| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၆. ကုသိနာရသုတ္တဝဏ္ဏနာ
6. Kusinārasuttavaṇṇanā
၇၆. ဆဋ္ဌေ ဥပဝတ္တနေတိ ပာစီနဂတာယ သာလပန္တိယာ ဥတ္တရေန နိဝတ္တိတ္ဝာ ဌိတာယ ဝေမဇ္ဈဋ္ဌာနေ။ အန္တရေန ယမကသာလာနန္တိ ဒ္ဝိန္နံ သာလရုက္ခာနံ အန္တရေ။ ကင္ခာတိ ဒ္ဝေဠ္ဟကံ။ ဝိမတီတိ ဝိနိစ္ဆိတုံ အသမတ္ထတာ။ ‘‘ဗုဒ္ဓော နု ခော န ဗုဒ္ဓော နု ခော, ဓမ္မော နု ခော န ဓမ္မော နု ခော, သင္ဃော နု ခော န သင္ဃော နု ခော, မဂ္ဂော နု ခော န မဂ္ဂော နု ခော, ပဋိပဒာ နု ခော န ပဋိပဒာ နု ခော’’တိ ယသ္သ သံသယော ဥပ္ပဇ္ဇေယ္ယ, တံ ဝော ဝဒာမိ ပုစ္ဆထ, ဘိက္ခဝေတိ အယမေတ္ထ သင္ခေပတ္ထော။ သတ္ထုဂာရဝေနပိ န ပုစ္ဆေယ္ယာထာတိ ‘‘မယံ သတ္ထု သန္တိကေ ပဗ္ဗဇိမ္ဟ, စတ္တာရော ပစ္စယာပိ နော သတ္ထု သန္တကာဝ။ တေ မယံ ဧတ္တကံ ကာလံ ကင္ခံ အကတ္ဝာ န အရဟာမ အဇ္ဇ ပစ္ဆိမေ ကာလေ ကင္ခံ ကာတု’’န္တိ သစေ ဧဝံ သတ္ထရိ ဂာရဝေန န ပုစ္ဆထ။ သဟာယကောပိ, ဘိက္ခဝေ, သဟာယကသ္သ အာရောစေတူတိ တုမ္ဟာကံ ယော ယသ္သ ဘိက္ခုသ္သ သန္ဒိဋ္ဌော သမ္ဘတ္တော, သော တသ္သ အာရောစေတု, အဟံ ဧကသ္သ ဘိက္ခုသ္သ ကထေသ္သာမိ, တသ္သ ကထံ သုတ္ဝာ သဗ္ဗေ နိက္ကင္ခာ ဘဝထာတိ ဒသ္သေတိ။ ဧဝံ ပသန္နောတိ ဧဝံ သဒ္ဒဟာမိ အဟန္တိ အတ္ထော။ ဉာဏမေဝာတိ နိက္ကင္ခဘာဝပစ္စက္ခကရဏဉာဏံယေဝ ဧတ္ထ တထာဂတသ္သ, န သဒ္ဓာမတ္တန္တိ အတ္ထော။ ဣမေသဉ္ဟိ, အာနန္ဒာတိ ဣမေသံ အန္တောသာဏိယံ နိသိန္နာနံ ပဉ္စန္နံ ဘိက္ခုသတာနံ။ ယော ပစ္ဆိမကောတိ ယော ဂုဏဝသေန ပစ္ဆိမကော, အာနန္ဒတ္ထေရံယေဝ သန္ဓာယာဟ။
76. Chaṭṭhe upavattaneti pācīnagatāya sālapantiyā uttarena nivattitvā ṭhitāya vemajjhaṭṭhāne. Antarena yamakasālānanti dvinnaṃ sālarukkhānaṃ antare. Kaṅkhāti dveḷhakaṃ. Vimatīti vinicchituṃ asamatthatā. ‘‘Buddho nu kho na buddho nu kho, dhammo nu kho na dhammo nu kho, saṅgho nu kho na saṅgho nu kho, maggo nu kho na maggo nu kho, paṭipadā nu kho na paṭipadā nu kho’’ti yassa saṃsayo uppajjeyya, taṃ vo vadāmi pucchatha, bhikkhaveti ayamettha saṅkhepattho. Satthugāravenapi na puccheyyāthāti ‘‘mayaṃ satthu santike pabbajimha, cattāro paccayāpi no satthu santakāva. Te mayaṃ ettakaṃ kālaṃ kaṅkhaṃ akatvā na arahāma ajja pacchime kāle kaṅkhaṃ kātu’’nti sace evaṃ satthari gāravena na pucchatha. Sahāyakopi, bhikkhave, sahāyakassa ārocetūti tumhākaṃ yo yassa bhikkhussa sandiṭṭho sambhatto, so tassa ārocetu, ahaṃ ekassa bhikkhussa kathessāmi, tassa kathaṃ sutvā sabbe nikkaṅkhā bhavathāti dasseti. Evaṃ pasannoti evaṃ saddahāmi ahanti attho. Ñāṇamevāti nikkaṅkhabhāvapaccakkhakaraṇañāṇaṃyeva ettha tathāgatassa, na saddhāmattanti attho. Imesañhi, ānandāti imesaṃ antosāṇiyaṃ nisinnānaṃ pañcannaṃ bhikkhusatānaṃ. Yo pacchimakoti yo guṇavasena pacchimako, ānandattheraṃyeva sandhāyāha.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၆. ကုသိနာရသုတ္တံ • 6. Kusinārasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၆. ကုသိနာရသုတ္တဝဏ္ဏနာ • 6. Kusinārasuttavaṇṇanā
