| Library / Tipiṭaka / তিপিটক • Tipiṭaka / কথাৰত্থুপাল়ি • Kathāvatthupāḷi |
১৩. তেরসমৰগ্গো
13. Terasamavaggo
(১২৭) ২. কুসলপটিলাভকথা
(127) 2. Kusalapaṭilābhakathā
৬৫৮. কপ্পট্ঠো কুসলং চিত্তং ন পটিলভেয্যাতি? আমন্তা। কপ্পট্ঠো দানং দদেয্যাতি? আমন্তা। হঞ্চি কপ্পট্ঠো দানং দদেয্য, নো চ ৰত রে ৰত্তব্বে – ‘‘কপ্পট্ঠো কুসলং চিত্তং ন পটিলভেয্যা’’তি।
658. Kappaṭṭho kusalaṃ cittaṃ na paṭilabheyyāti? Āmantā. Kappaṭṭho dānaṃ dadeyyāti? Āmantā. Hañci kappaṭṭho dānaṃ dadeyya, no ca vata re vattabbe – ‘‘kappaṭṭho kusalaṃ cittaṃ na paṭilabheyyā’’ti.
কপ্পট্ঠো কুসলং চিত্তং ন পটিলভেয্যাতি? আমন্তা। কপ্পট্ঠো চীৰরং দদেয্য…পে॰… পিণ্ডপাতং দদেয্য…পে॰… সেনাসনং দদেয্য…পে॰… গিলানপচ্চযভেসজ্জপরিক্খারং দদেয্য … খাদনীযং দদেয্য… ভোজনীযং দদেয্য… পানীযং দদেয্য… চেতিযং ৰন্দেয্য… চেতিযে মালং আরোপেয্য… গন্ধং আরোপেয্য… ৰিলেপনং আরোপেয্য…পে॰… চেতিযং অভিদক্খিণং 1 করেয্যাতি? আমন্তা। হঞ্চি কপ্পট্ঠো চেতিযং অভিদক্খিণং করেয্য, নো চ ৰত রে ৰত্তব্বে – ‘‘কপ্পট্ঠো কুসলং চিত্তং ন পটিলভেয্যা’’তি…পে॰…।
Kappaṭṭho kusalaṃ cittaṃ na paṭilabheyyāti? Āmantā. Kappaṭṭho cīvaraṃ dadeyya…pe… piṇḍapātaṃ dadeyya…pe… senāsanaṃ dadeyya…pe… gilānapaccayabhesajjaparikkhāraṃ dadeyya … khādanīyaṃ dadeyya… bhojanīyaṃ dadeyya… pānīyaṃ dadeyya… cetiyaṃ vandeyya… cetiye mālaṃ āropeyya… gandhaṃ āropeyya… vilepanaṃ āropeyya…pe… cetiyaṃ abhidakkhiṇaṃ 2 kareyyāti? Āmantā. Hañci kappaṭṭho cetiyaṃ abhidakkhiṇaṃ kareyya, no ca vata re vattabbe – ‘‘kappaṭṭho kusalaṃ cittaṃ na paṭilabheyyā’’ti…pe….
৬৫৯. কপ্পট্ঠো কুসলং চিত্তং পটিলভেয্যাতি? আমন্তা। ততো ৰুট্ঠানং কুসলং চিত্তং পটিলভেয্যাতি? আমন্তা। রূপাৰচরং…পে॰… অরূপাৰচরং…পে॰… লোকুত্তরং কুসলং চিত্তং পটিলভেয্যাতি? ন হেৰং ৰত্তব্বে…পে॰…।
659. Kappaṭṭho kusalaṃ cittaṃ paṭilabheyyāti? Āmantā. Tato vuṭṭhānaṃ kusalaṃ cittaṃ paṭilabheyyāti? Āmantā. Rūpāvacaraṃ…pe… arūpāvacaraṃ…pe… lokuttaraṃ kusalaṃ cittaṃ paṭilabheyyāti? Na hevaṃ vattabbe…pe….
কুসলপটিলাভকথা নিট্ঠিতা।
Kusalapaṭilābhakathā niṭṭhitā.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / পঞ্চপকরণ-অট্ঠকথা • Pañcapakaraṇa-aṭṭhakathā / ২. কুসলপটিলাভকথাৰণ্ণনা • 2. Kusalapaṭilābhakathāvaṇṇanā
