| Library / Tipiṭaka / တိပိဋက • Tipiṭaka / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) |
၃-၁၀. ကူဋသုတ္တာဒိဝဏ္ဏနာ
3-10. Kūṭasuttādivaṇṇanā
၁၄၁-၁၄၈. ဝသ္သိကန္တိ သုမနပုပ္ဖံ။ ဣမံ ကိရ သုတ္တံ သုတ္ဝာ ဘာတိယမဟာရာဇာ ဝီမံသိတုကာမတာယ ဧကသ္မိံ ဂဗ္ဘေ စတုဇာတိဂန္ဓေဟိ ပရိဘဏ္ဍံ ကာရေတ္ဝာ သုဂန္ဓာနိ ပုပ္ဖာနိ အာဟရာပေတ္ဝာ ဧကသ္သ သမုဂ္ဂသ္သ မဇ္ဈေ သုမနပုပ္ဖမုဋ္ဌိံ ဌပေတ္ဝာ သေသာနိ တသ္သ သမန္တတော မုဋ္ဌိမုဋ္ဌိံ ကတ္ဝာ ဌပေတ္ဝာ ဒ္ဝာရံ ပိဓာယ ဗဟိ နိက္ခန္တော။ အထသ္သ မုဟုတ္တံ ဝီတိနာမေတ္ဝာ ဒ္ဝာရံ ဝိဝရိတ္ဝာ ပဝိသန္တသ္သ သဗ္ဗပဌမံ သုမနပုပ္ဖဂန္ဓော ဃာနံ ပဟရိ။ သော မဟာတလသ္မိံယေဝ မဟာစေတိယာဘိမုခော နိပဇ္ဇိတ္ဝာ – ‘‘ဝသ္သိကံ တေသံ အဂ္ဂန္တိ ကထေန္တေန သုကထိတံ သမ္မာသမ္ဗုဒ္ဓေနာ’’တိ စေတိယံ ဝန္ဒိ။ ကုဋ္ဋရာဇာနောတိ ခုဒ္ဒကရာဇာနော။ ‘‘ခုဒ္ဒရာဇာနော’’တိပိ ပာဌော။ တန္တာဝုတာနန္တိ တန္တေ အာဝုတာနံ, တန္တံ အာရောပေတ္ဝာ ဝာယိတာနန္တိ အတ္ထော။ ဣဒဉ္စ ပစ္စတ္တေ သာမိဝစနံ။ ယာနိ ကာနိစိ တန္တာဝုတာနိ ဝတ္ထာနီတိ အယဉ္ဟေတ္ထ အတ္ထော။ အထ ဝာ တန္တာဝုတာနံ ဝတ္ထာနံ ယာနိ ကာနိစိ ဝတ္ထာနီတိ ဧဝံ သာဝသေသပာဌနယေနပေတ္ထ အတ္ထော ဒဋ္ဌဗ္ဗော။ သေသံ သဗ္ဗတ္ထ ဥတ္တာနမေဝာတိ။
141-148.Vassikanti sumanapupphaṃ. Imaṃ kira suttaṃ sutvā bhātiyamahārājā vīmaṃsitukāmatāya ekasmiṃ gabbhe catujātigandhehi paribhaṇḍaṃ kāretvā sugandhāni pupphāni āharāpetvā ekassa samuggassa majjhe sumanapupphamuṭṭhiṃ ṭhapetvā sesāni tassa samantato muṭṭhimuṭṭhiṃ katvā ṭhapetvā dvāraṃ pidhāya bahi nikkhanto. Athassa muhuttaṃ vītināmetvā dvāraṃ vivaritvā pavisantassa sabbapaṭhamaṃ sumanapupphagandho ghānaṃ pahari. So mahātalasmiṃyeva mahācetiyābhimukho nipajjitvā – ‘‘vassikaṃ tesaṃ agganti kathentena sukathitaṃ sammāsambuddhenā’’ti cetiyaṃ vandi. Kuṭṭarājānoti khuddakarājāno. ‘‘Khuddarājāno’’tipi pāṭho. Tantāvutānanti tante āvutānaṃ, tantaṃ āropetvā vāyitānanti attho. Idañca paccatte sāmivacanaṃ. Yāni kānici tantāvutāni vatthānīti ayañhettha attho. Atha vā tantāvutānaṃ vatthānaṃ yāni kānici vatthānīti evaṃ sāvasesapāṭhanayenapettha attho daṭṭhabbo. Sesaṃ sabbattha uttānamevāti.
အပ္ပမာဒဝဂ္ဂော အဋ္ဌမော။
Appamādavaggo aṭṭhamo.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya
၃-၇. ကူဋာဒိသုတ္တပဉ္စကံ • 3-7. Kūṭādisuttapañcakaṃ
၈-၁၀. စန္ဒိမာဒိသုတ္တတတိယကံ • 8-10. Candimādisuttatatiyakaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / သံယုတ္တနိကာယ (ဋီကာ) • Saṃyuttanikāya (ṭīkā) / ၃-၁၀. ကူဋသုတ္တာဒိဝဏ္ဏနာ • 3-10. Kūṭasuttādivaṇṇanā
