| Library / Tipiṭaka / တိပိဋက • Tipiṭaka / ပဉ္စပကရဏ-အဋ္ဌကထာ • Pañcapakaraṇa-aṭṭhakathā |
၁၄. စုဒ္ဒသမဝဂ္ဂော
14. Cuddasamavaggo
၁. ကုသလာကုသလပဋိသန္ဒဟနကထာဝဏ္ဏနာ
1. Kusalākusalapaṭisandahanakathāvaṇṇanā
၆၈၆-၆၉၀. ဣဒာနိ ကုသလာကုသလပဋိသန္ဒဟနကထာ နာမ ဟောတိ။ တတ္ထ ကုသလံ ဝာ အကုသလသ္သ, အကုသလံ ဝာ ကုသလသ္သ အနန္တရာ ဥပ္ပဇ္ဇနကံ နာမ နတ္ထီတိ တေသံ အညမညံ ပဋိသန္ဓာနံ န ယုဇ္ဇတိ။ ယေ ပန ယသ္မာ ဧကဝတ္ထုသ္မိညေဝ ရဇ္ဇတိ ဝိရဇ္ဇတိ စ, တသ္မာ တံ အညမညံ ပဋိသန္ဒဟတီတိ လဒ္ဓိံ ဂဟေတ္ဝာ ဌိတာ, သေယ္ယထာပိ မဟာသင္ဃိကာ; တေ သန္ဓာယ ပုစ္ဆာ သကဝာဒိသ္သ; ပဋိညာ ဣတရသ္သ။ အာဝဋ္ဋနာ ပဏိဓီတိ ဥဘယံ အာဝဇ္ဇနသ္သေဝ နာမံ။ တဉ္ဟိ ဘဝင္ဂံ အာဝဋ္ဋေတီတိ အာဝဋ္ဋနာ။ ဘဝင္ဂာရမ္မဏတော အညသ္မိံ အာရမ္မဏေ စိတ္တံ ပဏိဒဟတိ ဌပေတီတိ ပဏိဓိ။ ကုသလံ အနာဝဋ္ဋေန္တသ္သာတိ ယံ တံ အကုသလာနန္တရံ ပဋိသန္ဒဟန္တံ ကုသလံ ဥပ္ပဇ္ဇတိ, တံ အနာဝဋ္ဋေန္တသ္သ ဥပ္ပဇ္ဇတီတိ ပုစ္ဆတိ။ ဣတရော ပန ဝိနာ အာဝဇ္ဇနေန ကုသလသ္သ ဥပ္ပတ္တိံ အပသ္သန္တော ပဋိက္ခိပတိ။ ကုသလံ အယောနိသော မနသိကရောတောတိ ဣဒံ ယဒိ အကုသလာနန္တရံ ကုသလံ ဥပ္ပဇ္ဇေယ္ယ, အကုသလသ္သေဝ အာဝဇ္ဇနေန အယောနိသော မနသိကရောတော ဥပ္ပဇ္ဇေယ္ယာတိ စောဒနတ္ထံ ဝုတ္တံ။ သေသံ ယထာပာဠိမေဝ နိယ္ယာတိ။ နနု ယသ္မိံယေဝ ဝတ္ထုသ္မိန္တိ ဝစနံ ဧကာရမ္မဏေ သရာဂဝိရာဂုပ္ပတ္တိံ ဒီပေတိ, န ကုသလာကုသလာနံ အနန္တရတံ, တသ္မာ အသာဓကန္တိ။
686-690. Idāni kusalākusalapaṭisandahanakathā nāma hoti. Tattha kusalaṃ vā akusalassa, akusalaṃ vā kusalassa anantarā uppajjanakaṃ nāma natthīti tesaṃ aññamaññaṃ paṭisandhānaṃ na yujjati. Ye pana yasmā ekavatthusmiññeva rajjati virajjati ca, tasmā taṃ aññamaññaṃ paṭisandahatīti laddhiṃ gahetvā ṭhitā, seyyathāpi mahāsaṅghikā; te sandhāya pucchā sakavādissa; paṭiññā itarassa. Āvaṭṭanā paṇidhīti ubhayaṃ āvajjanasseva nāmaṃ. Tañhi bhavaṅgaṃ āvaṭṭetīti āvaṭṭanā. Bhavaṅgārammaṇato aññasmiṃ ārammaṇe cittaṃ paṇidahati ṭhapetīti paṇidhi. Kusalaṃ anāvaṭṭentassāti yaṃ taṃ akusalānantaraṃ paṭisandahantaṃ kusalaṃ uppajjati, taṃ anāvaṭṭentassa uppajjatīti pucchati. Itaro pana vinā āvajjanena kusalassa uppattiṃ apassanto paṭikkhipati. Kusalaṃ ayoniso manasikarototi idaṃ yadi akusalānantaraṃ kusalaṃ uppajjeyya, akusalasseva āvajjanena ayoniso manasikaroto uppajjeyyāti codanatthaṃ vuttaṃ. Sesaṃ yathāpāḷimeva niyyāti. Nanu yasmiṃyeva vatthusminti vacanaṃ ekārammaṇe sarāgavirāguppattiṃ dīpeti, na kusalākusalānaṃ anantarataṃ, tasmā asādhakanti.
ကုသလာကုသလပဋိသန္ဒဟနကထာဝဏ္ဏနာ။
Kusalākusalapaṭisandahanakathāvaṇṇanā.
Related texts:
တိပိဋက (မူလ) • Tipiṭaka (Mūla) / အဘိဓမ္မပိဋက • Abhidhammapiṭaka / ကထာဝတ္ထုပာဠိ • Kathāvatthupāḷi / (၁၃၆) ၁. ကုသလာကုသလပဋိသန္ဒဟနကထာ • (136) 1. Kusalākusalapaṭisandahanakathā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၁. ကုသလာကုသလပဋိသန္ဒဟနကထာဝဏ္ဏနာ • 1. Kusalākusalapaṭisandahanakathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၁. ကုသလာကုသလပဋိသန္ဒဟနကထာဝဏ္ဏနာ • 1. Kusalākusalapaṭisandahanakathāvaṇṇanā
