| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. குஸலராஸிஸுத்தங்
5. Kusalarāsisuttaṃ
411. ‘‘‘குஸலராஸீ’தி, பி⁴க்க²வே, வத³மானோ சத்தாரோ ஸதிபட்டா²னே ஸம்மா வத³மானோ வதெ³ய்ய. கேவலோ ஹாயங், பி⁴க்க²வே, குஸலராஸி, யதி³த³ங் – சத்தாரோ ஸதிபட்டா²னா.
411. ‘‘‘Kusalarāsī’ti, bhikkhave, vadamāno cattāro satipaṭṭhāne sammā vadamāno vadeyya. Kevalo hāyaṃ, bhikkhave, kusalarāsi, yadidaṃ – cattāro satipaṭṭhānā.
‘‘கதமே சத்தாரோ? இத⁴ , பி⁴க்க²வே, பி⁴க்கு² காயே காயானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங்; வேத³னாஸு…பே॰… சித்தே…பே॰… சித்தானுபஸ்ஸீ…பே॰… த⁴ம்மேஸு த⁴ம்மானுபஸ்ஸீ விஹரதி ஆதாபீ ஸம்பஜானோ ஸதிமா, வினெய்ய லோகே அபி⁴ஜ்ஜா²தோ³மனஸ்ஸங். ‘குஸலராஸீ’தி, பி⁴க்க²வே, வத³மானோ இமே சத்தாரோ ஸதிபட்டா²னே ஸம்மா வத³மானோ வதெ³ய்ய. கேவலோ ஹாயங், பி⁴க்க²வே, குஸலராஸி, யதி³த³ங் – சத்தாரோ ஸதிபட்டா²னா’’தி. பஞ்சமங்.
‘‘Katame cattāro? Idha , bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… cittānupassī…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. ‘Kusalarāsī’ti, bhikkhave, vadamāno ime cattāro satipaṭṭhāne sammā vadamāno vadeyya. Kevalo hāyaṃ, bhikkhave, kusalarāsi, yadidaṃ – cattāro satipaṭṭhānā’’ti. Pañcamaṃ.
