| Library / Tipiṭaka / திபிடக • Tipiṭaka / ஜாதக-அட்ட²கதா² • Jātaka-aṭṭhakathā |
[98] 8. கூடவாணிஜஜாதகவண்ணனா
[98] 8. Kūṭavāṇijajātakavaṇṇanā
ஸாது⁴ கோ² பண்டி³தோ நாமாதி இத³ங் ஸத்தா² ஜேதவனே விஹரந்தோ ஏகங் கூடவாணிஜங் ஆரப்³ப⁴ கதே²ஸி. ஸாவத்தி²யஞ்ஹி த்³வே ஜனா ஏகதோ வணிஜ்ஜங் கரொந்தா ப⁴ண்ட³ங் ஸகடேனாதா³ய ஜனபத³ங் க³ந்த்வா லத்³த⁴லாபா⁴ பச்சாக³மிங்ஸு. தேஸு கூடவாணிஜோ சிந்தேஸி ‘‘அயங் ப³ஹூ தி³வஸே து³ப்³போ⁴ஜனேன து³க்க²ஸெய்யாய கிலந்தோ, இதா³னி அத்தனோ க⁴ரே நானக்³க³ரஸேஹி யாவத³த்த²ங் ஸுபோ⁴ஜனங் பு⁴ஞ்ஜித்வா அஜீரகேன மரிஸ்ஸதி. அதா²ஹங் இமங் ப⁴ண்ட³ங் தயோ கொட்டா²ஸே கத்வா ஏகங் தஸ்ஸ தா³ரகானங் த³ஸ்ஸாமி, த்³வே கொட்டா²ஸே அத்தனா க³ஹெஸ்ஸாமீ’’தி. ஸோ ‘‘அஜ்ஜ பா⁴ஜெஸ்ஸாம, ஸ்வே பா⁴ஜெஸ்ஸாமா’’தி ப⁴ண்ட³ங் பா⁴ஜேதுங் ந இச்சி². அத² நங் பண்டி³தவாணிஜோ அகாமகங் நிப்பீளெத்வா பா⁴ஜாபெத்வா விஹாரங் க³ந்த்வா ஸத்தா²ரங் வந்தி³த்வா கதபடிஸந்தா²ரோ ‘‘அதிபபஞ்சோ தே கதோ, இதா⁴க³ந்த்வாபி சிரேன பு³த்³து⁴பட்டா²னங் ஆக³தோஸீ’’தி வுத்தே தங் பவத்திங் ப⁴க³வதோ ஆரோசேஸி. ஸத்தா² ‘‘ந கோ² ஸோ, உபாஸக, இதா³னேவ கூடவாணிஜோ, புப்³பே³பி கூடவாணிஜோயேவ. இதா³னி பன தங் வஞ்சேதுகாமோ ஜாதோ, புப்³பே³ பண்டி³தேபி வஞ்சேதுங் உஸ்ஸஹீ’’தி வத்வா தேன யாசிதோ அதீதங் ஆஹரி.
Sādhukho paṇḍito nāmāti idaṃ satthā jetavane viharanto ekaṃ kūṭavāṇijaṃ ārabbha kathesi. Sāvatthiyañhi dve janā ekato vaṇijjaṃ karontā bhaṇḍaṃ sakaṭenādāya janapadaṃ gantvā laddhalābhā paccāgamiṃsu. Tesu kūṭavāṇijo cintesi ‘‘ayaṃ bahū divase dubbhojanena dukkhaseyyāya kilanto, idāni attano ghare nānaggarasehi yāvadatthaṃ subhojanaṃ bhuñjitvā ajīrakena marissati. Athāhaṃ imaṃ bhaṇḍaṃ tayo koṭṭhāse katvā ekaṃ tassa dārakānaṃ dassāmi, dve koṭṭhāse attanā gahessāmī’’ti. So ‘‘ajja bhājessāma, sve bhājessāmā’’ti bhaṇḍaṃ bhājetuṃ na icchi. Atha naṃ paṇḍitavāṇijo akāmakaṃ nippīḷetvā bhājāpetvā vihāraṃ gantvā satthāraṃ vanditvā katapaṭisanthāro ‘‘atipapañco te kato, idhāgantvāpi cirena buddhupaṭṭhānaṃ āgatosī’’ti vutte taṃ pavattiṃ bhagavato ārocesi. Satthā ‘‘na kho so, upāsaka, idāneva kūṭavāṇijo, pubbepi kūṭavāṇijoyeva. Idāni pana taṃ vañcetukāmo jāto, pubbe paṇḍitepi vañcetuṃ ussahī’’ti vatvā tena yācito atītaṃ āhari.
அதீதே பா³ராணஸியங் ப்³ரஹ்மத³த்தே ரஜ்ஜங் காரெந்தே போ³தி⁴ஸத்தோ பா³ராணஸியங் வாணிஜகுலே நிப்³ப³த்தி, நாமக்³க³ஹணதி³வஸே சஸ்ஸ ‘‘பண்டி³தோ’’தி நாமங் அகங்ஸு. ஸோ வயப்பத்தோ அஞ்ஞேன வாணிஜேன ஸத்³தி⁴ங் ஏகதோ ஹுத்வா வணிஜ்ஜங் கரோதி, தஸ்ஸ ‘‘அதிபண்டி³தோ’’தி நாமங் அஹோஸி. தே பா³ராணஸிதோ பஞ்சஹி ஸகடஸதேஹி ப⁴ண்ட³ங் ஆதா³ய ஜனபத³ங் க³ந்த்வா வணிஜ்ஜங் கத்வா லத்³த⁴லாபா⁴ புன பா³ராணஸிங் ஆக³மிங்ஸு. அத² நேஸங் ப⁴ண்ட³பா⁴ஜனகாலே அதிபண்டி³தோ ஆஹ ‘‘மயா த்³வே கொட்டா²ஸா லத்³த⁴ப்³பா³’’தி. ‘‘கிங்காரணா’’தி? ‘‘த்வங் பண்டி³தோ, அஹங் அதிபண்டி³தோ. பண்டி³தோ ஏகங் லத்³து⁴ங் அரஹதி, அதிபண்டி³தோ த்³வே’’தி. ‘‘நனு அம்ஹாகங் த்³வின்னங் ப⁴ண்ட³மூலகம்பி கோ³ணாத³யோபி ஸமஸமாயேவ, த்வங் கஸ்மா த்³வே கொட்டா²ஸே லத்³து⁴ங் அரஹஸீ’’தி. ‘‘அதிபண்டி³தபா⁴வேனா’’தி. ஏவங் தே கத²ங் வட்³டெ⁴த்வா கலஹங் அகங்ஸு.
Atīte bārāṇasiyaṃ brahmadatte rajjaṃ kārente bodhisatto bārāṇasiyaṃ vāṇijakule nibbatti, nāmaggahaṇadivase cassa ‘‘paṇḍito’’ti nāmaṃ akaṃsu. So vayappatto aññena vāṇijena saddhiṃ ekato hutvā vaṇijjaṃ karoti, tassa ‘‘atipaṇḍito’’ti nāmaṃ ahosi. Te bārāṇasito pañcahi sakaṭasatehi bhaṇḍaṃ ādāya janapadaṃ gantvā vaṇijjaṃ katvā laddhalābhā puna bārāṇasiṃ āgamiṃsu. Atha nesaṃ bhaṇḍabhājanakāle atipaṇḍito āha ‘‘mayā dve koṭṭhāsā laddhabbā’’ti. ‘‘Kiṃkāraṇā’’ti? ‘‘Tvaṃ paṇḍito, ahaṃ atipaṇḍito. Paṇḍito ekaṃ laddhuṃ arahati, atipaṇḍito dve’’ti. ‘‘Nanu amhākaṃ dvinnaṃ bhaṇḍamūlakampi goṇādayopi samasamāyeva, tvaṃ kasmā dve koṭṭhāse laddhuṃ arahasī’’ti. ‘‘Atipaṇḍitabhāvenā’’ti. Evaṃ te kathaṃ vaḍḍhetvā kalahaṃ akaṃsu.
ததோ அதிபண்டி³தோ ‘‘அத்தே²கோ உபாயோ’’தி சிந்தெத்வா அத்தனோ பிதரங் ஏகஸ்மிங் ஸுஸிரருக்கே² பவேஸெத்வா ‘‘த்வங் அம்ஹேஸு ஆக³தேஸு ‘அதிபண்டி³தோ த்³வே கொட்டா²ஸே லத்³து⁴ங் அரஹதீ’தி வதெ³ய்யாஸீ’’தி வத்வா போ³தி⁴ஸத்தங் உபஸங்கமித்வா ‘‘ஸம்ம, மய்ஹங் த்³வின்னங் கொட்டா²ஸானங் யுத்தபா⁴வங் வா அயுத்தபா⁴வங் வா ஏஸா ருக்க²தே³வதா ஜானாதி, ஏஹி, தங் புச்சி²ஸ்ஸாமா’’தி தங் தத்த² நெத்வா ‘‘அய்யே ருக்க²தே³வதே, அம்ஹாகங் அட்டங் பச்சி²ந்தா³’’தி ஆஹ. அத²ஸ்ஸ பிதா ஸரங் பரிவத்தெத்வா ‘‘தேன ஹி கதே²தா²’’தி ஆஹ. ‘‘அய்யே, அயங் பண்டி³தோ, அஹங் அதிபண்டி³தோ. அம்ஹேஹி ஏகதோ வோஹாரோ கதோ, தத்த² கேன கிங் லத்³த⁴ப்³ப³ந்தி. பண்டி³தேன ஏகோ கொட்டா²ஸோ, அதிபண்டி³தேன பன த்³வே கொட்டா²ஸா லத்³த⁴ப்³பா³’’தி. போ³தி⁴ஸத்தோ ஏவங் வினிச்சி²தங் அட்டங் ஸுத்வா ‘‘இதா³னி தே³வதாபா⁴வங் வா அதே³வதாபா⁴வங் வா ஜானிஸ்ஸாமீ’’தி பலாலங் ஆஹரித்வா ஸுஸிரங் பூரெத்வா அக்³கி³ங் அதா³ஸி, அதிபண்டி³தஸ்ஸ பிதா ஜாலாய பு²ட்ட²காலே அட்³ட⁴ஜ்ஜா²மேன ஸரீரேன உபரி ஆருய்ஹ ஸாக²ங் க³ஹெத்வா ஓலம்ப³ந்தோ பூ⁴மியங் பதித்வா இமங் கா³த²மாஹ –
Tato atipaṇḍito ‘‘attheko upāyo’’ti cintetvā attano pitaraṃ ekasmiṃ susirarukkhe pavesetvā ‘‘tvaṃ amhesu āgatesu ‘atipaṇḍito dve koṭṭhāse laddhuṃ arahatī’ti vadeyyāsī’’ti vatvā bodhisattaṃ upasaṅkamitvā ‘‘samma, mayhaṃ dvinnaṃ koṭṭhāsānaṃ yuttabhāvaṃ vā ayuttabhāvaṃ vā esā rukkhadevatā jānāti, ehi, taṃ pucchissāmā’’ti taṃ tattha netvā ‘‘ayye rukkhadevate, amhākaṃ aṭṭaṃ pacchindā’’ti āha. Athassa pitā saraṃ parivattetvā ‘‘tena hi kathethā’’ti āha. ‘‘Ayye, ayaṃ paṇḍito, ahaṃ atipaṇḍito. Amhehi ekato vohāro kato, tattha kena kiṃ laddhabbanti. Paṇḍitena eko koṭṭhāso, atipaṇḍitena pana dve koṭṭhāsā laddhabbā’’ti. Bodhisatto evaṃ vinicchitaṃ aṭṭaṃ sutvā ‘‘idāni devatābhāvaṃ vā adevatābhāvaṃ vā jānissāmī’’ti palālaṃ āharitvā susiraṃ pūretvā aggiṃ adāsi, atipaṇḍitassa pitā jālāya phuṭṭhakāle aḍḍhajjhāmena sarīrena upari āruyha sākhaṃ gahetvā olambanto bhūmiyaṃ patitvā imaṃ gāthamāha –
98.
98.
‘‘ஸாது⁴ கோ² பண்டி³தோ நாம, ந த்வேவ அதிபண்டி³தோ;
‘‘Sādhu kho paṇḍito nāma, na tveva atipaṇḍito;
அதிபண்டி³தேன புத்தேன, மனம்ஹி உபகூளிதோ’’தி.
Atipaṇḍitena puttena, manamhi upakūḷito’’ti.
தத்த² ஸாது⁴ கோ² பண்டி³தோ நாமாதி இமஸ்மிங் லோகே பண்டி³ச்சேன ஸமன்னாக³தோ காரணாகாரணஞ்ஞூ புக்³க³லோ ஸாது⁴ ஸோப⁴னோ. அதிபண்டி³தோதி நாமமத்தேன அதிபண்டி³தோ கூடபுரிஸோ ந த்வேவ வரங். மனம்ஹி உபகூளிதோதி தோ²கேனம்ஹி ஜா²மோ, அட்³ட⁴ஜ்ஜா²மகோவ முத்தோதி அத்தோ². தே உபோ⁴பி மஜ்ஜே² பி⁴ந்தி³த்வா ஸமஞ்ஞேவ கொட்டா²ஸங் க³ண்ஹித்வா யதா²கம்மங் க³தா.
Tattha sādhu kho paṇḍito nāmāti imasmiṃ loke paṇḍiccena samannāgato kāraṇākāraṇaññū puggalo sādhu sobhano. Atipaṇḍitoti nāmamattena atipaṇḍito kūṭapuriso na tveva varaṃ. Manamhi upakūḷitoti thokenamhi jhāmo, aḍḍhajjhāmakova muttoti attho. Te ubhopi majjhe bhinditvā samaññeva koṭṭhāsaṃ gaṇhitvā yathākammaṃ gatā.
ஸத்தா² ‘‘புப்³பே³பி ஏஸ கூடவாணிஜோயேவா’’தி இமங் அதீதங் ஆஹரித்வா ஜாதகங் ஸமோதா⁴னேஸி – ‘‘ததா³ கூடவாணிஜோ பச்சுப்பன்னேபி கூடவாணிஜோயேவ, பண்டி³தவாணிஜோ பன அஹமேவ அஹோஸி’’ந்தி.
Satthā ‘‘pubbepi esa kūṭavāṇijoyevā’’ti imaṃ atītaṃ āharitvā jātakaṃ samodhānesi – ‘‘tadā kūṭavāṇijo paccuppannepi kūṭavāṇijoyeva, paṇḍitavāṇijo pana ahameva ahosi’’nti.
கூடவாணிஜஜாதகவண்ணனா அட்ட²மா.
Kūṭavāṇijajātakavaṇṇanā aṭṭhamā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / ஜாதகபாளி • Jātakapāḷi / 98. கூடவாணிஜஜாதகங் • 98. Kūṭavāṇijajātakaṃ
