| Library / Tipiṭaka / ཏིཔིཊཀ • Tipiṭaka / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā |
༡༤. ཙུདྡསམཝགྒོ
14. Cuddasamavaggo
༡. ཀུསལཱཀུསལཔཊིསནྡཧནཀཐཱཝཎྞནཱ
1. Kusalākusalapaṭisandahanakathāvaṇṇanā
༦༨༦-༦༩༠. ཨིདཱནི ཀུསལཱཀུསལཔཊིསནྡཧནཀཐཱ ནཱམ ཧོཏི། ཏཏྠ ཀུསལཾ ཝཱ ཨཀུསལསྶ, ཨཀུསལཾ ཝཱ ཀུསལསྶ ཨནནྟརཱ ཨུཔྤཛྫནཀཾ ནཱམ ནཏྠཱིཏི ཏེསཾ ཨཉྙམཉྙཾ པཊིསནྡྷཱནཾ ན ཡུཛྫཏི། ཡེ པན ཡསྨཱ ཨེཀཝཏྠུསྨིཉྙེཝ རཛྫཏི ཝིརཛྫཏི ཙ, ཏསྨཱ ཏཾ ཨཉྙམཉྙཾ པཊིསནྡཧཏཱིཏི ལདྡྷིཾ གཧེཏྭཱ ཋིཏཱ, སེཡྻཐཱཔི མཧཱསངྒྷིཀཱ; ཏེ སནྡྷཱཡ པུཙྪཱ སཀཝཱདིསྶ; པཊིཉྙཱ ཨིཏརསྶ། ཨཱཝཊྚནཱ པཎིདྷཱིཏི ཨུབྷཡཾ ཨཱཝཛྫནསྶེཝ ནཱམཾ། ཏཉྷི བྷཝངྒཾ ཨཱཝཊྚེཏཱིཏི ཨཱཝཊྚནཱ། བྷཝངྒཱརམྨཎཏོ ཨཉྙསྨིཾ ཨཱརམྨཎེ ཙིཏྟཾ པཎིདཧཏི ཋཔེཏཱིཏི པཎིདྷི། ཀུསལཾ ཨནཱཝཊྚེནྟསྶཱཏི ཡཾ ཏཾ ཨཀུསལཱནནྟརཾ པཊིསནྡཧནྟཾ ཀུསལཾ ཨུཔྤཛྫཏི, ཏཾ ཨནཱཝཊྚེནྟསྶ ཨུཔྤཛྫཏཱིཏི པུཙྪཏི། ཨིཏརོ པན ཝིནཱ ཨཱཝཛྫནེན ཀུསལསྶ ཨུཔྤཏྟིཾ ཨཔསྶནྟོ པཊིཀྑིཔཏི། ཀུསལཾ ཨཡོནིསོ མནསིཀརོཏོཏི ཨིདཾ ཡདི ཨཀུསལཱནནྟརཾ ཀུསལཾ ཨུཔྤཛྫེཡྻ, ཨཀུསལསྶེཝ ཨཱཝཛྫནེན ཨཡོནིསོ མནསིཀརོཏོ ཨུཔྤཛྫེཡྻཱཏི ཙོདནཏྠཾ ཝུཏྟཾ། སེསཾ ཡཐཱཔཱལི༹མེཝ ནིཡྻཱཏི། ནནུ ཡསྨིཾཡེཝ ཝཏྠུསྨིནྟི ཝཙནཾ ཨེཀཱརམྨཎེ སརཱགཝིརཱགུཔྤཏྟིཾ དཱིཔེཏི, ན ཀུསལཱཀུསལཱནཾ ཨནནྟརཏཾ, ཏསྨཱ ཨསཱདྷཀནྟི།
686-690. Idāni kusalākusalapaṭisandahanakathā nāma hoti. Tattha kusalaṃ vā akusalassa, akusalaṃ vā kusalassa anantarā uppajjanakaṃ nāma natthīti tesaṃ aññamaññaṃ paṭisandhānaṃ na yujjati. Ye pana yasmā ekavatthusmiññeva rajjati virajjati ca, tasmā taṃ aññamaññaṃ paṭisandahatīti laddhiṃ gahetvā ṭhitā, seyyathāpi mahāsaṅghikā; te sandhāya pucchā sakavādissa; paṭiññā itarassa. Āvaṭṭanā paṇidhīti ubhayaṃ āvajjanasseva nāmaṃ. Tañhi bhavaṅgaṃ āvaṭṭetīti āvaṭṭanā. Bhavaṅgārammaṇato aññasmiṃ ārammaṇe cittaṃ paṇidahati ṭhapetīti paṇidhi. Kusalaṃ anāvaṭṭentassāti yaṃ taṃ akusalānantaraṃ paṭisandahantaṃ kusalaṃ uppajjati, taṃ anāvaṭṭentassa uppajjatīti pucchati. Itaro pana vinā āvajjanena kusalassa uppattiṃ apassanto paṭikkhipati. Kusalaṃ ayoniso manasikarototi idaṃ yadi akusalānantaraṃ kusalaṃ uppajjeyya, akusalasseva āvajjanena ayoniso manasikaroto uppajjeyyāti codanatthaṃ vuttaṃ. Sesaṃ yathāpāḷimeva niyyāti. Nanu yasmiṃyeva vatthusminti vacanaṃ ekārammaṇe sarāgavirāguppattiṃ dīpeti, na kusalākusalānaṃ anantarataṃ, tasmā asādhakanti.
ཀུསལཱཀུསལཔཊིསནྡཧནཀཐཱཝཎྞནཱ།
Kusalākusalapaṭisandahanakathāvaṇṇanā.
Related texts:
ཏིཔིཊཀ (མཱུལ) • Tipiṭaka (Mūla) / ཨབྷིདྷམྨཔིཊཀ • Abhidhammapiṭaka / ཀཐཱཝཏྠུཔཱལི༹ • Kathāvatthupāḷi / (༡༣༦) ༡. ཀུསལཱཀུསལཔཊིསནྡཧནཀཐཱ • (136) 1. Kusalākusalapaṭisandahanakathā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༡. ཀུསལཱཀུསལཔཊིསནྡཧནཀཐཱཝཎྞནཱ • 1. Kusalākusalapaṭisandahanakathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༡. ཀུསལཱཀུསལཔཊིསནྡཧནཀཐཱཝཎྞནཱ • 1. Kusalākusalapaṭisandahanakathāvaṇṇanā
