| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
4. කූටාගාරසුත්‌තං
4. Kūṭāgārasuttaṃ
1114. ‘‘යො හි, භික්‌ඛවෙ 1, එවං වදෙය්‍ය – ‘අහං දුක්‌ඛං අරියසච්‌චං යථාභූතං අනභිසමෙච්‌ච…පෙ.… දුක්‌ඛනිරොධගාමිනිං පටිපදං අරියසච්‌චං යථාභූතං අනභිසමෙච්‌ච සම්‌මා දුක්‌ඛස්‌සන්‌තං කරිස්‌සාමී’ති – නෙතං ඨානං විජ්‌ජති.
1114. ‘‘Yo hi, bhikkhave 2, evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘සෙය්‍යථාපි , භික්‌ඛවෙ, යො එවං වදෙය්‍ය – ‘අහං කූටාගාරස්‌ස හෙට්‌ඨිමං ඝරං අකරිත්‌වා උපරිමං ඝරං ආරොපෙස්‌සාමී’ති – නෙතං ඨානං විජ්‌ජති; එවමෙව ඛො, භික්‌ඛවෙ, යො එවං වදෙය්‍ය – ‘අහං දුක්‌ඛං අරියසච්‌චං යථාභූතං අනභිසමෙච්‌ච…පෙ.… දුක්‌ඛනිරොධගාමිනිං පටිපදං අරියසච්‌චං යථාභූතං අනභිසමෙච්‌ච සම්‌මා දුක්‌ඛස්‌සන්‌තං කරිස්‌සාමී’ති – නෙතං ඨානං විජ්‌ජති.
‘‘Seyyathāpi , bhikkhave, yo evaṃ vadeyya – ‘ahaṃ kūṭāgārassa heṭṭhimaṃ gharaṃ akaritvā uparimaṃ gharaṃ āropessāmī’ti – netaṃ ṭhānaṃ vijjati; evameva kho, bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ anabhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ anabhisamecca sammā dukkhassantaṃ karissāmī’ti – netaṃ ṭhānaṃ vijjati.
‘‘යො ච ඛො, භික්‌ඛවෙ, එවං වදෙය්‍ය – ‘අහං දුක්‌ඛං අරියසච්‌චං යථාභූතං අභිසමෙච්‌ච…පෙ.… දුක්‌ඛනිරොධගාමිනිං පටිපදං අරියසච්‌චං යථාභූතං අභිසමෙච්‌ච සම්‌මා දුක්‌ඛස්‌සන්‌තං කරිස්‌සාමී’ති – ඨානමෙතං විජ්‌ජති.
‘‘Yo ca kho, bhikkhave, evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘සෙය්‍යථාපි, භික්‌ඛවෙ, යො එවං වදෙය්‍ය – ‘අහං කූටාගාරස්‌ස හෙට්‌ඨිමං ඝරං කරිත්‌වා උපරිමං ඝරං ආරොපෙස්‌සාමී’ති – ඨානමෙතං විජ්‌ජති; එවමෙව ඛො , භික්‌ඛවෙ, යො එවං වදෙය්‍ය – ‘අහං දුක්‌ඛං අරියසච්‌චං යථාභූතං අභිසමෙච්‌ච…පෙ.… දුක්‌ඛනිරොධගාමිනිං පටිපදං අරියසච්‌චං යථාභූතං අභිසමෙච්‌ච සම්‌මා දුක්‌ඛස්‌සන්‌තං කරිස්‌සාමී’ති – ඨානමෙතං විජ්‌ජති.
‘‘Seyyathāpi, bhikkhave, yo evaṃ vadeyya – ‘ahaṃ kūṭāgārassa heṭṭhimaṃ gharaṃ karitvā uparimaṃ gharaṃ āropessāmī’ti – ṭhānametaṃ vijjati; evameva kho , bhikkhave, yo evaṃ vadeyya – ‘ahaṃ dukkhaṃ ariyasaccaṃ yathābhūtaṃ abhisamecca…pe… dukkhanirodhagāminiṃ paṭipadaṃ ariyasaccaṃ yathābhūtaṃ abhisamecca sammā dukkhassantaṃ karissāmī’ti – ṭhānametaṃ vijjati.
‘‘තස්‌මාතිහ , භික්‌ඛවෙ, ‘ඉදං දුක්‌ඛ’න්‌ති යොගො කරණීයො…පෙ.… ‘අයං දුක්‌ඛනිරොධගාමිනී පටිපදා’ති යොගො කරණීයො’’ති. චතුත්‌ථං.
‘‘Tasmātiha , bhikkhave, ‘idaṃ dukkha’nti yogo karaṇīyo…pe… ‘ayaṃ dukkhanirodhagāminī paṭipadā’ti yogo karaṇīyo’’ti. Catutthaṃ.
Footnotes:
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 4. කූටාගාරසුත්‌තවණ්‌ණනා • 4. Kūṭāgārasuttavaṇṇanā
