti? Na hevaṃ vattabbe …pe… nanu arahā nevācināti na apacināti apacinitvā ṭhitoti? Āmantā. Hañci arahā nevācināti na apacināti apacinitvā ṭhito, no ca vata re vattabbe – ‘‘arahā kusalacitto parinibbāyatī’’ti. Nanu arahā neva pajahati na upādiyati pajahitvā ṭhito, neva visineti na ussineti visinetvā ṭhito; nanu arahā neva vidhūpeti na sandhūpeti vidhūpetvā ṭhitoti? Āmantā. Hañci arahā neva vidhūpeti na sandhūpeti vidhūpetvā ṭhito, no ca vata re vattabbe – ‘‘arahā kusalacitto parinibbāyatī’’ti.
895. ந வத்தப்³ப³ங் – ‘‘அரஹா குஸலசித்தோ பரினிப்³பா³யதீ’’தி? ஆமந்தா. நனு அரஹா உபட்டி²தஸ்ஸதி ஸதோ ஸம்பஜானோ பரினிப்³பா³யதீதி? ஆமந்தா. ஹஞ்சி அரஹா உபட்டி²தஸ்ஸதி ஸதோ ஸம்பஜானோ பரினிப்³பா³யதி, தேன வத ரே வத்தப்³பே³ – ‘‘அரஹா குஸலசித்தோ பரினிப்³பா³யதீ’’தி.
895. Na vattabbaṃ – ‘‘arahā kusalacitto parinibbāyatī’’ti? Āmantā. Nanu arahā upaṭṭhitassati sato sampajāno parinibbāyatīti? Āmantā. Hañci arahā upaṭṭhitassati sato sampajāno parinibbāyati, tena vata re vattabbe – ‘‘arahā kusalacitto parinibbāyatī’’ti.
குஸலசித்தகதா² நிட்டி²தா.
Kusalacittakathā niṭṭhitā.
Related texts:
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 2. குஸலசித்தகதா²வண்ணனா • 2. Kusalacittakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 2. குஸலசித்தகதா²வண்ணனா • 2. Kusalacittakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 2. குஸலசித்தகதா²வண்ணனா • 2. Kusalacittakathāvaṇṇanā
