| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6. குஸினாரஸுத்தவண்ணனா
6. Kusinārasuttavaṇṇanā
76. ச²ட்டே² நக³ரங் பவிஸிதுகாமா உய்யானதோ உபேச்ச வத்தந்தி க³ச்ச²ந்தி ஏதேனாதி உபவத்தனங். யதே²வ ஹி கலம்ப³னதி³தீரதோ ராஜமாதுவிஹாரத்³வாரேன தூ²பாராமங் க³ந்தப்³ப³ங் ஹோதி, ஏவங் ஹிரஞ்ஞவதிகாய பாரிமதீரதோ ஸாலவனங் உய்யானங், யதா² அனுராத⁴புரஸ்ஸ தூ²பாராமோ த³க்கி²ணபச்சி²மதி³ஸாய, ஏவங் தங் உய்யானங் குஸினாராய த³க்கி²ணபச்சி²மதி³ஸாய ஹோதி. யதா² தூ²பாராமதோ த³க்கி²ணத்³வாரேன நக³ரங் பவிஸனமக்³கோ³ பாசீனமுகோ² க³ந்த்வா உத்தரேன நிவத்ததி, ஏவங் உய்யானதோ ஸாலபந்தி பாசீனமுகா² க³ந்த்வா உத்தரேன நிவத்தா, தஸ்மா தங் ‘‘உபவத்தன’’ந்தி வுச்சதி. அந்தரேதி த்³வின்னங் ஸாலருக்கா²னங் வேமஜ்ஜே². தத்த² ஹி பஞ்ஞாபியமானஸ்ஸ மஞ்சஸ்ஸ ஏகா ஸாலபந்தி ஸீஸபா⁴கே³ ஹோதி, ஏகா பாத³பா⁴கே³. தத்ரபி ஏகோ தருணஸாலோ ஸீஸபா⁴க³ஸ்ஸ ஆஸன்னோ ஹோதி, ஏகோ பாத³பா⁴க³ஸ்ஸ. அபிச யமகஸாலா நாம மூலக²ந்த⁴விடபபத்தேஹி அஞ்ஞமஞ்ஞங் ஸங்ஸிப்³பி³த்வா டி²தஸாலாதிபி வத³ந்தி.
76. Chaṭṭhe nagaraṃ pavisitukāmā uyyānato upecca vattanti gacchanti etenāti upavattanaṃ. Yatheva hi kalambanaditīrato rājamātuvihāradvārena thūpārāmaṃ gantabbaṃ hoti, evaṃ hiraññavatikāya pārimatīrato sālavanaṃ uyyānaṃ, yathā anurādhapurassa thūpārāmo dakkhiṇapacchimadisāya, evaṃ taṃ uyyānaṃ kusinārāya dakkhiṇapacchimadisāya hoti. Yathā thūpārāmato dakkhiṇadvārena nagaraṃ pavisanamaggo pācīnamukho gantvā uttarena nivattati, evaṃ uyyānato sālapanti pācīnamukhā gantvā uttarena nivattā, tasmā taṃ ‘‘upavattana’’nti vuccati. Antareti dvinnaṃ sālarukkhānaṃ vemajjhe. Tattha hi paññāpiyamānassa mañcassa ekā sālapanti sīsabhāge hoti, ekā pādabhāge. Tatrapi eko taruṇasālo sīsabhāgassa āsanno hoti, eko pādabhāgassa. Apica yamakasālā nāma mūlakhandhaviṭapapattehi aññamaññaṃ saṃsibbitvā ṭhitasālātipi vadanti.
த்³வெள்ஹகந்தி த்³விதா⁴கா³ஹோ, அனேகங்ஸக்³கா³ஹோதி அத்தோ². விமதீதி ஸங்ஸயாபத்தீதி ஆஹ ‘‘வினிச்சி²துங் அஸமத்த²தா’’தி. தங் வோ வதா³மீதி தங் ஸங்ஸயவந்தங் பி⁴க்கு²ங் ஸந்தா⁴ய வோ தும்ஹே வதா³மீதி. நிக்கங்க²பா⁴வபச்சக்க²கரணந்தி பு³த்³தா⁴தீ³ஸு தேஸங் பி⁴க்கூ²னங் நிக்கங்க²பா⁴வஸ்ஸ பச்சக்க²காரியா யாதா²வதோ தமத்த²ங் படிவிஜ்ஜி²த்வா டி²தங் ஸப்³ப³ஞ்ஞுதஞ்ஞாணமேவ. எத்தா²தி ஏதஸ்மிங் அத்தே².
Dveḷhakanti dvidhāgāho, anekaṃsaggāhoti attho. Vimatīti saṃsayāpattīti āha ‘‘vinicchituṃ asamatthatā’’ti. Taṃ vo vadāmīti taṃ saṃsayavantaṃ bhikkhuṃ sandhāya vo tumhe vadāmīti. Nikkaṅkhabhāvapaccakkhakaraṇanti buddhādīsu tesaṃ bhikkhūnaṃ nikkaṅkhabhāvassa paccakkhakāriyā yāthāvato tamatthaṃ paṭivijjhitvā ṭhitaṃ sabbaññutaññāṇameva. Etthāti etasmiṃ atthe.
குஸினாரஸுத்தவண்ணனா நிட்டி²தா.
Kusinārasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. குஸினாரஸுத்தங் • 6. Kusinārasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. குஸினாரஸுத்தவண்ணனா • 6. Kusinārasuttavaṇṇanā
