| Library / Tipiṭaka / ติปิฎก • Tipiṭaka / กถาวตฺถุปาฬิ • Kathāvatthupāḷi |
๒๒. พาวีสติมวโคฺค
22. Bāvīsatimavaggo
(๒๐๙) ๒. กุสลจิตฺตกถา
(209) 2. Kusalacittakathā
๘๙๔. อรหา กุสลจิโตฺต ปรินิพฺพายตีติ? อามนฺตาฯ อรหา ปุญฺญาภิสงฺขารํ อภิสงฺขโรโนฺต… อาเนญฺชาภิสงฺขารํ อภิสงฺขโรโนฺต… คติสํวตฺตนิยํ กมฺมํ กโรโนฺต… ภวสํวตฺตนิยํ กมฺมํ กโรโนฺต… อิสฺสริยสํวตฺตนิยํ กมฺมํ กโรโนฺต… อธิปจฺจสํวตฺตนิยํ กมฺมํ กโรโนฺต… มหาโภคสํวตฺตนิยํ กมฺมํ กโรโนฺต… มหาปริวารสํวตฺตนิยํ กมฺมํ กโรโนฺต… เทวโสภคฺยสํวตฺตนิยํ กมฺมํ กโรโนฺต… มนุสฺสโสภคฺยสํวตฺตนิยํ กมฺมํ กโรโนฺต ปรินิพฺพายตีติ? น เหวํ วตฺตเพฺพ…เป.…ฯ
894. Arahā kusalacitto parinibbāyatīti? Āmantā. Arahā puññābhisaṅkhāraṃ abhisaṅkharonto… āneñjābhisaṅkhāraṃ abhisaṅkharonto… gatisaṃvattaniyaṃ kammaṃ karonto… bhavasaṃvattaniyaṃ kammaṃ karonto… issariyasaṃvattaniyaṃ kammaṃ karonto… adhipaccasaṃvattaniyaṃ kammaṃ karonto… mahābhogasaṃvattaniyaṃ kammaṃ karonto… mahāparivārasaṃvattaniyaṃ kammaṃ karonto… devasobhagyasaṃvattaniyaṃ kammaṃ karonto… manussasobhagyasaṃvattaniyaṃ kammaṃ karonto parinibbāyatīti? Na hevaṃ vattabbe…pe….
อรหา กุสลจิโตฺต ปรินิพฺพายตีติ? อามนฺตาฯ อรหา อาจินโนฺต อปจินโนฺต ปชหโนฺต อุปาทิยโนฺต วิสิเนโนฺต อุสฺสิเนโนฺต วิธูเปโนฺต สนฺธูเปโนฺต ปรินิพฺพายตีติ? น เหวํ วตฺตเพฺพ …เป.… นนุ อรหา เนวาจินาติ น อปจินาติ อปจินิตฺวา ฐิโตติ? อามนฺตาฯ หญฺจิ อรหา เนวาจินาติ น อปจินาติ อปจินิตฺวา ฐิโต, โน จ วต เร วตฺตเพฺพ – ‘‘อรหา กุสลจิโตฺต ปรินิพฺพายตี’’ติฯ นนุ อรหา เนว ปชหติ น อุปาทิยติ ปชหิตฺวา ฐิโต, เนว วิสิเนติ น อุสฺสิเนติ วิสิเนตฺวา ฐิโต; นนุ อรหา เนว วิธูเปติ น สนฺธูเปติ วิธูเปตฺวา ฐิโตติ? อามนฺตาฯ หญฺจิ อรหา เนว วิธูเปติ น สนฺธูเปติ วิธูเปตฺวา ฐิโต, โน จ วต เร วตฺตเพฺพ – ‘‘อรหา กุสลจิโตฺต ปรินิพฺพายตี’’ติฯ
Arahā kusalacitto parinibbāyatīti? Āmantā. Arahā ācinanto apacinanto pajahanto upādiyanto visinento ussinento vidhūpento sandhūpento parinibbāyatīti? Na hevaṃ vattabbe …pe… nanu arahā nevācināti na apacināti apacinitvā ṭhitoti? Āmantā. Hañci arahā nevācināti na apacināti apacinitvā ṭhito, no ca vata re vattabbe – ‘‘arahā kusalacitto parinibbāyatī’’ti. Nanu arahā neva pajahati na upādiyati pajahitvā ṭhito, neva visineti na ussineti visinetvā ṭhito; nanu arahā neva vidhūpeti na sandhūpeti vidhūpetvā ṭhitoti? Āmantā. Hañci arahā neva vidhūpeti na sandhūpeti vidhūpetvā ṭhito, no ca vata re vattabbe – ‘‘arahā kusalacitto parinibbāyatī’’ti.
๘๙๕. น วตฺตพฺพํ – ‘‘อรหา กุสลจิโตฺต ปรินิพฺพายตี’’ติ? อามนฺตาฯ นนุ อรหา อุปฎฺฐิตสฺสติ สโต สมฺปชาโน ปรินิพฺพายตีติ? อามนฺตาฯ หญฺจิ อรหา อุปฎฺฐิตสฺสติ สโต สมฺปชาโน ปรินิพฺพายติ, เตน วต เร วตฺตเพฺพ – ‘‘อรหา กุสลจิโตฺต ปรินิพฺพายตี’’ติฯ
895. Na vattabbaṃ – ‘‘arahā kusalacitto parinibbāyatī’’ti? Āmantā. Nanu arahā upaṭṭhitassati sato sampajāno parinibbāyatīti? Āmantā. Hañci arahā upaṭṭhitassati sato sampajāno parinibbāyati, tena vata re vattabbe – ‘‘arahā kusalacitto parinibbāyatī’’ti.
กุสลจิตฺตกถา นิฎฺฐิตาฯ
Kusalacittakathā niṭṭhitā.
Related texts:
อฎฺฐกถา • Aṭṭhakathā / อภิธมฺมปิฎก (อฎฺฐกถา) • Abhidhammapiṭaka (aṭṭhakathā) / ปญฺจปกรณ-อฎฺฐกถา • Pañcapakaraṇa-aṭṭhakathā / ๒. กุสลจิตฺตกถาวณฺณนา • 2. Kusalacittakathāvaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-มูลฎีกา • Pañcapakaraṇa-mūlaṭīkā / ๒. กุสลจิตฺตกถาวณฺณนา • 2. Kusalacittakathāvaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / ปญฺจปกรณ-อนุฎีกา • Pañcapakaraṇa-anuṭīkā / ๒. กุสลจิตฺตกถาวณฺณนา • 2. Kusalacittakathāvaṇṇanā
