| Library / Tipiṭaka / तिपिटक • Tipiṭaka / कथावत्थुपाळि • Kathāvatthupāḷi |
२२. बावीसतिमवग्गो
22. Bāvīsatimavaggo
(२०९) २. कुसलचित्तकथा
(209) 2. Kusalacittakathā
८९४. अरहा कुसलचित्तो परिनिब्बायतीति? आमन्ता। अरहा पुञ्ञाभिसङ्खारं अभिसङ्खरोन्तो… आनेञ्जाभिसङ्खारं अभिसङ्खरोन्तो… गतिसंवत्तनियं कम्मं करोन्तो… भवसंवत्तनियं कम्मं करोन्तो… इस्सरियसंवत्तनियं कम्मं करोन्तो… अधिपच्चसंवत्तनियं कम्मं करोन्तो… महाभोगसंवत्तनियं कम्मं करोन्तो… महापरिवारसंवत्तनियं कम्मं करोन्तो… देवसोभग्यसंवत्तनियं कम्मं करोन्तो… मनुस्ससोभग्यसंवत्तनियं कम्मं करोन्तो परिनिब्बायतीति? न हेवं वत्तब्बे…पे॰…।
894. Arahā kusalacitto parinibbāyatīti? Āmantā. Arahā puññābhisaṅkhāraṃ abhisaṅkharonto… āneñjābhisaṅkhāraṃ abhisaṅkharonto… gatisaṃvattaniyaṃ kammaṃ karonto… bhavasaṃvattaniyaṃ kammaṃ karonto… issariyasaṃvattaniyaṃ kammaṃ karonto… adhipaccasaṃvattaniyaṃ kammaṃ karonto… mahābhogasaṃvattaniyaṃ kammaṃ karonto… mahāparivārasaṃvattaniyaṃ kammaṃ karonto… devasobhagyasaṃvattaniyaṃ kammaṃ karonto… manussasobhagyasaṃvattaniyaṃ kammaṃ karonto parinibbāyatīti? Na hevaṃ vattabbe…pe….
अरहा कुसलचित्तो परिनिब्बायतीति? आमन्ता। अरहा आचिनन्तो अपचिनन्तो पजहन्तो उपादियन्तो विसिनेन्तो उस्सिनेन्तो विधूपेन्तो सन्धूपेन्तो परिनिब्बायतीति? न हेवं वत्तब्बे …पे॰… ननु अरहा नेवाचिनाति न अपचिनाति अपचिनित्वा ठितोति? आमन्ता। हञ्चि अरहा नेवाचिनाति न अपचिनाति अपचिनित्वा ठितो, नो च वत रे वत्तब्बे – ‘‘अरहा कुसलचित्तो परिनिब्बायती’’ति। ननु अरहा नेव पजहति न उपादियति पजहित्वा ठितो, नेव विसिनेति न उस्सिनेति विसिनेत्वा ठितो; ननु अरहा नेव विधूपेति न सन्धूपेति विधूपेत्वा ठितोति? आमन्ता। हञ्चि अरहा नेव विधूपेति न सन्धूपेति विधूपेत्वा ठितो, नो च वत रे वत्तब्बे – ‘‘अरहा कुसलचित्तो परिनिब्बायती’’ति।
Arahā kusalacitto parinibbāyatīti? Āmantā. Arahā ācinanto apacinanto pajahanto upādiyanto visinento ussinento vidhūpento sandhūpento parinibbāyatīti? Na hevaṃ vattabbe …pe… nanu arahā nevācināti na apacināti apacinitvā ṭhitoti? Āmantā. Hañci arahā nevācināti na apacināti apacinitvā ṭhito, no ca vata re vattabbe – ‘‘arahā kusalacitto parinibbāyatī’’ti. Nanu arahā neva pajahati na upādiyati pajahitvā ṭhito, neva visineti na ussineti visinetvā ṭhito; nanu arahā neva vidhūpeti na sandhūpeti vidhūpetvā ṭhitoti? Āmantā. Hañci arahā neva vidhūpeti na sandhūpeti vidhūpetvā ṭhito, no ca vata re vattabbe – ‘‘arahā kusalacitto parinibbāyatī’’ti.
८९५. न वत्तब्बं – ‘‘अरहा कुसलचित्तो परिनिब्बायती’’ति? आमन्ता। ननु अरहा उपट्ठितस्सति सतो सम्पजानो परिनिब्बायतीति? आमन्ता। हञ्चि अरहा उपट्ठितस्सति सतो सम्पजानो परिनिब्बायति, तेन वत रे वत्तब्बे – ‘‘अरहा कुसलचित्तो परिनिब्बायती’’ति।
895. Na vattabbaṃ – ‘‘arahā kusalacitto parinibbāyatī’’ti? Āmantā. Nanu arahā upaṭṭhitassati sato sampajāno parinibbāyatīti? Āmantā. Hañci arahā upaṭṭhitassati sato sampajāno parinibbāyati, tena vata re vattabbe – ‘‘arahā kusalacitto parinibbāyatī’’ti.
कुसलचित्तकथा निट्ठिता।
Kusalacittakathā niṭṭhitā.
Related texts:
अट्ठकथा • Aṭṭhakathā / अभिधम्मपिटक (अट्ठकथा) • Abhidhammapiṭaka (aṭṭhakathā) / पञ्चपकरण-अट्ठकथा • Pañcapakaraṇa-aṭṭhakathā / २. कुसलचित्तकथावण्णना • 2. Kusalacittakathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-मूलटीका • Pañcapakaraṇa-mūlaṭīkā / २. कुसलचित्तकथावण्णना • 2. Kusalacittakathāvaṇṇanā
टीका • Tīkā / अभिधम्मपिटक (टीका) • Abhidhammapiṭaka (ṭīkā) / पञ्चपकरण-अनुटीका • Pañcapakaraṇa-anuṭīkā / २. कुसलचित्तकथावण्णना • 2. Kusalacittakathāvaṇṇanā
