| Library / Tipiṭaka / д̇ибидага • Tipiṭaka / ж̇аад̇ага-адтагат̇аа • Jātaka-aṭṭhakathā |
3. гудид̣̇уусагаваг̇г̇о
3. Kuṭidūsakavaggo
[321] 1. гудид̣̇уусагаж̇аад̇агаван̣н̣анаа
[321] 1. Kuṭidūsakajātakavaṇṇanā
мануссассзва д̇з сийсанд̇и ид̣̇ам̣ сад̇т̇аа ж̇зд̇аванз вихаранд̇о махаагассабад̇т̇зрасса бан̣н̣асаалажхаабагам̣ д̣̇ахарабхигкум̣ аараб̣бха гат̇зси. вад̇т̇у бана рааж̇аг̇ахз самудтид̇ам̣. д̇ад̣̇аа гира т̇зро рааж̇аг̇ахам̣ ниссааяа аран̃н̃агудияам̣ вихарад̇и, д̇асса д̣̇вз д̣̇ахараа убадтаанам̣ гаронд̇и. д̇зсу зго т̇зрасса убагаараго, зго д̣̇уб̣б̣ажо ид̇арзна гад̇ам̣ ад̇д̇анаа гад̇асад̣̇исам̣ гарод̇и. д̇зна мукод̣̇агаад̣̇ийсу убадтаабид̇зсу т̇зрасса санд̇игам̣ г̇анд̇ваа ванд̣̇ид̇ваа ‘‘бханд̇з, уд̣̇агам̣ табид̇ам̣, мукам̣ д̇ховат̇аа’’д̇иаад̣̇ийни вад̣̇ад̇и. д̇зна гаалассзва вудтааяа т̇зрасса баривзн̣з саммадтз т̇зрасса нигкаманавзлааяа ид̇о жид̇о жа бахаранд̇о сагалабаривзн̣ам̣ ад̇д̇анаа саммадтам̣ вияа гарод̇и. вад̇д̇асамбанно жинд̇зси ‘‘аяам̣ д̣̇уб̣б̣ажо маяаа гад̇ам̣ ад̇д̇анаа гад̇асад̣̇исам̣ гарод̇и, зд̇асса сатагаммам̣ баагадам̣ гариссаамий’’д̇и.
Manussassevate sīsanti idaṃ satthā jetavane viharanto mahākassapattherassa paṇṇasālajhāpakaṃ daharabhikkhuṃ ārabbha kathesi. Vatthu pana rājagahe samuṭṭhitaṃ. Tadā kira thero rājagahaṃ nissāya araññakuṭiyaṃ viharati, tassa dve daharā upaṭṭhānaṃ karonti. Tesu eko therassa upakārako, eko dubbaco itarena kataṃ attanā katasadisaṃ karoti. Tena mukhodakādīsu upaṭṭhāpitesu therassa santikaṃ gantvā vanditvā ‘‘bhante, udakaṃ ṭhapitaṃ, mukhaṃ dhovathā’’tiādīni vadati. Tena kālasseva vuṭṭhāya therassa pariveṇe sammaṭṭhe therassa nikkhamanavelāya ito cito ca paharanto sakalapariveṇaṃ attanā sammaṭṭhaṃ viya karoti. Vattasampanno cintesi ‘‘ayaṃ dubbaco mayā kataṃ attanā katasadisaṃ karoti, etassa saṭhakammaṃ pākaṭaṃ karissāmī’’ti.
д̇асмим̣ анд̇ог̇аамз бхуд̇ваа ааг̇анд̇ваа нид̣̇д̣̇ааяанд̇зва нхаанод̣̇агам̣ д̇аабзд̇ваа бидтигодтагз табзд̇ваа ан̃н̃ам̣ ад̣дханаал̣имад̇д̇ам̣ уд̣̇агам̣ уд̣̇д̇ханз табзси. ид̇аро баб̣уж̇жхид̇ваава г̇анд̇ваа усумам̣ удтаханд̇ам̣ д̣̇исваа ‘‘уд̣̇агам̣ д̇аабзд̇ваа годтагз табид̇ам̣ бхависсад̇ий’’д̇и т̇зрассса санд̇игам̣ г̇анд̇ваа ‘‘бханд̇з, нхаанагодтагз уд̣̇агам̣ табид̇ам̣, нхааяат̇аа’’д̇и ааха. т̇зро ‘нхааяиссаамий’’д̇и д̇зна сад̣̇д̇хим̣язва ааг̇анд̇ваа годтагз уд̣̇агам̣ ад̣̇ид̇ваа ‘‘гахам̣ уд̣̇ага’’нд̇и бужчи. со взг̇зна аг̇г̇исаалам̣ г̇анд̇ваа д̇ужчабхааж̇анз ул̣ун̇гам̣ од̇аарзси, ул̣ун̇го д̇ужчабхааж̇анасса д̇алз бадихад̇о ‘‘д̇ад̇аа’’д̇и сад̣̇д̣̇амагааси. д̇ад̇о бадтааяа д̇асса ‘‘ул̣ун̇гасад̣̇д̣̇аго’’д̇взва наамам̣ ж̇аад̇ам̣.
Tasmiṃ antogāme bhutvā āgantvā niddāyanteva nhānodakaṃ tāpetvā piṭṭhikoṭṭhake ṭhapetvā aññaṃ aḍḍhanāḷimattaṃ udakaṃ uddhane ṭhapesi. Itaro pabujjhitvāva gantvā usumaṃ uṭṭhahantaṃ disvā ‘‘udakaṃ tāpetvā koṭṭhake ṭhapitaṃ bhavissatī’’ti therasssa santikaṃ gantvā ‘‘bhante, nhānakoṭṭhake udakaṃ ṭhapitaṃ, nhāyathā’’ti āha. Thero ‘nhāyissāmī’’ti tena saddhiṃyeva āgantvā koṭṭhake udakaṃ aditvā ‘‘kahaṃ udaka’’nti pucchi. So vegena aggisālaṃ gantvā tucchabhājane uḷuṅkaṃ otāresi, uḷuṅko tucchabhājanassa tale paṭihato ‘‘tatā’’ti saddamakāsi. Tato paṭṭhāya tassa ‘‘uḷuṅkasaddako’’tveva nāmaṃ jātaṃ.
д̇асмим̣ кан̣з ид̇аро бидтигодтагад̇о уд̣̇агам̣ аахарид̇ваа ‘‘нхааяат̇а, бханд̇з’’д̇и ааха. т̇зро нхад̇ваа ааваж̇ж̇знд̇о ул̣ун̇гасад̣̇д̣̇агасса д̣̇уб̣б̣ажабхаавам̣ н̃ад̇ваа д̇ам̣ сааяам̣ т̇зрубадтаанам̣ ааг̇ад̇ам̣ овад̣̇и ‘‘аавусо, саман̣зна наама ад̇д̇анаа гад̇амзва ‘гад̇ам̣ мз’д̇и вад̇д̇ум̣ ваддад̇и, ан̃н̃ат̇аа самбаж̇аанамусааваад̣̇о ход̇и, ид̇о бадтааяа зваруубам̣ маа агаасий’’д̇и. со т̇зрасса гуж̇жхид̇ваа бунад̣̇ивасз т̇зрзна сад̣̇д̇хим̣ бин̣д̣ааяа г̇аамам̣ на баависи. т̇зро ид̇арзнзва сад̣̇д̇хим̣ баависи. ул̣ун̇гасад̣̇д̣̇агоби т̇зрасса убадтаагагулам̣ г̇анд̇ваа ‘‘бханд̇з, т̇зро гаха’’нд̇и вуд̇д̇з ‘‘апаасугзна вихаарзязва нисинно’’д̇и вад̇ваа ‘‘гим̣, бханд̇з, лад̣̇д̇хум̣ ваддад̇ий’’д̇и вуд̇д̇з ‘‘ид̣̇ан̃жид̣̇ан̃жа д̣̇зт̇аа’’д̇и г̇ахзд̇ваа ад̇д̇ано ружид̇адтаанам̣ г̇анд̇ваа бхун̃ж̇ид̇ваа вихаарам̣ аг̇амааси.
Tasmiṃ khaṇe itaro piṭṭhikoṭṭhakato udakaṃ āharitvā ‘‘nhāyatha, bhante’’ti āha. Thero nhatvā āvajjento uḷuṅkasaddakassa dubbacabhāvaṃ ñatvā taṃ sāyaṃ therupaṭṭhānaṃ āgataṃ ovadi ‘‘āvuso, samaṇena nāma attanā katameva ‘kataṃ me’ti vattuṃ vaṭṭati, aññathā sampajānamusāvādo hoti, ito paṭṭhāya evarūpaṃ mā akāsī’’ti. So therassa kujjhitvā punadivase therena saddhiṃ piṇḍāya gāmaṃ na pāvisi. Thero itareneva saddhiṃ pāvisi. Uḷuṅkasaddakopi therassa upaṭṭhākakulaṃ gantvā ‘‘bhante, thero kaha’’nti vutte ‘‘aphāsukena vihāreyeva nisinno’’ti vatvā ‘‘kiṃ, bhante, laddhuṃ vaṭṭatī’’ti vutte ‘‘idañcidañca dethā’’ti gahetvā attano rucitaṭṭhānaṃ gantvā bhuñjitvā vihāraṃ agamāsi.
бунад̣̇ивасз т̇зро д̇ам̣ гулам̣ г̇анд̇ваа нисийд̣̇и. мануссзхи ‘‘гим̣, бханд̇з, аяяасса апаасугам̣, хияяо гирад̇т̇а вихаарзязва нисиннаа, асугад̣̇ахарасса хад̇т̇з аахаарам̣ бзсаяимха, барибхуд̇д̇о аяязнаа’’д̇и вуд̇д̇з т̇зро д̇ун̣хийбхууд̇ова бхад̇д̇агижжам̣ гад̇ваа вихаарам̣ г̇анд̇ваа сааяам̣ т̇зрубадтаанагаалз ааг̇ад̇ам̣ ааманд̇зд̇ваа ‘‘аавусо, асугаг̇аамз наама асугагулз ‘т̇зрасса ид̣̇ан̃жид̣̇ан̃жа лад̣̇д̇хум̣ ваддад̇ий’д̇и вин̃н̃аабзд̇ваа гира д̇з бхуд̇д̇а’’нд̇и вад̇ваа ‘‘вин̃н̃ад̇д̇и наама на ваддад̇и, маа буна зваруубам̣ анаажаарам̣ жараа’’д̇и ааха. со зд̇д̇агзна т̇зрз аагхаад̇ам̣ б̣анд̇хид̇ваа ‘‘аяам̣ хияяоби уд̣̇агамад̇д̇ам̣ ниссааяа маяаа сад̣̇д̇хим̣ галахам̣ гари, ид̣̇аани банасса убадтаагаанам̣ г̇зхз маяаа бхад̇д̇амудти бхуд̇д̇аад̇и асаханд̇о буна галахам̣ гарод̇и, ж̇ааниссаамисса гад̇д̇аб̣б̣аяуд̇д̇ага’’нд̇и бунад̣̇ивасз т̇зрз бин̣д̣ааяа бавидтз муг̇г̇арам̣ г̇ахзд̇ваа барибхог̇абхааж̇анаани бхинд̣̇ид̇ваа бан̣н̣асаалам̣ жхаабзд̇ваа балааяи. со ж̇ийвамаанова мануссабзд̇о худ̇ваа суссид̇ваа гаалам̣ гад̇ваа авийжимахаанираяз ниб̣б̣ад̇д̇и. со д̇зна гад̇о анаажааро махааж̇анасса маж̇жхз баагадо ж̇аад̇о.
Punadivase thero taṃ kulaṃ gantvā nisīdi. Manussehi ‘‘kiṃ, bhante, ayyassa aphāsukaṃ, hiyyo kirattha vihāreyeva nisinnā, asukadaharassa hatthe āhāraṃ pesayimha, paribhutto ayyenā’’ti vutte thero tuṇhībhūtova bhattakiccaṃ katvā vihāraṃ gantvā sāyaṃ therupaṭṭhānakāle āgataṃ āmantetvā ‘‘āvuso, asukagāme nāma asukakule ‘therassa idañcidañca laddhuṃ vaṭṭatī’ti viññāpetvā kira te bhutta’’nti vatvā ‘‘viññatti nāma na vaṭṭati, mā puna evarūpaṃ anācāraṃ carā’’ti āha. So ettakena there āghātaṃ bandhitvā ‘‘ayaṃ hiyyopi udakamattaṃ nissāya mayā saddhiṃ kalahaṃ kari, idāni panassa upaṭṭhākānaṃ gehe mayā bhattamuṭṭhi bhuttāti asahanto puna kalahaṃ karoti, jānissāmissa kattabbayuttaka’’nti punadivase there piṇḍāya paviṭṭhe muggaraṃ gahetvā paribhogabhājanāni bhinditvā paṇṇasālaṃ jhāpetvā palāyi. So jīvamānova manussapeto hutvā sussitvā kālaṃ katvā avīcimahāniraye nibbatti. So tena kato anācāro mahājanassa majjhe pākaṭo jāto.
ат̇згажжз бхигкуу рааж̇аг̇ахаа саавад̇т̇им̣ г̇анд̇ваа сабхааг̇адтаанз бад̇д̇ажийварам̣ бадисаамзд̇ваа сад̇т̇у санд̇игам̣ г̇анд̇ваа ванд̣̇ид̇ваа нисийд̣̇им̣су. сад̇т̇аа д̇зхи сад̣̇д̇хим̣ бадисант̇аарам̣ гад̇ваа ‘‘гуд̇о ааг̇ад̇ад̇т̇аа’’д̇и бужчи. ‘‘рааж̇аг̇ахаа, бханд̇з’’д̇и. ‘‘го д̇ад̇т̇а оваад̣̇ад̣̇ааяаго аажарияо’’д̇и. ‘‘махаагассабад̇т̇зро, бханд̇з’’д̇и. ‘‘сукам̣, бхигкавз, гассабассаа’’д̇и. ‘‘аама, бханд̇з, т̇зрасса сукам̣, сад̣̇д̇хивихаариго банасса оваад̣̇з д̣̇иннз гуж̇жхид̇ваа т̇зрасса бан̣н̣асаалам̣ жхаабзд̇ваа балааяийд̇и. д̇ам̣ суд̇ваа сад̇т̇аа ‘‘бхигкавз, гассабасса зваруубзна б̣аалзна сад̣̇д̇хим̣ жаран̣ад̇о згажарияаава сзяяо’’д̇и вад̇ваа имам̣ д̇хаммабад̣̇з г̇аат̇амааха –
Athekacce bhikkhū rājagahā sāvatthiṃ gantvā sabhāgaṭṭhāne pattacīvaraṃ paṭisāmetvā satthu santikaṃ gantvā vanditvā nisīdiṃsu. Satthā tehi saddhiṃ paṭisanthāraṃ katvā ‘‘kuto āgatatthā’’ti pucchi. ‘‘Rājagahā, bhante’’ti. ‘‘Ko tattha ovādadāyako ācariyo’’ti. ‘‘Mahākassapatthero, bhante’’ti. ‘‘Sukhaṃ, bhikkhave, kassapassā’’ti. ‘‘Āma, bhante, therassa sukhaṃ, saddhivihāriko panassa ovāde dinne kujjhitvā therassa paṇṇasālaṃ jhāpetvā palāyīti. Taṃ sutvā satthā ‘‘bhikkhave, kassapassa evarūpena bālena saddhiṃ caraṇato ekacariyāva seyyo’’ti vatvā imaṃ dhammapade gāthamāha –
‘‘жаран̃жз наад̇хиг̇ажчзяяа, сзяяам̣ сад̣̇исамад̇д̇ано;
‘‘Carañce nādhigaccheyya, seyyaṃ sadisamattano;
згажарияам̣ д̣̇ал̣хам̣ гаяираа, над̇т̇и б̣аалз сахааяад̇аа’’д̇и. (д̇ха. ба. 61);
Ekacariyaṃ daḷhaṃ kayirā, natthi bāle sahāyatā’’ti. (dha. pa. 61);
ид̣̇ан̃жа бана вад̇ваа буна д̇з бхигкуу ааманд̇зд̇ваа ‘‘на, бхигкавз, ид̣̇аанзва со гудид̣̇уусаго, буб̣б̣зби гудид̣̇уусагоязва, на жа ид̣̇аанзва оваад̣̇ад̣̇ааяагасса гуж̇жхад̇и, буб̣б̣зби гуж̇жхиязваа’’д̇и вад̇ваа д̇зхи яаажид̇о ад̇ийд̇ам̣ аахари.
Idañca pana vatvā puna te bhikkhū āmantetvā ‘‘na, bhikkhave, idāneva so kuṭidūsako, pubbepi kuṭidūsakoyeva, na ca idāneva ovādadāyakassa kujjhati, pubbepi kujjhiyevā’’ti vatvā tehi yācito atītaṃ āhari.
ад̇ийд̇з б̣аараан̣асияам̣ б̣рахмад̣̇ад̇д̇з раж̇ж̇ам̣ гаарзнд̇з б̣од̇хисад̇д̇о син̇г̇иласагун̣аяонияам̣ ниб̣б̣ад̇д̇ид̇ваа ваяаббад̇д̇о ад̇д̇ано манаабам̣ ановассагам̣ гулаавагам̣ гад̇ваа химаванд̇абад̣̇зсз васад̇и. ат̇зго маггадо вассагаалз ажчиннад̇хаарз д̣̇звз вассанд̇з сийд̇абийл̣ид̇о д̣̇анд̇з каад̣̇анд̇о б̣од̇хисад̇д̇асса авид̣̇уурз нисийд̣̇и. б̣од̇хисад̇д̇о д̇ам̣ д̇ат̇аа гиламанд̇ам̣ д̣̇исваа д̇зна сад̣̇д̇хим̣ саллабанд̇о батамам̣ г̇аат̇амааха –
Atīte bārāṇasiyaṃ brahmadatte rajjaṃ kārente bodhisatto siṅgilasakuṇayoniyaṃ nibbattitvā vayappatto attano manāpaṃ anovassakaṃ kulāvakaṃ katvā himavantapadese vasati. Atheko makkaṭo vassakāle acchinnadhāre deve vassante sītapīḷito dante khādanto bodhisattassa avidūre nisīdi. Bodhisatto taṃ tathā kilamantaṃ disvā tena saddhiṃ sallapanto paṭhamaṃ gāthamāha –
81.
81.
‘‘мануссассзва д̇з сийсам̣, хад̇т̇абаад̣̇аа жа ваанара;
‘‘Manussasseva te sīsaṃ, hatthapādā ca vānara;
ат̇а гзна ну ван̣н̣зна, аг̇аарам̣ д̇з на виж̇ж̇ад̇ий’’д̇и.
Atha kena nu vaṇṇena, agāraṃ te na vijjatī’’ti.
д̇ад̇т̇а ван̣н̣знаад̇и гааран̣зна. аг̇ааранд̇и д̇ава ниваасаг̇зхам̣ гзна гааран̣зна над̇т̇ийд̇и бужчи.
Tattha vaṇṇenāti kāraṇena. Agāranti tava nivāsagehaṃ kena kāraṇena natthīti pucchi.
д̇ам̣ суд̇ваа ваанаро д̣̇уд̇ияам̣ г̇аат̇амааха –
Taṃ sutvā vānaro dutiyaṃ gāthamāha –
82.
82.
‘‘мануссассзва мз сийсам̣, хад̇т̇абаад̣̇аа жа син̇г̇ила;
‘‘Manussasseva me sīsaṃ, hatthapādā ca siṅgila;
яааху сздтаа мануссзсу, саа мз бан̃н̃аа на виж̇ж̇ад̇ий’’д̇и.
Yāhu seṭṭhā manussesu, sā me paññā na vijjatī’’ti.
д̇ад̇т̇а син̇г̇илаад̇и д̇ам̣ сагун̣ам̣ наамзнаалабад̇и. яааху сздтаа мануссзсууд̇и яаа мануссзсу сздтаад̇и гат̇знд̇и, саа мама вижааран̣абан̃н̃аа над̇т̇и. сийсахад̇т̇абаад̣̇агааяаб̣алаани хи логз аббамаан̣ам̣, вижааран̣абан̃н̃аава сздтаа, саа мама над̇т̇и, д̇асмаа мз аг̇аарам̣ на виж̇ж̇ад̇ийд̇и.
Tattha siṅgilāti taṃ sakuṇaṃ nāmenālapati. Yāhu seṭṭhā manussesūti yā manussesu seṭṭhāti kathenti, sā mama vicāraṇapaññā natthi. Sīsahatthapādakāyabalāni hi loke appamāṇaṃ, vicāraṇapaññāva seṭṭhā, sā mama natthi, tasmā me agāraṃ na vijjatīti.
д̇ам̣ суд̇ваа б̣од̇хисад̇д̇о ид̇арам̣ г̇аат̇аад̣̇ваяамааха –
Taṃ sutvā bodhisatto itaraṃ gāthādvayamāha –
83.
83.
‘‘анавадтид̇ажид̇д̇асса, лахужид̇д̇асса д̣̇уб̣бхино;
‘‘Anavaṭṭhitacittassa, lahucittassa dubbhino;
нижжам̣ ад̣̇д̇хувасийласса, сукабхааво на виж̇ж̇ад̇и.
Niccaṃ addhuvasīlassa, sukhabhāvo na vijjati.
84.
84.
‘‘со гарассу аанубхаавам̣, вийд̇ивад̇д̇ассу сийлияам̣;
‘‘So karassu ānubhāvaṃ, vītivattassu sīliyaṃ;
сийд̇аваад̇абарид̇д̇аан̣ам̣, гарассу гудавам̣ габий’’д̇и.
Sītavātaparittāṇaṃ, karassu kuṭavaṃ kapī’’ti.
д̇ад̇т̇а анавадтид̇ажид̇д̇ассаад̇и аббад̇идтид̇ажид̇д̇асса. д̣̇уб̣бхинод̇и мид̇д̇ад̣̇уб̣бхисса. ад̣̇д̇хувасийлассаад̇и на саб̣б̣агаалам̣ сийларагкагасса. со гарассу аанубхааванд̇и со д̇вам̣ самма маггада бан̃н̃ааяа уббаад̣̇анад̇т̇ам̣ аанубхаавам̣ б̣алам̣ убааяам̣ гарохи. вийд̇ивад̇д̇ассу сийлияанд̇и ад̇д̇ано д̣̇уссийлабхаавасан̇каад̇ам̣ сийлияам̣ ад̇иггамид̇ваа сийлаваа ход̇и. гудавам̣ габийд̇и сийд̇аваад̇асса барид̇д̇аан̣асамад̇т̇ам̣ ад̇д̇ано гудавам̣ гулаавагам̣ згам̣ васанааг̇аарагам̣ гарохийд̇и.
Tattha anavaṭṭhitacittassāti appatiṭṭhitacittassa. Dubbhinoti mittadubbhissa. Addhuvasīlassāti na sabbakālaṃ sīlarakkhakassa. So karassu ānubhāvanti so tvaṃ samma makkaṭa paññāya uppādanatthaṃ ānubhāvaṃ balaṃ upāyaṃ karohi. Vītivattassu sīliyanti attano dussīlabhāvasaṅkhātaṃ sīliyaṃ atikkamitvā sīlavā hoti. Kuṭavaṃ kapīti sītavātassa parittāṇasamatthaṃ attano kuṭavaṃ kulāvakaṃ ekaṃ vasanāgārakaṃ karohīti.
маггадо жинд̇зси ‘‘аяам̣ д̇аава ад̇д̇ано ановассагадтаанз нисиннабхаавзна мам̣ барибхаасад̇и, на нисийд̣̇аабзссаами нам̣ имасмим̣ гулаавагз’’д̇и. д̇ад̇о б̣од̇хисад̇д̇ам̣ г̇ан̣хид̇угаамо багканд̣̇и, б̣од̇хисад̇д̇о уббад̇ид̇ваа ан̃н̃ад̇т̇а г̇ад̇о. маггадо гулаавагам̣ вид̣̇д̇хам̣сзд̇ваа жун̣н̣авижун̣н̣ам̣ гад̇ваа баггаами.
Makkaṭo cintesi ‘‘ayaṃ tāva attano anovassakaṭṭhāne nisinnabhāvena maṃ paribhāsati, na nisīdāpessāmi naṃ imasmiṃ kulāvake’’ti. Tato bodhisattaṃ gaṇhitukāmo pakkhandi, bodhisatto uppatitvā aññattha gato. Makkaṭo kulāvakaṃ viddhaṃsetvā cuṇṇavicuṇṇaṃ katvā pakkāmi.
сад̇т̇аа имам̣ д̇хаммад̣̇зсанам̣ аахарид̇ваа ж̇аад̇агам̣ самод̇хаанзси – ‘‘д̇ад̣̇аа маггадо гудижхаабаго ахоси, син̇г̇иласагун̣о бана ахамзва ахоси’’нд̇и.
Satthā imaṃ dhammadesanaṃ āharitvā jātakaṃ samodhānesi – ‘‘tadā makkaṭo kuṭijhāpako ahosi, siṅgilasakuṇo pana ahameva ahosi’’nti.
гудид̣̇уусагаж̇аад̇агаван̣н̣анаа батамаа.
Kuṭidūsakajātakavaṇṇanā paṭhamā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / ж̇аад̇агабаал̣и • Jātakapāḷi / 321. гудид̣̇уусагаж̇аад̇агам̣ • 321. Kuṭidūsakajātakaṃ
