| Library / Tipiṭaka / திபிடக • Tipiṭaka / த⁴ம்மஸங்க³ணி-அட்ட²கதா² • Dhammasaṅgaṇi-aṭṭhakathā |
குஸலகம்மபத²கதா²
Kusalakammapathakathā
பாணாதிபாதாதீ³ஹி பன விரதியோ அனபி⁴ஜ்ஜா²அப்³யாபாத³ஸம்மாதி³ட்டி²யோ சாதி இமே த³ஸ குஸலகம்மபதா² நாம. தத்த² பாணாதிபாதாத³யோ வுத்தத்தா² ஏவ. பாணாதிபாதாதீ³ஹி ஏதாய விரமந்தி, ஸயங் வா விரமதி, விரமணமத்தமேவ வா ஏதந்தி விரதி. யா பாணாதிபாதா விரமந்தஸ்ஸ ‘‘யா தஸ்மிங் ஸமயே பாணாதிபாதா ஆரதி விரதீ’’தி (த⁴॰ ஸ॰ 299-301) ஏவங் வுத்தா குஸலசித்தஸம்பயுத்தா விரதி, ஸா பபே⁴த³தோ திவிதா⁴ ஹோதி – ஸம்பத்தவிரதி, ஸமாதா³னவிரதி, ஸமுச்சே²த³விரதீதி.
Pāṇātipātādīhi pana viratiyo anabhijjhāabyāpādasammādiṭṭhiyo cāti ime dasa kusalakammapathā nāma. Tattha pāṇātipātādayo vuttatthā eva. Pāṇātipātādīhi etāya viramanti, sayaṃ vā viramati, viramaṇamattameva vā etanti virati. Yā pāṇātipātā viramantassa ‘‘yā tasmiṃ samaye pāṇātipātā ārati viratī’’ti (dha. sa. 299-301) evaṃ vuttā kusalacittasampayuttā virati, sā pabhedato tividhā hoti – sampattavirati, samādānavirati, samucchedaviratīti.
தத்த² அஸமாதி³ன்னஸிக்கா²பதா³னங் அத்தனோ ஜாதிவயபா³ஹுஸச்சாதீ³னி பச்சவெக்கி²த்வா ‘அயுத்தங் அம்ஹாகங் ஏவரூபங் பாபங் காது’ந்தி ஸம்பத்தங் வத்து²ங் அவீதிக்கமந்தானங் உப்பஜ்ஜமானா விரதி ‘ஸம்பத்தவிரதீ’தி வேதி³தப்³பா³ – ஸீஹளதீ³பே சக்கனஉபாஸகஸ்ஸ விய. தஸ்ஸ கிர த³ஹரகாலேயேவ மாதுயா ரோகோ³ உப்பஜ்ஜி. வேஜ்ஜேன ச ‘அல்லஸஸமங்ஸங் லத்³து⁴ங் வட்டதீ’தி வுத்தங். ததோ சக்கனஸ்ஸ பா⁴தா ‘க³ச்ச², தாத, கெ²த்தங் ஆஹிண்டா³ஹீ’தி சக்கனங் பேஸேஸி. ஸோ தத்த² க³தோ. தஸ்மிஞ்ச ஸமயே ஏகோ ஸஸோ தருணஸஸ்ஸங் கா²தி³துங் ஆக³தோ ஹோதி. ஸோ தங் தி³ஸ்வாவ வேகே³ன தா⁴வந்தோ வல்லியா ப³த்³தோ⁴ ‘கிரி கிரீ’தி ஸத்³த³மகாஸி. சக்கனோ தேன ஸத்³தே³ன க³ந்த்வா தங் க³ஹெத்வா சிந்தேஸி – ‘மாது பே⁴ஸஜ்ஜங் கரோமீ’தி. புன சிந்தேஸி – ‘ந மேதங் பதிரூபங் ய்வாஹங் மாது ஜீவிதகாரணா பரங் ஜீவிதா வோரோபெய்ய’ந்தி. அத² நங் ‘க³ச்ச², அரஞ்ஞே ஸஸேஹி ஸத்³தி⁴ங் திணோத³கங் பரிபு⁴ஞ்ஜா’தி முஞ்சி. பா⁴தரா ச ‘கிங் தாத ஸஸோ லத்³தோ⁴’தி புச்சி²தோ தங் பவத்திங் ஆசிக்கி². ததோ நங் பா⁴தா பரிபா⁴ஸி. ஸோ மாதுஸந்திகங் க³ந்த்வா ‘யதோ அஹங் ஜாதோ நாபி⁴ஜானாமி ஸஞ்சிச்ச பாணங் ஜீவிதா வோரோபேதா’தி ஸச்சங் வத்வா அட்டா²ஸி. தாவதே³வஸ்ஸ மாதா அரோகா³ அஹோஸி.
Tattha asamādinnasikkhāpadānaṃ attano jātivayabāhusaccādīni paccavekkhitvā ‘ayuttaṃ amhākaṃ evarūpaṃ pāpaṃ kātu’nti sampattaṃ vatthuṃ avītikkamantānaṃ uppajjamānā virati ‘sampattaviratī’ti veditabbā – sīhaḷadīpe cakkanaupāsakassa viya. Tassa kira daharakāleyeva mātuyā rogo uppajji. Vejjena ca ‘allasasamaṃsaṃ laddhuṃ vaṭṭatī’ti vuttaṃ. Tato cakkanassa bhātā ‘gaccha, tāta, khettaṃ āhiṇḍāhī’ti cakkanaṃ pesesi. So tattha gato. Tasmiñca samaye eko saso taruṇasassaṃ khādituṃ āgato hoti. So taṃ disvāva vegena dhāvanto valliyā baddho ‘kiri kirī’ti saddamakāsi. Cakkano tena saddena gantvā taṃ gahetvā cintesi – ‘mātu bhesajjaṃ karomī’ti. Puna cintesi – ‘na metaṃ patirūpaṃ yvāhaṃ mātu jīvitakāraṇā paraṃ jīvitā voropeyya’nti. Atha naṃ ‘gaccha, araññe sasehi saddhiṃ tiṇodakaṃ paribhuñjā’ti muñci. Bhātarā ca ‘kiṃ tāta saso laddho’ti pucchito taṃ pavattiṃ ācikkhi. Tato naṃ bhātā paribhāsi. So mātusantikaṃ gantvā ‘yato ahaṃ jāto nābhijānāmi sañcicca pāṇaṃ jīvitā voropetā’ti saccaṃ vatvā aṭṭhāsi. Tāvadevassa mātā arogā ahosi.
ஸமாதி³ன்னஸிக்கா²பதா³னங் பன ஸிக்கா²பத³ஸமாதா³னே ச ததுத்தரிஞ்ச அத்தனோ ஜீவிதம்பி பரிச்சஜித்வா வத்து²ங் அவீதிக்கமந்தானங் உப்பஜ்ஜமானா விரதி ‘ஸமாதா³னவிரதீ’தி வேதி³தப்³பா³. உத்தரவட்³ட⁴மானபப்³ப³தவாஸீஉபாஸகஸ்ஸ விய. ஸோ கிர அம்ப³ரியவிஹாரவாஸினோ பிங்க³லபு³த்³த⁴ரக்கி²தத்தே²ரஸ்ஸ ஸந்திகே ஸிக்கா²பதா³னி க³ஹெத்வா கெ²த்தங் கஸதி. அத²ஸ்ஸ கோ³ணோ நட்டோ². ஸோ தங் க³வேஸந்தோ உத்தரவட்³ட⁴மானபப்³ப³தங் ஆருஹி. தத்ர நங் மஹாஸப்போ அக்³க³ஹேஸி. ஸோ சிந்தேஸி – ‘இமாயஸ்ஸ திகி²ணவாஸியா ஸீஸங் சி²ந்தா³மீ’தி. புன சிந்தேஸி – ‘ந மேதங் பதிரூபங் ய்வாஹங் பா⁴வனீயஸ்ஸ க³ருனோ ஸந்திகே ஸிக்கா²பதா³னி க³ஹெத்வா பி⁴ந்தெ³ய்ய’ந்தி ஏவங் யாவததியங் சிந்தெத்வா ‘ஜீவிதங் பரிச்சஜாமி, ந ஸிக்கா²பத³’ந்தி அங்ஸே ட²பிதங் திகி²ணத³ண்ட³வாஸிங் அரஞ்ஞே ச²ட்³டே³ஸி. தாவதே³வ நங் மஹாவாளோ முஞ்சித்வா அக³மாஸீதி.
Samādinnasikkhāpadānaṃ pana sikkhāpadasamādāne ca tatuttariñca attano jīvitampi pariccajitvā vatthuṃ avītikkamantānaṃ uppajjamānā virati ‘samādānaviratī’ti veditabbā. Uttaravaḍḍhamānapabbatavāsīupāsakassa viya. So kira ambariyavihāravāsino piṅgalabuddharakkhitattherassa santike sikkhāpadāni gahetvā khettaṃ kasati. Athassa goṇo naṭṭho. So taṃ gavesanto uttaravaḍḍhamānapabbataṃ āruhi. Tatra naṃ mahāsappo aggahesi. So cintesi – ‘imāyassa tikhiṇavāsiyā sīsaṃ chindāmī’ti. Puna cintesi – ‘na metaṃ patirūpaṃ yvāhaṃ bhāvanīyassa garuno santike sikkhāpadāni gahetvā bhindeyya’nti evaṃ yāvatatiyaṃ cintetvā ‘jīvitaṃ pariccajāmi, na sikkhāpada’nti aṃse ṭhapitaṃ tikhiṇadaṇḍavāsiṃ araññe chaḍḍesi. Tāvadeva naṃ mahāvāḷo muñcitvā agamāsīti.
அரியமக்³க³ஸம்பயுத்தா பன விரதி ‘ஸமுச்சே²த³விரதீ’தி வேதி³தப்³பா³, யஸ்ஸா உப்பத்திதோ பபு⁴தி ‘பாணங் கா⁴தெஸ்ஸாமீ’தி அரியபுக்³க³லானங் சித்தம்பி நுப்பஜ்ஜதீதி.
Ariyamaggasampayuttā pana virati ‘samucchedaviratī’ti veditabbā, yassā uppattito pabhuti ‘pāṇaṃ ghātessāmī’ti ariyapuggalānaṃ cittampi nuppajjatīti.
இதா³னி யதா² அகுஸலானங் ஏவங் இமேஸம்பி குஸலகம்மபதா²னங் த⁴ம்மதோ கொட்டா²ஸதோ ஆரம்மணதோ வேத³னாதோ மூலதோதி பஞ்சஹாகாரேஹி வினிச்ச²யோ வேதி³தப்³போ³ –
Idāni yathā akusalānaṃ evaṃ imesampi kusalakammapathānaṃ dhammato koṭṭhāsato ārammaṇato vedanāto mūlatoti pañcahākārehi vinicchayo veditabbo –
தத்த² ‘த⁴ம்மதோ’தி ஏதேஸு ஹி படிபாடியா ஸத்த சேதனாபி வட்டந்தி, விரதியோபி; அந்தே தயோ சேதனாஸம்பயுத்தாவ.
Tattha ‘dhammato’ti etesu hi paṭipāṭiyā satta cetanāpi vaṭṭanti, viratiyopi; ante tayo cetanāsampayuttāva.
‘கொட்டா²ஸதோ’தி படிபாடியா ஸத்த கம்மபதா² ஏவ, நோ மூலானி. அந்தே தயோ கம்மபதா² சேவ மூலானி ச. அனபி⁴ஜ்ஜா² ஹி மூலங் பத்வா ‘அலோபோ⁴ குஸலமூலங்’ ஹோதி. அப்³யாபாதோ³ ‘அதோ³ஸோ குஸலமூலங்’, ஸம்மாதி³ட்டி² ‘அமோஹோ குஸலமூலங்’.
‘Koṭṭhāsato’ti paṭipāṭiyā satta kammapathā eva, no mūlāni. Ante tayo kammapathā ceva mūlāni ca. Anabhijjhā hi mūlaṃ patvā ‘alobho kusalamūlaṃ’ hoti. Abyāpādo ‘adoso kusalamūlaṃ’, sammādiṭṭhi ‘amoho kusalamūlaṃ’.
‘ஆரம்மணதோ’தி பாணாதிபாதாதீ³னங் ஆரம்மணானேவ ஏதேஸங் ஆரம்மணானி. வீதிக்கமிதப்³ப³தோயேவ ஹி வேரமணீ நாம ஹோதி. யதா² பன நிப்³பா³னாரம்மணோ அரியமக்³கோ³ கிலேஸே பஜஹதி, ஏவங் ஜீவிதிந்த்³ரியாதி³ஆரம்மணாபேதே கம்மபதா² பாணாதிபாதாதீ³னி து³ஸ்ஸீல்யானி பஜஹந்தீதி வேதி³தப்³பா³.
‘Ārammaṇato’ti pāṇātipātādīnaṃ ārammaṇāneva etesaṃ ārammaṇāni. Vītikkamitabbatoyeva hi veramaṇī nāma hoti. Yathā pana nibbānārammaṇo ariyamaggo kilese pajahati, evaṃ jīvitindriyādiārammaṇāpete kammapathā pāṇātipātādīni dussīlyāni pajahantīti veditabbā.
‘வேத³னாதோ’தி ஸப்³பே³ ஸுக²வேத³னா வா ஹொந்தி மஜ்ஜ²த்தவேத³னா வா. குஸலங் பத்வா ஹி து³க்க²வேத³னா நாம நத்தி².
‘Vedanāto’ti sabbe sukhavedanā vā honti majjhattavedanā vā. Kusalaṃ patvā hi dukkhavedanā nāma natthi.
‘மூலதோ’தி படிபாடியா ஸத்த கம்மபதா² ஞாணஸம்பயுத்தசித்தேன விரமந்தஸ்ஸ அலோப⁴அதோ³ஸஅமோஹவஸேன திமூலா ஹொந்தி; ஞாணவிப்பயுத்தசித்தேன விரமந்தஸ்ஸ த்³விமூலா. அனபி⁴ஜ்ஜா² ஞாணஸம்பயுத்தசித்தேன விரமந்தஸ்ஸ த்³விமூலா ஹோதி; ஞாணவிப்பயுத்தசித்தேன ஏகமூலா. அலோபோ⁴ பன அத்தனாவ அத்தனோ மூலங் ந ஹோதி. அப்³யாபாதே³பி ஏஸேவ நயோ. ஸம்மாதி³ட்டி² அலோபா⁴தோ³ஸவஸேன த்³விமூலாவ ஹோதி. இமே த³ஸ குஸலகம்மபதா² நாம.
‘Mūlato’ti paṭipāṭiyā satta kammapathā ñāṇasampayuttacittena viramantassa alobhaadosaamohavasena timūlā honti; ñāṇavippayuttacittena viramantassa dvimūlā. Anabhijjhā ñāṇasampayuttacittena viramantassa dvimūlā hoti; ñāṇavippayuttacittena ekamūlā. Alobho pana attanāva attano mūlaṃ na hoti. Abyāpādepi eseva nayo. Sammādiṭṭhi alobhādosavasena dvimūlāva hoti. Ime dasa kusalakammapathā nāma.
