| Library / Tipiṭaka / திபிடக • Tipiṭaka / தீ³க⁴னிகாய • Dīghanikāya |
5. கூடத³ந்தஸுத்தங்
5. Kūṭadantasuttaṃ
கா²ணுமதகப்³ராஹ்மணக³ஹபதிகா
Khāṇumatakabrāhmaṇagahapatikā
323. ஏவங் மே ஸுதங் – ஏகங் ஸமயங் ப⁴க³வா மக³தே⁴ஸு சாரிகங் சரமானோ மஹதா பி⁴க்கு²ஸங்கே⁴ன ஸத்³தி⁴ங் பஞ்சமத்தேஹி பி⁴க்கு²ஸதேஹி யேன கா²ணுமதங் நாம மக³தா⁴னங் ப்³ராஹ்மணகா³மோ தத³வஸரி. தத்ர ஸுத³ங் ப⁴க³வா கா²ணுமதே விஹரதி அம்ப³லட்டி²காயங். தேன கோ² பன ஸமயேன கூடத³ந்தோ ப்³ராஹ்மணோ கா²ணுமதங் அஜ்ஜா²வஸதி ஸத்துஸ்ஸத³ங் ஸதிணகட்டோ²த³கங் ஸத⁴ஞ்ஞங் ராஜபொ⁴க்³க³ங் ரஞ்ஞா மாக³தே⁴ன ஸேனியேன பி³ம்பி³ஸாரேன தி³ன்னங் ராஜதா³யங் ப்³ரஹ்மதெ³ய்யங். தேன கோ² பன ஸமயேன கூடத³ந்தஸ்ஸ ப்³ராஹ்மணஸ்ஸ மஹாயஞ்ஞோ உபக்க²டோ ஹோதி. ஸத்த ச உஸப⁴ஸதானி ஸத்த ச வச்ச²தரஸதானி ஸத்த ச வச்ச²தரீஸதானி ஸத்த ச அஜஸதானி ஸத்த ச உரப்³ப⁴ஸதானி தூ²ணூபனீதானி ஹொந்தி யஞ்ஞத்தா²ய.
323. Evaṃ me sutaṃ – ekaṃ samayaṃ bhagavā magadhesu cārikaṃ caramāno mahatā bhikkhusaṅghena saddhiṃ pañcamattehi bhikkhusatehi yena khāṇumataṃ nāma magadhānaṃ brāhmaṇagāmo tadavasari. Tatra sudaṃ bhagavā khāṇumate viharati ambalaṭṭhikāyaṃ. Tena kho pana samayena kūṭadanto brāhmaṇo khāṇumataṃ ajjhāvasati sattussadaṃ satiṇakaṭṭhodakaṃ sadhaññaṃ rājabhoggaṃ raññā māgadhena seniyena bimbisārena dinnaṃ rājadāyaṃ brahmadeyyaṃ. Tena kho pana samayena kūṭadantassa brāhmaṇassa mahāyañño upakkhaṭo hoti. Satta ca usabhasatāni satta ca vacchatarasatāni satta ca vacchatarīsatāni satta ca ajasatāni satta ca urabbhasatāni thūṇūpanītāni honti yaññatthāya.
324. அஸ்ஸோஸுங் கோ² கா²ணுமதகா ப்³ராஹ்மணக³ஹபதிகா – ‘‘ஸமணோ க²லு, போ⁴, கோ³தமோ ஸக்யபுத்தோ ஸக்யகுலா பப்³ப³ஜிதோ மக³தே⁴ஸு சாரிகங் சரமானோ மஹதா பி⁴க்கு²ஸங்கே⁴ன ஸத்³தி⁴ங் பஞ்சமத்தேஹி பி⁴க்கு²ஸதேஹி கா²ணுமதங் அனுப்பத்தோ கா²ணுமதே விஹரதி அம்ப³லட்டி²காயங். தங் கோ² பன ப⁴வந்தங் கோ³தமங் ஏவங் கல்யாணோ கித்திஸத்³தோ³ அப்³பு⁴க்³க³தோ – ‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா’தி . ஸோ இமங் லோகங் ஸதே³வகங் ஸமாரகங் ஸப்³ரஹ்மகங் ஸஸ்ஸமணப்³ராஹ்மணிங் பஜங் ஸதே³வமனுஸ்ஸங் ஸயங் அபி⁴ஞ்ஞா ஸச்சி²கத்வா பவேதே³தி. ஸோ த⁴ம்மங் தே³ஸேதி ஆதி³கல்யாணங் மஜ்ஜே²கல்யாணங் பரியோஸானகல்யாணங் ஸாத்த²ங் ஸப்³யஞ்ஜனங் கேவலபரிபுண்ணங் பரிஸுத்³த⁴ங் ப்³ரஹ்மசரியங் பகாஸேதி. ஸாது⁴ கோ² பன ததா²ரூபானங் அரஹதங் த³ஸ்ஸனங் ஹோதீ’’தி.
324. Assosuṃ kho khāṇumatakā brāhmaṇagahapatikā – ‘‘samaṇo khalu, bho, gotamo sakyaputto sakyakulā pabbajito magadhesu cārikaṃ caramāno mahatā bhikkhusaṅghena saddhiṃ pañcamattehi bhikkhusatehi khāṇumataṃ anuppatto khāṇumate viharati ambalaṭṭhikāyaṃ. Taṃ kho pana bhavantaṃ gotamaṃ evaṃ kalyāṇo kittisaddo abbhuggato – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā’ti . So imaṃ lokaṃ sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā sacchikatvā pavedeti. So dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāseti. Sādhu kho pana tathārūpānaṃ arahataṃ dassanaṃ hotī’’ti.
325. அத² கோ² கா²ணுமதகா ப்³ராஹ்மணக³ஹபதிகா கா²ணுமதா நிக்க²மித்வா ஸங்க⁴ஸங்கீ⁴ க³ணீபூ⁴தா யேன அம்ப³லட்டி²கா தேனுபஸங்கமந்தி.
325. Atha kho khāṇumatakā brāhmaṇagahapatikā khāṇumatā nikkhamitvā saṅghasaṅghī gaṇībhūtā yena ambalaṭṭhikā tenupasaṅkamanti.
326. தேன கோ² பன ஸமயேன கூடத³ந்தோ ப்³ராஹ்மணோ உபரிபாஸாதே³ தி³வாஸெய்யங் உபக³தோ ஹோதி. அத்³த³ஸா கோ² கூடத³ந்தோ ப்³ராஹ்மணோ கா²ணுமதகே ப்³ராஹ்மணக³ஹபதிகே கா²ணுமதா நிக்க²மித்வா ஸங்க⁴ஸங்கீ⁴ க³ணீபூ⁴தே யேன அம்ப³லட்டி²கா தேனுபஸங்கமந்தே. தி³ஸ்வா க²த்தங் ஆமந்தேஸி – ‘‘கிங் நு கோ², போ⁴ க²த்தே, கா²ணுமதகா ப்³ராஹ்மணக³ஹபதிகா கா²ணுமதா நிக்க²மித்வா ஸங்க⁴ஸங்கீ⁴ க³ணீபூ⁴தா யேன அம்ப³லட்டி²கா தேனுபஸங்கமந்தீ’’தி?
326. Tena kho pana samayena kūṭadanto brāhmaṇo uparipāsāde divāseyyaṃ upagato hoti. Addasā kho kūṭadanto brāhmaṇo khāṇumatake brāhmaṇagahapatike khāṇumatā nikkhamitvā saṅghasaṅghī gaṇībhūte yena ambalaṭṭhikā tenupasaṅkamante. Disvā khattaṃ āmantesi – ‘‘kiṃ nu kho, bho khatte, khāṇumatakā brāhmaṇagahapatikā khāṇumatā nikkhamitvā saṅghasaṅghī gaṇībhūtā yena ambalaṭṭhikā tenupasaṅkamantī’’ti?
327. ‘‘அத்தி² கோ², போ⁴, ஸமணோ கோ³தமோ ஸக்யபுத்தோ ஸக்யகுலா பப்³ப³ஜிதோ மக³தே⁴ஸு சாரிகங் சரமானோ மஹதா பி⁴க்கு²ஸங்கே⁴ன ஸத்³தி⁴ங் பஞ்சமத்தேஹி பி⁴க்கு²ஸதேஹி கா²ணுமதங் அனுப்பத்தோ, கா²ணுமதே விஹரதி அம்ப³லட்டி²காயங். தங் கோ² பன ப⁴வந்தங் கோ³தமங் ஏவங் கல்யாணோ கித்திஸத்³தோ³ அப்³பு⁴க்³க³தோ – ‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா’தி. தமேதே ப⁴வந்தங் கோ³தமங் த³ஸ்ஸனாய உபஸங்கமந்தீ’’தி.
327. ‘‘Atthi kho, bho, samaṇo gotamo sakyaputto sakyakulā pabbajito magadhesu cārikaṃ caramāno mahatā bhikkhusaṅghena saddhiṃ pañcamattehi bhikkhusatehi khāṇumataṃ anuppatto, khāṇumate viharati ambalaṭṭhikāyaṃ. Taṃ kho pana bhavantaṃ gotamaṃ evaṃ kalyāṇo kittisaddo abbhuggato – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā’ti. Tamete bhavantaṃ gotamaṃ dassanāya upasaṅkamantī’’ti.
328. அத² கோ² கூடத³ந்தஸ்ஸ ப்³ராஹ்மணஸ்ஸ ஏதத³ஹோஸி – ‘‘ஸுதங் கோ² பன மேதங் – ‘ஸமணோ கோ³தமோ திவித⁴ங் யஞ்ஞஸம்பத³ங் ஸோளஸபரிக்கா²ரங் ஜானாதீ’தி. ந கோ² பனாஹங் ஜானாமி திவித⁴ங் யஞ்ஞஸம்பத³ங் ஸோளஸபரிக்கா²ரங். இச்சா²மி சாஹங் மஹாயஞ்ஞங் யஜிதுங். யங்னூனாஹங் ஸமணங் கோ³தமங் உபஸங்கமித்வா திவித⁴ங் யஞ்ஞஸம்பத³ங் ஸோளஸபரிக்கா²ரங் புச்செ²ய்ய’’ந்தி.
328. Atha kho kūṭadantassa brāhmaṇassa etadahosi – ‘‘sutaṃ kho pana metaṃ – ‘samaṇo gotamo tividhaṃ yaññasampadaṃ soḷasaparikkhāraṃ jānātī’ti. Na kho panāhaṃ jānāmi tividhaṃ yaññasampadaṃ soḷasaparikkhāraṃ. Icchāmi cāhaṃ mahāyaññaṃ yajituṃ. Yaṃnūnāhaṃ samaṇaṃ gotamaṃ upasaṅkamitvā tividhaṃ yaññasampadaṃ soḷasaparikkhāraṃ puccheyya’’nti.
329. அத² கோ² கூடத³ந்தோ ப்³ராஹ்மணோ க²த்தங் ஆமந்தேஸி – ‘‘தேன ஹி, போ⁴ க²த்தே, யேன கா²ணுமதகா ப்³ராஹ்மணக³ஹபதிகா தேனுபஸங்கம. உபஸங்கமித்வா கா²ணுமதகே ப்³ராஹ்மணக³ஹபதிகே ஏவங் வதே³ஹி – ‘கூடத³ந்தோ, போ⁴, ப்³ராஹ்மணோ ஏவமாஹ – ‘‘ஆக³மெந்து கிர ப⁴வந்தோ, கூடத³ந்தோபி ப்³ராஹ்மணோ ஸமணங் கோ³தமங் த³ஸ்ஸனாய உபஸங்கமிஸ்ஸதீ’’’தி. ‘‘ஏவங், போ⁴’’தி கோ² ஸோ க²த்தா கூடத³ந்தஸ்ஸ ப்³ராஹ்மணஸ்ஸ படிஸ்ஸுத்வா யேன கா²ணுமதகா ப்³ராஹ்மணக³ஹபதிகா தேனுபஸங்கமி. உபஸங்கமித்வா கா²ணுமதகே ப்³ராஹ்மணக³ஹபதிகே ஏதத³வோச – ‘‘கூடத³ந்தோ, போ⁴, ப்³ராஹ்மணோ ஏவமாஹ – ‘ஆக³மெந்து கிர பொ⁴ந்தோ, கூடத³ந்தோபி ப்³ராஹ்மணோ ஸமணங் கோ³தமங் த³ஸ்ஸனாய உபஸங்கமிஸ்ஸதீ’’’தி.
329. Atha kho kūṭadanto brāhmaṇo khattaṃ āmantesi – ‘‘tena hi, bho khatte, yena khāṇumatakā brāhmaṇagahapatikā tenupasaṅkama. Upasaṅkamitvā khāṇumatake brāhmaṇagahapatike evaṃ vadehi – ‘kūṭadanto, bho, brāhmaṇo evamāha – ‘‘āgamentu kira bhavanto, kūṭadantopi brāhmaṇo samaṇaṃ gotamaṃ dassanāya upasaṅkamissatī’’’ti. ‘‘Evaṃ, bho’’ti kho so khattā kūṭadantassa brāhmaṇassa paṭissutvā yena khāṇumatakā brāhmaṇagahapatikā tenupasaṅkami. Upasaṅkamitvā khāṇumatake brāhmaṇagahapatike etadavoca – ‘‘kūṭadanto, bho, brāhmaṇo evamāha – ‘āgamentu kira bhonto, kūṭadantopi brāhmaṇo samaṇaṃ gotamaṃ dassanāya upasaṅkamissatī’’’ti.
கூடத³ந்தகு³ணகதா²
Kūṭadantaguṇakathā
330. தேன கோ² பன ஸமயேன அனேகானி ப்³ராஹ்மணஸதானி கா²ணுமதே படிவஸந்தி – ‘‘கூடத³ந்தஸ்ஸ ப்³ராஹ்மணஸ்ஸ மஹாயஞ்ஞங் அனுப⁴விஸ்ஸாமா’’தி. அஸ்ஸோஸுங் கோ² தே ப்³ராஹ்மணா – ‘‘கூடத³ந்தோ கிர ப்³ராஹ்மணோ ஸமணங் கோ³தமங் த³ஸ்ஸனாய உபஸங்கமிஸ்ஸதீ’’தி. அத² கோ² தே ப்³ராஹ்மணா யேன கூடத³ந்தோ ப்³ராஹ்மணோ தேனுபஸங்கமிங்ஸு.
330. Tena kho pana samayena anekāni brāhmaṇasatāni khāṇumate paṭivasanti – ‘‘kūṭadantassa brāhmaṇassa mahāyaññaṃ anubhavissāmā’’ti. Assosuṃ kho te brāhmaṇā – ‘‘kūṭadanto kira brāhmaṇo samaṇaṃ gotamaṃ dassanāya upasaṅkamissatī’’ti. Atha kho te brāhmaṇā yena kūṭadanto brāhmaṇo tenupasaṅkamiṃsu.
331. உபஸங்கமித்வா கூடத³ந்தங் ப்³ராஹ்மணங் ஏதத³வோசுங் – ‘‘ஸச்சங் கிர ப⁴வங் கூடத³ந்தோ ஸமணங் கோ³தமங் த³ஸ்ஸனாய உபஸங்கமிஸ்ஸதீ’’தி? ‘‘ஏவங் கோ² மே, போ⁴, ஹோதி – ‘அஹம்பி ஸமணங் கோ³தமங் த³ஸ்ஸனாய உபஸங்கமிஸ்ஸாமீ’’’தி.
331. Upasaṅkamitvā kūṭadantaṃ brāhmaṇaṃ etadavocuṃ – ‘‘saccaṃ kira bhavaṃ kūṭadanto samaṇaṃ gotamaṃ dassanāya upasaṅkamissatī’’ti? ‘‘Evaṃ kho me, bho, hoti – ‘ahampi samaṇaṃ gotamaṃ dassanāya upasaṅkamissāmī’’’ti.
‘‘மா ப⁴வங் கூடத³ந்தோ ஸமணங் கோ³தமங் த³ஸ்ஸனாய உபஸங்கமி. ந அரஹதி ப⁴வங் கூடத³ந்தோ ஸமணங் கோ³தமங் த³ஸ்ஸனாய உபஸங்கமிதுங். ஸசே ப⁴வங் கூடத³ந்தோ ஸமணங் கோ³தமங் த³ஸ்ஸனாய உபஸங்கமிஸ்ஸதி, போ⁴தோ கூடத³ந்தஸ்ஸ யஸோ ஹாயிஸ்ஸதி, ஸமணஸ்ஸ கோ³தமஸ்ஸ யஸோ அபி⁴வட்³டி⁴ஸ்ஸதி. யம்பி போ⁴தோ கூடத³ந்தஸ்ஸ யஸோ ஹாயிஸ்ஸதி, ஸமணஸ்ஸ கோ³தமஸ்ஸ யஸோ அபி⁴வட்³டி⁴ஸ்ஸதி, இமினாபங்கே³ன ந அரஹதி ப⁴வங் கூடத³ந்தோ ஸமணங் கோ³தமங் த³ஸ்ஸனாய உபஸங்கமிதுங். ஸமணோ த்வேவ கோ³தமோ அரஹதி ப⁴வந்தங் கூடத³ந்தங் த³ஸ்ஸனாய உபஸங்கமிதுங் .
‘‘Mā bhavaṃ kūṭadanto samaṇaṃ gotamaṃ dassanāya upasaṅkami. Na arahati bhavaṃ kūṭadanto samaṇaṃ gotamaṃ dassanāya upasaṅkamituṃ. Sace bhavaṃ kūṭadanto samaṇaṃ gotamaṃ dassanāya upasaṅkamissati, bhoto kūṭadantassa yaso hāyissati, samaṇassa gotamassa yaso abhivaḍḍhissati. Yampi bhoto kūṭadantassa yaso hāyissati, samaṇassa gotamassa yaso abhivaḍḍhissati, imināpaṅgena na arahati bhavaṃ kūṭadanto samaṇaṃ gotamaṃ dassanāya upasaṅkamituṃ. Samaṇo tveva gotamo arahati bhavantaṃ kūṭadantaṃ dassanāya upasaṅkamituṃ .
‘‘ப⁴வஞ்ஹி கூடத³ந்தோ உப⁴தோ ஸுஜாதோ மாதிதோ ச பிதிதோ ச ஸங்ஸுத்³த⁴க³ஹணிகோ யாவ ஸத்தமா பிதாமஹயுகா³ அக்கி²த்தோ அனுபக்குட்டோ² ஜாதிவாதே³ன. யம்பி ப⁴வங் கூடத³ந்தோ உப⁴தோ ஸுஜாதோ மாதிதோ ச பிதிதோ ச ஸங்ஸுத்³த⁴க³ஹணிகோ யாவ ஸத்தமா பிதாமஹயுகா³ அக்கி²த்தோ அனுபக்குட்டோ² ஜாதிவாதே³ன, இமினாபங்கே³ன ந அரஹதி ப⁴வங் கூடத³ந்தோ ஸமணங் கோ³தமங் த³ஸ்ஸனாய உபஸங்கமிதுங். ஸமணோ த்வேவ கோ³தமோ அரஹதி ப⁴வந்தங் கூடத³ந்தங் த³ஸ்ஸனாய உபஸங்கமிதுங்.
‘‘Bhavañhi kūṭadanto ubhato sujāto mātito ca pitito ca saṃsuddhagahaṇiko yāva sattamā pitāmahayugā akkhitto anupakkuṭṭho jātivādena. Yampi bhavaṃ kūṭadanto ubhato sujāto mātito ca pitito ca saṃsuddhagahaṇiko yāva sattamā pitāmahayugā akkhitto anupakkuṭṭho jātivādena, imināpaṅgena na arahati bhavaṃ kūṭadanto samaṇaṃ gotamaṃ dassanāya upasaṅkamituṃ. Samaṇo tveva gotamo arahati bhavantaṃ kūṭadantaṃ dassanāya upasaṅkamituṃ.
‘‘ப⁴வஞ்ஹி கூடத³ந்தோ அட்³டோ⁴ மஹத்³த⁴னோ மஹாபோ⁴கோ³ பஹூதவித்தூபகரணோ பஹூதஜாதரூபரஜதோ…பே॰…
‘‘Bhavañhi kūṭadanto aḍḍho mahaddhano mahābhogo pahūtavittūpakaraṇo pahūtajātarūparajato…pe…
‘‘ப⁴வஞ்ஹி கூடத³ந்தோ அஜ்ஜா²யகோ மந்தத⁴ரோ திண்ணங் வேதா³னங் பாரகூ³ ஸனிக⁴ண்டு³கேடுபா⁴னங் ஸாக்க²ரப்பபே⁴தா³னங் இதிஹாஸபஞ்சமானங் பத³கோ வெய்யாகரணோ லோகாயதமஹாபுரிஸலக்க²ணேஸு அனவயோ…பே॰…
‘‘Bhavañhi kūṭadanto ajjhāyako mantadharo tiṇṇaṃ vedānaṃ pāragū sanighaṇḍukeṭubhānaṃ sākkharappabhedānaṃ itihāsapañcamānaṃ padako veyyākaraṇo lokāyatamahāpurisalakkhaṇesu anavayo…pe…
‘‘ப⁴வஞ்ஹி கூடத³ந்தோ அபி⁴ரூபோ த³ஸ்ஸனீயோ பாஸாதி³கோ பரமாய வண்ணபொக்க²ரதாய ஸமன்னாக³தோ ப்³ரஹ்மவண்ணீ ப்³ரஹ்மவச்ச²ஸீ அகு²த்³தா³வகாஸோ த³ஸ்ஸனாய…பே॰…
‘‘Bhavañhi kūṭadanto abhirūpo dassanīyo pāsādiko paramāya vaṇṇapokkharatāya samannāgato brahmavaṇṇī brahmavacchasī akhuddāvakāso dassanāya…pe…
‘‘ப⁴வஞ்ஹி கூடத³ந்தோ ஸீலவா வுத்³த⁴ஸீலீ வுத்³த⁴ஸீலேன ஸமன்னாக³தோ…பே॰…
‘‘Bhavañhi kūṭadanto sīlavā vuddhasīlī vuddhasīlena samannāgato…pe…
‘‘ப⁴வஞ்ஹி கூடத³ந்தோ கல்யாணவாசோ கல்யாணவாக்கரணோ போரியா வாசாய ஸமன்னாக³தோ விஸ்ஸட்டா²ய அனேலக³லாய அத்த²ஸ்ஸ விஞ்ஞாபனியா…பே॰…
‘‘Bhavañhi kūṭadanto kalyāṇavāco kalyāṇavākkaraṇo poriyā vācāya samannāgato vissaṭṭhāya anelagalāya atthassa viññāpaniyā…pe…
‘‘ப⁴வஞ்ஹி கூடத³ந்தோ ப³ஹூனங் ஆசரியபாசரியோ தீணி மாணவகஸதானி மந்தே வாசேதி, ப³ஹூ கோ² பன நானாதி³ஸா நானாஜனபதா³ மாணவகா ஆக³ச்ச²ந்தி போ⁴தோ கூடத³ந்தஸ்ஸ ஸந்திகே மந்தத்தி²கா மந்தே அதி⁴யிதுகாமா…பே॰…
‘‘Bhavañhi kūṭadanto bahūnaṃ ācariyapācariyo tīṇi māṇavakasatāni mante vāceti, bahū kho pana nānādisā nānājanapadā māṇavakā āgacchanti bhoto kūṭadantassa santike mantatthikā mante adhiyitukāmā…pe…
‘‘ப⁴வஞ்ஹி கூடத³ந்தோ ஜிண்ணோ வுத்³தோ⁴ மஹல்லகோ அத்³த⁴க³தோ வயோஅனுப்பத்தோ. ஸமணோ கோ³தமோ தருணோ சேவ தருணபப்³ப³ஜிதோ ச…பே॰…
‘‘Bhavañhi kūṭadanto jiṇṇo vuddho mahallako addhagato vayoanuppatto. Samaṇo gotamo taruṇo ceva taruṇapabbajito ca…pe…
‘‘ப⁴வஞ்ஹி கூடத³ந்தோ ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஸக்கதோ க³ருகதோ மானிதோ பூஜிதோ அபசிதோ…பே॰…
‘‘Bhavañhi kūṭadanto rañño māgadhassa seniyassa bimbisārassa sakkato garukato mānito pūjito apacito…pe…
‘‘ப⁴வஞ்ஹி கூடத³ந்தோ ப்³ராஹ்மணஸ்ஸ பொக்க²ரஸாதிஸ்ஸ ஸக்கதோ க³ருகதோ மானிதோ பூஜிதோ அபசிதோ…பே॰…
‘‘Bhavañhi kūṭadanto brāhmaṇassa pokkharasātissa sakkato garukato mānito pūjito apacito…pe…
‘‘ப⁴வஞ்ஹி கூடத³ந்தோ கா²ணுமதங் அஜ்ஜா²வஸதி ஸத்துஸ்ஸத³ங் ஸதிணகட்டோ²த³கங் ஸத⁴ஞ்ஞங் ராஜபொ⁴க்³க³ங் ரஞ்ஞா மாக³தே⁴ன ஸேனியேன பி³ம்பி³ஸாரேன தி³ன்னங் ராஜதா³யங் ப்³ரஹ்மதெ³ய்யங். யம்பி ப⁴வங் கூடத³ந்தோ கா²ணுமதங் அஜ்ஜா²வஸதி ஸத்துஸ்ஸத³ங் ஸதிணகட்டோ²த³கங் ஸத⁴ஞ்ஞங் ராஜபொ⁴க்³க³ங், ரஞ்ஞா மாக³தே⁴ன ஸேனியேன பி³ம்பி³ஸாரேன தி³ன்னங் ராஜதா³யங் ப்³ரஹ்மதெ³ய்யங், இமினாபங்கே³ன ந அரஹதி ப⁴வங் கூடத³ந்தோ ஸமணங் கோ³தமங் த³ஸ்ஸனாய உபஸங்கமிதுங். ஸமணொத்வேவ கோ³தமோ அரஹதி ப⁴வந்தங் கூடத³ந்தங் த³ஸ்ஸனாய உபஸங்கமிது’’ந்தி.
‘‘Bhavañhi kūṭadanto khāṇumataṃ ajjhāvasati sattussadaṃ satiṇakaṭṭhodakaṃ sadhaññaṃ rājabhoggaṃ raññā māgadhena seniyena bimbisārena dinnaṃ rājadāyaṃ brahmadeyyaṃ. Yampi bhavaṃ kūṭadanto khāṇumataṃ ajjhāvasati sattussadaṃ satiṇakaṭṭhodakaṃ sadhaññaṃ rājabhoggaṃ, raññā māgadhena seniyena bimbisārena dinnaṃ rājadāyaṃ brahmadeyyaṃ, imināpaṅgena na arahati bhavaṃ kūṭadanto samaṇaṃ gotamaṃ dassanāya upasaṅkamituṃ. Samaṇotveva gotamo arahati bhavantaṃ kūṭadantaṃ dassanāya upasaṅkamitu’’nti.
பு³த்³த⁴கு³ணகதா²
Buddhaguṇakathā
332. ஏவங் வுத்தே கூடத³ந்தோ ப்³ராஹ்மணோ தே ப்³ராஹ்மணே ஏதத³வோச –
332. Evaṃ vutte kūṭadanto brāhmaṇo te brāhmaṇe etadavoca –
‘‘தேன ஹி, போ⁴, மமபி ஸுணாத², யதா² மயமேவ அரஹாம தங் ப⁴வந்தங் கோ³தமங் த³ஸ்ஸனாய உபஸங்கமிதுங், ந த்வேவ அரஹதி ஸோ ப⁴வங் கோ³தமோ அம்ஹாகங் த³ஸ்ஸனாய உபஸங்கமிதுங். ஸமணோ க²லு, போ⁴, கோ³தமோ உப⁴தோ ஸுஜாதோ மாதிதோ ச பிதிதோ ச ஸங்ஸுத்³த⁴க³ஹணிகோ யாவ ஸத்தமா பிதாமஹயுகா³ அக்கி²த்தோ அனுபக்குட்டோ² ஜாதிவாதே³ன. யம்பி, போ⁴, ஸமணோ கோ³தமோ உப⁴தோ ஸுஜாதோ மாதிதோ ச பிதிதோ ச ஸங்ஸுத்³த⁴க³ஹணிகோ யாவ ஸத்தமா பிதாமஹயுகா³ அக்கி²த்தோ அனுபக்குட்டோ² ஜாதிவாதே³ன, இமினாபங்கே³ன ந அரஹதி ஸோ ப⁴வங் கோ³தமோ அம்ஹாகங் த³ஸ்ஸனாய உபஸங்கமிதுங். அத² கோ² மயமேவ அரஹாம தங் ப⁴வந்தங் கோ³தமங் த³ஸ்ஸனாய உபஸங்கமிதுங்.
‘‘Tena hi, bho, mamapi suṇātha, yathā mayameva arahāma taṃ bhavantaṃ gotamaṃ dassanāya upasaṅkamituṃ, na tveva arahati so bhavaṃ gotamo amhākaṃ dassanāya upasaṅkamituṃ. Samaṇo khalu, bho, gotamo ubhato sujāto mātito ca pitito ca saṃsuddhagahaṇiko yāva sattamā pitāmahayugā akkhitto anupakkuṭṭho jātivādena. Yampi, bho, samaṇo gotamo ubhato sujāto mātito ca pitito ca saṃsuddhagahaṇiko yāva sattamā pitāmahayugā akkhitto anupakkuṭṭho jātivādena, imināpaṅgena na arahati so bhavaṃ gotamo amhākaṃ dassanāya upasaṅkamituṃ. Atha kho mayameva arahāma taṃ bhavantaṃ gotamaṃ dassanāya upasaṅkamituṃ.
‘‘ஸமணோ க²லு, போ⁴, கோ³தமோ மஹந்தங் ஞாதிஸங்க⁴ங் ஓஹாய பப்³ப³ஜிதோ…பே॰…
‘‘Samaṇo khalu, bho, gotamo mahantaṃ ñātisaṅghaṃ ohāya pabbajito…pe…
‘‘ஸமணோ க²லு, போ⁴, கோ³தமோ பஹூதங் ஹிரஞ்ஞஸுவண்ணங் ஓஹாய பப்³ப³ஜிதோ பூ⁴மிக³தஞ்ச வேஹாஸட்ட²ங் ச…பே॰…
‘‘Samaṇo khalu, bho, gotamo pahūtaṃ hiraññasuvaṇṇaṃ ohāya pabbajito bhūmigatañca vehāsaṭṭhaṃ ca…pe…
‘‘ஸமணோ க²லு, போ⁴, கோ³தமோ த³ஹரோவ ஸமானோ யுவா ஸுஸுகாளகேஸோ ப⁴த்³ரேன யொப்³ப³னேன ஸமன்னாக³தோ பட²மேன வயஸா அகா³ரஸ்மா அனகா³ரியங் பப்³ப³ஜிதோ…பே॰…
‘‘Samaṇo khalu, bho, gotamo daharova samāno yuvā susukāḷakeso bhadrena yobbanena samannāgato paṭhamena vayasā agārasmā anagāriyaṃ pabbajito…pe…
‘‘ஸமணோ க²லு, போ⁴, கோ³தமோ அகாமகானங் மாதாபிதூனங் அஸ்ஸுமுகா²னங் ருத³ந்தானங் கேஸமஸ்ஸுங் ஓஹாரெத்வா காஸாயானி வத்தா²னி அச்சா²தெ³த்வா அகா³ரஸ்மா அனகா³ரியங் பப்³ப³ஜிதோ…பே॰…
‘‘Samaṇo khalu, bho, gotamo akāmakānaṃ mātāpitūnaṃ assumukhānaṃ rudantānaṃ kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajito…pe…
‘‘ஸமணோ க²லு, போ⁴, கோ³தமோ அபி⁴ரூபோ த³ஸ்ஸனீயோ பாஸாதி³கோ பரமாய வண்ணபொக்க²ரதாய ஸமன்னாக³தோ ப்³ரஹ்மவண்ணீ ப்³ரஹ்மவச்ச²ஸீ அகு²த்³தா³வகாஸோ த³ஸ்ஸனாய …பே॰…
‘‘Samaṇo khalu, bho, gotamo abhirūpo dassanīyo pāsādiko paramāya vaṇṇapokkharatāya samannāgato brahmavaṇṇī brahmavacchasī akhuddāvakāso dassanāya …pe…
‘‘ஸமணோ க²லு, போ⁴, கோ³தமோ ஸீலவா அரியஸீலீ குஸலஸீலீ குஸலஸீலேன ஸமன்னாக³தோ…பே॰…
‘‘Samaṇo khalu, bho, gotamo sīlavā ariyasīlī kusalasīlī kusalasīlena samannāgato…pe…
‘‘ஸமணோ க²லு, போ⁴, கோ³தமோ கல்யாணவாசோ கல்யாணவாக்கரணோ போரியா வாசாய ஸமன்னாக³தோ விஸ்ஸட்டா²ய அனேலக³லாய அத்த²ஸ்ஸ விஞ்ஞாபனியா…பே॰…
‘‘Samaṇo khalu, bho, gotamo kalyāṇavāco kalyāṇavākkaraṇo poriyā vācāya samannāgato vissaṭṭhāya anelagalāya atthassa viññāpaniyā…pe…
‘‘ஸமணோ க²லு, போ⁴, கோ³தமோ ப³ஹூனங் ஆசரியபாசரியோ…பே॰…
‘‘Samaṇo khalu, bho, gotamo bahūnaṃ ācariyapācariyo…pe…
‘‘ஸமணோ க²லு, போ⁴, கோ³தமோ கீ²ணகாமராகோ³ விக³தசாபல்லோ…பே॰…
‘‘Samaṇo khalu, bho, gotamo khīṇakāmarāgo vigatacāpallo…pe…
‘‘ஸமணோ க²லு, போ⁴, கோ³தமோ கம்மவாதீ³ கிரியவாதீ³ அபாபபுரெக்கா²ரோ ப்³ரஹ்மஞ்ஞாய பஜாய…பே॰…
‘‘Samaṇo khalu, bho, gotamo kammavādī kiriyavādī apāpapurekkhāro brahmaññāya pajāya…pe…
‘‘ஸமணோ க²லு, போ⁴, கோ³தமோ உச்சா குலா பப்³ப³ஜிதோ அஸம்பி⁴ன்னக²த்தியகுலா…பே॰…
‘‘Samaṇo khalu, bho, gotamo uccā kulā pabbajito asambhinnakhattiyakulā…pe…
‘‘ஸமணோ க²லு, போ⁴, கோ³தமோ அட்³டா⁴ குலா பப்³ப³ஜிதோ மஹத்³த⁴னா மஹாபோ⁴கா³…பே॰…
‘‘Samaṇo khalu, bho, gotamo aḍḍhā kulā pabbajito mahaddhanā mahābhogā…pe…
‘‘ஸமணங் க²லு, போ⁴, கோ³தமங் திரோரட்டா² திரோஜனபதா³ பஞ்ஹங் புச்சி²துங் ஆக³ச்ச²ந்தி…பே॰…
‘‘Samaṇaṃ khalu, bho, gotamaṃ tiroraṭṭhā tirojanapadā pañhaṃ pucchituṃ āgacchanti…pe…
‘‘ஸமணங் க²லு, போ⁴, கோ³தமங் அனேகானி தே³வதாஸஹஸ்ஸானி பாணேஹி ஸரணங் க³தானி…பே॰…
‘‘Samaṇaṃ khalu, bho, gotamaṃ anekāni devatāsahassāni pāṇehi saraṇaṃ gatāni…pe…
‘‘ஸமணங் க²லு, போ⁴, கோ³தமங் ஏவங் கல்யாணோ கித்திஸத்³தோ³ அப்³பு⁴க்³க³தோ – ‘இதிபி ஸோ ப⁴க³வா அரஹங் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானங் பு³த்³தோ⁴ ப⁴க³வா’ தி…பே॰…
‘‘Samaṇaṃ khalu, bho, gotamaṃ evaṃ kalyāṇo kittisaddo abbhuggato – ‘itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā’ ti…pe…
‘‘ஸமணோ க²லு, போ⁴, கோ³தமோ த்³வத்திங்ஸமஹாபுரிஸலக்க²ணேஹி ஸமன்னாக³தோ…பே॰…
‘‘Samaṇo khalu, bho, gotamo dvattiṃsamahāpurisalakkhaṇehi samannāgato…pe…
‘‘ஸமணோ க²லு, போ⁴, கோ³தமோ ஏஹிஸ்வாக³தவாதீ³ ஸகி²லோ ஸம்மோத³கோ அப்³பா⁴குடிகோ உத்தானமுகோ² புப்³ப³பா⁴ஸீ…பே॰…
‘‘Samaṇo khalu, bho, gotamo ehisvāgatavādī sakhilo sammodako abbhākuṭiko uttānamukho pubbabhāsī…pe…
‘‘ஸமணோ க²லு, போ⁴, கோ³தமோ சதுன்னங் பரிஸானங் ஸக்கதோ க³ருகதோ மானிதோ பூஜிதோ அபசிதோ…பே॰…
‘‘Samaṇo khalu, bho, gotamo catunnaṃ parisānaṃ sakkato garukato mānito pūjito apacito…pe…
‘‘ஸமணே க²லு, போ⁴, கோ³தமே ப³ஹூ தே³வா ச மனுஸ்ஸா ச அபி⁴ப்பஸன்னா…பே॰…
‘‘Samaṇe khalu, bho, gotame bahū devā ca manussā ca abhippasannā…pe…
‘‘ஸமணோ க²லு, போ⁴, கோ³தமோ யஸ்மிங் கா³மே வா நிக³மே வா படிவஸதி ந தஸ்மிங் கா³மே வா நிக³மே வா அமனுஸ்ஸா மனுஸ்ஸே விஹேடெ²ந்தி…பே॰…
‘‘Samaṇo khalu, bho, gotamo yasmiṃ gāme vā nigame vā paṭivasati na tasmiṃ gāme vā nigame vā amanussā manusse viheṭhenti…pe…
‘‘ஸமணோ க²லு, போ⁴, கோ³தமோ ஸங்கீ⁴ க³ணீ க³ணாசரியோ புது²தித்த²கரானங் அக்³க³மக்கா²யதி, யதா² கோ² பன, போ⁴, ஏதேஸங் ஸமணப்³ராஹ்மணானங் யதா² வா ததா² வா யஸோ ஸமுதா³க³ச்ச²தி, ந ஹேவங் ஸமணஸ்ஸ கோ³தமஸ்ஸ யஸோ ஸமுதா³க³தோ. அத² கோ² அனுத்தராய விஜ்ஜாசரணஸம்பதா³ய ஸமணஸ்ஸ கோ³தமஸ்ஸ யஸோ ஸமுதா³க³தோ…பே॰…
‘‘Samaṇo khalu, bho, gotamo saṅghī gaṇī gaṇācariyo puthutitthakarānaṃ aggamakkhāyati, yathā kho pana, bho, etesaṃ samaṇabrāhmaṇānaṃ yathā vā tathā vā yaso samudāgacchati, na hevaṃ samaṇassa gotamassa yaso samudāgato. Atha kho anuttarāya vijjācaraṇasampadāya samaṇassa gotamassa yaso samudāgato…pe…
‘‘ஸமணங் க²லு, போ⁴, கோ³தமங் ராஜா மாக³தோ⁴ ஸேனியோ பி³ம்பி³ஸாரோ ஸபுத்தோ ஸப⁴ரியோ ஸபரிஸோ ஸாமச்சோ பாணேஹி ஸரணங் க³தோ…பே॰…
‘‘Samaṇaṃ khalu, bho, gotamaṃ rājā māgadho seniyo bimbisāro saputto sabhariyo sapariso sāmacco pāṇehi saraṇaṃ gato…pe…
‘‘ஸமணங் க²லு, போ⁴, கோ³தமங் ராஜா பஸேனதி³ கோஸலோ ஸபுத்தோ ஸப⁴ரியோ ஸபரிஸோ ஸாமச்சோ பாணேஹி ஸரணங் க³தோ…பே॰…
‘‘Samaṇaṃ khalu, bho, gotamaṃ rājā pasenadi kosalo saputto sabhariyo sapariso sāmacco pāṇehi saraṇaṃ gato…pe…
‘‘ஸமணங் க²லு, போ⁴, கோ³தமங் ப்³ராஹ்மணோ பொக்க²ரஸாதி ஸபுத்தோ ஸப⁴ரியோ ஸபரிஸோ ஸாமச்சோ பாணேஹி ஸரணங் க³தோ…பே॰…
‘‘Samaṇaṃ khalu, bho, gotamaṃ brāhmaṇo pokkharasāti saputto sabhariyo sapariso sāmacco pāṇehi saraṇaṃ gato…pe…
‘‘ஸமணோ க²லு, போ⁴, கோ³தமோ ரஞ்ஞோ மாக³த⁴ஸ்ஸ ஸேனியஸ்ஸ பி³ம்பி³ஸாரஸ்ஸ ஸக்கதோ க³ருகதோ மானிதோ பூஜிதோ அபசிதோ…பே॰…
‘‘Samaṇo khalu, bho, gotamo rañño māgadhassa seniyassa bimbisārassa sakkato garukato mānito pūjito apacito…pe…
‘‘ஸமணோ க²லு, போ⁴, கோ³தமோ ரஞ்ஞோ பஸேனதி³ஸ்ஸ கோஸலஸ்ஸ ஸக்கதோ க³ருகதோ மானிதோ பூஜிதோ அபசிதோ…பே॰…
‘‘Samaṇo khalu, bho, gotamo rañño pasenadissa kosalassa sakkato garukato mānito pūjito apacito…pe…
‘‘ஸமணோ க²லு, போ⁴, கோ³தமோ ப்³ராஹ்மணஸ்ஸ பொக்க²ரஸாதிஸ்ஸ ஸக்கதோ க³ருகதோ மானிதோ பூஜிதோ அபசிதோ…பே॰…
‘‘Samaṇo khalu, bho, gotamo brāhmaṇassa pokkharasātissa sakkato garukato mānito pūjito apacito…pe…
‘‘ஸமணோ க²லு, போ⁴, கோ³தமோ கா²ணுமதங் அனுப்பத்தோ கா²ணுமதே விஹரதி அம்ப³லட்டி²காயங். யே கோ² பன, போ⁴, கேசி ஸமணா வா ப்³ராஹ்மணா வா அம்ஹாகங் கா³மகெ²த்தங் ஆக³ச்ச²ந்தி, அதிதீ² நோ தே ஹொந்தி. அதிதீ² கோ² பனம்ஹேஹி ஸக்காதப்³பா³ க³ருகாதப்³பா³ மானேதப்³பா³ பூஜேதப்³பா³ அபசேதப்³பா³. யம்பி, போ⁴, ஸமணோ கோ³தமோ கா²ணுமதங் அனுப்பத்தோ கா²ணுமதே விஹரதி அம்ப³லட்டி²காயங், அதிதி²ம்ஹாகங் ஸமணோ கோ³தமோ. அதிதி² கோ² பனம்ஹேஹி ஸக்காதப்³போ³ க³ருகாதப்³போ³ மானேதப்³போ³ பூஜேதப்³போ³ அபசேதப்³போ³. இமினாபங்கே³ன நாரஹதி ஸோ ப⁴வங் கோ³தமோ அம்ஹாகங் த³ஸ்ஸனாய உபஸங்கமிதுங். அத² கோ² மயமேவ அரஹாம தங் ப⁴வந்தங் கோ³தமங் த³ஸ்ஸனாய உபஸங்கமிதுங். எத்தகே கோ² அஹங், போ⁴, தஸ்ஸ போ⁴தோ கோ³தமஸ்ஸ வண்ணே பரியாபுணாமி, நோ ச கோ² ஸோ ப⁴வங் கோ³தமோ எத்தகவண்ணோ. அபரிமாணவண்ணோ ஹி ஸோ ப⁴வங் கோ³தமோ’’தி.
‘‘Samaṇo khalu, bho, gotamo khāṇumataṃ anuppatto khāṇumate viharati ambalaṭṭhikāyaṃ. Ye kho pana, bho, keci samaṇā vā brāhmaṇā vā amhākaṃ gāmakhettaṃ āgacchanti, atithī no te honti. Atithī kho panamhehi sakkātabbā garukātabbā mānetabbā pūjetabbā apacetabbā. Yampi, bho, samaṇo gotamo khāṇumataṃ anuppatto khāṇumate viharati ambalaṭṭhikāyaṃ, atithimhākaṃ samaṇo gotamo. Atithi kho panamhehi sakkātabbo garukātabbo mānetabbo pūjetabbo apacetabbo. Imināpaṅgena nārahati so bhavaṃ gotamo amhākaṃ dassanāya upasaṅkamituṃ. Atha kho mayameva arahāma taṃ bhavantaṃ gotamaṃ dassanāya upasaṅkamituṃ. Ettake kho ahaṃ, bho, tassa bhoto gotamassa vaṇṇe pariyāpuṇāmi, no ca kho so bhavaṃ gotamo ettakavaṇṇo. Aparimāṇavaṇṇo hi so bhavaṃ gotamo’’ti.
333. ஏவங் வுத்தே, தே ப்³ராஹ்மணா கூடத³ந்தங் ப்³ராஹ்மணங் ஏதத³வோசுங் – ‘‘யதா² கோ² ப⁴வங் கூடத³ந்தோ ஸமணஸ்ஸ கோ³தமஸ்ஸ வண்ணே பா⁴ஸதி, இதோ சேபி ஸோ ப⁴வங் கோ³தமோ யோஜனஸதே விஹரதி, அலமேவ ஸத்³தே⁴ன குலபுத்தேன த³ஸ்ஸனாய உபஸங்கமிதுங் அபி புடோஸேனா’’தி. ‘‘தேன ஹி, போ⁴, ஸப்³பே³வ மயங் ஸமணங் கோ³தமங் த³ஸ்ஸனாய உபஸங்கமிஸ்ஸாமா’’தி.
333. Evaṃ vutte, te brāhmaṇā kūṭadantaṃ brāhmaṇaṃ etadavocuṃ – ‘‘yathā kho bhavaṃ kūṭadanto samaṇassa gotamassa vaṇṇe bhāsati, ito cepi so bhavaṃ gotamo yojanasate viharati, alameva saddhena kulaputtena dassanāya upasaṅkamituṃ api puṭosenā’’ti. ‘‘Tena hi, bho, sabbeva mayaṃ samaṇaṃ gotamaṃ dassanāya upasaṅkamissāmā’’ti.
மஹாவிஜிதராஜயஞ்ஞகதா²
Mahāvijitarājayaññakathā
334. அத² கோ² கூடத³ந்தோ ப்³ராஹ்மணோ மஹதா ப்³ராஹ்மணக³ணேன ஸத்³தி⁴ங் யேன அம்ப³லட்டி²கா யேன ப⁴க³வா தேனுபஸங்கமி, உபஸங்கமித்வா ப⁴க³வதா ஸத்³தி⁴ங் ஸம்மோதி³ . ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. கா²ணுமதகாபி கோ² ப்³ராஹ்மணக³ஹபதிகா அப்பேகச்சே ப⁴க³வந்தங் அபி⁴வாதெ³த்வா ஏகமந்தங் நிஸீதி³ங்ஸு; அப்பேகச்சே ப⁴க³வதா ஸத்³தி⁴ங் ஸம்மோதி³ங்ஸு, ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³ங்ஸு; அப்பேகச்சே யேன ப⁴க³வா தேனஞ்ஜலிங் பணாமெத்வா ஏகமந்தங் நிஸீதி³ங்ஸு; அப்பேகச்சே நாமகொ³த்தங் ஸாவெத்வா ஏகமந்தங் நிஸீதி³ங்ஸு; அப்பேகச்சே துண்ஹீபூ⁴தா ஏகமந்தங் நிஸீதி³ங்ஸு.
334. Atha kho kūṭadanto brāhmaṇo mahatā brāhmaṇagaṇena saddhiṃ yena ambalaṭṭhikā yena bhagavā tenupasaṅkami, upasaṅkamitvā bhagavatā saddhiṃ sammodi . Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Khāṇumatakāpi kho brāhmaṇagahapatikā appekacce bhagavantaṃ abhivādetvā ekamantaṃ nisīdiṃsu; appekacce bhagavatā saddhiṃ sammodiṃsu, sammodanīyaṃ kathaṃ sāraṇīyaṃ vītisāretvā ekamantaṃ nisīdiṃsu; appekacce yena bhagavā tenañjaliṃ paṇāmetvā ekamantaṃ nisīdiṃsu; appekacce nāmagottaṃ sāvetvā ekamantaṃ nisīdiṃsu; appekacce tuṇhībhūtā ekamantaṃ nisīdiṃsu.
335. ஏகமந்தங் நிஸின்னோ கோ² கூடத³ந்தோ ப்³ராஹ்மணோ ப⁴க³வந்தங் ஏதத³வோச – ‘‘ஸுதங் மேதங், போ⁴ கோ³தம – ‘ஸமணோ கோ³தமோ திவித⁴ங் யஞ்ஞஸம்பத³ங் ஸோளஸபரிக்கா²ரங் ஜானாதீ’தி. ந கோ² பனாஹங் ஜானாமி திவித⁴ங் யஞ்ஞஸம்பத³ங் ஸோளஸபரிக்கா²ரங். இச்சா²மி சாஹங் மஹாயஞ்ஞங் யஜிதுங். ஸாது⁴ மே ப⁴வங் கோ³தமோ திவித⁴ங் யஞ்ஞஸம்பத³ங் ஸோளஸபரிக்கா²ரங் தே³ஸேதூ’’தி.
335. Ekamantaṃ nisinno kho kūṭadanto brāhmaṇo bhagavantaṃ etadavoca – ‘‘sutaṃ metaṃ, bho gotama – ‘samaṇo gotamo tividhaṃ yaññasampadaṃ soḷasaparikkhāraṃ jānātī’ti. Na kho panāhaṃ jānāmi tividhaṃ yaññasampadaṃ soḷasaparikkhāraṃ. Icchāmi cāhaṃ mahāyaññaṃ yajituṃ. Sādhu me bhavaṃ gotamo tividhaṃ yaññasampadaṃ soḷasaparikkhāraṃ desetū’’ti.
336. ‘‘தேன ஹி, ப்³ராஹ்மண, ஸுணாஹி ஸாது⁴கங் மனஸிகரோஹி, பா⁴ஸிஸ்ஸாமீ’’தி. ‘‘ஏவங், போ⁴’’தி கோ² கூடத³ந்தோ ப்³ராஹ்மணோ ப⁴க³வதோ பச்சஸ்ஸோஸி. ப⁴க³வா ஏதத³வோச – ‘‘பூ⁴தபுப்³ப³ங், ப்³ராஹ்மண , ராஜா மஹாவிஜிதோ நாம அஹோஸி அட்³டோ⁴ மஹத்³த⁴னோ மஹாபோ⁴கோ³ பஹூதஜாதரூபரஜதோ பஹூதவித்தூபகரணோ பஹூதத⁴னத⁴ஞ்ஞோ பரிபுண்ணகோஸகொட்டா²கா³ரோ. அத² கோ², ப்³ராஹ்மண, ரஞ்ஞோ மஹாவிஜிதஸ்ஸ ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ – ‘அதி⁴க³தா கோ² மே விபுலா மானுஸகா போ⁴கா³, மஹந்தங் பத²விமண்ட³லங் அபி⁴விஜிய அஜ்ஜா²வஸாமி , யங்னூனாஹங் மஹாயஞ்ஞங் யஜெய்யங், யங் மம அஸ்ஸ தீ³க⁴ரத்தங் ஹிதாய ஸுகா²யா’தி.
336. ‘‘Tena hi, brāhmaṇa, suṇāhi sādhukaṃ manasikarohi, bhāsissāmī’’ti. ‘‘Evaṃ, bho’’ti kho kūṭadanto brāhmaṇo bhagavato paccassosi. Bhagavā etadavoca – ‘‘bhūtapubbaṃ, brāhmaṇa , rājā mahāvijito nāma ahosi aḍḍho mahaddhano mahābhogo pahūtajātarūparajato pahūtavittūpakaraṇo pahūtadhanadhañño paripuṇṇakosakoṭṭhāgāro. Atha kho, brāhmaṇa, rañño mahāvijitassa rahogatassa paṭisallīnassa evaṃ cetaso parivitakko udapādi – ‘adhigatā kho me vipulā mānusakā bhogā, mahantaṃ pathavimaṇḍalaṃ abhivijiya ajjhāvasāmi , yaṃnūnāhaṃ mahāyaññaṃ yajeyyaṃ, yaṃ mama assa dīgharattaṃ hitāya sukhāyā’ti.
337. ‘‘அத² கோ², ப்³ராஹ்மண, ராஜா மஹாவிஜிதோ புரோஹிதங் ப்³ராஹ்மணங் ஆமந்தெத்வா ஏதத³வோச – ‘இத⁴ மய்ஹங், ப்³ராஹ்மண, ரஹோக³தஸ்ஸ படிஸல்லீனஸ்ஸ ஏவங் சேதஸோ பரிவிதக்கோ உத³பாதி³ – அதி⁴க³தா கோ² மே விபுலா மானுஸகா போ⁴கா³ , மஹந்தங் பத²விமண்ட³லங் அபி⁴விஜிய அஜ்ஜா²வஸாமி. யங்னூனாஹங் மஹாயஞ்ஞங் யஜெய்யங் யங் மம அஸ்ஸ தீ³க⁴ரத்தங் ஹிதாய ஸுகா²யா’தி. இச்சா²மஹங், ப்³ராஹ்மண, மஹாயஞ்ஞங் யஜிதுங். அனுஸாஸது மங் ப⁴வங் யங் மம அஸ்ஸ தீ³க⁴ரத்தங் ஹிதாய ஸுகா²யா’’’தி.
337. ‘‘Atha kho, brāhmaṇa, rājā mahāvijito purohitaṃ brāhmaṇaṃ āmantetvā etadavoca – ‘idha mayhaṃ, brāhmaṇa, rahogatassa paṭisallīnassa evaṃ cetaso parivitakko udapādi – adhigatā kho me vipulā mānusakā bhogā , mahantaṃ pathavimaṇḍalaṃ abhivijiya ajjhāvasāmi. Yaṃnūnāhaṃ mahāyaññaṃ yajeyyaṃ yaṃ mama assa dīgharattaṃ hitāya sukhāyā’ti. Icchāmahaṃ, brāhmaṇa, mahāyaññaṃ yajituṃ. Anusāsatu maṃ bhavaṃ yaṃ mama assa dīgharattaṃ hitāya sukhāyā’’’ti.
338. ‘‘ஏவங் வுத்தே, ப்³ராஹ்மண, புரோஹிதோ ப்³ராஹ்மணோ ராஜானங் மஹாவிஜிதங் ஏதத³வோச – ‘போ⁴தோ கோ² ரஞ்ஞோ ஜனபதோ³ ஸகண்டகோ ஸஉப்பீளோ, கா³மகா⁴தாபி தி³ஸ்ஸந்தி, நிக³மகா⁴தாபி தி³ஸ்ஸந்தி, நக³ரகா⁴தாபி தி³ஸ்ஸந்தி , பந்த²து³ஹனாபி தி³ஸ்ஸந்தி. ப⁴வங் கோ² பன ராஜா ஏவங் ஸகண்டகே ஜனபதே³ ஸஉப்பீளே ப³லிமுத்³த⁴ரெய்ய, அகிச்சகாரீ அஸ்ஸ தேன ப⁴வங் ராஜா. ஸியா கோ² பன போ⁴தோ ரஞ்ஞோ ஏவமஸ்ஸ – ‘‘அஹமேதங் த³ஸ்ஸுகீ²லங் வதே⁴ன வா ப³ந்தே⁴ன வா ஜானியா வா க³ரஹாய வா பப்³பா³ஜனாய வா ஸமூஹனிஸ்ஸாமீ’’தி, ந கோ² பனேதஸ்ஸ த³ஸ்ஸுகீ²லஸ்ஸ ஏவங் ஸம்மா ஸமுக்³கா⁴தோ ஹோதி. யே தே ஹதாவஸேஸகா ப⁴விஸ்ஸந்தி, தே பச்சா² ரஞ்ஞோ ஜனபத³ங் விஹேடெ²ஸ்ஸந்தி. அபி ச கோ² இத³ங் ஸங்விதா⁴னங் ஆக³ம்ம ஏவமேதஸ்ஸ த³ஸ்ஸுகீ²லஸ்ஸ ஸம்மா ஸமுக்³கா⁴தோ ஹோதி. தேன ஹி ப⁴வங் ராஜா யே போ⁴தோ ரஞ்ஞோ ஜனபதே³ உஸ்ஸஹந்தி கஸிகோ³ரக்கே², தேஸங் ப⁴வங் ராஜா பீ³ஜப⁴த்தங் அனுப்பதே³து. யே போ⁴தோ ரஞ்ஞோ ஜனபதே³ உஸ்ஸஹந்தி வாணிஜ்ஜாய, தேஸங் ப⁴வங் ராஜா பாப⁴தங் அனுப்பதே³து. யே போ⁴தோ ரஞ்ஞோ ஜனபதே³ உஸ்ஸஹந்தி ராஜபோரிஸே, தேஸங் ப⁴வங் ராஜா ப⁴த்தவேதனங் பகப்பேது. தே ச மனுஸ்ஸா ஸகம்மபஸுதா ரஞ்ஞோ ஜனபத³ங் ந விஹேடெ²ஸ்ஸந்தி; மஹா ச ரஞ்ஞோ ராஸிகோ ப⁴விஸ்ஸதி. கே²மட்டி²தா ஜனபதா³ அகண்டகா அனுப்பீளா. மனுஸ்ஸா முதா³ மோத³மானா உரே புத்தே நச்செந்தா அபாருதக⁴ரா மஞ்ஞே விஹரிஸ்ஸந்தீ’தி. ‘ஏவங், போ⁴’தி கோ², ப்³ராஹ்மண, ராஜா மஹாவிஜிதோ புரோஹிதஸ்ஸ ப்³ராஹ்மணஸ்ஸ படிஸ்ஸுத்வா யே ரஞ்ஞோ ஜனபதே³ உஸ்ஸஹிங்ஸு கஸிகோ³ரக்கே², தேஸங் ராஜா மஹாவிஜிதோ பீ³ஜப⁴த்தங் அனுப்பதா³ஸி. யே ச ரஞ்ஞோ ஜனபதே³ உஸ்ஸஹிங்ஸு வாணிஜ்ஜாய, தேஸங் ராஜா மஹாவிஜிதோ பாப⁴தங் அனுப்பதா³ஸி. யே ச ரஞ்ஞோ ஜனபதே³ உஸ்ஸஹிங்ஸு ராஜபோரிஸே, தேஸங் ராஜா மஹாவிஜிதோ ப⁴த்தவேதனங் பகப்பேஸி. தே ச மனுஸ்ஸா ஸகம்மபஸுதா ரஞ்ஞோ ஜனபத³ங் ந விஹேடி²ங்ஸு, மஹா ச ரஞ்ஞோ ராஸிகோ அஹோஸி. கே²மட்டி²தா ஜனபதா³ அகண்டகா அனுப்பீளா மனுஸ்ஸா முதா³ மோத³மானா உரே புத்தே நச்செந்தா அபாருதக⁴ரா மஞ்ஞே விஹரிங்ஸு. அத² கோ², ப்³ராஹ்மண, ராஜா மஹாவிஜிதோ புரோஹிதங் ப்³ராஹ்மணங் ஆமந்தெத்வா ஏதத³வோச – ‘ஸமூஹதோ கோ² மே போ⁴தோ த³ஸ்ஸுகீ²லோ, போ⁴தோ ஸங்விதா⁴னங் ஆக³ம்ம மஹா ச மே ராஸிகோ. கே²மட்டி²தா ஜனபதா³ அகண்டகா அனுப்பீளா மனுஸ்ஸா முதா³ மோத³மானா உரே புத்தே நச்செந்தா அபாருதக⁴ரா மஞ்ஞே விஹரந்தி. இச்சா²மஹங் ப்³ராஹ்மண மஹாயஞ்ஞங் யஜிதுங். அனுஸாஸது மங் ப⁴வங் யங் மம அஸ்ஸ தீ³க⁴ரத்தங் ஹிதாய ஸுகா²யா’தி.
338. ‘‘Evaṃ vutte, brāhmaṇa, purohito brāhmaṇo rājānaṃ mahāvijitaṃ etadavoca – ‘bhoto kho rañño janapado sakaṇṭako sauppīḷo, gāmaghātāpi dissanti, nigamaghātāpi dissanti, nagaraghātāpi dissanti , panthaduhanāpi dissanti. Bhavaṃ kho pana rājā evaṃ sakaṇṭake janapade sauppīḷe balimuddhareyya, akiccakārī assa tena bhavaṃ rājā. Siyā kho pana bhoto rañño evamassa – ‘‘ahametaṃ dassukhīlaṃ vadhena vā bandhena vā jāniyā vā garahāya vā pabbājanāya vā samūhanissāmī’’ti, na kho panetassa dassukhīlassa evaṃ sammā samugghāto hoti. Ye te hatāvasesakā bhavissanti, te pacchā rañño janapadaṃ viheṭhessanti. Api ca kho idaṃ saṃvidhānaṃ āgamma evametassa dassukhīlassa sammā samugghāto hoti. Tena hi bhavaṃ rājā ye bhoto rañño janapade ussahanti kasigorakkhe, tesaṃ bhavaṃ rājā bījabhattaṃ anuppadetu. Ye bhoto rañño janapade ussahanti vāṇijjāya, tesaṃ bhavaṃ rājā pābhataṃ anuppadetu. Ye bhoto rañño janapade ussahanti rājaporise, tesaṃ bhavaṃ rājā bhattavetanaṃ pakappetu. Te ca manussā sakammapasutā rañño janapadaṃ na viheṭhessanti; mahā ca rañño rāsiko bhavissati. Khemaṭṭhitā janapadā akaṇṭakā anuppīḷā. Manussā mudā modamānā ure putte naccentā apārutagharā maññe viharissantī’ti. ‘Evaṃ, bho’ti kho, brāhmaṇa, rājā mahāvijito purohitassa brāhmaṇassa paṭissutvā ye rañño janapade ussahiṃsu kasigorakkhe, tesaṃ rājā mahāvijito bījabhattaṃ anuppadāsi. Ye ca rañño janapade ussahiṃsu vāṇijjāya, tesaṃ rājā mahāvijito pābhataṃ anuppadāsi. Ye ca rañño janapade ussahiṃsu rājaporise, tesaṃ rājā mahāvijito bhattavetanaṃ pakappesi. Te ca manussā sakammapasutā rañño janapadaṃ na viheṭhiṃsu, mahā ca rañño rāsiko ahosi. Khemaṭṭhitā janapadā akaṇṭakā anuppīḷā manussā mudā modamānā ure putte naccentā apārutagharā maññe vihariṃsu. Atha kho, brāhmaṇa, rājā mahāvijito purohitaṃ brāhmaṇaṃ āmantetvā etadavoca – ‘samūhato kho me bhoto dassukhīlo, bhoto saṃvidhānaṃ āgamma mahā ca me rāsiko. Khemaṭṭhitā janapadā akaṇṭakā anuppīḷā manussā mudā modamānā ure putte naccentā apārutagharā maññe viharanti. Icchāmahaṃ brāhmaṇa mahāyaññaṃ yajituṃ. Anusāsatu maṃ bhavaṃ yaṃ mama assa dīgharattaṃ hitāya sukhāyā’ti.
சதுபரிக்கா²ரங்
Catuparikkhāraṃ
339. ‘‘தேன ஹி ப⁴வங் ராஜா யே போ⁴தோ ரஞ்ஞோ ஜனபதே³ க²த்தியா ஆனுயந்தா நேக³மா சேவ ஜானபதா³ ச தே ப⁴வங் ராஜா ஆமந்தயதங் – ‘இச்சா²மஹங், போ⁴, மஹாயஞ்ஞங் யஜிதுங், அனுஜானந்து மே ப⁴வந்தோ யங் மம அஸ்ஸ தீ³க⁴ரத்தங் ஹிதாய ஸுகா²யா’தி. யே போ⁴தோ ரஞ்ஞோ ஜனபதே³ அமச்சா பாரிஸஜ்ஜா நேக³மா சேவ ஜானபதா³ ச…பே॰… ப்³ராஹ்மணமஹாஸாலா நேக³மா சேவ ஜானபதா³ ச…பே॰… க³ஹபதினேசயிகா நேக³மா சேவ ஜானபதா³ ச, தே ப⁴வங் ராஜா ஆமந்தயதங் – ‘இச்சா²மஹங், போ⁴, மஹாயஞ்ஞங் யஜிதுங், அனுஜானந்து மே ப⁴வந்தோ யங் மம அஸ்ஸ தீ³க⁴ரத்தங் ஹிதாய ஸுகா²யா’தி. ‘ஏவங், போ⁴’தி கோ², ப்³ராஹ்மண, ராஜா மஹாவிஜிதோ புரோஹிதஸ்ஸ ப்³ராஹ்மணஸ்ஸ படிஸ்ஸுத்வா யே ரஞ்ஞோ ஜனபதே³ க²த்தியா ஆனுயந்தா நேக³மா சேவ ஜானபதா³ ச, தே ராஜா மஹாவிஜிதோ ஆமந்தேஸி – ‘இச்சா²மஹங், போ⁴, மஹாயஞ்ஞங் யஜிதுங், அனுஜானந்து மே ப⁴வந்தோ யங் மம அஸ்ஸ தீ³க⁴ரத்தங் ஹிதாய ஸுகா²யா’’தி. ‘யஜதங் ப⁴வங் ராஜா யஞ்ஞங், யஞ்ஞகாலோ மஹாராஜா’தி. யே ரஞ்ஞோ ஜனபதே³ அமச்சா பாரிஸஜ்ஜா நேக³மா சேவ ஜானபதா³ ச…பே॰… ப்³ராஹ்மணமஹாஸாலா நேக³மா சேவ ஜானபதா³ ச…பே॰… க³ஹபதினேசயிகா நேக³மா சேவ ஜானபதா³ ச, தே ராஜா மஹாவிஜிதோ ஆமந்தேஸி – ‘இச்சா²மஹங், போ⁴ , மஹாயஞ்ஞங் யஜிதுங். அனுஜானந்து மே ப⁴வந்தோ யங் மம அஸ்ஸ தீ³க⁴ரத்தங் ஹிதாய ஸுகா²யா’தி. ‘யஜதங் ப⁴வங் ராஜா யஞ்ஞங், யஞ்ஞகாலோ மஹாராஜா’தி. இதிமே சத்தாரோ அனுமதிபக்கா² தஸ்ஸேவ யஞ்ஞஸ்ஸ பரிக்கா²ரா ப⁴வந்தி.
339. ‘‘Tena hi bhavaṃ rājā ye bhoto rañño janapade khattiyā ānuyantā negamā ceva jānapadā ca te bhavaṃ rājā āmantayataṃ – ‘icchāmahaṃ, bho, mahāyaññaṃ yajituṃ, anujānantu me bhavanto yaṃ mama assa dīgharattaṃ hitāya sukhāyā’ti. Ye bhoto rañño janapade amaccā pārisajjā negamā ceva jānapadā ca…pe… brāhmaṇamahāsālā negamā ceva jānapadā ca…pe… gahapatinecayikā negamā ceva jānapadā ca, te bhavaṃ rājā āmantayataṃ – ‘icchāmahaṃ, bho, mahāyaññaṃ yajituṃ, anujānantu me bhavanto yaṃ mama assa dīgharattaṃ hitāya sukhāyā’ti. ‘Evaṃ, bho’ti kho, brāhmaṇa, rājā mahāvijito purohitassa brāhmaṇassa paṭissutvā ye rañño janapade khattiyā ānuyantā negamā ceva jānapadā ca, te rājā mahāvijito āmantesi – ‘icchāmahaṃ, bho, mahāyaññaṃ yajituṃ, anujānantu me bhavanto yaṃ mama assa dīgharattaṃ hitāya sukhāyā’’ti. ‘Yajataṃ bhavaṃ rājā yaññaṃ, yaññakālo mahārājā’ti. Ye rañño janapade amaccā pārisajjā negamā ceva jānapadā ca…pe… brāhmaṇamahāsālā negamā ceva jānapadā ca…pe… gahapatinecayikā negamā ceva jānapadā ca, te rājā mahāvijito āmantesi – ‘icchāmahaṃ, bho , mahāyaññaṃ yajituṃ. Anujānantu me bhavanto yaṃ mama assa dīgharattaṃ hitāya sukhāyā’ti. ‘Yajataṃ bhavaṃ rājā yaññaṃ, yaññakālo mahārājā’ti. Itime cattāro anumatipakkhā tasseva yaññassa parikkhārā bhavanti.
அட்ட² பரிக்கா²ரா
Aṭṭha parikkhārā
340. ‘‘ராஜா மஹாவிஜிதோ அட்ட²ஹங்கே³ஹி ஸமன்னாக³தோ, உப⁴தோ ஸுஜாதோ மாதிதோ ச பிதிதோ ச ஸங்ஸுத்³த⁴க³ஹணிகோ யாவ ஸத்தமா பிதாமஹயுகா³ அக்கி²த்தோ அனுபக்குட்டோ² ஜாதிவாதே³ன அபி⁴ரூபோ த³ஸ்ஸனீயோ பாஸாதி³கோ பரமாய வண்ணபொக்க²ரதாய ஸமன்னாக³தோ ப்³ரஹ்மவண்ணீ ப்³ரஹ்மவச்ச²ஸீ அகு²த்³தா³வகாஸோ த³ஸ்ஸனாய; அட்³டோ⁴ மஹத்³த⁴னோ மஹாபோ⁴கோ³ பஹூதஜாதரூபரஜதோ பஹூதவித்தூபகரணோ பஹூதத⁴னத⁴ஞ்ஞோ பரிபுண்ணகோஸகொட்டா²கா³ரோ; ப³லவா சதுரங்கி³னியா ஸேனாய ஸமன்னாக³தோ அஸ்ஸவாய ஓவாத³படிகராய ஸஹதி 1 மஞ்ஞே பச்சத்தி²கே யஸஸா; ஸத்³தோ⁴ தா³யகோ தா³னபதி அனாவடத்³வாரோ ஸமணப்³ராஹ்மணகபணத்³தி⁴கவணிப்³ப³கயாசகானங் ஓபானபூ⁴தோ புஞ்ஞானி கரோதி; ப³ஹுஸ்ஸுதோ தஸ்ஸ தஸ்ஸ ஸுதஜாதஸ்ஸ, தஸ்ஸ தஸ்ஸேவ கோ² பன பா⁴ஸிதஸ்ஸ அத்த²ங் ஜானாதி ‘அயங் இமஸ்ஸ பா⁴ஸிதஸ்ஸ அத்தோ² அயங் இமஸ்ஸ பா⁴ஸிதஸ்ஸ அத்தோ²’தி; பண்டி³தோ, வியத்தோ, மேதா⁴வீ, படிப³லோ, அதீதானாக³தபச்சுப்பன்னே அத்தே² சிந்தேதுங். ராஜா மஹாவிஜிதோ இமேஹி அட்ட²ஹங்கே³ஹி ஸமன்னாக³தோ. இதி இமானிபி அட்ட²ங்கா³னி தஸ்ஸேவ யஞ்ஞஸ்ஸ பரிக்கா²ரா ப⁴வந்தி.
340. ‘‘Rājā mahāvijito aṭṭhahaṅgehi samannāgato, ubhato sujāto mātito ca pitito ca saṃsuddhagahaṇiko yāva sattamā pitāmahayugā akkhitto anupakkuṭṭho jātivādena abhirūpo dassanīyo pāsādiko paramāya vaṇṇapokkharatāya samannāgato brahmavaṇṇī brahmavacchasī akhuddāvakāso dassanāya; aḍḍho mahaddhano mahābhogo pahūtajātarūparajato pahūtavittūpakaraṇo pahūtadhanadhañño paripuṇṇakosakoṭṭhāgāro; balavā caturaṅginiyā senāya samannāgato assavāya ovādapaṭikarāya sahati 2 maññe paccatthike yasasā; saddho dāyako dānapati anāvaṭadvāro samaṇabrāhmaṇakapaṇaddhikavaṇibbakayācakānaṃ opānabhūto puññāni karoti; bahussuto tassa tassa sutajātassa, tassa tasseva kho pana bhāsitassa atthaṃ jānāti ‘ayaṃ imassa bhāsitassa attho ayaṃ imassa bhāsitassa attho’ti; paṇḍito, viyatto, medhāvī, paṭibalo, atītānāgatapaccuppanne atthe cintetuṃ. Rājā mahāvijito imehi aṭṭhahaṅgehi samannāgato. Iti imānipi aṭṭhaṅgāni tasseva yaññassa parikkhārā bhavanti.
சதுபரிக்கா²ரங்
Catuparikkhāraṃ
341. ‘‘புரோஹிதோ 3 ப்³ராஹ்மணோ சதுஹங்கே³ஹி ஸமன்னாக³தோ. உப⁴தோ ஸுஜாதோ மாதிதோ ச பிதிதோ ச ஸங்ஸுத்³த⁴க³ஹணிகோ யாவ ஸத்தமா பிதாமஹயுகா³ அக்கி²த்தோ அனுபக்குட்டோ² ஜாதிவாதே³ன; அஜ்ஜா²யகோ மந்தத⁴ரோ திண்ணங் வேதா³னங் பாரகூ³ ஸனிக⁴ண்டு³கேடுபா⁴னங் ஸாக்க²ரப்பபே⁴தா³னங் இதிஹாஸபஞ்சமானங் பத³கோ வெய்யாகரணோ லோகாயதமஹாபுரிஸலக்க²ணேஸு அனவயோ; ஸீலவா வுத்³த⁴ஸீலீ வுத்³த⁴ஸீலேன ஸமன்னாக³தோ; பண்டி³தோ வியத்தோ மேதா⁴வீ பட²மோ வா து³தியோ வா ஸுஜங் பக்³க³ண்ஹந்தானங். புரோஹிதோ ப்³ராஹ்மணோ இமேஹி சதூஹங்கே³ஹி ஸமன்னாக³தோ. இதி இமானி சத்தாரி அங்கா³னி தஸ்ஸேவ யஞ்ஞஸ்ஸ பரிக்கா²ரா ப⁴வந்தி.
341. ‘‘Purohito 4 brāhmaṇo catuhaṅgehi samannāgato. Ubhato sujāto mātito ca pitito ca saṃsuddhagahaṇiko yāva sattamā pitāmahayugā akkhitto anupakkuṭṭho jātivādena; ajjhāyako mantadharo tiṇṇaṃ vedānaṃ pāragū sanighaṇḍukeṭubhānaṃ sākkharappabhedānaṃ itihāsapañcamānaṃ padako veyyākaraṇo lokāyatamahāpurisalakkhaṇesu anavayo; sīlavā vuddhasīlī vuddhasīlena samannāgato; paṇḍito viyatto medhāvī paṭhamo vā dutiyo vā sujaṃ paggaṇhantānaṃ. Purohito brāhmaṇo imehi catūhaṅgehi samannāgato. Iti imāni cattāri aṅgāni tasseva yaññassa parikkhārā bhavanti.
திஸ்ஸோ விதா⁴
Tisso vidhā
342. ‘‘அத² கோ², ப்³ராஹ்மண, புரோஹிதோ ப்³ராஹ்மணோ ரஞ்ஞோ மஹாவிஜிதஸ்ஸ புப்³பே³வ யஞ்ஞா திஸ்ஸோ விதா⁴ தே³ஸேஸி. ஸியா கோ² பன போ⁴தோ ரஞ்ஞோ மஹாயஞ்ஞங் யிட்டு²காமஸ்ஸ 5 கோசிதே³வ விப்படிஸாரோ – ‘மஹா வத மே போ⁴க³க்க²ந்தோ⁴ விக³ச்சி²ஸ்ஸதீ’தி, ஸோ போ⁴தா ரஞ்ஞா விப்படிஸாரோ ந கரணீயோ. ஸியா கோ² பன போ⁴தோ ரஞ்ஞோ மஹாயஞ்ஞங் யஜமானஸ்ஸ கோசிதே³வ விப்படிஸாரோ – ‘மஹா வத மே போ⁴க³க்க²ந்தோ⁴ விக³ச்ச²தீ’தி, ஸோ போ⁴தா ரஞ்ஞா விப்படிஸாரோ ந கரணீயோ. ஸியா கோ² பன போ⁴தோ ரஞ்ஞோ மஹாயஞ்ஞங் யிட்ட²ஸ்ஸ கோசிதே³வ விப்படிஸாரோ – ‘மஹா வத மே போ⁴க³க்க²ந்தோ⁴ விக³தோ’தி, ஸோ போ⁴தா ரஞ்ஞா விப்படிஸாரோ ந கரணீயோ’’தி. இமா கோ², ப்³ராஹ்மண, புரோஹிதோ ப்³ராஹ்மணோ ரஞ்ஞோ மஹாவிஜிதஸ்ஸ புப்³பே³வ யஞ்ஞா திஸ்ஸோ விதா⁴ தே³ஸேஸி.
342. ‘‘Atha kho, brāhmaṇa, purohito brāhmaṇo rañño mahāvijitassa pubbeva yaññā tisso vidhā desesi. Siyā kho pana bhoto rañño mahāyaññaṃ yiṭṭhukāmassa 6 kocideva vippaṭisāro – ‘mahā vata me bhogakkhandho vigacchissatī’ti, so bhotā raññā vippaṭisāro na karaṇīyo. Siyā kho pana bhoto rañño mahāyaññaṃ yajamānassa kocideva vippaṭisāro – ‘mahā vata me bhogakkhandho vigacchatī’ti, so bhotā raññā vippaṭisāro na karaṇīyo. Siyā kho pana bhoto rañño mahāyaññaṃ yiṭṭhassa kocideva vippaṭisāro – ‘mahā vata me bhogakkhandho vigato’ti, so bhotā raññā vippaṭisāro na karaṇīyo’’ti. Imā kho, brāhmaṇa, purohito brāhmaṇo rañño mahāvijitassa pubbeva yaññā tisso vidhā desesi.
த³ஸ ஆகாரா
Dasa ākārā
343. ‘‘அத² கோ², ப்³ராஹ்மண, புரோஹிதோ ப்³ராஹ்மணோ ரஞ்ஞோ மஹாவிஜிதஸ்ஸ புப்³பே³வ யஞ்ஞா த³ஸஹாகாரேஹி படிக்³கா³ஹகேஸு விப்படிஸாரங் படிவினேஸி. ‘ஆக³மிஸ்ஸந்தி கோ² போ⁴தோ யஞ்ஞங் பாணாதிபாதினோபி பாணாதிபாதா படிவிரதாபி. யே தத்த² பாணாதிபாதினோ, தேஸஞ்ஞேவ தேன. யே தத்த² பாணாதிபாதா படிவிரதா, தே ஆரப்³ப⁴ யஜதங் ப⁴வங், ஸஜ்ஜதங் ப⁴வங், மோத³தங் ப⁴வங், சித்தமேவ ப⁴வங் அந்தரங் பஸாதே³து. ஆக³மிஸ்ஸந்தி கோ² போ⁴தோ யஞ்ஞங் அதி³ன்னாதா³யினோபி அதி³ன்னாதா³னா படிவிரதாபி…பே॰… காமேஸு மிச்சா²சாரினோபி காமேஸுமிச்சா²சாரா படிவிரதாபி… முஸாவாதி³னோபி முஸாவாதா³ படிவிரதாபி… பிஸுணவாசினோபி பிஸுணாய வாசாய படிவிரதாபி… ப²ருஸவாசினோபி ப²ருஸாய வாசாய படிவிரதாபி… ஸம்ப²ப்பலாபினோபி ஸம்ப²ப்பலாபா படிவிரதாபி … அபி⁴ஜ்ஜா²லுனோபி அனபி⁴ஜ்ஜா²லுனோபி… ப்³யாபன்னசித்தாபி அப்³யாபன்னசித்தாபி… மிச்சா²தி³ட்டி²காபி ஸம்மாதி³ட்டி²காபி…. யே தத்த² மிச்சா²தி³ட்டி²கா, தேஸஞ்ஞேவ தேன. யே தத்த² ஸம்மாதி³ட்டி²கா, தே ஆரப்³ப⁴ யஜதங் ப⁴வங், ஸஜ்ஜதங் ப⁴வங், மோத³தங் ப⁴வங், சித்தமேவ ப⁴வங் அந்தரங் பஸாதே³தூ’தி. இமேஹி கோ², ப்³ராஹ்மண, புரோஹிதோ ப்³ராஹ்மணோ ரஞ்ஞோ மஹாவிஜிதஸ்ஸ புப்³பே³வ யஞ்ஞா த³ஸஹாகாரேஹி படிக்³கா³ஹகேஸு விப்படிஸாரங் படிவினேஸி.
343. ‘‘Atha kho, brāhmaṇa, purohito brāhmaṇo rañño mahāvijitassa pubbeva yaññā dasahākārehi paṭiggāhakesu vippaṭisāraṃ paṭivinesi. ‘Āgamissanti kho bhoto yaññaṃ pāṇātipātinopi pāṇātipātā paṭiviratāpi. Ye tattha pāṇātipātino, tesaññeva tena. Ye tattha pāṇātipātā paṭiviratā, te ārabbha yajataṃ bhavaṃ, sajjataṃ bhavaṃ, modataṃ bhavaṃ, cittameva bhavaṃ antaraṃ pasādetu. Āgamissanti kho bhoto yaññaṃ adinnādāyinopi adinnādānā paṭiviratāpi…pe… kāmesu micchācārinopi kāmesumicchācārā paṭiviratāpi… musāvādinopi musāvādā paṭiviratāpi… pisuṇavācinopi pisuṇāya vācāya paṭiviratāpi… pharusavācinopi pharusāya vācāya paṭiviratāpi… samphappalāpinopi samphappalāpā paṭiviratāpi … abhijjhālunopi anabhijjhālunopi… byāpannacittāpi abyāpannacittāpi… micchādiṭṭhikāpi sammādiṭṭhikāpi…. Ye tattha micchādiṭṭhikā, tesaññeva tena. Ye tattha sammādiṭṭhikā, te ārabbha yajataṃ bhavaṃ, sajjataṃ bhavaṃ, modataṃ bhavaṃ, cittameva bhavaṃ antaraṃ pasādetū’ti. Imehi kho, brāhmaṇa, purohito brāhmaṇo rañño mahāvijitassa pubbeva yaññā dasahākārehi paṭiggāhakesu vippaṭisāraṃ paṭivinesi.
ஸோளஸ ஆகாரா
Soḷasa ākārā
344. ‘‘அத² கோ², ப்³ராஹ்மண, புரோஹிதோ ப்³ராஹ்மணோ ரஞ்ஞோ மஹாவிஜிதஸ்ஸ மஹாயஞ்ஞங் யஜமானஸ்ஸ ஸோளஸஹாகாரேஹி சித்தங் ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி ஸியா கோ² பன போ⁴தோ ரஞ்ஞோ மஹாயஞ்ஞங் யஜமானஸ்ஸ கோசிதே³வ வத்தா – ‘ராஜா கோ² மஹாவிஜிதோ மஹாயஞ்ஞங் யஜதி, நோ ச கோ² தஸ்ஸ ஆமந்திதா க²த்தியா ஆனுயந்தா நேக³மா சேவ ஜானபதா³ ச; அத² ச பன ப⁴வங் ராஜா ஏவரூபங் மஹாயஞ்ஞங் யஜதீ’தி . ஏவம்பி போ⁴தோ ரஞ்ஞோ வத்தா த⁴ம்மதோ நத்தி². போ⁴தா கோ² பன ரஞ்ஞா ஆமந்திதா க²த்தியா ஆனுயந்தா நேக³மா சேவ ஜானபதா³ ச . இமினாபேதங் ப⁴வங் ராஜா ஜானாது, யஜதங் ப⁴வங், ஸஜ்ஜதங் ப⁴வங், மோத³தங் ப⁴வங், சித்தமேவ ப⁴வங் அந்தரங் பஸாதே³து.
344. ‘‘Atha kho, brāhmaṇa, purohito brāhmaṇo rañño mahāvijitassa mahāyaññaṃ yajamānassa soḷasahākārehi cittaṃ sandassesi samādapesi samuttejesi sampahaṃsesi siyā kho pana bhoto rañño mahāyaññaṃ yajamānassa kocideva vattā – ‘rājā kho mahāvijito mahāyaññaṃ yajati, no ca kho tassa āmantitā khattiyā ānuyantā negamā ceva jānapadā ca; atha ca pana bhavaṃ rājā evarūpaṃ mahāyaññaṃ yajatī’ti . Evampi bhoto rañño vattā dhammato natthi. Bhotā kho pana raññā āmantitā khattiyā ānuyantā negamā ceva jānapadā ca . Imināpetaṃ bhavaṃ rājā jānātu, yajataṃ bhavaṃ, sajjataṃ bhavaṃ, modataṃ bhavaṃ, cittameva bhavaṃ antaraṃ pasādetu.
‘‘ஸியா கோ² பன போ⁴தோ ரஞ்ஞோ மஹாயஞ்ஞங் யஜமானஸ்ஸ கோசிதே³வ வத்தா – ‘ராஜா கோ² மஹாவிஜிதோ மஹாயஞ்ஞங் யஜதி, நோ ச கோ² தஸ்ஸ ஆமந்திதா அமச்சா பாரிஸஜ்ஜா நேக³மா சேவ ஜானபதா³ ச…பே॰… ப்³ராஹ்மணமஹாஸாலா நேக³மா சேவ ஜானபதா³ ச…பே॰… க³ஹபதினேசயிகா நேக³மா சேவ ஜானபதா³ ச, அத² ச பன ப⁴வங் ராஜா ஏவரூபங் மஹாயஞ்ஞங் யஜதீ’தி. ஏவம்பி போ⁴தோ ரஞ்ஞோ வத்தா த⁴ம்மதோ நத்தி². போ⁴தா கோ² பன ரஞ்ஞா ஆமந்திதா க³ஹபதினேசயிகா நேக³மா சேவ ஜானபதா³ ச. இமினாபேதங் ப⁴வங் ராஜா ஜானாது, யஜதங் ப⁴வங், ஸஜ்ஜதங் ப⁴வங், மோத³தங் ப⁴வங், சித்தமேவ ப⁴வங் அந்தரங் பஸாதே³து.
‘‘Siyā kho pana bhoto rañño mahāyaññaṃ yajamānassa kocideva vattā – ‘rājā kho mahāvijito mahāyaññaṃ yajati, no ca kho tassa āmantitā amaccā pārisajjā negamā ceva jānapadā ca…pe… brāhmaṇamahāsālā negamā ceva jānapadā ca…pe… gahapatinecayikā negamā ceva jānapadā ca, atha ca pana bhavaṃ rājā evarūpaṃ mahāyaññaṃ yajatī’ti. Evampi bhoto rañño vattā dhammato natthi. Bhotā kho pana raññā āmantitā gahapatinecayikā negamā ceva jānapadā ca. Imināpetaṃ bhavaṃ rājā jānātu, yajataṃ bhavaṃ, sajjataṃ bhavaṃ, modataṃ bhavaṃ, cittameva bhavaṃ antaraṃ pasādetu.
‘‘ஸியா கோ² பன போ⁴தோ ரஞ்ஞோ மஹாயஞ்ஞங் யஜமானஸ்ஸ கோசிதே³வ வத்தா – ‘ராஜா கோ² மஹாவிஜிதோ மஹாயஞ்ஞங் யஜதி, நோ ச கோ² உப⁴தோ ஸுஜாதோ மாதிதோ ச பிதிதோ ச ஸங்ஸுத்³த⁴க³ஹணிகோ யாவ ஸத்தமா பிதாமஹயுகா³ அக்கி²த்தோ அனுபக்குட்டோ² ஜாதிவாதே³ன, அத² ச பன ப⁴வங் ராஜா ஏவரூபங் மஹாயஞ்ஞங் யஜதீ’தி. ஏவம்பி போ⁴தோ ரஞ்ஞோ வத்தா த⁴ம்மதோ நத்தி². ப⁴வங் கோ² பன ராஜா உப⁴தோ ஸுஜாதோ மாதிதோ ச பிதிதோ ச ஸங்ஸுத்³த⁴க³ஹணிகோ யாவ ஸத்தமா பிதாமஹயுகா³ அக்கி²த்தோ அனுபக்குட்டோ² ஜாதிவாதே³ன. இமினாபேதங் ப⁴வங் ராஜா ஜானாது, யஜதங் ப⁴வங், ஸஜ்ஜதங் ப⁴வங், மோத³தங் ப⁴வங், சித்தமேவ ப⁴வங் அந்தரங் பஸாதே³து.
‘‘Siyā kho pana bhoto rañño mahāyaññaṃ yajamānassa kocideva vattā – ‘rājā kho mahāvijito mahāyaññaṃ yajati, no ca kho ubhato sujāto mātito ca pitito ca saṃsuddhagahaṇiko yāva sattamā pitāmahayugā akkhitto anupakkuṭṭho jātivādena, atha ca pana bhavaṃ rājā evarūpaṃ mahāyaññaṃ yajatī’ti. Evampi bhoto rañño vattā dhammato natthi. Bhavaṃ kho pana rājā ubhato sujāto mātito ca pitito ca saṃsuddhagahaṇiko yāva sattamā pitāmahayugā akkhitto anupakkuṭṭho jātivādena. Imināpetaṃ bhavaṃ rājā jānātu, yajataṃ bhavaṃ, sajjataṃ bhavaṃ, modataṃ bhavaṃ, cittameva bhavaṃ antaraṃ pasādetu.
‘‘ஸியா கோ² பன போ⁴தோ ரஞ்ஞோ மஹாயஞ்ஞங் யஜமானஸ்ஸ கோசிதே³வ வத்தா – ‘ராஜா கோ² மஹாவிஜிதோ மஹாயஞ்ஞங் யஜதி நோ ச கோ² அபி⁴ரூபோ த³ஸ்ஸனீயோ பாஸாதி³கோ பரமாய வண்ணபொக்க²ரதாய ஸமன்னாக³தோ ப்³ரஹ்மவண்ணீ ப்³ரஹ்மவச்ச²ஸீ அகு²த்³தா³வகாஸோ த³ஸ்ஸனாய…பே॰… நோ ச கோ² அட்³டோ⁴ மஹத்³த⁴னோ மஹாபோ⁴கோ³ பஹூதஜாதரூபரஜதோ பஹூதவித்தூபகரணோ பஹூதத⁴னத⁴ஞ்ஞோ பரிபுண்ணகோஸகொட்டா²கா³ரோ…பே॰… நோ ச கோ² ப³லவா சதுரங்கி³னியா ஸேனாய ஸமன்னாக³தோ அஸ்ஸவாய ஓவாத³படிகராய ஸஹதி மஞ்ஞே பச்சத்தி²கே யஸஸா…பே॰… நோ ச கோ² ஸத்³தோ⁴ தா³யகோ தா³னபதி அனாவடத்³வாரோ ஸமணப்³ராஹ்மணகபணத்³தி⁴கவணிப்³ப³கயாசகானங் ஓபானபூ⁴தோ புஞ்ஞானி கரோதி…பே॰… நோ ச கோ² ப³ஹுஸ்ஸுதோ தஸ்ஸ தஸ்ஸ ஸுதஜாதஸ்ஸ…பே॰… நோ ச கோ² தஸ்ஸ தஸ்ஸேவ கோ² பன பா⁴ஸிதஸ்ஸ அத்த²ங் ஜானாதி ‘‘அயங் இமஸ்ஸ பா⁴ஸிதஸ்ஸ அத்தோ², அயங் இமஸ்ஸ பா⁴ஸிதஸ்ஸ அத்தோ²’’தி…பே॰… நோ ச கோ² பண்டி³தோ வியத்தோ மேதா⁴வீ படிப³லோ அதீதானாக³தபச்சுப்பன்னே அத்தே² சிந்தேதுங், அத² ச பன ப⁴வங் ராஜா ஏவரூபங் மஹாயஞ்ஞங் யஜதீ’தி . ஏவம்பி போ⁴தோ ரஞ்ஞோ வத்தா த⁴ம்மதோ நத்தி². ப⁴வங் கோ² பன ராஜா பண்டி³தோ வியத்தோ மேதா⁴வீ படிப³லோ அதீதானாக³தபச்சுப்பன்னே அத்தே² சிந்தேதுங். இமினாபேதங் ப⁴வங் ராஜா ஜானாது , யஜதங் ப⁴வங், ஸஜ்ஜதங் ப⁴வங், மோத³தங் ப⁴வங், சித்தமேவ ப⁴வங் அந்தரங் பஸாதே³து.
‘‘Siyā kho pana bhoto rañño mahāyaññaṃ yajamānassa kocideva vattā – ‘rājā kho mahāvijito mahāyaññaṃ yajati no ca kho abhirūpo dassanīyo pāsādiko paramāya vaṇṇapokkharatāya samannāgato brahmavaṇṇī brahmavacchasī akhuddāvakāso dassanāya…pe… no ca kho aḍḍho mahaddhano mahābhogo pahūtajātarūparajato pahūtavittūpakaraṇo pahūtadhanadhañño paripuṇṇakosakoṭṭhāgāro…pe… no ca kho balavā caturaṅginiyā senāya samannāgato assavāya ovādapaṭikarāya sahati maññe paccatthike yasasā…pe… no ca kho saddho dāyako dānapati anāvaṭadvāro samaṇabrāhmaṇakapaṇaddhikavaṇibbakayācakānaṃ opānabhūto puññāni karoti…pe… no ca kho bahussuto tassa tassa sutajātassa…pe… no ca kho tassa tasseva kho pana bhāsitassa atthaṃ jānāti ‘‘ayaṃ imassa bhāsitassa attho, ayaṃ imassa bhāsitassa attho’’ti…pe… no ca kho paṇḍito viyatto medhāvī paṭibalo atītānāgatapaccuppanne atthe cintetuṃ, atha ca pana bhavaṃ rājā evarūpaṃ mahāyaññaṃ yajatī’ti . Evampi bhoto rañño vattā dhammato natthi. Bhavaṃ kho pana rājā paṇḍito viyatto medhāvī paṭibalo atītānāgatapaccuppanne atthe cintetuṃ. Imināpetaṃ bhavaṃ rājā jānātu , yajataṃ bhavaṃ, sajjataṃ bhavaṃ, modataṃ bhavaṃ, cittameva bhavaṃ antaraṃ pasādetu.
‘‘ஸியா கோ² பன போ⁴தோ ரஞ்ஞோ மஹாயஞ்ஞங் யஜமானஸ்ஸ கோசிதே³வ வத்தா – ‘ராஜா கோ² மஹாவிஜிதோ மஹாயஞ்ஞங் யஜதி. நோ ச க்²வஸ்ஸ புரோஹிதோ ப்³ராஹ்மணோ உப⁴தோ ஸுஜாதோ மாதிதோ ச பிதிதோ ச ஸங்ஸுத்³த⁴க³ஹணிகோ யாவ ஸத்தமா பிதாமஹயுகா³ அக்கி²த்தோ அனுபக்குட்டோ² ஜாதிவாதே³ன; அத² ச பன ப⁴வங் ராஜா ஏவரூபங் மஹாயஞ்ஞங் யஜதீ’தி. ஏவம்பி போ⁴தோ ரஞ்ஞோ வத்தா த⁴ம்மதோ நத்தி². போ⁴தோ கோ² பன ரஞ்ஞோ புரோஹிதோ ப்³ராஹ்மணோ உப⁴தோ ஸுஜாதோ மாதிதோ ச பிதிதோ ச ஸங்ஸுத்³த⁴க³ஹணிகோ யாவ ஸத்தமா பிதாமஹயுகா³ அக்கி²த்தோ அனுபக்குட்டோ² ஜாதிவாதே³ன. இமினாபேதங் ப⁴வங் ராஜா ஜானாது, யஜதங் ப⁴வங், ஸஜ்ஜதங் ப⁴வங், மோத³தங் ப⁴வங், சித்தமேவ ப⁴வங் அந்தரங் பஸாதே³து.
‘‘Siyā kho pana bhoto rañño mahāyaññaṃ yajamānassa kocideva vattā – ‘rājā kho mahāvijito mahāyaññaṃ yajati. No ca khvassa purohito brāhmaṇo ubhato sujāto mātito ca pitito ca saṃsuddhagahaṇiko yāva sattamā pitāmahayugā akkhitto anupakkuṭṭho jātivādena; atha ca pana bhavaṃ rājā evarūpaṃ mahāyaññaṃ yajatī’ti. Evampi bhoto rañño vattā dhammato natthi. Bhoto kho pana rañño purohito brāhmaṇo ubhato sujāto mātito ca pitito ca saṃsuddhagahaṇiko yāva sattamā pitāmahayugā akkhitto anupakkuṭṭho jātivādena. Imināpetaṃ bhavaṃ rājā jānātu, yajataṃ bhavaṃ, sajjataṃ bhavaṃ, modataṃ bhavaṃ, cittameva bhavaṃ antaraṃ pasādetu.
‘‘ஸியா கோ² பன போ⁴தோ ரஞ்ஞோ மஹாயஞ்ஞங் யஜமானஸ்ஸ கோசிதே³வ வத்தா – ‘ராஜா கோ² மஹாவிஜிதோ மஹாயஞ்ஞங் யஜதி. நோ ச க்²வஸ்ஸ புரோஹிதோ ப்³ராஹ்மணோ அஜ்ஜா²யகோ மந்தத⁴ரோ திண்ணங் வேதா³னங் பாரகூ³ ஸனிக⁴ண்டு³கேடுபா⁴னங் ஸாக்க²ரப்பபே⁴தா³னங் இதிஹாஸபஞ்சமானங் பத³கோ வெய்யாகரணோ லோகாயதமஹாபுரிஸலக்க²ணேஸு அனவயோ…பே॰… நோ ச க்²வஸ்ஸ புரோஹிதோ ப்³ராஹ்மணோ ஸீலவா வுத்³த⁴ஸீலீ வுத்³த⁴ஸீலேன ஸமன்னாக³தோ…பே॰… நோ ச க்²வஸ்ஸ புரோஹிதோ ப்³ராஹ்மணோ பண்டி³தோ வியத்தோ மேதா⁴வீ பட²மோ வா து³தியோ வா ஸுஜங் பக்³க³ண்ஹந்தானங், அத² ச பன ப⁴வங் ராஜா ஏவரூபங் மஹாயஞ்ஞங் யஜதீ’தி. ஏவம்பி போ⁴தோ ரஞ்ஞோ வத்தா த⁴ம்மதோ நத்தி². போ⁴தோ கோ² பன ரஞ்ஞோ புரோஹிதோ ப்³ராஹ்மணோ பண்டி³தோ வியத்தோ மேதா⁴வீ பட²மோ வா து³தியோ வா ஸுஜங் பக்³க³ண்ஹந்தானங். இமினாபேதங் ப⁴வங் ராஜா ஜானாது, யஜதங் ப⁴வங், ஸஜ்ஜதங் ப⁴வங், மோத³தங் ப⁴வங், சித்தமேவ ப⁴வங் அந்தரங் பஸாதே³தூதி. இமேஹி கோ², ப்³ராஹ்மண, புரோஹிதோ ப்³ராஹ்மணோ ரஞ்ஞோ மஹாவிஜிதஸ்ஸ மஹாயஞ்ஞங் யஜமானஸ்ஸ ஸோளஸஹி ஆகாரேஹி சித்தங் ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹங்ஸேஸி.
‘‘Siyā kho pana bhoto rañño mahāyaññaṃ yajamānassa kocideva vattā – ‘rājā kho mahāvijito mahāyaññaṃ yajati. No ca khvassa purohito brāhmaṇo ajjhāyako mantadharo tiṇṇaṃ vedānaṃ pāragū sanighaṇḍukeṭubhānaṃ sākkharappabhedānaṃ itihāsapañcamānaṃ padako veyyākaraṇo lokāyatamahāpurisalakkhaṇesu anavayo…pe… no ca khvassa purohito brāhmaṇo sīlavā vuddhasīlī vuddhasīlena samannāgato…pe… no ca khvassa purohito brāhmaṇo paṇḍito viyatto medhāvī paṭhamo vā dutiyo vā sujaṃ paggaṇhantānaṃ, atha ca pana bhavaṃ rājā evarūpaṃ mahāyaññaṃ yajatī’ti. Evampi bhoto rañño vattā dhammato natthi. Bhoto kho pana rañño purohito brāhmaṇo paṇḍito viyatto medhāvī paṭhamo vā dutiyo vā sujaṃ paggaṇhantānaṃ. Imināpetaṃ bhavaṃ rājā jānātu, yajataṃ bhavaṃ, sajjataṃ bhavaṃ, modataṃ bhavaṃ, cittameva bhavaṃ antaraṃ pasādetūti. Imehi kho, brāhmaṇa, purohito brāhmaṇo rañño mahāvijitassa mahāyaññaṃ yajamānassa soḷasahi ākārehi cittaṃ sandassesi samādapesi samuttejesi sampahaṃsesi.
345. ‘‘தஸ்மிங் கோ², ப்³ராஹ்மண, யஞ்ஞே நேவ கா³வோ ஹஞ்ஞிங்ஸு, ந அஜேளகா ஹஞ்ஞிங்ஸு, ந குக்குடஸூகரா ஹஞ்ஞிங்ஸு, ந விவிதா⁴ பாணா ஸங்கா⁴தங் ஆபஜ்ஜிங்ஸு, ந ருக்கா² சி²ஜ்ஜிங்ஸு யூபத்தா²ய, ந த³ப்³பா⁴ லூயிங்ஸு ப³ரிஹிஸத்தா²ய 7. யேபிஸ்ஸ அஹேஸுங் தா³ஸாதி வா பெஸ்ஸாதி வா கம்மகராதி வா, தேபி ந த³ண்ட³தஜ்ஜிதா ந ப⁴யதஜ்ஜிதா ந அஸ்ஸுமுகா² ருத³மானா பரிகம்மானி அகங்ஸு. அத² கோ² யே இச்சி²ங்ஸு, தே அகங்ஸு, யே ந இச்சி²ங்ஸு, ந தே அகங்ஸு; யங் இச்சி²ங்ஸு, தங் அகங்ஸு, யங் ந இச்சி²ங்ஸு, ந தங் அகங்ஸு. ஸப்பிதேலனவனீதத³தி⁴மது⁴பா²ணிதேன சேவ ஸோ யஞ்ஞோ நிட்டா²னமக³மாஸி.
345. ‘‘Tasmiṃ kho, brāhmaṇa, yaññe neva gāvo haññiṃsu, na ajeḷakā haññiṃsu, na kukkuṭasūkarā haññiṃsu, na vividhā pāṇā saṃghātaṃ āpajjiṃsu, na rukkhā chijjiṃsu yūpatthāya, na dabbhā lūyiṃsu barihisatthāya 8. Yepissa ahesuṃ dāsāti vā pessāti vā kammakarāti vā, tepi na daṇḍatajjitā na bhayatajjitā na assumukhā rudamānā parikammāni akaṃsu. Atha kho ye icchiṃsu, te akaṃsu, ye na icchiṃsu, na te akaṃsu; yaṃ icchiṃsu, taṃ akaṃsu, yaṃ na icchiṃsu, na taṃ akaṃsu. Sappitelanavanītadadhimadhuphāṇitena ceva so yañño niṭṭhānamagamāsi.
346. ‘‘அத² கோ², ப்³ராஹ்மண, க²த்தியா ஆனுயந்தா நேக³மா சேவ ஜானபதா³ ச, அமச்சா பாரிஸஜ்ஜா நேக³மா சேவ ஜானபதா³ ச, ப்³ராஹ்மணமஹாஸாலா நேக³மா சேவ ஜானபதா³ ச, க³ஹபதினேசயிகா நேக³மா சேவ ஜானபதா³ ச பஹூதங் ஸாபதெய்யங் ஆதா³ய ராஜானங் மஹாவிஜிதங் உபஸங்கமித்வா ஏவமாஹங்ஸு – ‘இத³ங், தே³வ, பஹூதங் ஸாபதெய்யங் தே³வஞ்ஞேவ உத்³தி³ஸ்ஸாப⁴தங், தங் தே³வோ படிக்³க³ண்ஹாதூ’தி. ‘அலங், போ⁴, மமாபித³ங் பஹூதங் ஸாபதெய்யங் த⁴ம்மிகேன ப³லினா அபி⁴ஸங்க²தங்; தஞ்ச வோ ஹோது, இதோ ச பி⁴ய்யோ ஹரதா²’தி. தே ரஞ்ஞா படிக்கி²த்தா ஏகமந்தங் அபக்கம்ம ஏவங் ஸமசிந்தேஸுங் – ‘ந கோ² ஏதங் அம்ஹாகங் பதிரூபங், யங் மயங் இமானி ஸாபதெய்யானி புனதே³வ ஸகானி க⁴ரானி படிஹரெய்யாம. ராஜா கோ² மஹாவிஜிதோ மஹாயஞ்ஞங் யஜதி, ஹந்த³ஸ்ஸ மயங் அனுயாகி³னோ ஹோமா’தி.
346. ‘‘Atha kho, brāhmaṇa, khattiyā ānuyantā negamā ceva jānapadā ca, amaccā pārisajjā negamā ceva jānapadā ca, brāhmaṇamahāsālā negamā ceva jānapadā ca, gahapatinecayikā negamā ceva jānapadā ca pahūtaṃ sāpateyyaṃ ādāya rājānaṃ mahāvijitaṃ upasaṅkamitvā evamāhaṃsu – ‘idaṃ, deva, pahūtaṃ sāpateyyaṃ devaññeva uddissābhataṃ, taṃ devo paṭiggaṇhātū’ti. ‘Alaṃ, bho, mamāpidaṃ pahūtaṃ sāpateyyaṃ dhammikena balinā abhisaṅkhataṃ; tañca vo hotu, ito ca bhiyyo harathā’ti. Te raññā paṭikkhittā ekamantaṃ apakkamma evaṃ samacintesuṃ – ‘na kho etaṃ amhākaṃ patirūpaṃ, yaṃ mayaṃ imāni sāpateyyāni punadeva sakāni gharāni paṭihareyyāma. Rājā kho mahāvijito mahāyaññaṃ yajati, handassa mayaṃ anuyāgino homā’ti.
347. ‘‘அத² கோ², ப்³ராஹ்மண, புரத்தி²மேன யஞ்ஞவாடஸ்ஸ 9 க²த்தியா ஆனுயந்தா நேக³மா சேவ ஜானபதா³ ச தா³னானி பட்ட²பேஸுங். த³க்கி²ணேன யஞ்ஞவாடஸ்ஸ அமச்சா பாரிஸஜ்ஜா நேக³மா சேவ ஜானபதா³ ச தா³னானி பட்ட²பேஸுங். பச்சி²மேன யஞ்ஞவாடஸ்ஸ ப்³ராஹ்மணமஹாஸாலா நேக³மா சேவ ஜானபதா³ ச தா³னானி பட்ட²பேஸுங். உத்தரேன யஞ்ஞவாடஸ்ஸ க³ஹபதினேசயிகா நேக³மா சேவ ஜானபதா³ ச தா³னானி பட்ட²பேஸுங்.
347. ‘‘Atha kho, brāhmaṇa, puratthimena yaññavāṭassa 10 khattiyā ānuyantā negamā ceva jānapadā ca dānāni paṭṭhapesuṃ. Dakkhiṇena yaññavāṭassa amaccā pārisajjā negamā ceva jānapadā ca dānāni paṭṭhapesuṃ. Pacchimena yaññavāṭassa brāhmaṇamahāsālā negamā ceva jānapadā ca dānāni paṭṭhapesuṃ. Uttarena yaññavāṭassa gahapatinecayikā negamā ceva jānapadā ca dānāni paṭṭhapesuṃ.
‘‘தேஸுபி கோ², ப்³ராஹ்மண, யஞ்ஞேஸு நேவ கா³வோ ஹஞ்ஞிங்ஸு, ந அஜேளகா ஹஞ்ஞிங்ஸு, ந குக்குடஸூகரா ஹஞ்ஞிங்ஸு, ந விவிதா⁴ பாணா ஸங்கா⁴தங் ஆபஜ்ஜிங்ஸு, ந ருக்கா² சி²ஜ்ஜிங்ஸு யூபத்தா²ய, ந த³ப்³பா⁴ லூயிங்ஸு ப³ரிஹிஸத்தா²ய. யேபி நேஸங் அஹேஸுங் தா³ஸாதி வா பெஸ்ஸாதி வா கம்மகராதி வா, தேபி ந த³ண்ட³தஜ்ஜிதா ந ப⁴யதஜ்ஜிதா ந அஸ்ஸுமுகா² ருத³மானா பரிகம்மானி அகங்ஸு. அத² கோ² யே இச்சி²ங்ஸு, தே அகங்ஸு, யே ந இச்சி²ங்ஸு, ந தே அகங்ஸு; யங் இச்சி²ங்ஸு, தங் அகங்ஸு, யங் ந இச்சி²ங்ஸு ந தங் அகங்ஸு. ஸப்பிதேலனவனீதத³தி⁴மது⁴பா²ணிதேன சேவ தே யஞ்ஞா நிட்டா²னமக³மங்ஸு.
‘‘Tesupi kho, brāhmaṇa, yaññesu neva gāvo haññiṃsu, na ajeḷakā haññiṃsu, na kukkuṭasūkarā haññiṃsu, na vividhā pāṇā saṃghātaṃ āpajjiṃsu, na rukkhā chijjiṃsu yūpatthāya, na dabbhā lūyiṃsu barihisatthāya. Yepi nesaṃ ahesuṃ dāsāti vā pessāti vā kammakarāti vā, tepi na daṇḍatajjitā na bhayatajjitā na assumukhā rudamānā parikammāni akaṃsu. Atha kho ye icchiṃsu, te akaṃsu, ye na icchiṃsu, na te akaṃsu; yaṃ icchiṃsu, taṃ akaṃsu, yaṃ na icchiṃsu na taṃ akaṃsu. Sappitelanavanītadadhimadhuphāṇitena ceva te yaññā niṭṭhānamagamaṃsu.
‘‘இதி சத்தாரோ ச அனுமதிபக்கா², ராஜா மஹாவிஜிதோ அட்ட²ஹங்கே³ஹி ஸமன்னாக³தோ, புரோஹிதோ ப்³ராஹ்மணோ சதூஹங்கே³ஹி ஸமன்னாக³தோ; திஸ்ஸோ ச விதா⁴ அயங் வுச்சதி ப்³ராஹ்மண திவிதா⁴ யஞ்ஞஸம்பதா³ ஸோளஸபரிக்கா²ரா’’தி.
‘‘Iti cattāro ca anumatipakkhā, rājā mahāvijito aṭṭhahaṅgehi samannāgato, purohito brāhmaṇo catūhaṅgehi samannāgato; tisso ca vidhā ayaṃ vuccati brāhmaṇa tividhā yaññasampadā soḷasaparikkhārā’’ti.
348. ஏவங் வுத்தே, தே ப்³ராஹ்மணா உன்னாதி³னோ உச்சாஸத்³த³மஹாஸத்³தா³ அஹேஸுங் – ‘‘அஹோ யஞ்ஞோ, அஹோ யஞ்ஞஸம்பதா³’’தி! கூடத³ந்தோ பன ப்³ராஹ்மணோ தூண்ஹீபூ⁴தோவ நிஸின்னோ ஹோதி. அத² கோ² தே ப்³ராஹ்மணா கூடத³ந்தங் ப்³ராஹ்மணங் ஏதத³வோசுங் – ‘‘கஸ்மா பன ப⁴வங் கூடத³ந்தோ ஸமணஸ்ஸ கோ³தமஸ்ஸ ஸுபா⁴ஸிதங் ஸுபா⁴ஸிததோ நாப்³ப⁴னுமோத³தீ’’தி? ‘‘நாஹங், போ⁴, ஸமணஸ்ஸ கோ³தமஸ்ஸ ஸுபா⁴ஸிதங் ஸுபா⁴ஸிததோ நாப்³ப⁴னுமோதா³மி. முத்³தா⁴பி தஸ்ஸ விபதெய்ய, யோ ஸமணஸ்ஸ கோ³தமஸ்ஸ ஸுபா⁴ஸிதங் ஸுபா⁴ஸிததோ நாப்³ப⁴னுமோதெ³ய்ய. அபி ச மே, போ⁴, ஏவங் ஹோதி – ஸமணோ கோ³தமோ ந ஏவமாஹ – ‘ஏவங் மே ஸுத’ந்தி வா ‘ஏவங் அரஹதி ப⁴விது’ந்தி வா; அபி ச ஸமணோ கோ³தமோ – ‘ஏவங் ததா³ ஆஸி, இத்த²ங் ததா³ ஆஸி’ த்வேவ பா⁴ஸதி. தஸ்ஸ மய்ஹங் போ⁴ ஏவங் ஹோதி – ‘அத்³தா⁴ ஸமணோ கோ³தமோ தேன ஸமயேன ராஜா வா அஹோஸி மஹாவிஜிதோ யஞ்ஞஸ்ஸாமி புரோஹிதோ வா ப்³ராஹ்மணோ தஸ்ஸ யஞ்ஞஸ்ஸ யாஜேதா’தி. அபி⁴ஜானாதி பன ப⁴வங் கோ³தமோ ஏவரூபங் யஞ்ஞங் யஜித்வா வா யாஜெத்வா வா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜிதாதி’’? ‘‘அபி⁴ஜானாமஹங், ப்³ராஹ்மண, ஏவரூபங் யஞ்ஞங் யஜித்வா வா யாஜெத்வா வா காயஸ்ஸ பே⁴தா³ பரங் மரணா ஸுக³திங் ஸக்³க³ங் லோகங் உபபஜ்ஜிதா, அஹங் தேன ஸமயேன புரோஹிதோ ப்³ராஹ்மணோ அஹோஸிங் தஸ்ஸ யஞ்ஞஸ்ஸ யாஜேதா’’தி.
348. Evaṃ vutte, te brāhmaṇā unnādino uccāsaddamahāsaddā ahesuṃ – ‘‘aho yañño, aho yaññasampadā’’ti! Kūṭadanto pana brāhmaṇo tūṇhībhūtova nisinno hoti. Atha kho te brāhmaṇā kūṭadantaṃ brāhmaṇaṃ etadavocuṃ – ‘‘kasmā pana bhavaṃ kūṭadanto samaṇassa gotamassa subhāsitaṃ subhāsitato nābbhanumodatī’’ti? ‘‘Nāhaṃ, bho, samaṇassa gotamassa subhāsitaṃ subhāsitato nābbhanumodāmi. Muddhāpi tassa vipateyya, yo samaṇassa gotamassa subhāsitaṃ subhāsitato nābbhanumodeyya. Api ca me, bho, evaṃ hoti – samaṇo gotamo na evamāha – ‘evaṃ me suta’nti vā ‘evaṃ arahati bhavitu’nti vā; api ca samaṇo gotamo – ‘evaṃ tadā āsi, itthaṃ tadā āsi’ tveva bhāsati. Tassa mayhaṃ bho evaṃ hoti – ‘addhā samaṇo gotamo tena samayena rājā vā ahosi mahāvijito yaññassāmi purohito vā brāhmaṇo tassa yaññassa yājetā’ti. Abhijānāti pana bhavaṃ gotamo evarūpaṃ yaññaṃ yajitvā vā yājetvā vā kāyassa bhedā paraṃ maraṇā sugatiṃ saggaṃ lokaṃ upapajjitāti’’? ‘‘Abhijānāmahaṃ, brāhmaṇa, evarūpaṃ yaññaṃ yajitvā vā yājetvā vā kāyassa bhedā paraṃ maraṇā sugatiṃ saggaṃ lokaṃ upapajjitā, ahaṃ tena samayena purohito brāhmaṇo ahosiṃ tassa yaññassa yājetā’’ti.
நிச்சதா³னஅனுகுலயஞ்ஞங்
Niccadānaanukulayaññaṃ
‘‘அத்தி² கோ², ப்³ராஹ்மண, அஞ்ஞோ யஞ்ஞோ இமாய திவிதா⁴ய யஞ்ஞஸம்பதா³ய ஸோளஸபரிக்கா²ராய அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி.
‘‘Atthi kho, brāhmaṇa, añño yañño imāya tividhāya yaññasampadāya soḷasaparikkhārāya appaṭṭhataro ca appasamārambhataro ca mahapphalataro ca mahānisaṃsataro cā’’ti.
‘‘கதமோ பன ஸோ, போ⁴ கோ³தம, யஞ்ஞோ இமாய திவிதா⁴ய யஞ்ஞஸம்பதா³ய ஸோளஸபரிக்கா²ராய அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி?
‘‘Katamo pana so, bho gotama, yañño imāya tividhāya yaññasampadāya soḷasaparikkhārāya appaṭṭhataro ca appasamārambhataro ca mahapphalataro ca mahānisaṃsataro cā’’ti?
‘‘யானி கோ² பன தானி, ப்³ராஹ்மண, நிச்சதா³னானி அனுகுலயஞ்ஞானி ஸீலவந்தே பப்³ப³ஜிதே உத்³தி³ஸ்ஸ தி³ய்யந்தி; அயங் கோ², ப்³ராஹ்மண, யஞ்ஞோ இமாய திவிதா⁴ய யஞ்ஞஸம்பதா³ய ஸோளஸபரிக்கா²ராய அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி.
‘‘Yāni kho pana tāni, brāhmaṇa, niccadānāni anukulayaññāni sīlavante pabbajite uddissa diyyanti; ayaṃ kho, brāhmaṇa, yañño imāya tividhāya yaññasampadāya soḷasaparikkhārāya appaṭṭhataro ca appasamārambhataro ca mahapphalataro ca mahānisaṃsataro cā’’ti.
‘‘கோ நு கோ², போ⁴ கோ³தம, ஹேது கோ பச்சயோ, யேன தங் நிச்சதா³னங் அனுகுலயஞ்ஞங் இமாய திவிதா⁴ய யஞ்ஞஸம்பதா³ய ஸோளஸபரிக்கா²ராய அப்பட்ட²தரஞ்ச அப்பஸமாரம்ப⁴தரஞ்ச மஹப்ப²லதரஞ்ச மஹானிஸங்ஸதரஞ்சா’’தி ?
‘‘Ko nu kho, bho gotama, hetu ko paccayo, yena taṃ niccadānaṃ anukulayaññaṃ imāya tividhāya yaññasampadāya soḷasaparikkhārāya appaṭṭhatarañca appasamārambhatarañca mahapphalatarañca mahānisaṃsatarañcā’’ti ?
‘‘ந கோ², ப்³ராஹ்மண, ஏவரூபங் யஞ்ஞங் உபஸங்கமந்தி அரஹந்தோ வா அரஹத்தமக்³க³ங் வா ஸமாபன்னா. தங் கிஸ்ஸ ஹேது? தி³ஸ்ஸந்தி ஹெத்த², ப்³ராஹ்மண, த³ண்ட³ப்பஹாராபி க³லக்³க³ஹாபி, தஸ்மா ஏவரூபங் யஞ்ஞங் ந உபஸங்கமந்தி அரஹந்தோ வா அரஹத்தமக்³க³ங் வா ஸமாபன்னா. யானி கோ² பன தானி, ப்³ராஹ்மண, நிச்சதா³னானி அனுகுலயஞ்ஞானி ஸீலவந்தே பப்³ப³ஜிதே உத்³தி³ஸ்ஸ தி³ய்யந்தி; ஏவரூபங் கோ², ப்³ராஹ்மண, யஞ்ஞங் உபஸங்கமந்தி அரஹந்தோ வா அரஹத்தமக்³க³ங் வா ஸமாபன்னா. தங் கிஸ்ஸ ஹேது? ந ஹெத்த², ப்³ராஹ்மண, தி³ஸ்ஸந்தி த³ண்ட³ப்பஹாராபி க³லக்³க³ஹாபி, தஸ்மா ஏவரூபங் யஞ்ஞங் உபஸங்கமந்தி அரஹந்தோ வா அரஹத்தமக்³க³ங் வா ஸமாபன்னா. அயங் கோ², ப்³ராஹ்மண, ஹேது அயங் பச்சயோ, யேன தங் நிச்சதா³னங் அனுகுலயஞ்ஞங் இமாய திவிதா⁴ய யஞ்ஞஸம்பதா³ய ஸோளஸபரிக்கா²ராய அப்பட்ட²தரஞ்ச அப்பஸமாரம்ப⁴தரஞ்ச மஹப்ப²லதரஞ்ச மஹானிஸங்ஸதரஞ்சா’’தி.
‘‘Na kho, brāhmaṇa, evarūpaṃ yaññaṃ upasaṅkamanti arahanto vā arahattamaggaṃ vā samāpannā. Taṃ kissa hetu? Dissanti hettha, brāhmaṇa, daṇḍappahārāpi galaggahāpi, tasmā evarūpaṃ yaññaṃ na upasaṅkamanti arahanto vā arahattamaggaṃ vā samāpannā. Yāni kho pana tāni, brāhmaṇa, niccadānāni anukulayaññāni sīlavante pabbajite uddissa diyyanti; evarūpaṃ kho, brāhmaṇa, yaññaṃ upasaṅkamanti arahanto vā arahattamaggaṃ vā samāpannā. Taṃ kissa hetu? Na hettha, brāhmaṇa, dissanti daṇḍappahārāpi galaggahāpi, tasmā evarūpaṃ yaññaṃ upasaṅkamanti arahanto vā arahattamaggaṃ vā samāpannā. Ayaṃ kho, brāhmaṇa, hetu ayaṃ paccayo, yena taṃ niccadānaṃ anukulayaññaṃ imāya tividhāya yaññasampadāya soḷasaparikkhārāya appaṭṭhatarañca appasamārambhatarañca mahapphalatarañca mahānisaṃsatarañcā’’ti.
350. ‘‘அத்தி² பன, போ⁴ கோ³தம, அஞ்ஞோ யஞ்ஞோ இமாய ச திவிதா⁴ய யஞ்ஞஸம்பதா³ய ஸோளஸபரிக்கா²ராய இமினா ச நிச்சதா³னேன அனுகுலயஞ்ஞேன அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி?
350. ‘‘Atthi pana, bho gotama, añño yañño imāya ca tividhāya yaññasampadāya soḷasaparikkhārāya iminā ca niccadānena anukulayaññena appaṭṭhataro ca appasamārambhataro ca mahapphalataro ca mahānisaṃsataro cā’’ti?
‘‘அத்தி² கோ², ப்³ராஹ்மண, அஞ்ஞோ யஞ்ஞோ இமாய ச திவிதா⁴ய யஞ்ஞஸம்பதா³ய ஸோளஸபரிக்கா²ராய இமினா ச நிச்சதா³னேன அனுகுலயஞ்ஞேன அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி.
‘‘Atthi kho, brāhmaṇa, añño yañño imāya ca tividhāya yaññasampadāya soḷasaparikkhārāya iminā ca niccadānena anukulayaññena appaṭṭhataro ca appasamārambhataro ca mahapphalataro ca mahānisaṃsataro cā’’ti.
‘‘கதமோ பன ஸோ, போ⁴ கோ³தம, யஞ்ஞோ இமாய ச திவிதா⁴ய யஞ்ஞஸம்பதா³ய ஸோளஸபரிக்கா²ராய இமினா ச நிச்சதா³னேன அனுகுலயஞ்ஞேன அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி?
‘‘Katamo pana so, bho gotama, yañño imāya ca tividhāya yaññasampadāya soḷasaparikkhārāya iminā ca niccadānena anukulayaññena appaṭṭhataro ca appasamārambhataro ca mahapphalataro ca mahānisaṃsataro cā’’ti?
‘‘யோ கோ², ப்³ராஹ்மண, சாதுத்³தி³ஸங் ஸங்க⁴ங் உத்³தி³ஸ்ஸ விஹாரங் கரோதி, அயங் கோ² , ப்³ராஹ்மண, யஞ்ஞோ இமாய ச திவிதா⁴ய யஞ்ஞஸம்பதா³ய ஸோளஸபரிக்கா²ராய இமினா ச நிச்சதா³னேன அனுகுலயஞ்ஞேன அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி.
‘‘Yo kho, brāhmaṇa, cātuddisaṃ saṅghaṃ uddissa vihāraṃ karoti, ayaṃ kho , brāhmaṇa, yañño imāya ca tividhāya yaññasampadāya soḷasaparikkhārāya iminā ca niccadānena anukulayaññena appaṭṭhataro ca appasamārambhataro ca mahapphalataro ca mahānisaṃsataro cā’’ti.
351. ‘‘அத்தி² பன, போ⁴ கோ³தம, அஞ்ஞோ யஞ்ஞோ இமாய ச திவிதா⁴ய யஞ்ஞஸம்பதா³ய ஸோளஸபரிக்கா²ராய இமினா ச நிச்சதா³னேன அனுகுலயஞ்ஞேன இமினா ச விஹாரதா³னேன அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி?
351. ‘‘Atthi pana, bho gotama, añño yañño imāya ca tividhāya yaññasampadāya soḷasaparikkhārāya iminā ca niccadānena anukulayaññena iminā ca vihāradānena appaṭṭhataro ca appasamārambhataro ca mahapphalataro ca mahānisaṃsataro cā’’ti?
‘‘அத்தி² கோ², ப்³ராஹ்மண, அஞ்ஞோ யஞ்ஞோ இமாய ச திவிதா⁴ய யஞ்ஞஸம்பதா³ய ஸோளஸபரிக்கா²ராய இமினா ச நிச்சதா³னேன அனுகுலயஞ்ஞேன இமினா ச விஹாரதா³னேன அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி.
‘‘Atthi kho, brāhmaṇa, añño yañño imāya ca tividhāya yaññasampadāya soḷasaparikkhārāya iminā ca niccadānena anukulayaññena iminā ca vihāradānena appaṭṭhataro ca appasamārambhataro ca mahapphalataro ca mahānisaṃsataro cā’’ti.
‘‘கதமோ பன ஸோ, போ⁴ கோ³தம, யஞ்ஞோ இமாய ச திவிதா⁴ய யஞ்ஞஸம்பதா³ய ஸோளஸபரிக்கா²ராய இமினா ச நிச்சதா³னேன அனுகுலயஞ்ஞேன இமினா ச விஹாரதா³னேன அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி?
‘‘Katamo pana so, bho gotama, yañño imāya ca tividhāya yaññasampadāya soḷasaparikkhārāya iminā ca niccadānena anukulayaññena iminā ca vihāradānena appaṭṭhataro ca appasamārambhataro ca mahapphalataro ca mahānisaṃsataro cā’’ti?
‘‘யோ கோ², ப்³ராஹ்மண, பஸன்னசித்தோ பு³த்³த⁴ங் ஸரணங் க³ச்ச²தி, த⁴ம்மங் ஸரணங் க³ச்ச²தி, ஸங்க⁴ங் ஸரணங் க³ச்ச²தி; அயங் கோ², ப்³ராஹ்மண, யஞ்ஞோ இமாய ச திவிதா⁴ய யஞ்ஞஸம்பதா³ய ஸோளஸபரிக்கா²ராய இமினா ச நிச்சதா³னேன அனுகுலயஞ்ஞேன இமினா ச விஹாரதா³னேன அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி.
‘‘Yo kho, brāhmaṇa, pasannacitto buddhaṃ saraṇaṃ gacchati, dhammaṃ saraṇaṃ gacchati, saṅghaṃ saraṇaṃ gacchati; ayaṃ kho, brāhmaṇa, yañño imāya ca tividhāya yaññasampadāya soḷasaparikkhārāya iminā ca niccadānena anukulayaññena iminā ca vihāradānena appaṭṭhataro ca appasamārambhataro ca mahapphalataro ca mahānisaṃsataro cā’’ti.
352. ‘‘அத்தி² பன, போ⁴ கோ³தம, அஞ்ஞோ யஞ்ஞோ இமாய ச திவிதா⁴ய யஞ்ஞஸம்பதா³ய ஸோளஸபரிக்கா²ராய இமினா ச நிச்சதா³னேன அனுகுலயஞ்ஞேன இமினா ச விஹாரதா³னேன இமேஹி ச ஸரணக³மனேஹி அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி?
352. ‘‘Atthi pana, bho gotama, añño yañño imāya ca tividhāya yaññasampadāya soḷasaparikkhārāya iminā ca niccadānena anukulayaññena iminā ca vihāradānena imehi ca saraṇagamanehi appaṭṭhataro ca appasamārambhataro ca mahapphalataro ca mahānisaṃsataro cā’’ti?
‘‘அத்தி² கோ², ப்³ராஹ்மண, அஞ்ஞோ யஞ்ஞோ இமாய ச திவிதா⁴ய யஞ்ஞஸம்பதா³ய ஸோளஸபரிக்கா²ராய இமினா ச நிச்சதா³னேன அனுகுலயஞ்ஞேன இமினா ச விஹாரதா³னேன இமேஹி ச ஸரணக³மனேஹி அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி.
‘‘Atthi kho, brāhmaṇa, añño yañño imāya ca tividhāya yaññasampadāya soḷasaparikkhārāya iminā ca niccadānena anukulayaññena iminā ca vihāradānena imehi ca saraṇagamanehi appaṭṭhataro ca appasamārambhataro ca mahapphalataro ca mahānisaṃsataro cā’’ti.
‘‘கதமோ பன ஸோ, போ⁴ கோ³தம, யஞ்ஞோ இமாய ச திவிதா⁴ய யஞ்ஞஸம்பதா³ய ஸோளஸபரிக்கா²ராய இமினா ச நிச்சதா³னேன அனுகுலயஞ்ஞேன இமினா ச விஹாரதா³னேன இமேஹி ச ஸரணக³மனேஹி அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி?
‘‘Katamo pana so, bho gotama, yañño imāya ca tividhāya yaññasampadāya soḷasaparikkhārāya iminā ca niccadānena anukulayaññena iminā ca vihāradānena imehi ca saraṇagamanehi appaṭṭhataro ca appasamārambhataro ca mahapphalataro ca mahānisaṃsataro cā’’ti?
‘‘யோ கோ², ப்³ராஹ்மண, பஸன்னசித்தோ ஸிக்கா²பதா³னி ஸமாதி³யதி – பாணாதிபாதா வேரமணிங், அதி³ன்னாதா³னா வேரமணிங், காமேஸுமிச்சா²சாரா வேரமணிங், முஸாவாதா³ வேரமணிங், ஸுராமேரயமஜ்ஜபமாத³ட்டா²னா வேரமணிங். அயங் கோ², ப்³ராஹ்மண, யஞ்ஞோ இமாய ச திவிதா⁴ய யஞ்ஞஸம்பதா³ய ஸோளஸபரிக்கா²ராய இமினா ச நிச்சதா³னேன அனுகுலயஞ்ஞேன இமினா ச விஹாரதா³னேன இமேஹி ச ஸரணக³மனேஹி அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி.
‘‘Yo kho, brāhmaṇa, pasannacitto sikkhāpadāni samādiyati – pāṇātipātā veramaṇiṃ, adinnādānā veramaṇiṃ, kāmesumicchācārā veramaṇiṃ, musāvādā veramaṇiṃ, surāmerayamajjapamādaṭṭhānā veramaṇiṃ. Ayaṃ kho, brāhmaṇa, yañño imāya ca tividhāya yaññasampadāya soḷasaparikkhārāya iminā ca niccadānena anukulayaññena iminā ca vihāradānena imehi ca saraṇagamanehi appaṭṭhataro ca appasamārambhataro ca mahapphalataro ca mahānisaṃsataro cā’’ti.
353. ‘‘அத்தி² பன, போ⁴ கோ³தம, அஞ்ஞோ யஞ்ஞோ இமாய ச திவிதா⁴ய யஞ்ஞஸம்பதா³ய ஸோளஸபரிக்கா²ராய இமினா ச நிச்சதா³னேன அனுகுலயஞ்ஞேன இமினா ச விஹாரதா³னேன இமேஹி ச ஸரணக³மனேஹி இமேஹி ச ஸிக்கா²பதே³ஹி அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி?
353. ‘‘Atthi pana, bho gotama, añño yañño imāya ca tividhāya yaññasampadāya soḷasaparikkhārāya iminā ca niccadānena anukulayaññena iminā ca vihāradānena imehi ca saraṇagamanehi imehi ca sikkhāpadehi appaṭṭhataro ca appasamārambhataro ca mahapphalataro ca mahānisaṃsataro cā’’ti?
‘‘அத்தி² கோ², ப்³ராஹ்மண, அஞ்ஞோ யஞ்ஞோ இமாய ச திவிதா⁴ய யஞ்ஞஸம்பதா³ய ஸோளஸபரிக்கா²ராய இமினா ச நிச்சதா³னேன அனுகுலயஞ்ஞேன இமினா ச விஹாரதா³னேன இமேஹி ச ஸரணக³மனேஹி இமேஹி ச ஸிக்கா²பதே³ஹி அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி.
‘‘Atthi kho, brāhmaṇa, añño yañño imāya ca tividhāya yaññasampadāya soḷasaparikkhārāya iminā ca niccadānena anukulayaññena iminā ca vihāradānena imehi ca saraṇagamanehi imehi ca sikkhāpadehi appaṭṭhataro ca appasamārambhataro ca mahapphalataro ca mahānisaṃsataro cā’’ti.
‘‘கதமோ பன ஸோ, போ⁴ கோ³தம, யஞ்ஞோ இமாய ச திவிதா⁴ய யஞ்ஞஸம்பதா³ய ஸோளஸபரிக்கா²ராய இமினா ச நிச்சதா³னேன அனுகுலயஞ்ஞேன இமினா ச விஹாரதா³னேன இமேஹி ச ஸரணக³மனேஹி இமேஹி ச ஸிக்கா²பதே³ஹி அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சா’’தி?
‘‘Katamo pana so, bho gotama, yañño imāya ca tividhāya yaññasampadāya soḷasaparikkhārāya iminā ca niccadānena anukulayaññena iminā ca vihāradānena imehi ca saraṇagamanehi imehi ca sikkhāpadehi appaṭṭhataro ca appasamārambhataro ca mahapphalataro ca mahānisaṃsataro cā’’ti?
‘‘இத⁴, ப்³ராஹ்மண, ததா²க³தோ லோகே உப்பஜ்ஜதி அரஹங் ஸம்மாஸம்பு³த்³தோ⁴…பே॰… (யதா² 190-212 அனுச்சே²தே³ஸு, ஏவங் வித்தா²ரேதப்³ப³ங்). ஏவங் கோ², ப்³ராஹ்மண, பி⁴க்கு² ஸீலஸம்பன்னோ ஹோதி…பே॰… பட²மங் ஜா²னங் உபஸம்பஜ்ஜ விஹரதி. அயங் கோ², ப்³ராஹ்மண, யஞ்ஞோ புரிமேஹி யஞ்ஞேஹி அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ ச…பே॰… து³தியங் ஜா²னங்…பே॰… ததியங் ஜா²னங்…பே॰… சதுத்த²ங் ஜா²னங் உபஸம்பஜ்ஜ விஹரதி. அயம்பி கோ², ப்³ராஹ்மண, யஞ்ஞோ புரிமேஹி யஞ்ஞேஹி அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ சாதி. ஞாணத³ஸ்ஸனாய சித்தங் அபி⁴னீஹரதி அபி⁴னின்னாமேதி…பே॰… அயம்பி கோ², ப்³ராஹ்மண, யஞ்ஞோ புரிமேஹி யஞ்ஞேஹி அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ ச…பே॰… நாபரங் இத்த²த்தாயாதி பஜானாதி. அயம்பி கோ², ப்³ராஹ்மண, யஞ்ஞோ புரிமேஹி யஞ்ஞேஹி அப்பட்ட²தரோ ச அப்பஸமாரம்ப⁴தரோ ச மஹப்ப²லதரோ ச மஹானிஸங்ஸதரோ ச. இமாய ச, ப்³ராஹ்மண, யஞ்ஞஸம்பதா³ய அஞ்ஞா யஞ்ஞஸம்பதா³ உத்தரிதரா வா பணீததரா வா நத்தீ²’’தி.
‘‘Idha, brāhmaṇa, tathāgato loke uppajjati arahaṃ sammāsambuddho…pe… (yathā 190-212 anucchedesu, evaṃ vitthāretabbaṃ). Evaṃ kho, brāhmaṇa, bhikkhu sīlasampanno hoti…pe… paṭhamaṃ jhānaṃ upasampajja viharati. Ayaṃ kho, brāhmaṇa, yañño purimehi yaññehi appaṭṭhataro ca appasamārambhataro ca mahapphalataro ca mahānisaṃsataro ca…pe… dutiyaṃ jhānaṃ…pe… tatiyaṃ jhānaṃ…pe… catutthaṃ jhānaṃ upasampajja viharati. Ayampi kho, brāhmaṇa, yañño purimehi yaññehi appaṭṭhataro ca appasamārambhataro ca mahapphalataro ca mahānisaṃsataro cāti. Ñāṇadassanāya cittaṃ abhinīharati abhininnāmeti…pe… ayampi kho, brāhmaṇa, yañño purimehi yaññehi appaṭṭhataro ca appasamārambhataro ca mahapphalataro ca mahānisaṃsataro ca…pe… nāparaṃ itthattāyāti pajānāti. Ayampi kho, brāhmaṇa, yañño purimehi yaññehi appaṭṭhataro ca appasamārambhataro ca mahapphalataro ca mahānisaṃsataro ca. Imāya ca, brāhmaṇa, yaññasampadāya aññā yaññasampadā uttaritarā vā paṇītatarā vā natthī’’ti.
கூடத³ந்தஉபாஸகத்தபடிவேத³னா
Kūṭadantaupāsakattapaṭivedanā
354. ஏவங் வுத்தே, கூடத³ந்தோ ப்³ராஹ்மணோ ப⁴க³வந்தங் ஏதத³வோச – ‘‘அபி⁴க்கந்தங், போ⁴ கோ³தம, அபி⁴க்கந்தங், போ⁴ கோ³தம! ஸெய்யதா²பி போ⁴ கோ³தம, நிக்குஜ்ஜிதங் வா உக்குஜ்ஜெய்ய, படிச்ச²ன்னங் வா விவரெய்ய, மூள்ஹஸ்ஸ வா மக்³க³ங் ஆசிக்கெ²ய்ய, அந்த⁴காரே வா தேலபஜ்ஜோதங் தா⁴ரெய்ய ‘சக்கு²மந்தோ ரூபானி த³க்க²ந்தீ’தி; ஏவமேவங் போ⁴தா கோ³தமேன அனேகபரியாயேன த⁴ம்மோ பகாஸிதோ. ஏஸாஹங் ப⁴வந்தங் கோ³தமங் ஸரணங் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. உபாஸகங் மங் ப⁴வங் கோ³தமோ தா⁴ரேது அஜ்ஜதக்³கே³ பாணுபேதங் ஸரணங் க³தங். ஏஸாஹங் போ⁴ கோ³தம ஸத்த ச உஸப⁴ஸதானி ஸத்த ச வச்ச²தரஸதானி ஸத்த ச வச்ச²தரீஸதானி ஸத்த ச அஜஸதானி ஸத்த ச உரப்³ப⁴ஸதானி முஞ்சாமி, ஜீவிதங் தே³மி, ஹரிதானி சேவ திணானி கா²த³ந்து, ஸீதானி ச பானீயானி பிவந்து, ஸீதோ ச நேஸங் வாதோ உபவாயதூ’’தி.
354. Evaṃ vutte, kūṭadanto brāhmaṇo bhagavantaṃ etadavoca – ‘‘abhikkantaṃ, bho gotama, abhikkantaṃ, bho gotama! Seyyathāpi bho gotama, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya ‘cakkhumanto rūpāni dakkhantī’ti; evamevaṃ bhotā gotamena anekapariyāyena dhammo pakāsito. Esāhaṃ bhavantaṃ gotamaṃ saraṇaṃ gacchāmi dhammañca bhikkhusaṅghañca. Upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gataṃ. Esāhaṃ bho gotama satta ca usabhasatāni satta ca vacchatarasatāni satta ca vacchatarīsatāni satta ca ajasatāni satta ca urabbhasatāni muñcāmi, jīvitaṃ demi, haritāni ceva tiṇāni khādantu, sītāni ca pānīyāni pivantu, sīto ca nesaṃ vāto upavāyatū’’ti.
ஸோதாபத்திப²லஸச்சி²கிரியா
Sotāpattiphalasacchikiriyā
355. அத² கோ² ப⁴க³வா கூடத³ந்தஸ்ஸ ப்³ராஹ்மணஸ்ஸ அனுபுப்³பி³ங் கத²ங் கதே²ஸி, ஸெய்யதி²த³ங், தா³னகத²ங் ஸீலகத²ங் ஸக்³க³கத²ங்; காமானங் ஆதீ³னவங் ஓகாரங் ஸங்கிலேஸங் நெக்க²ம்மே ஆனிஸங்ஸங் பகாஸேஸி. யதா³ ப⁴க³வா அஞ்ஞாஸி கூடத³ந்தங் ப்³ராஹ்மணங் கல்லசித்தங் முது³சித்தங் வினீவரணசித்தங் உத³க்³க³சித்தங் பஸன்னசித்தங், அத² யா பு³த்³தா⁴னங் ஸாமுக்கங்ஸிகா த⁴ம்மதே³ஸனா, தங் பகாஸேஸி – து³க்க²ங் ஸமுத³யங் நிரோத⁴ங் மக்³க³ங். ஸெய்யதா²பி நாம ஸுத்³த⁴ங் வத்த²ங் அபக³தகாளகங் ஸம்மதே³வ ரஜனங் படிக்³க³ண்ஹெய்ய, ஏவமேவ கூடத³ந்தஸ்ஸ ப்³ராஹ்மணஸ்ஸ தஸ்மிஞ்ஞேவ ஆஸனே விரஜங் வீதமலங் த⁴ம்மசக்கு²ங் உத³பாதி³ – ‘‘யங் கிஞ்சி ஸமுத³யத⁴ம்மங், ஸப்³ப³ங் தங் நிரோத⁴த⁴ம்ம’’ந்தி.
355. Atha kho bhagavā kūṭadantassa brāhmaṇassa anupubbiṃ kathaṃ kathesi, seyyathidaṃ, dānakathaṃ sīlakathaṃ saggakathaṃ; kāmānaṃ ādīnavaṃ okāraṃ saṃkilesaṃ nekkhamme ānisaṃsaṃ pakāsesi. Yadā bhagavā aññāsi kūṭadantaṃ brāhmaṇaṃ kallacittaṃ muducittaṃ vinīvaraṇacittaṃ udaggacittaṃ pasannacittaṃ, atha yā buddhānaṃ sāmukkaṃsikā dhammadesanā, taṃ pakāsesi – dukkhaṃ samudayaṃ nirodhaṃ maggaṃ. Seyyathāpi nāma suddhaṃ vatthaṃ apagatakāḷakaṃ sammadeva rajanaṃ paṭiggaṇheyya, evameva kūṭadantassa brāhmaṇassa tasmiññeva āsane virajaṃ vītamalaṃ dhammacakkhuṃ udapādi – ‘‘yaṃ kiñci samudayadhammaṃ, sabbaṃ taṃ nirodhadhamma’’nti.
356. அத² கோ² கூடத³ந்தோ ப்³ராஹ்மணோ தி³ட்ட²த⁴ம்மோ பத்தத⁴ம்மோ விதி³தத⁴ம்மோ பரியோகா³ள்ஹத⁴ம்மோ திண்ணவிசிகிச்சோ² விக³தகத²ங்கதோ² வேஸாரஜ்ஜப்பத்தோ அபரப்பச்சயோ ஸத்து²ஸாஸனே ப⁴க³வந்தங் ஏதத³வோச – ‘‘அதி⁴வாஸேது மே ப⁴வங் கோ³தமோ ஸ்வாதனாய ப⁴த்தங் ஸத்³தி⁴ங் பி⁴க்கு²ஸங்கே⁴னா’’தி. அதி⁴வாஸேஸி ப⁴க³வா துண்ஹீபா⁴வேன.
356. Atha kho kūṭadanto brāhmaṇo diṭṭhadhammo pattadhammo viditadhammo pariyogāḷhadhammo tiṇṇavicikiccho vigatakathaṃkatho vesārajjappatto aparappaccayo satthusāsane bhagavantaṃ etadavoca – ‘‘adhivāsetu me bhavaṃ gotamo svātanāya bhattaṃ saddhiṃ bhikkhusaṅghenā’’ti. Adhivāsesi bhagavā tuṇhībhāvena.
357. அத² கோ² கூடத³ந்தோ ப்³ராஹ்மணோ ப⁴க³வதோ அதி⁴வாஸனங் விதி³த்வா உட்டா²யாஸனா ப⁴க³வந்தங் அபி⁴வாதெ³த்வா பத³க்கி²ணங் கத்வா பக்காமி. அத² கோ² கூடத³ந்தோ ப்³ராஹ்மணோ தஸ்ஸா ரத்தியா அச்சயேன ஸகே யஞ்ஞவாடே பணீதங் கா²த³னீயங் போ⁴ஜனீயங் படியாதா³பெத்வா ப⁴க³வதோ காலங் ஆரோசாபேஸி – ‘‘காலோ, போ⁴ கோ³தம; நிட்டி²தங் ப⁴த்த’’ந்தி.
357. Atha kho kūṭadanto brāhmaṇo bhagavato adhivāsanaṃ viditvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho kūṭadanto brāhmaṇo tassā rattiyā accayena sake yaññavāṭe paṇītaṃ khādanīyaṃ bhojanīyaṃ paṭiyādāpetvā bhagavato kālaṃ ārocāpesi – ‘‘kālo, bho gotama; niṭṭhitaṃ bhatta’’nti.
358. அத² கோ² ப⁴க³வா புப்³ப³ண்ஹஸமயங் நிவாஸெத்வா பத்தசீவரமாதா³ய ஸத்³தி⁴ங் பி⁴க்கு²ஸங்கே⁴ன யேன கூடத³ந்தஸ்ஸ ப்³ராஹ்மணஸ்ஸ யஞ்ஞவாடோ தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³.
358. Atha kho bhagavā pubbaṇhasamayaṃ nivāsetvā pattacīvaramādāya saddhiṃ bhikkhusaṅghena yena kūṭadantassa brāhmaṇassa yaññavāṭo tenupasaṅkami; upasaṅkamitvā paññatte āsane nisīdi.
அத² கோ² கூடத³ந்தோ ப்³ராஹ்மணோ பு³த்³த⁴ப்பமுக²ங் பி⁴க்கு²ஸங்க⁴ங் பணீதேன கா²த³னீயேன போ⁴ஜனீயேன ஸஹத்தா² ஸந்தப்பேஸி ஸம்பவாரேஸி. அத² கோ² கூடத³ந்தோ ப்³ராஹ்மணோ ப⁴க³வந்தங் பு⁴த்தாவிங் ஓனீதபத்தபாணிங் அஞ்ஞதரங் நீசங் ஆஸனங் க³ஹெத்வா ஏகமந்தங் நிஸீதி³. ஏகமந்தங் நிஸின்னங் கோ² கூடத³ந்தங் ப்³ராஹ்மணங் ப⁴க³வா த⁴ம்மியா கதா²ய ஸந்த³ஸ்ஸெத்வா ஸமாத³பெத்வா ஸமுத்தேஜெத்வா ஸம்பஹங்ஸெத்வா உட்டா²யாஸனா பக்காமீதி.
Atha kho kūṭadanto brāhmaṇo buddhappamukhaṃ bhikkhusaṅghaṃ paṇītena khādanīyena bhojanīyena sahatthā santappesi sampavāresi. Atha kho kūṭadanto brāhmaṇo bhagavantaṃ bhuttāviṃ onītapattapāṇiṃ aññataraṃ nīcaṃ āsanaṃ gahetvā ekamantaṃ nisīdi. Ekamantaṃ nisinnaṃ kho kūṭadantaṃ brāhmaṇaṃ bhagavā dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā pakkāmīti.
கூடத³ந்தஸுத்தங் நிட்டி²தங் பஞ்சமங்.
Kūṭadantasuttaṃ niṭṭhitaṃ pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / தீ³க⁴ நிகாய (அட்ட²கதா²) • Dīgha nikāya (aṭṭhakathā) / 5. கூடத³ந்தஸுத்தவண்ணனா • 5. Kūṭadantasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / தீ³க⁴னிகாய (டீகா) • Dīghanikāya (ṭīkā) / 5. கூடத³ந்தஸுத்தவண்ணனா • 5. Kūṭadantasuttavaṇṇanā
