| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) |
༦. ཀུསིནཱརསུཏྟཝཎྞནཱ
6. Kusinārasuttavaṇṇanā
༧༦. ཚཊྛེ ནགརཾ པཝིསིཏུཀཱམཱ ཨུཡྻཱནཏོ ཨུཔེཙྩ ཝཏྟནྟི གཙྪནྟི ཨེཏེནཱཏི ཨུཔཝཏྟནཾ། ཡཐེཝ ཧི ཀལམྦནདིཏཱིརཏོ རཱཛམཱཏུཝིཧཱརདྭཱརེན ཐཱུཔཱརཱམཾ གནྟབྦཾ ཧོཏི, ཨེཝཾ ཧིརཉྙཝཏིཀཱཡ པཱརིམཏཱིརཏོ སཱལཝནཾ ཨུཡྻཱནཾ, ཡཐཱ ཨནུརཱདྷཔུརསྶ ཐཱུཔཱརཱམོ དཀྑིཎཔཙྪིམདིསཱཡ, ཨེཝཾ ཏཾ ཨུཡྻཱནཾ ཀུསིནཱརཱཡ དཀྑིཎཔཙྪིམདིསཱཡ ཧོཏི། ཡཐཱ ཐཱུཔཱརཱམཏོ དཀྑིཎདྭཱརེན ནགརཾ པཝིསནམགྒོ པཱཙཱིནམུཁོ གནྟྭཱ ཨུཏྟརེན ནིཝཏྟཏི, ཨེཝཾ ཨུཡྻཱནཏོ སཱལཔནྟི པཱཙཱིནམུཁཱ གནྟྭཱ ཨུཏྟརེན ནིཝཏྟཱ, ཏསྨཱ ཏཾ ‘‘ཨུཔཝཏྟན’’ནྟི ཝུཙྩཏི། ཨནྟརེཏི དྭིནྣཾ སཱལརུཀྑཱནཾ ཝེམཛ྄ཛྷེ། ཏཏྠ ཧི པཉྙཱཔིཡམཱནསྶ མཉྩསྶ ཨེཀཱ སཱལཔནྟི སཱིསབྷཱགེ ཧོཏི, ཨེཀཱ པཱདབྷཱགེ། ཏཏྲཔི ཨེཀོ ཏརུཎསཱལོ སཱིསབྷཱགསྶ ཨཱསནྣོ ཧོཏི, ཨེཀོ པཱདབྷཱགསྶ། ཨཔིཙ ཡམཀསཱལཱ ནཱམ མཱུལཁནྡྷཝིཊཔཔཏྟེཧི ཨཉྙམཉྙཾ སཾསིབྦིཏྭཱ ཋིཏསཱལཱཏིཔི ཝདནྟི།
76. Chaṭṭhe nagaraṃ pavisitukāmā uyyānato upecca vattanti gacchanti etenāti upavattanaṃ. Yatheva hi kalambanaditīrato rājamātuvihāradvārena thūpārāmaṃ gantabbaṃ hoti, evaṃ hiraññavatikāya pārimatīrato sālavanaṃ uyyānaṃ, yathā anurādhapurassa thūpārāmo dakkhiṇapacchimadisāya, evaṃ taṃ uyyānaṃ kusinārāya dakkhiṇapacchimadisāya hoti. Yathā thūpārāmato dakkhiṇadvārena nagaraṃ pavisanamaggo pācīnamukho gantvā uttarena nivattati, evaṃ uyyānato sālapanti pācīnamukhā gantvā uttarena nivattā, tasmā taṃ ‘‘upavattana’’nti vuccati. Antareti dvinnaṃ sālarukkhānaṃ vemajjhe. Tattha hi paññāpiyamānassa mañcassa ekā sālapanti sīsabhāge hoti, ekā pādabhāge. Tatrapi eko taruṇasālo sīsabhāgassa āsanno hoti, eko pādabhāgassa. Apica yamakasālā nāma mūlakhandhaviṭapapattehi aññamaññaṃ saṃsibbitvā ṭhitasālātipi vadanti.
དྭེལ༹ྷཀནྟི དྭིདྷཱགཱཧོ, ཨནེཀཾསགྒཱཧོཏི ཨཏྠོ། ཝིམཏཱིཏི སཾསཡཱཔཏྟཱིཏི ཨཱཧ ‘‘ཝིནིཙྪིཏུཾ ཨསམཏྠཏཱ’’ཏི། ཏཾ ཝོ ཝདཱམཱིཏི ཏཾ སཾསཡཝནྟཾ བྷིཀྑུཾ སནྡྷཱཡ ཝོ ཏུམྷེ ཝདཱམཱིཏི། ནིཀྐངྑབྷཱཝཔཙྩཀྑཀརཎནྟི བུདྡྷཱདཱིསུ ཏེསཾ བྷིཀྑཱུནཾ ནིཀྐངྑབྷཱཝསྶ པཙྩཀྑཀཱརིཡཱ ཡཱཐཱཝཏོ ཏམཏྠཾ པཊིཝིཛ྄ཛྷིཏྭཱ ཋིཏཾ སབྦཉྙུཏཉྙཱཎམེཝ། ཨེཏྠཱཏི ཨེཏསྨིཾ ཨཏྠེ།
Dveḷhakanti dvidhāgāho, anekaṃsaggāhoti attho. Vimatīti saṃsayāpattīti āha ‘‘vinicchituṃ asamatthatā’’ti. Taṃ vo vadāmīti taṃ saṃsayavantaṃ bhikkhuṃ sandhāya vo tumhe vadāmīti. Nikkaṅkhabhāvapaccakkhakaraṇanti buddhādīsu tesaṃ bhikkhūnaṃ nikkaṅkhabhāvassa paccakkhakāriyā yāthāvato tamatthaṃ paṭivijjhitvā ṭhitaṃ sabbaññutaññāṇameva. Etthāti etasmiṃ atthe.
ཀུསིནཱརསུཏྟཝཎྞནཱ ནིཊྛིཏཱ།
Kusinārasuttavaṇṇanā niṭṭhitā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / ཨངྒུཏྟརནིཀཱཡ • Aṅguttaranikāya / ༦. ཀུསིནཱརསུཏྟཾ • 6. Kusinārasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༦. ཀུསིནཱརསུཏྟཝཎྞནཱ • 6. Kusinārasuttavaṇṇanā
