| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৫. কুসলরাসিসুত্তং
5. Kusalarāsisuttaṃ
৪১১. ‘‘‘কুসলরাসী’তি, ভিক্খৰে, ৰদমানো চত্তারো সতিপট্ঠানে সম্মা ৰদমানো ৰদেয্য। কেৰলো হাযং, ভিক্খৰে, কুসলরাসি, যদিদং – চত্তারো সতিপট্ঠানা।
411. ‘‘‘Kusalarāsī’ti, bhikkhave, vadamāno cattāro satipaṭṭhāne sammā vadamāno vadeyya. Kevalo hāyaṃ, bhikkhave, kusalarāsi, yadidaṃ – cattāro satipaṭṭhānā.
‘‘কতমে চত্তারো? ইধ , ভিক্খৰে, ভিক্খু কাযে কাযানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং; ৰেদনাসু…পে॰… চিত্তে…পে॰… চিত্তানুপস্সী…পে॰… ধম্মেসু ধম্মানুপস্সী ৰিহরতি আতাপী সম্পজানো সতিমা, ৰিনেয্য লোকে অভিজ্ঝাদোমনস্সং। ‘কুসলরাসী’তি, ভিক্খৰে, ৰদমানো ইমে চত্তারো সতিপট্ঠানে সম্মা ৰদমানো ৰদেয্য। কেৰলো হাযং, ভিক্খৰে, কুসলরাসি, যদিদং – চত্তারো সতিপট্ঠানা’’তি। পঞ্চমং।
‘‘Katame cattāro? Idha , bhikkhave, bhikkhu kāye kāyānupassī viharati ātāpī sampajāno satimā, vineyya loke abhijjhādomanassaṃ; vedanāsu…pe… citte…pe… cittānupassī…pe… dhammesu dhammānupassī viharati ātāpī sampajāno satimā, vineyya loke abhijjhādomanassaṃ. ‘Kusalarāsī’ti, bhikkhave, vadamāno ime cattāro satipaṭṭhāne sammā vadamāno vadeyya. Kevalo hāyaṃ, bhikkhave, kusalarāsi, yadidaṃ – cattāro satipaṭṭhānā’’ti. Pañcamaṃ.
