| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
(၁၃) ၃. ကုသိနာရဝဂ္ဂော
(13) 3. Kusināravaggo
၁. ကုသိနာရသုတ္တံ
1. Kusinārasuttaṃ
၁၂၄. ဧကံ သမယံ ဘဂဝာ ကုသိနာရာယံ ဝိဟရတိ ဗလိဟရဏေ ဝနသဏ္ဍေ။ တတ္ရ ခော ဘဂဝာ ဘိက္ခူ အာမန္တေသိ – ‘‘ဘိက္ခဝော’’တိ။ ‘‘ဘဒန္တေ’’တိ တေ ဘိက္ခူ ဘဂဝတော ပစ္စသ္သောသုံ။ ဘဂဝာ ဧတဒဝောစ –
124. Ekaṃ samayaṃ bhagavā kusinārāyaṃ viharati baliharaṇe vanasaṇḍe. Tatra kho bhagavā bhikkhū āmantesi – ‘‘bhikkhavo’’ti. ‘‘Bhadante’’ti te bhikkhū bhagavato paccassosuṃ. Bhagavā etadavoca –
‘‘ဣဓ, ဘိက္ခဝေ, ဘိက္ခု အညတရံ ဂာမံ ဝာ နိဂမံ ဝာ ဥပနိသ္သာယ ဝိဟရတိ။ တမေနံ ဂဟပတိ ဝာ ဂဟပတိပုတ္တော ဝာ ဥပသင္ကမိတ္ဝာ သ္ဝာတနာယ ဘတ္တေန နိမန္တေတိ ။ အာကင္ခမာနော, ဘိက္ခဝေ, ဘိက္ခု အဓိဝာသေတိ။ သော တသ္သာ ရတ္တိယာ အစ္စယေန ပုဗ္ဗဏ္ဟသမယံ နိဝာသေတ္ဝာ ပတ္တစီဝရမာဒာယ ယေန တသ္သ ဂဟပတိသ္သ ဝာ ဂဟပတိပုတ္တသ္သ ဝာ နိဝေသနံ တေနုပသင္ကမတိ; ဥပသင္ကမိတ္ဝာ ပညတ္တေ အာသနေ နိသီဒတိ။ တမေနံ သော ဂဟပတိ ဝာ ဂဟပတိပုတ္တော ဝာ ပဏီတေန ခာဒနီယေန ဘောဇနီယေန သဟတ္ထာ သန္တပ္ပေတိ သမ္ပဝာရေတိ။
‘‘Idha, bhikkhave, bhikkhu aññataraṃ gāmaṃ vā nigamaṃ vā upanissāya viharati. Tamenaṃ gahapati vā gahapatiputto vā upasaṅkamitvā svātanāya bhattena nimanteti . Ākaṅkhamāno, bhikkhave, bhikkhu adhivāseti. So tassā rattiyā accayena pubbaṇhasamayaṃ nivāsetvā pattacīvaramādāya yena tassa gahapatissa vā gahapatiputtassa vā nivesanaṃ tenupasaṅkamati; upasaṅkamitvā paññatte āsane nisīdati. Tamenaṃ so gahapati vā gahapatiputto vā paṇītena khādanīyena bhojanīyena sahatthā santappeti sampavāreti.
‘‘တသ္သ ဧဝံ ဟောတိ – ‘သာဓု ဝတ မ္ယာယံ ဂဟပတိ ဝာ ဂဟပတိပုတ္တော ဝာ ပဏီတေန ခာဒနီယေန ဘောဇနီယေန သဟတ္ထာ သန္တပ္ပေတိ သမ္ပဝာရေတီ’တိ။ ဧဝမ္ပိသ္သ ဟောတိ – ‘အဟော ဝတ မာယံ ဂဟပတိ ဝာ ဂဟပတိပုတ္တော ဝာ အာယတိမ္ပိ ဧဝရူပေန ပဏီတေန ခာဒနီယေန ဘောဇနီယေန သဟတ္ထာ သန္တပ္ပေယ္ယ သမ္ပဝာရေယ္ယာ’တိ! သော တံ ပိဏ္ဍပာတံ ဂထိတော 1 မုစ္ဆိတော အဇ္ဈောသန္နော 2 အနာဒီနဝဒသ္သာဝီ အနိသ္သရဏပညော ပရိဘုဉ္ဇတိ။ သော တတ္ထ ကာမဝိတက္ကမ္ပိ ဝိတက္ကေတိ, ဗ္ယာပာဒဝိတက္ကမ္ပိ ဝိတက္ကေတိ, ဝိဟိံသာဝိတက္ကမ္ပိ ဝိတက္ကေတိ။ ဧဝရူပသ္သာဟံ, ဘိက္ခဝေ, ဘိက္ခုနော ဒိန္နံ န မဟပ္ဖလန္တိ ဝဒာမိ။ တံ ကိသ္သ ဟေတု? ပမတ္တော ဟိ, ဘိက္ခဝေ, ဘိက္ခု ဝိဟရတိ။
‘‘Tassa evaṃ hoti – ‘sādhu vata myāyaṃ gahapati vā gahapatiputto vā paṇītena khādanīyena bhojanīyena sahatthā santappeti sampavāretī’ti. Evampissa hoti – ‘aho vata māyaṃ gahapati vā gahapatiputto vā āyatimpi evarūpena paṇītena khādanīyena bhojanīyena sahatthā santappeyya sampavāreyyā’ti! So taṃ piṇḍapātaṃ gathito 3 mucchito ajjhosanno 4 anādīnavadassāvī anissaraṇapañño paribhuñjati. So tattha kāmavitakkampi vitakketi, byāpādavitakkampi vitakketi, vihiṃsāvitakkampi vitakketi. Evarūpassāhaṃ, bhikkhave, bhikkhuno dinnaṃ na mahapphalanti vadāmi. Taṃ kissa hetu? Pamatto hi, bhikkhave, bhikkhu viharati.
‘‘ဣဓ ပန, ဘိက္ခဝေ, ဘိက္ခု အညတရံ ဂာမံ ဝာ နိဂမံ ဝာ ဥပနိသ္သာယ ဝိဟရတိ။ တမေနံ ဂဟပတိ ဝာ ဂဟပတိပုတ္တော ဝာ ဥပသင္ကမိတ္ဝာ သ္ဝာတနာယ ဘတ္တေန နိမန္တေတိ။ အာကင္ခမာနော, ဘိက္ခဝေ, ဘိက္ခု အဓိဝာသေတိ။ သော တသ္သာ ရတ္တိယာ အစ္စယေန ပုဗ္ဗဏ္ဟသမယံ နိဝာသေတ္ဝာ ပတ္တစီဝရမာဒာယ ယေန တသ္သ ဂဟပတိသ္သ ဝာ ဂဟပတိပုတ္တသ္သ ဝာ နိဝေသနံ တေနုပသင္ကမတိ; ဥပသင္ကမိတ္ဝာ ပညတ္တေ အာသနေ နိသီဒတိ။ တမေနံ သော ဂဟပတိ ဝာ ဂဟပတိပုတ္တော ဝာ ပဏီတေန ခာဒနီယေန ဘောဇနီယေန သဟတ္ထာ သန္တပ္ပေတိ သမ္ပဝာရေတိ။
‘‘Idha pana, bhikkhave, bhikkhu aññataraṃ gāmaṃ vā nigamaṃ vā upanissāya viharati. Tamenaṃ gahapati vā gahapatiputto vā upasaṅkamitvā svātanāya bhattena nimanteti. Ākaṅkhamāno, bhikkhave, bhikkhu adhivāseti. So tassā rattiyā accayena pubbaṇhasamayaṃ nivāsetvā pattacīvaramādāya yena tassa gahapatissa vā gahapatiputtassa vā nivesanaṃ tenupasaṅkamati; upasaṅkamitvā paññatte āsane nisīdati. Tamenaṃ so gahapati vā gahapatiputto vā paṇītena khādanīyena bhojanīyena sahatthā santappeti sampavāreti.
‘‘တသ္သ န ဧဝံ ဟောတိ – ‘သာဓု ဝတ မ္ယာယံ ဂဟပတိ ဝာ ဂဟပတိပုတ္တော ဝာ ပဏီတေန ခာဒနီယေန ဘောဇနီယေန သဟတ္ထာ သန္တပ္ပေတိ သမ္ပဝာရေတီ’တိ။ ဧဝမ္ပိသ္သ န ဟောတိ – ‘အဟော ဝတ မာယံ ဂဟပတိ ဝာ ဂဟပတိပုတ္တော ဝာ အာယတိမ္ပိ ဧဝရူပေန ပဏီတေန ခာဒနီယေန ဘောဇနီယေန သဟတ္ထာ သန္တပ္ပေယ္ယ သမ္ပဝာရေယ္ယာ’တိ! သော တံ ပိဏ္ဍပာတံ အဂထိတော အမုစ္ဆိတော အနဇ္ဈောသန္နော အာဒီနဝဒသ္သာဝီ နိသ္သရဏပညော ပရိဘုဉ္ဇတိ။ သော တတ္ထ နေက္ခမ္မဝိတက္ကမ္ပိ ဝိတက္ကေတိ, အဗ္ယာပာဒဝိတက္ကမ္ပိ ဝိတက္ကေတိ, အဝိဟိံသာဝိတက္ကမ္ပိ ဝိတက္ကေတိ။ ဧဝရူပသ္သာဟံ, ဘိက္ခဝေ, ဘိက္ခုနော ဒိန္နံ မဟပ္ဖလန္တိ ဝဒာမိ။ တံ ကိသ္သ ဟေတု? အပ္ပမတ္တော ဟိ, ဘိက္ခဝေ, ဘိက္ခု ဝိဟရတီ’’တိ။ ပဌမံ။
‘‘Tassa na evaṃ hoti – ‘sādhu vata myāyaṃ gahapati vā gahapatiputto vā paṇītena khādanīyena bhojanīyena sahatthā santappeti sampavāretī’ti. Evampissa na hoti – ‘aho vata māyaṃ gahapati vā gahapatiputto vā āyatimpi evarūpena paṇītena khādanīyena bhojanīyena sahatthā santappeyya sampavāreyyā’ti! So taṃ piṇḍapātaṃ agathito amucchito anajjhosanno ādīnavadassāvī nissaraṇapañño paribhuñjati. So tattha nekkhammavitakkampi vitakketi, abyāpādavitakkampi vitakketi, avihiṃsāvitakkampi vitakketi. Evarūpassāhaṃ, bhikkhave, bhikkhuno dinnaṃ mahapphalanti vadāmi. Taṃ kissa hetu? Appamatto hi, bhikkhave, bhikkhu viharatī’’ti. Paṭhamaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၁. ကုသိနာရသုတ္တဝဏ္ဏနာ • 1. Kusinārasuttavaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၂. ကုသိနာရသုတ္တာဒိဝဏ္ဏနာ • 1-2. Kusinārasuttādivaṇṇanā
