| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
6. குஸுமாஸனியத்தே²ரஅபதா³னவண்ணனா
6. Kusumāsaniyattheraapadānavaṇṇanā
நக³ரே த⁴ஞ்ஞவதியாதிஆதி³கங் ஆயஸ்மதோ குஸுமாஸனியத்தே²ரஸ்ஸ அபதா³னங். அயம்பி புரிமஜினவரேஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே ப்³ராஹ்மணகுலே நிப்³ப³த்தோ விஞ்ஞுதங் பத்தோ மஹத்³த⁴னோ மஹாபோ⁴கோ³ திண்ணங் வேதா³னங் பாரங் க³தோ ப்³ராஹ்மணஸிப்பேஸு கோடிப்பத்தோ ஸகபரஸமயகுஸலோ மாதாபிதரோ பூஜேதுகாமோ பஞ்ச உப்பலகலாபே அத்தனோ ஸமீபே ட²பெத்வா நிஸின்னோ பி⁴க்கு²ஸங்க⁴பரிவுதங் விபஸ்ஸிங் ப⁴க³வந்தங் ஆக³ச்ச²ந்தங் தி³ஸ்வா நீலபீதாதி³க⁴னபு³த்³த⁴ரஸ்மியோ ச தி³ஸ்வா பஸன்னமானஸோ ஆஸனங் பஞ்ஞாபெத்வா தத்த² தானி புப்பா²னி ஸந்த²ரித்வா ப⁴க³வந்தங் தத்த² நிஸீதா³பெத்வா ஸகக⁴ரே மாது அத்தா²ய படியத்தானி ஸப்³பா³னி கா²த³னீயபோ⁴ஜனீயானி க³ஹெத்வா ஸபரிவாரங் ப⁴க³வந்தங் ஸஹத்தே²ன ஸந்தப்பெந்தோ போ⁴ஜேஸி. போ⁴ஜனாவஸானே ஏகங் உப்பலஹத்த²ங் அதா³ஸி. தேன ஸோமனஸ்ஸஜாதோ பத்த²னங் அகாஸி. ப⁴க³வாபி அனுமோத³னங் கத்வா பகாமி. ஸோ தேன புஞ்ஞேன தே³வமனுஸ்ஸேஸு த்³வே ஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ ஸாவத்தி²யங் விப⁴வஸம்பன்னே ஏகஸ்மிங் குலே நிப்³ப³த்தோ விஞ்ஞுதங் பத்தோ போ⁴க³யஸேஹி வட்³டி⁴தோ காமேஸு ஆதீ³னவங் தி³ஸ்வா க⁴ராவாஸங் பஹாய பப்³ப³ஜிதோ நசிரஸ்ஸேவ அரஹா அஹோஸி.
Nagare dhaññavatiyātiādikaṃ āyasmato kusumāsaniyattherassa apadānaṃ. Ayampi purimajinavaresu katādhikāro tattha tattha bhave vivaṭṭūpanissayāni puññāni upacinanto vipassissa bhagavato kāle brāhmaṇakule nibbatto viññutaṃ patto mahaddhano mahābhogo tiṇṇaṃ vedānaṃ pāraṃ gato brāhmaṇasippesu koṭippatto sakaparasamayakusalo mātāpitaro pūjetukāmo pañca uppalakalāpe attano samīpe ṭhapetvā nisinno bhikkhusaṅghaparivutaṃ vipassiṃ bhagavantaṃ āgacchantaṃ disvā nīlapītādighanabuddharasmiyo ca disvā pasannamānaso āsanaṃ paññāpetvā tattha tāni pupphāni santharitvā bhagavantaṃ tattha nisīdāpetvā sakaghare mātu atthāya paṭiyattāni sabbāni khādanīyabhojanīyāni gahetvā saparivāraṃ bhagavantaṃ sahatthena santappento bhojesi. Bhojanāvasāne ekaṃ uppalahatthaṃ adāsi. Tena somanassajāto patthanaṃ akāsi. Bhagavāpi anumodanaṃ katvā pakāmi. So tena puññena devamanussesu dve sampattiyo anubhavitvā imasmiṃ buddhuppāde sāvatthiyaṃ vibhavasampanne ekasmiṃ kule nibbatto viññutaṃ patto bhogayasehi vaḍḍhito kāmesu ādīnavaṃ disvā gharāvāsaṃ pahāya pabbajito nacirasseva arahā ahosi.
65. ஸோ அபரபா⁴கே³ புப்³பே³ கதகுஸலங் புப்³பே³னிவாஸஞாணேன ஸரித்வா ஸோமனஸ்ஸப்பத்தோ புப்³ப³சரிதாபதா³னங் பகாஸெந்தோ நக³ரே த⁴ஞ்ஞவதியாதிஆதி³மாஹ. த⁴ஞ்ஞானங் புஞ்ஞவந்தானங் க²த்தியப்³ராஹ்மணக³ஹபதிமஹாஸாலானங் அனேகேஸங் குலானங் ஆகரத்தா த⁴ஞ்ஞவதீ, அத² வா முத்தாமணிஆதி³ஸத்தரதனானங் ஸத்தவித⁴த⁴ஞ்ஞானங் உபபோ⁴க³பரிபோ⁴கா³னங் ஆகரத்தா த⁴ஞ்ஞவதீ, அத² வா த⁴ஞ்ஞானங் பு³த்³த⁴பச்சேகபு³த்³த⁴கீ²ணாஸவானங் வஸனட்டா²னங் ஆராமவிஹாராதீ³னங் ஆகரத்தா த⁴ஞ்ஞவதீ, தஸ்ஸா த⁴ஞ்ஞவதியா. நக³ரந்தி பத்தெ²ந்தி எத்த² உபபோ⁴க³பரிபோ⁴க³த்தி²கா ஜனாதி நக³ரங், ந க³ச்ச²தீதி வா நக³ங், ராஜயுவராஜமஹாமத்தாதீ³னங் வஸனட்டா²னங். நக³ங் ராதி ஆத³தா³தி க³ண்ஹாதீதி நக³ரங், ராஜாதீ³னங் வஸனட்டா²னஸமூஹபூ⁴தங் பாகாரபரிகா²தீ³ஹி பரிக்கி²த்தங் பரிச்சி²ன்னட்டா²னங் நக³ரங் நாமாதி அத்தோ². நக³ரே யதா³ அஹங் விபஸ்ஸிஸ்ஸ ப⁴க³வதோ ஸந்திகே ப்³யாகரணங் அலபி⁴ங், ததா³ தஸ்மிங் த⁴ஞ்ஞவதியா நக³ரே ப்³ராஹ்மணோ அஹோஸிந்தி ஸம்ப³ந்தோ⁴. ஸேஸங் ஸப்³ப³த்த² உத்தானமேவாதி.
65. So aparabhāge pubbe katakusalaṃ pubbenivāsañāṇena saritvā somanassappatto pubbacaritāpadānaṃ pakāsento nagare dhaññavatiyātiādimāha. Dhaññānaṃ puññavantānaṃ khattiyabrāhmaṇagahapatimahāsālānaṃ anekesaṃ kulānaṃ ākarattā dhaññavatī, atha vā muttāmaṇiādisattaratanānaṃ sattavidhadhaññānaṃ upabhogaparibhogānaṃ ākarattā dhaññavatī, atha vā dhaññānaṃ buddhapaccekabuddhakhīṇāsavānaṃ vasanaṭṭhānaṃ ārāmavihārādīnaṃ ākarattā dhaññavatī, tassā dhaññavatiyā. Nagaranti patthenti ettha upabhogaparibhogatthikā janāti nagaraṃ, na gacchatīti vā nagaṃ, rājayuvarājamahāmattādīnaṃ vasanaṭṭhānaṃ. Nagaṃ rāti ādadāti gaṇhātīti nagaraṃ, rājādīnaṃ vasanaṭṭhānasamūhabhūtaṃ pākāraparikhādīhi parikkhittaṃ paricchinnaṭṭhānaṃ nagaraṃ nāmāti attho. Nagare yadā ahaṃ vipassissa bhagavato santike byākaraṇaṃ alabhiṃ, tadā tasmiṃ dhaññavatiyā nagare brāhmaṇo ahosinti sambandho. Sesaṃ sabbattha uttānamevāti.
குஸுமாஸனியத்தே²ரஅபதா³னவண்ணனா ஸமத்தா.
Kusumāsaniyattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 6. குஸுமாஸனியத்தே²ரஅபதா³னங் • 6. Kusumāsaniyattheraapadānaṃ
