| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৪. কূটাগারসুত্তং
4. Kūṭāgārasuttaṃ
১১১৪. ‘‘যো হি, ভিক্খৰে 1, এৰং ৰদেয্য – ‘অহং দুক্খং অরিযসচ্চং যথাভূতং অনভিসমেচ্চ…পে॰… দুক্খনিরোধগামিনিং পটিপদং অরিযসচ্চং যথাভূতং অনভিসমেচ্চ সম্মা দুক্খস্সন্তং করিস্সামী’তি – নেতং ঠানং ৰিজ্জতি।
1114. ‘‘Yo hi, bhikkhave 2, evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘সেয্যথাপি , ভিক্খৰে, যো এৰং ৰদেয্য – ‘অহং কূটাগারস্স হেট্ঠিমং ঘরং অকরিত্ৰা উপরিমং ঘরং আরোপেস্সামী’তি – নেতং ঠানং ৰিজ্জতি; এৰমেৰ খো, ভিক্খৰে, যো এৰং ৰদেয্য – ‘অহং দুক্খং অরিযসচ্চং যথাভূতং অনভিসমেচ্চ…পে॰… দুক্খনিরোধগামিনিং পটিপদং অরিযসচ্চং যথাভূতং অনভিসমেচ্চ সম্মা দুক্খস্সন্তং করিস্সামী’তি – নেতং ঠানং ৰিজ্জতি।
‘‘Seyyathāpi , bhikkhave, yo evaṃ vadeyya – ‘ahaṃ kūṭāgārassa heṭṭhimaṃ gharaṃ akaritvā uparimaṃ gharaṃ āropessāmī’ti – netaṃ ṭhānaṃ vijjati; evameva kho, bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘যো চ খো, ভিক্খৰে, এৰং ৰদেয্য – ‘অহং দুক্খং অরিযসচ্চং যথাভূতং অভিসমেচ্চ…পে॰… দুক্খনিরোধগামিনিং পটিপদং অরিযসচ্চং যথাভূতং অভিসমেচ্চ সম্মা দুক্খস্সন্তং করিস্সামী’তি – ঠানমেতং ৰিজ্জতি।
‘‘Yo ca kho, bhikkhave, evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘সেয্যথাপি, ভিক্খৰে, যো এৰং ৰদেয্য – ‘অহং কূটাগারস্স হেট্ঠিমং ঘরং করিত্ৰা উপরিমং ঘরং আরোপেস্সামী’তি – ঠানমেতং ৰিজ্জতি; এৰমেৰ খো , ভিক্খৰে, যো এৰং ৰদেয্য – ‘অহং দুক্খং অরিযসচ্চং যথাভূতং অভিসমেচ্চ…পে॰… দুক্খনিরোধগামিনিং পটিপদং অরিযসচ্চং যথাভূতং অভিসমেচ্চ সম্মা দুক্খস্সন্তং করিস্সামী’তি – ঠানমেতং ৰিজ্জতি।
‘‘Seyyathāpi, bhikkhave, yo evaṃ vadeyya – ‘ahaṃ kūṭāgārassa heṭṭhimaṃ gharaṃ karitvā uparimaṃ gharaṃ āropessāmī’ti – ṭhānametaṃ vijjati; evameva kho , bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘তস্মাতিহ , ভিক্খৰে, ‘ইদং দুক্খ’ন্তি যোগো করণীযো…পে॰… ‘অযং দুক্খনিরোধগামিনী পটিপদা’তি যোগো করণীযো’’তি। চতুত্থং।
‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Catutthaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৪. কূটাগারসুত্তৰণ্ণনা • 4. Kūṭāgārasuttavaṇṇanā
