| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
குஸஸங்காமனவத்து²கதா²வண்ணனா
Kusasaṅkāmanavatthukathāvaṇṇanā
138. மஹாபச்சரியாதீ³ஸு யங் வுத்தங் ‘‘பது³த்³தா⁴ரேனேவ காரேதப்³போ³’’தி, தங் ஸுவுத்தங். கிந்து தஸ்ஸ பரிகப்பாவஹாரகமத்தங் ந தி³ஸ்ஸதீதி த³ஸ்ஸனத்த²ங் இத³ங் வுத்தங். உத்³தா⁴ரே வாயங் ஆபன்னோ, தஸ்மா தி³ஸ்வா க³ச்ச²ந்தோ ‘‘பது³த்³தா⁴ரேனேவ காரேதப்³போ³’’தி இத³ங் தத்த² து³வுத்தந்தி வுத்தங் ஹோதி. கத²ங்? ‘‘ஸாடகத்தி²கோ ஸாடகபஸிப்³ப³கமேவ க³ஹெத்வா ப³ஹி நிக்க²மித்வா ஸாடகபா⁴வங் ஞத்வா ‘பச்சா² க³ண்ஹிஸ்ஸாமீ’தி ஏவங் பரிகப்பெத்வா க³ண்ஹதி, ந உத்³தா⁴ரே ஏவாபஜ்ஜதி. யதா³ ப³ஹி ட²த்வா ‘ஸாடகோ அய’ந்தி தி³ஸ்வா க³ச்ச²தி, ததா³ பது³த்³தா⁴ரேனேவ காரேதப்³போ³’’தி ந வுத்தமேதங், கிந்து கிஞ்சாபி பரிகப்போ தி³ஸ்ஸதி, புப்³ப³பா⁴கே³ அவஹாரக்க²ணே ந தி³ஸ்ஸதீதி ந ஸோ பரிகப்பாவஹாரோ, அயமத்தோ² மஹாஅட்ட²கதா²யங் வுத்தோவ, தஸ்மா ‘‘ஞாயமேவா’’தி வத³ந்தி. கம்மந்தஸாலா நாம கஸ்ஸகானங் வனச்சே²த³கானங் கே³ஹானி. அயங் தாவாதி ஸசே உபசாரஸீமந்திஆதி³ யாவ தே²ரவாதோ³ மஹாஅட்ட²கதா²னயோ, தத்த² கேசி பனாதிஆதி³ ந க³ஹேதப்³ப³ங் தே²ரவாத³த்தா யுத்திஅபா⁴வதோ, ந ஹி ஸாஹத்தி²கே ஏவங்விதா⁴ அத்த²ஸாத⁴கசேதனா ஹோதி. ஆணத்திகே ஏவ அத்த²ஸாத⁴கசேதனா. ‘‘ஸேஸங் மஹாபச்சரியங் வுத்தேனத்தே²ன ஸமேதீ’’தி வுத்தங்.
138.Mahāpaccariyādīsu yaṃ vuttaṃ ‘‘paduddhāreneva kāretabbo’’ti, taṃ suvuttaṃ. Kintu tassa parikappāvahārakamattaṃ na dissatīti dassanatthaṃ idaṃ vuttaṃ. Uddhāre vāyaṃ āpanno, tasmā disvā gacchanto ‘‘paduddhāreneva kāretabbo’’ti idaṃ tattha duvuttanti vuttaṃ hoti. Kathaṃ? ‘‘Sāṭakatthiko sāṭakapasibbakameva gahetvā bahi nikkhamitvā sāṭakabhāvaṃ ñatvā ‘pacchā gaṇhissāmī’ti evaṃ parikappetvā gaṇhati, na uddhāre evāpajjati. Yadā bahi ṭhatvā ‘sāṭako aya’nti disvā gacchati, tadā paduddhāreneva kāretabbo’’ti na vuttametaṃ, kintu kiñcāpi parikappo dissati, pubbabhāge avahārakkhaṇe na dissatīti na so parikappāvahāro, ayamattho mahāaṭṭhakathāyaṃ vuttova, tasmā ‘‘ñāyamevā’’ti vadanti. Kammantasālā nāma kassakānaṃ vanacchedakānaṃ gehāni. Ayaṃ tāvāti sace upacārasīmantiādi yāva theravādo mahāaṭṭhakathānayo, tattha keci panātiādi na gahetabbaṃ theravādattā yuttiabhāvato, na hi sāhatthike evaṃvidhā atthasādhakacetanā hoti. Āṇattike eva atthasādhakacetanā. ‘‘Sesaṃ mahāpaccariyaṃ vuttenatthena sametī’’ti vuttaṃ.
குஸஸங்காமனகரணே ஸசே பரோ ‘‘நாயங் மம ஸந்தகோ’’தி ஜானாதி, இதரஸ்ஸ ஹத்த²தோ முத்தமத்தே பாராஜிகாபத்தி கீ²லஸங்காமனே விய. ‘‘அத்தனோ ஸந்தகங் ஸசே ஜானாதி, ந ஹோதீ’’தி வத³ந்தி. ஏவங் ஸந்தே பஞ்சகானி ஸங்கரானி ஹொந்தீதி உபபரிக்கி²தப்³ப³ங்.
Kusasaṅkāmanakaraṇe sace paro ‘‘nāyaṃ mama santako’’ti jānāti, itarassa hatthato muttamatte pārājikāpatti khīlasaṅkāmane viya. ‘‘Attano santakaṃ sace jānāti, na hotī’’ti vadanti. Evaṃ sante pañcakāni saṅkarāni hontīti upaparikkhitabbaṃ.
140. பரானுத்³த³யதாயாதி எத்த² பரானுத்³த³யதாய கோடிப்பத்தேன ப⁴க³வதா கஸ்மா ‘‘அனாபத்தி பேதபரிக்³க³ஹே திரச்சா²னக³தபரிக்³க³ஹே’’தி (பாரா॰ 131) வுத்தந்தி சே? பரானுத்³த³யதாய ஏவ. யஸ்ஸ ஹி பரிக்கா²ரஸ்ஸ ஆதா³னே ராஜானோ சோரங் க³ஹெத்வா ந ஹனநாதீ³னி கரெய்யுங், தஸ்மிம்பி நாம ஸமணோ கோ³தமோ பாராஜிகங் பஞ்ஞபெத்வா பி⁴க்கு²ங் அபி⁴க்கு²ங் கரோதீதி மஹாஜனோ ப⁴க³வதி பஸாத³ஞ்ஞத²த்தங் ஆபஜ்ஜித்வா அபாயுபகோ³ ஹோதி. அபேதபரிக்³க³ஹிதா ருக்கா²தீ³ ச து³ல்லபா⁴, ந ச ஸக்கா ஞாதுந்தி ருக்கா²தீ³ஹி பாபபீ⁴ருகோ உபாஸகஜனோ படிமாக⁴ரசேதியபோ³தி⁴க⁴ரவிஹாராதீ³னி அகத்வா மஹதோ புஞ்ஞக்க²ந்த⁴தோ பரிஹாயெய்ய. ‘‘ருக்க²மூலஸேனாஸனங் பங்ஸுகூலசீவரங் நிஸ்ஸாய பப்³ப³ஜ்ஜா’’தி (மஹாவ॰ 128) வுத்தனிஸ்ஸயா ச அனிஸ்ஸயா ஹொந்தி. பரபரிக்³க³ஹிதஸஞ்ஞினோ ஹி பி⁴க்கூ² ருக்க²மூலபங்ஸுகூலானி ந ஸாதி³யிஸ்ஸந்தீதி, பப்³ப³ஜ்ஜா ச ந ஸம்ப⁴வெய்யுங், ஸப்பத³ட்ட²காலே சா²ரிகத்தா²ய ருக்க²ங் அக்³க³ஹெத்வா மரணங் வா நிக³ச்செ²ய்யுங், அச்சி²ன்னசீவராதி³காலே ஸாகா²ப⁴ங்கா³தி³ங் அக்³க³ஹெத்வா நக்³கா³ ஹுத்வா தித்தி²யலத்³தி⁴மேவ ஸுலத்³தி⁴ விய தீ³பெந்தா விசரெய்யுங், ததோ தித்தி²யெஸ்வேவ லோகோ பஸீதி³த்வா தி³ட்டி²க்³க³ஹணங் பத்வா ஸங்ஸாரகா²ணுகோ ப⁴வெய்ய, தஸ்மா ப⁴க³வா பரானுத்³த³யதாய ஏவ ‘‘அனாபத்தி பேதபரிக்³க³ஹே’’திஆதி³மாஹாதி வேதி³தப்³ப³ங்.
140.Parānuddayatāyāti ettha parānuddayatāya koṭippattena bhagavatā kasmā ‘‘anāpatti petapariggahe tiracchānagatapariggahe’’ti (pārā. 131) vuttanti ce? Parānuddayatāya eva. Yassa hi parikkhārassa ādāne rājāno coraṃ gahetvā na hananādīni kareyyuṃ, tasmimpi nāma samaṇo gotamo pārājikaṃ paññapetvā bhikkhuṃ abhikkhuṃ karotīti mahājano bhagavati pasādaññathattaṃ āpajjitvā apāyupago hoti. Apetapariggahitā rukkhādī ca dullabhā, na ca sakkā ñātunti rukkhādīhi pāpabhīruko upāsakajano paṭimāgharacetiyabodhigharavihārādīni akatvā mahato puññakkhandhato parihāyeyya. ‘‘Rukkhamūlasenāsanaṃ paṃsukūlacīvaraṃ nissāya pabbajjā’’ti (mahāva. 128) vuttanissayā ca anissayā honti. Parapariggahitasaññino hi bhikkhū rukkhamūlapaṃsukūlāni na sādiyissantīti, pabbajjā ca na sambhaveyyuṃ, sappadaṭṭhakāle chārikatthāya rukkhaṃ aggahetvā maraṇaṃ vā nigaccheyyuṃ, acchinnacīvarādikāle sākhābhaṅgādiṃ aggahetvā naggā hutvā titthiyaladdhimeva suladdhi viya dīpentā vicareyyuṃ, tato titthiyesveva loko pasīditvā diṭṭhiggahaṇaṃ patvā saṃsārakhāṇuko bhaveyya, tasmā bhagavā parānuddayatāya eva ‘‘anāpatti petapariggahe’’tiādimāhāti veditabbaṃ.
141. அபரம்பி பா⁴க³ங் தே³ஹீதி ‘‘க³ஹிதங் விஞ்ஞத்திஸதி³ஸத்தா நேவ ப⁴ண்ட³தெ³ய்யங் ந பாராஜிக’’ந்தி லிகி²தங், இத³ங் பகதிஜனே யுஜ்ஜதி. ‘‘ஸசே பன ஸாமிகோ வா தேன ஆணத்தோ வா ‘அபரஸ்ஸ ஸஹாயபி⁴க்கு²ஸ்ஸ பா⁴க³ங் ஏஸ க³ண்ஹாதி யாசதி வா’தி யங் அபரபா⁴க³ங் தே³தி, தங் ப⁴ண்ட³தெ³ய்ய’’ந்தி வத³ந்தி.
141.Aparampibhāgaṃ dehīti ‘‘gahitaṃ viññattisadisattā neva bhaṇḍadeyyaṃ na pārājika’’nti likhitaṃ, idaṃ pakatijane yujjati. ‘‘Sace pana sāmiko vā tena āṇatto vā ‘aparassa sahāyabhikkhussa bhāgaṃ esa gaṇhāti yācati vā’ti yaṃ aparabhāgaṃ deti, taṃ bhaṇḍadeyya’’nti vadanti.
148-9. கா²த³ந்தஸ்ஸ ப⁴ண்ட³தெ³ய்யந்தி சோரஸ்ஸ வா ஸாமிகஸ்ஸ வா ஸம்பத்தஸ்ஸ தி³ன்னங் ஸுதி³ன்னமேவ கிர. அவிஸேஸேனாதி ‘‘உஸ்ஸாஹக³தானங் வா’’தி அவத்வா வுத்தங், ந ஹி கதிபயானங் அனுஸ்ஸாஹதாய ஸங்கி⁴கமஸங்கி⁴கங் ஹோதி. மஹாஅட்ட²கதா²யம்பி ‘‘யதி³ ஸஉஸ்ஸாஹாவ க³ச்ச²ந்தி, தெ²ய்யசித்தேன பரிபு⁴ஞ்ஜதோ அவஹாரோ ஹோதீ’’தி வுத்தத்தா தது³ப⁴யமேகங். ச²ட்³டி³தவிஹாரே உபசாரஸீமாய பமாணங் ஜானிதுங் ந ஸக்கா, அயங் பன பி⁴க்கு² உபசாரஸீமாய ப³ஹி ட²த்வா க⁴ண்டிபஹரணாதி³ங் கத்வா பரிபு⁴ஞ்ஜதி கா²த³தி, தேன ஏவங் கா²தி³தங் ஸுகா²தி³தந்தி அத்தோ². ‘‘இதரவிஹாரே தத்த² தி³த்தவிதி⁴னாவ படிபஜ்ஜிதப்³ப³’’ந்தி வுத்தங். ‘‘ஸுகா²தி³தங் அந்தோவிஹாரத்தா’’தி லிகி²தங், ஆக³தானாக³தானங் ஸந்தகத்தாதி ‘‘சாதுத்³தி³ஸஸ்ஸ ஸங்க⁴ஸ்ஸ தே³மீ’’தி தி³ன்னத்தா வுத்தங். ஏவங் அவத்வா ‘‘ஸங்க⁴ஸ்ஸ தே³மீ’’தி தி³ன்னம்பி தாதி³ஸமேவ. ததா² ஹி ப³ஹி டி²தோ லாப⁴ங் ந லப⁴தி ப⁴க³வதோ வசனேனாதி வேதி³தப்³ப³ங்.
148-9.Khādantassa bhaṇḍadeyyanti corassa vā sāmikassa vā sampattassa dinnaṃ sudinnameva kira. Avisesenāti ‘‘ussāhagatānaṃ vā’’ti avatvā vuttaṃ, na hi katipayānaṃ anussāhatāya saṅghikamasaṅghikaṃ hoti. Mahāaṭṭhakathāyampi ‘‘yadi saussāhāva gacchanti, theyyacittena paribhuñjato avahāro hotī’’ti vuttattā tadubhayamekaṃ. Chaḍḍitavihāre upacārasīmāya pamāṇaṃ jānituṃ na sakkā, ayaṃ pana bhikkhu upacārasīmāya bahi ṭhatvā ghaṇṭipaharaṇādiṃ katvā paribhuñjati khādati, tena evaṃ khāditaṃ sukhāditanti attho. ‘‘Itaravihāre tattha dittavidhināva paṭipajjitabba’’nti vuttaṃ. ‘‘Sukhāditaṃ antovihārattā’’ti likhitaṃ, āgatānāgatānaṃ santakattāti ‘‘cātuddisassa saṅghassa demī’’ti dinnattā vuttaṃ. Evaṃ avatvā ‘‘saṅghassa demī’’ti dinnampi tādisameva. Tathā hi bahi ṭhito lābhaṃ na labhati bhagavato vacanenāti veditabbaṃ.
153. ‘‘மதஸூகரோ’’தி வசனதோ தமேவ ஜீவந்தங் ப⁴ண்ட³தெ³ய்யந்தி கத்வா தா³துங் ந லப⁴தி. வஜ்ஜ²ங் வட்டதீதி தீ³பிதங் ஹோதி. மத்³த³ந்தோ க³ச்ச²தி, ப⁴ண்ட³தெ³ய்யந்தி எத்த² கித்தகங் ப⁴ண்ட³தெ³ய்யங், ந ஹி ஸக்கா ‘‘எத்தகா ஸூகரா மத்³தி³த்வா க³தா க³மிஸ்ஸந்தீ’’தி ஜானிதுந்தி? யத்தகே ஸாமிகானங் தி³ன்னே தே ‘‘தி³ன்னங் மம ப⁴ண்ட³’’ந்தி துஸ்ஸந்தி, தத்தகங் தா³தப்³ப³ங். நோ சே துஸ்ஸந்தி, அதிக்கந்தஸூகரமூலங் த³த்வா கிங் ஓபாதோ க²ணித்வா தா³தப்³போ³தி? ந தா³தப்³போ³. அத² கிங் சோதி³யமானஸ்ஸ உபி⁴ன்னங் து⁴ரனிக்கே²பேன பாராஜிகங் ஹோதீதி? ந ஹோதி, கேவலங் கப்பியபரிக்கா²ரங் த³த்வா தோஸேதப்³போ³வ ஸாமிகோ, ஏஸேவ நயோ அஞ்ஞேஸுபி ஏவரூபேஸூதி நோ தக்கோதி ஆசரியோ. ‘‘தத³ஹேவ வா து³தியதி³வஸே வா மத்³த³ந்தோ க³ச்ச²தீ’’தி வுத்தங். கு³ம்பே³ கி²பதி, ப⁴ண்ட³தெ³ய்யமேவாதி அவஸ்ஸங் பவிஸனகே ஸந்தா⁴ய வுத்தங். எத்த² ஏகஸ்மிங் விஹாரே பரசக்காதி³ப⁴யங் ஆக³தங். மூலவத்து²ச்சே²த³ந்தி ‘‘ஸப்³ப³ஸேனாஸனங் ஏதே இஸ்ஸரா’’தி வசனதோ இதரே அனிஸ்ஸராதி தீ³பிதங் ஹோதி.
153.‘‘Matasūkaro’’ti vacanato tameva jīvantaṃ bhaṇḍadeyyanti katvā dātuṃ na labhati. Vajjhaṃ vaṭṭatīti dīpitaṃ hoti. Maddanto gacchati, bhaṇḍadeyyanti ettha kittakaṃ bhaṇḍadeyyaṃ, na hi sakkā ‘‘ettakā sūkarā madditvā gatā gamissantī’’ti jānitunti? Yattake sāmikānaṃ dinne te ‘‘dinnaṃ mama bhaṇḍa’’nti tussanti, tattakaṃ dātabbaṃ. No ce tussanti, atikkantasūkaramūlaṃ datvā kiṃ opāto khaṇitvā dātabboti? Na dātabbo. Atha kiṃ codiyamānassa ubhinnaṃ dhuranikkhepena pārājikaṃ hotīti? Na hoti, kevalaṃ kappiyaparikkhāraṃ datvā tosetabbova sāmiko, eseva nayo aññesupi evarūpesūti no takkoti ācariyo. ‘‘Tadaheva vā dutiyadivase vā maddanto gacchatī’’ti vuttaṃ. Gumbe khipati, bhaṇḍadeyyamevāti avassaṃ pavisanake sandhāya vuttaṃ. Ettha ekasmiṃ vihāre paracakkādibhayaṃ āgataṃ. Mūlavatthucchedanti ‘‘sabbasenāsanaṃ ete issarā’’ti vacanato itare anissarāti dīpitaṃ hoti.
156. ஆராமரக்க²காதி விஸ்ஸட்ட²வஸேன க³ஹேதப்³ப³ங். அதி⁴ப்பாயங் ஞத்வாதி எத்த² யஸ்ஸ தா³னங் படிக்³க³ண்ஹந்தங் பி⁴க்கு²ங், பா⁴க³ங் வா ஸாமிகா ந ரக்க²ந்தி ந த³ண்டெ³ந்தி, தஸ்ஸ தா³னங் அப்படிச்சா²தெ³த்வா க³ஹேதுங் வட்டதீதி இத⁴ ஸன்னிட்டா²னங். தம்பி ‘‘ந வட்டதி ஸங்கி⁴கே’’தி வுத்தங். அயமேவ பி⁴க்கு² இஸ்ஸரோதி யத்த² ஸோ இச்ச²தி, தத்த² அத்தஞாதஹேதுங் லப⁴தி கிர அத்தோ². அபிச ‘‘த³ஹரோ’’தி வத³ந்தி. ஸவத்து²கந்தி ஸஹ பூ⁴மியாதி வுத்தங் ஹோதி. ‘‘க³ருப⁴ண்ட³ங் ஹோதீ’’தி வத்வா ‘‘திணமத்தங் பன ந தா³தப்³ப³’’ந்தி வுத்தங், தங் கிந்து க³ருப⁴ண்ட³ந்தி சே, அரக்கி²யஅகோ³பியட்டா²னே, வினஸ்ஸனகபா⁴வே ச டி²தங் ஸந்தா⁴ய வுத்தங். கப்பியேபி சாதி வத்வா, அவத்வா வா க³ஹணயுத்தே மாதாதி³ஸந்தகேபி தெ²ய்யசித்துப்பாதே³ன. இத³ங் பன ஸிக்கா²பத³ங் ‘‘ராஜாபிமேஸங் அபி⁴ப்பஸன்னோ’’தி (பாரா॰ 86) வசனதோ லாப⁴க்³க³மஹத்தங், வேபுல்லமஹத்தஞ்ச பத்தகாலே பஞ்ஞத்தந்தி ஸித்³த⁴ங்.
156.Ārāmarakkhakāti vissaṭṭhavasena gahetabbaṃ. Adhippāyaṃ ñatvāti ettha yassa dānaṃ paṭiggaṇhantaṃ bhikkhuṃ, bhāgaṃ vā sāmikā na rakkhanti na daṇḍenti, tassa dānaṃ appaṭicchādetvā gahetuṃ vaṭṭatīti idha sanniṭṭhānaṃ. Tampi ‘‘na vaṭṭati saṅghike’’ti vuttaṃ. Ayameva bhikkhu issaroti yattha so icchati, tattha attañātahetuṃ labhati kira attho. Apica ‘‘daharo’’ti vadanti. Savatthukanti saha bhūmiyāti vuttaṃ hoti. ‘‘Garubhaṇḍaṃ hotī’’ti vatvā ‘‘tiṇamattaṃ pana na dātabba’’nti vuttaṃ, taṃ kintu garubhaṇḍanti ce, arakkhiyaagopiyaṭṭhāne, vinassanakabhāve ca ṭhitaṃ sandhāya vuttaṃ. Kappiyepi cāti vatvā, avatvā vā gahaṇayutte mātādisantakepi theyyacittuppādena. Idaṃ pana sikkhāpadaṃ ‘‘rājāpimesaṃ abhippasanno’’ti (pārā. 86) vacanato lābhaggamahattaṃ, vepullamahattañca pattakāle paññattanti siddhaṃ.
து³தியபாராஜிகவண்ணனா நிட்டி²தா.
Dutiyapārājikavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / வினீதவத்து²வண்ணனா • Vinītavatthuvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / குஸஸங்காமனவத்து²கதா²வண்ணனா • Kusasaṅkāmanavatthukathāvaṇṇanā
