| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၃. တေရသမဝဂ္ဂော
13. Terasamavaggo
(၁၂၇) ၂. ကုသလပဋိလာဘကထာ
(127) 2. Kusalapaṭilābhakathā
၆၅၈. ကပ္ပဋ္ဌော ကုသလံ စိတ္တံ န ပဋိလဘေယ္ယာတိ? အာမန္တာ။ ကပ္ပဋ္ဌော ဒာနံ ဒဒေယ္ယာတိ? အာမန္တာ။ ဟဉ္စိ ကပ္ပဋ္ဌော ဒာနံ ဒဒေယ္ယ, နော စ ဝတ ရေ ဝတ္တဗ္ဗေ – ‘‘ကပ္ပဋ္ဌော ကုသလံ စိတ္တံ န ပဋိလဘေယ္ယာ’’တိ။
658. Kappaṭṭho kusalaṃ cittaṃ na paṭilabheyyāti? Āmantā. Kappaṭṭho dānaṃ dadeyyāti? Āmantā. Hañci kappaṭṭho dānaṃ dadeyya, no ca vata re vattabbe – ‘‘kappaṭṭho kusalaṃ cittaṃ na paṭilabheyyā’’ti.
ကပ္ပဋ္ဌော ကုသလံ စိတ္တံ န ပဋိလဘေယ္ယာတိ? အာမန္တာ။ ကပ္ပဋ္ဌော စီဝရံ ဒဒေယ္ယ။ပေ.။ ပိဏ္ဍပာတံ ဒဒေယ္ယ။ပေ.။ သေနာသနံ ဒဒေယ္ယ။ပေ.။ ဂိလာနပစ္စယဘေသဇ္ဇပရိက္ခာရံ ဒဒေယ္ယ ။ ခာဒနီယံ ဒဒေယ္ယ။ ဘောဇနီယံ ဒဒေယ္ယ။ ပာနီယံ ဒဒေယ္ယ။ စေတိယံ ဝန္ဒေယ္ယ။ စေတိယေ မာလံ အာရောပေယ္ယ။ ဂန္ဓံ အာရောပေယ္ယ။ ဝိလေပနံ အာရောပေယ္ယ။ပေ.။ စေတိယံ အဘိဒက္ခိဏံ 1 ကရေယ္ယာတိ? အာမန္တာ။ ဟဉ္စိ ကပ္ပဋ္ဌော စေတိယံ အဘိဒက္ခိဏံ ကရေယ္ယ, နော စ ဝတ ရေ ဝတ္တဗ္ဗေ – ‘‘ကပ္ပဋ္ဌော ကုသလံ စိတ္တံ န ပဋိလဘေယ္ယာ’’တိ။ပေ.။။
Kappaṭṭho kusalaṃ cittaṃ na paṭilabheyyāti? Āmantā. Kappaṭṭho cīvaraṃ dadeyya…pe… piṇḍapātaṃ dadeyya…pe… senāsanaṃ dadeyya…pe… gilānapaccayabhesajjaparikkhāraṃ dadeyya … khādanīyaṃ dadeyya… bhojanīyaṃ dadeyya… pānīyaṃ dadeyya… cetiyaṃ vandeyya… cetiye mālaṃ āropeyya… gandhaṃ āropeyya… vilepanaṃ āropeyya…pe… cetiyaṃ abhidakkhiṇaṃ 2 kareyyāti? Āmantā. Hañci kappaṭṭho cetiyaṃ abhidakkhiṇaṃ kareyya, no ca vata re vattabbe – ‘‘kappaṭṭho kusalaṃ cittaṃ na paṭilabheyyā’’ti…pe….
၆၅၉. ကပ္ပဋ္ဌော ကုသလံ စိတ္တံ ပဋိလဘေယ္ယာတိ? အာမန္တာ။ တတော ဝုဋ္ဌာနံ ကုသလံ စိတ္တံ ပဋိလဘေယ္ယာတိ? အာမန္တာ။ ရူပာဝစရံ။ပေ.။ အရူပာဝစရံ။ပေ.။ လောကုတ္တရံ ကုသလံ စိတ္တံ ပဋိလဘေယ္ယာတိ? န ဟေဝံ ဝတ္တဗ္ဗေ။ပေ.။။
659. Kappaṭṭho kusalaṃ cittaṃ paṭilabheyyāti? Āmantā. Tato vuṭṭhānaṃ kusalaṃ cittaṃ paṭilabheyyāti? Āmantā. Rūpāvacaraṃ…pe… arūpāvacaraṃ…pe… lokuttaraṃ kusalaṃ cittaṃ paṭilabheyyāti? Na hevaṃ vattabbe…pe….
ကုသလပဋိလာဘကထာ နိဋ္ဌိတာ။
Kusalapaṭilābhakathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၂. ကုသလပဋိလာဘကထာဝဏ္ဏနာ • 2. Kusalapaṭilābhakathāvaṇṇanā
