| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၅. အက္ကောသဝဂ္ဂော
5. Akkosavaggo
၄. ကုသိနာရသုတ္တဝဏ္ဏနာ
4. Kusinārasuttavaṇṇanā
၄၄. ပဉ္စမသ္သ စတုတ္ထေ ကုသိနာရာယန္တိ ဧဝံနာမကေ နဂရေ။ ဒေဝတာနံ အတ္ထာယ ဗလိံ ဟရန္တိ ဧတ္ထာတိ ဗလိဟရဏော, တသ္မိံ ဗလိဟရဏေ။ အစ္ဆိဒ္ဒေန အပ္ပဋိမံသေနာတိအာဒီသု ယေန ကေနစိဒေဝ ပဟဋော ဝာ ဟောတိ, ဝေဇ္ဇကမ္မာဒီနိ ဝာ ကတာနိ, တသ္သ ကာယသမာစာရော ဥပစိကာဒီဟိ ခာယိတတာလပဏ္ဏံ ဝိယ ဆိဒ္ဒော စ, ပဋိမသိတုံ ယတ္ထ ကတ္ထစိ ဂဟေတ္ဝာ အာကဍ္ဎိတုံ သက္ကုဏေယ္ယတာယ ပဋိမံသော စ ဟောတိ, ဝိပရီတော အစ္ဆိဒ္ဒော အပ္ပဋိမံသော နာမ။ ဝစီသမာစာရော ပန မုသာဝာဒဩမသဝာဒပေသုညအမူလကာနုဒ္ဓံသနာဒီဟိ ဆိဒ္ဒော သပ္ပဋိမံသော စ ဟောတိ, ဝိပရီတော အစ္ဆိဒ္ဒော အပ္ပဋိမံသော။ မေတ္တံ နု ခော မေ စိတ္တန္တိ ပလိဗောဓံ ဆိန္ဒိတ္ဝာ ကမ္မဋ္ဌာနဘာဝနာနုယောဂေန အဓိဂတံ မေ မေတ္တစိတ္တံ။ အနာဃာတန္တိ အာဃာတဝိရဟိတံ, ဝိက္ခမ္ဘနေန ဝိဟတာဃာတန္တိ အတ္ထော။ ကတ္ထ ဝုတ္တန္တိ ဣဒံ သိက္ခာပဒံ ကိသ္မိံ နဂရေ ဝုတ္တံ။
44. Pañcamassa catutthe kusinārāyanti evaṃnāmake nagare. Devatānaṃ atthāya baliṃ haranti etthāti baliharaṇo, tasmiṃ baliharaṇe. Acchiddena appaṭimaṃsenātiādīsu yena kenacideva pahaṭo vā hoti, vejjakammādīni vā katāni, tassa kāyasamācāro upacikādīhi khāyitatālapaṇṇaṃ viya chiddo ca, paṭimasituṃ yattha katthaci gahetvā ākaḍḍhituṃ sakkuṇeyyatāya paṭimaṃso ca hoti, viparīto acchiddo appaṭimaṃso nāma. Vacīsamācāro pana musāvādaomasavādapesuññaamūlakānuddhaṃsanādīhi chiddo sappaṭimaṃso ca hoti, viparīto acchiddo appaṭimaṃso. Mettaṃ nu kho me cittanti palibodhaṃ chinditvā kammaṭṭhānabhāvanānuyogena adhigataṃ me mettacittaṃ. Anāghātanti āghātavirahitaṃ, vikkhambhanena vihatāghātanti attho. Kattha vuttanti idaṃ sikkhāpadaṃ kismiṃ nagare vuttaṃ.
ကာလေန ဝက္ခာမီတိအာဒီသု ဧကော ဧကံ ဩကာသံ ကာရေတ္ဝာ စောဒေန္တော ကာလေန ဝဒတိ နာမ။ သင္ဃမဇ္ဈေ ဝာ ဂဏမဇ္ဈေ ဝာ သလာကဂ္ဂယာဂဂ္ဂဝိတက္ကမာဠကဘိက္ခာစာရမဂ္ဂအာသနသာလာဒီသု ဝာ ဥပဋ္ဌာကေဟိ ပရိဝာရိတက္ခဏေ ဝာ စောဒေန္တော အကာလေန ဝဒတိ နာမ။ တစ္ဆေန ဝဒန္တော ဘူတေန ဝဒတိ နာမ။ ‘‘ဒဟရမဟလ္လကပရိသာဝစရကပံသုကူလိကဓမ္မကထိကပတိရူပံ တဝ ဣဒ’’န္တိ ဝဒန္တော ဖရုသေန ဝဒတိ နာမ။ ကာရဏနိသ္သိတံ ပန ကတ္ဝာ, ‘‘ဘန္တေ မဟလ္လကတ္ထ, ပရိသာဝစရကတ္ထ, ပံသုကူလိကတ္ထ, ဓမ္မကထိကတ္ထပတိရူပံ တုမ္ဟာကမိဒ’’န္တိ ဝဒန္တော သဏ္ဟေန ဝဒတိ နာမ။ ကာရဏနိသ္သိတံ ကတ္ဝာ ဝဒန္တော အတ္ထသံဟိတေန ဝဒတိ နာမ။ မေတ္တစိတ္တော ဝက္ခာမိ နော ဒောသန္တရောတိ မေတ္တစိတ္တံ ပစ္စုပဋ္ဌပေတ္ဝာ ဝက္ခာမိ, န ဒုဋ္ဌစိတ္တော ဟုတ္ဝာ။
Kālena vakkhāmītiādīsu eko ekaṃ okāsaṃ kāretvā codento kālena vadati nāma. Saṅghamajjhe vā gaṇamajjhe vā salākaggayāgaggavitakkamāḷakabhikkhācāramaggaāsanasālādīsu vā upaṭṭhākehi parivāritakkhaṇe vā codento akālena vadati nāma. Tacchena vadanto bhūtena vadati nāma. ‘‘Daharamahallakaparisāvacarakapaṃsukūlikadhammakathikapatirūpaṃ tava ida’’nti vadanto pharusena vadati nāma. Kāraṇanissitaṃ pana katvā, ‘‘bhante mahallakattha, parisāvacarakattha, paṃsukūlikattha, dhammakathikatthapatirūpaṃ tumhākamida’’nti vadanto saṇhena vadati nāma. Kāraṇanissitaṃ katvā vadanto atthasaṃhitena vadati nāma. Mettacitto vakkhāmi no dosantaroti mettacittaṃ paccupaṭṭhapetvā vakkhāmi, na duṭṭhacitto hutvā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၄. ကုသိနာရသုတ္တံ • 4. Kusinārasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၈. ဝိဝာဒသုတ္တာဒိဝဏ္ဏနာ • 1-8. Vivādasuttādivaṇṇanā
