| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
6. குடிகாரஸிக்கா²பத³வண்ணனா
6. Kuṭikārasikkhāpadavaṇṇanā
ஸஞ்ஞாசிகாய பனாதி எத்த² ஸந்தி அத்தவாசகோ ததியத்தே² நிபாதோ, யாசிகாதி பா⁴வஸாத⁴னோ, தேஸஞ்ச மஜ்ஜே²பத³லோபஸமாஸோ. பனாதி நிபாதமத்தமேவ. தேனாஹ ‘‘ஸயங் பவத்திதயாசனா வுச்சதீ’’தி. யா ஹி அத்தனா பவத்திதா, ஸா அத்தனோ நாம ஹோதீதி ஆஹ ‘‘தஸ்மா’’திஆதி³. நனு ந ஸக்கா யாசனாயேவ குடிங் காதுந்தி அனுயோக³ங் ஸந்தா⁴ய தஸ்ஸாதி⁴ப்பாயத்த²ங் த³ஸ்ஸேதுங் ‘‘ஸயங் யாசிதகேஹீ’’திஆதி³மாஹ. தத்த² ஸயங் யாசிதகேஹீதி ‘‘வாஸிங் தே³த², ப²ரஸுங் தே³தா²’’திஆதி³னா (பாரா॰ 342) ஸயங் யாசிதகேஹி. உபகரணேஹீதி வாஸியாதீ³ஹி. பரேன ப⁴ண்ட³ஸாமிகேன ‘‘மம இத³’’ந்தி அபரிச்சாகா³ரக்க²ணகோ³பனவஸேன பரிக்³க³ஹிதங் பரபரிக்³க³ஹிதகங், பரஸந்தகந்தி வுத்தங் ஹோதி. மூலச்சே²த³வஸேனாதி மூலஸ்ஸ சி²ந்த³னவஸேன, பரஸந்தகபா⁴வதோ மோசெத்வா அத்தனோ ஸந்தகங் கத்வாதி வுத்தங் ஹோதி. ஏவஞ்ஹி அஞ்ஞாதகஅப்பவாரிதட்டா²னதோ யாசந்தஸ்ஸ அஞ்ஞாதகவிஞ்ஞத்தியா து³க்கடங். தாவகாலிகங் பன வட்டதீதி தாவகாலிகங் கத்வா யாசிதுங் வட்டதி. ஸககம்மங் ந யாசிதப்³பா³தி பாணாதிபாதஸிக்கா²பத³ரக்க²ணத்த²ங் வுத்தங். ‘‘ஹத்த²கம்மங் தே³தா²’’தி அனியமெத்வாபி ந யாசிதப்³பா³. ஏவங் யாசிதா ஹி தே ‘‘ஸாது⁴, ப⁴ந்தே’’தி பி⁴க்கு²ங் உய்யோஜெத்வா மிகே³பி மாரெத்வா ஆஹரெய்யுங். நியமெத்வா பன ‘‘விஹாரே கிஞ்சி கத்தப்³ப³ங் அத்தி², தத்த² ஹத்த²கம்மங் தே³தா²’’தி யாசிதப்³பா³. ‘‘குடி நாம உல்லித்தா வா ஹோதி, அவலித்தா வா உல்லித்தாவலித்தா வா’’தி (பாரா॰ 345) பத³பா⁴ஜனே வுத்தத்தா ‘‘குடிந்தி உல்லித்தாதீ³ஸு அஞ்ஞதர’’ந்தி வுத்தங். தத்த² உத்³த⁴ங் முக²ங் லித்தா உல்லித்தா. அந்தோ லிம்பந்தா ஹி ஏவங் லிம்பந்தி. அதோ⁴ முக²ங் லித்தா அவலித்தா. ப³ஹி லிம்பந்தா ஹி ஏவங் லிம்பந்தி. தேனாஹ ‘‘தத்த² உல்லித்தா நாமா’’திஆதி³. பிட்ட²ஸங்கா⁴டோதி த்³வாரபா³ஹா. ‘‘ஸுதா⁴ய வா மத்திகாய வா’’தி ஏதேன ட²பெத்வா இமே த்³வே லேபே அவஸேஸோ ப⁴ஸ்மாகோ³மயாதி³பே⁴தோ³ அலேபோதி த³ஸ்ஸேதி.
Saññācikāyapanāti ettha santi attavācako tatiyatthe nipāto, yācikāti bhāvasādhano, tesañca majjhepadalopasamāso. Panāti nipātamattameva. Tenāha ‘‘sayaṃ pavattitayācanā vuccatī’’ti. Yā hi attanā pavattitā, sā attano nāma hotīti āha ‘‘tasmā’’tiādi. Nanu na sakkā yācanāyeva kuṭiṃ kātunti anuyogaṃ sandhāya tassādhippāyatthaṃ dassetuṃ ‘‘sayaṃ yācitakehī’’tiādimāha. Tattha sayaṃ yācitakehīti ‘‘vāsiṃ detha, pharasuṃ dethā’’tiādinā (pārā. 342) sayaṃ yācitakehi. Upakaraṇehīti vāsiyādīhi. Parena bhaṇḍasāmikena ‘‘mama ida’’nti apariccāgārakkhaṇagopanavasena pariggahitaṃ parapariggahitakaṃ, parasantakanti vuttaṃ hoti. Mūlacchedavasenāti mūlassa chindanavasena, parasantakabhāvato mocetvā attano santakaṃ katvāti vuttaṃ hoti. Evañhi aññātakaappavāritaṭṭhānato yācantassa aññātakaviññattiyā dukkaṭaṃ. Tāvakālikaṃ pana vaṭṭatīti tāvakālikaṃ katvā yācituṃ vaṭṭati. Sakakammaṃ na yācitabbāti pāṇātipātasikkhāpadarakkhaṇatthaṃ vuttaṃ. ‘‘Hatthakammaṃ dethā’’ti aniyametvāpi na yācitabbā. Evaṃ yācitā hi te ‘‘sādhu, bhante’’ti bhikkhuṃ uyyojetvā migepi māretvā āhareyyuṃ. Niyametvā pana ‘‘vihāre kiñci kattabbaṃ atthi, tattha hatthakammaṃ dethā’’ti yācitabbā. ‘‘Kuṭi nāma ullittā vā hoti, avalittā vā ullittāvalittā vā’’ti (pārā. 345) padabhājane vuttattā ‘‘kuṭinti ullittādīsu aññatara’’nti vuttaṃ. Tattha uddhaṃ mukhaṃ littā ullittā. Anto limpantā hi evaṃ limpanti. Adho mukhaṃ littā avalittā. Bahi limpantā hi evaṃ limpanti. Tenāha ‘‘tattha ullittā nāmā’’tiādi. Piṭṭhasaṅghāṭoti dvārabāhā. ‘‘Sudhāya vā mattikāya vā’’ti etena ṭhapetvā ime dve lepe avaseso bhasmāgomayādibhedo alepoti dasseti.
யஸ்மா பன ஸஞ்ஞாசிகாய குடிங் கரொந்தேனாபி இத⁴ வுத்தனயேனேவ படிபஜ்ஜிதப்³ப³ங், தஸ்மா ‘‘ஸயங் வா கரொந்தேன ஆணத்தியா வா காராபெந்தேனா’’தி வுத்தங். எத்த² ச ‘‘ஸயங் வா கரொந்தேனா’’தி இமினா ஸாமத்தி²யதோ லப்³ப⁴மானமத்த²மாஹ, ந து பத³த்த²தோ. ‘‘ஆணத்தியா வா காராபெந்தேனா’’தி (பாரா॰ அட்ட²॰ 2.348-349) பன பத³த்த²தோ. ஏவஞ்ச கத்வா யதி³ பன ‘‘கரொந்தேன வா காராபெந்தேன வா’’தி வதெ³ய்ய, ப்³யஞ்ஜனங் விலோமிதங் ப⁴வெய்ய. ந ஹி காராபெந்தோ கரொந்தோ நாம ஹோதீதி ஏதி³ஸீ சோத³னா அனவகாஸாதி த³ட்ட²ப்³ப³ங். நத்தி² ஸாமீ பதி ஏதிஸ்ஸாதி அஸாமிகா, தங் அஸாமிகங், அனிஸ்ஸரந்தி அத்தோ². அனிஸ்ஸரதா செத்த² காராபனேனாதி ஆஹ ‘‘காரேதா தா³யகேன விரஹித’’ந்தி. உத்³தே³ஸோதி உத்³தி³ஸிதப்³போ³.
Yasmā pana saññācikāya kuṭiṃ karontenāpi idha vuttanayeneva paṭipajjitabbaṃ, tasmā ‘‘sayaṃ vā karontena āṇattiyā vā kārāpentenā’’ti vuttaṃ. Ettha ca ‘‘sayaṃ vā karontenā’’ti iminā sāmatthiyato labbhamānamatthamāha, na tu padatthato. ‘‘Āṇattiyā vā kārāpentenā’’ti (pārā. aṭṭha. 2.348-349) pana padatthato. Evañca katvā yadi pana ‘‘karontena vā kārāpentena vā’’ti vadeyya, byañjanaṃ vilomitaṃ bhaveyya. Na hi kārāpento karonto nāma hotīti edisī codanā anavakāsāti daṭṭhabbaṃ. Natthi sāmī pati etissāti asāmikā, taṃ asāmikaṃ, anissaranti attho. Anissaratā cettha kārāpanenāti āha ‘‘kāretā dāyakena virahita’’nti. Uddesoti uddisitabbo.
தத்ராதி ஸாமிஸ்மிங் பு⁴ம்மவசனந்தி ஆஹ ‘‘தஸ்ஸா குடியா’’தி. தீ³க⁴ஸோதி நிஸ்ஸக்கவசனந்தி ஆஹ ‘‘தீ³க⁴தோ’’தி. ப³ஹிகுட்டேதி குட்டஸ்ஸ ப³ஹி, து²ஸேன மிஸ்ஸகோ பிண்டோ³ து²ஸபிண்டோ³, தஸ்ஸ பரியந்தோ து²ஸபிண்ட³பரியந்தோ, தேன, து²ஸமிஸ்ஸகமத்திகாபிண்ட³பரியந்தேனாதி வுத்தங் ஹோதி. து²ஸபிண்ட³ஸ்ஸூபரி ஸேதகம்மங் பன அப்³போ³ஹாரிகங். அப்³ப⁴ந்தரே ப⁴வோ அப்³ப⁴ந்தரிமோ, தேன. யத்தா²தி யஸ்ஸங் குடியங். பமாணயுத்தோதி பகதிவித³த்தி²யா நவவித³த்தி²பமாணோ. ‘‘திரியங் ஸத்தந்தரா’’தி (பாரா॰ 348) உக்கங்ஸதோ பமாணஸ்ஸ வுத்தத்தா ‘‘ஹெட்டி²மகோடியா சதுஹத்த²வித்தா²ரா ந ஹோதீ’’தி வுத்தங்.
Tatrāti sāmismiṃ bhummavacananti āha ‘‘tassā kuṭiyā’’ti. Dīghasoti nissakkavacananti āha ‘‘dīghato’’ti. Bahikuṭṭeti kuṭṭassa bahi, thusena missako piṇḍo thusapiṇḍo, tassa pariyanto thusapiṇḍapariyanto, tena, thusamissakamattikāpiṇḍapariyantenāti vuttaṃ hoti. Thusapiṇḍassūpari setakammaṃ pana abbohārikaṃ. Abbhantare bhavo abbhantarimo, tena. Yatthāti yassaṃ kuṭiyaṃ. Pamāṇayuttoti pakatividatthiyā navavidatthipamāṇo. ‘‘Tiriyaṃ sattantarā’’ti (pārā. 348) ukkaṃsato pamāṇassa vuttattā ‘‘heṭṭhimakoṭiyā catuhatthavitthārā na hotī’’ti vuttaṃ.
ஸோதெ⁴த்வாதி ஸமதலஸீமமண்ட³லஸதி³ஸங் கத்வா. பத³பா⁴ஜனே வுத்தனயேன ஸங்க⁴ங் திக்க²த்துங் யாசித்வாதி ‘‘ஸங்க⁴ங் உபஸங்கமித்வா ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ ‘அஹங், ப⁴ந்தே, ஸஞ்ஞாசிகாய குடிங் கத்துகாமோ அஸாமிகங் அத்துத்³தே³ஸங், ஸோஹங், ப⁴ந்தே, ஸங்க⁴ங் குடிவத்து²ஓலோகனங் யாசாமீ’’’தி (பாரா॰ 349) பத³பா⁴ஜனே வுத்தனயேன திக்க²த்துங் யாசித்வா. ஸங்கே⁴ன வா ஸம்மதாதி பத³பா⁴ஜனியங் (பாரா॰ 350) வுத்தேன ஞத்திது³தியகம்மேன, அபலோகனகம்மவஸேன வா ஸங்கே⁴ன ஸம்மதா. வத்தூ²தி குடிவத்து². அனாரம்ப⁴ந்தி அனுபத்³த³வங். பரிதோ கமதி க³ச்ச²தி எத்தா²தி பரிக்கமனங், தேன ஸஹ வத்ததீதி ஸபரிக்கமனங், ஸஉபசாரந்தி அத்தோ². தேனாஹ ‘‘தேஹி பி⁴க்கூ²ஹீ’’திஆதி³.
Sodhetvāti samatalasīmamaṇḍalasadisaṃ katvā. Padabhājane vuttanayena saṅghaṃ tikkhattuṃ yācitvāti ‘‘saṅghaṃ upasaṅkamitvā ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo ‘ahaṃ, bhante, saññācikāya kuṭiṃ kattukāmo asāmikaṃ attuddesaṃ, sohaṃ, bhante, saṅghaṃ kuṭivatthuolokanaṃ yācāmī’’’ti (pārā. 349) padabhājane vuttanayena tikkhattuṃ yācitvā. Saṅghena vā sammatāti padabhājaniyaṃ (pārā. 350) vuttena ñattidutiyakammena, apalokanakammavasena vā saṅghena sammatā. Vatthūti kuṭivatthu. Anārambhanti anupaddavaṃ. Parito kamati gacchati etthāti parikkamanaṃ, tena saha vattatīti saparikkamanaṃ, saupacāranti attho. Tenāha ‘‘tehi bhikkhūhī’’tiādi.
கிபில்லிகாதீ³னந்தி எத்த² கிபில்லிகா (பாரா॰ அட்ட²॰ 2.353) நாம ரத்தகாளபிங்க³லாதி³பே⁴தா³ யா காசி, தா ஆதி³ யேஸங் தானி கிபில்லிகாதீ³னி, தேஸங். ஆதி³ஸத்³தே³ன உபசிகாதீ³னங் ஸங்க³ஹணங். ஆஸயோதி நிப³த்³த⁴வஸனட்டா²னங், ஸோ ஆதி³ யேஸங் தே ஆஸயாத³யோ, தேஹி. ஆதி³ஸத்³தே³ன செத்த² நிஸ்ஸிதஸ்ஸ க³ஹணங். ஸோளஸஹி உபத்³த³வேஹீதி ‘‘கிபில்லிகானங் வா ஆஸயோ ஹோதி, உபசிகானங் வா உந்தூ³ரானங் வா அஹீனங் வா விச்சி²கானங் வா ஸதபதீ³னங் வா ஹத்தீ²னங் வா அஸ்ஸானங் வா ஸீஹானங் வா ப்³யக்³கா⁴னங் வா தீ³பீனங் வா அச்சா²னங் வா தரச்சா²னங் வா யேஸங் கேஸஞ்சி திரச்சா²னக³தானங் பாணானங் வா ஆஸயோ ஹோதி, புப்³ப³ண்ணனிஸ்ஸிதங் வா ஹோதி, அபரண்ணஅப்³பா⁴கா⁴தஆகா⁴தனஸுஸானஉய்யானராஜவத்து²ஹத்தி²ஸாலாஅஸ்ஸஸாலாப³ந்த⁴னாகா³ரபானாகா³ரஸூனரச்சா²சச்சரஸபா⁴ஸங்ஸரணனிஸ்ஸிதங் வா ஹோதீ’’தி (பாரா॰ 353) ஏவங் வுத்தேஹி ஸோளஸஹி உபத்³த³வேஹி. தத்த² ச அப்³பா⁴கா⁴தங் (பாரா॰ அட்ட²॰ 2.353) நாம காரணாக⁴ரங். ஆகா⁴தனங் நாம த⁴ம்மக³ந்தி⁴கா. ஸுஸானந்தி மஹாஸுஸானங். ஸங்ஸரணங் நாம அனிப்³பி³ஜ்ஜ²க³மனீயோ க³தபச்சாக³தமக்³கோ³.
Kipillikādīnanti ettha kipillikā (pārā. aṭṭha. 2.353) nāma rattakāḷapiṅgalādibhedā yā kāci, tā ādi yesaṃ tāni kipillikādīni, tesaṃ. Ādisaddena upacikādīnaṃ saṅgahaṇaṃ. Āsayoti nibaddhavasanaṭṭhānaṃ, so ādi yesaṃ te āsayādayo, tehi. Ādisaddena cettha nissitassa gahaṇaṃ. Soḷasahi upaddavehīti ‘‘kipillikānaṃ vā āsayo hoti, upacikānaṃ vā undūrānaṃ vā ahīnaṃ vā vicchikānaṃ vā satapadīnaṃ vā hatthīnaṃ vā assānaṃ vā sīhānaṃ vā byagghānaṃ vā dīpīnaṃ vā acchānaṃ vā taracchānaṃ vā yesaṃ kesañci tiracchānagatānaṃ pāṇānaṃ vā āsayo hoti, pubbaṇṇanissitaṃ vā hoti, aparaṇṇaabbhāghātaāghātanasusānauyyānarājavatthuhatthisālāassasālābandhanāgārapānāgārasūnaracchācaccarasabhāsaṃsaraṇanissitaṃ vā hotī’’ti (pārā. 353) evaṃ vuttehi soḷasahi upaddavehi. Tattha ca abbhāghātaṃ (pārā. aṭṭha. 2.353) nāma kāraṇāgharaṃ. Āghātanaṃ nāma dhammagandhikā. Susānanti mahāsusānaṃ. Saṃsaraṇaṃ nāma anibbijjhagamanīyo gatapaccāgatamaggo.
ஆவிஜ்ஜி²துங் ஸக்குணெய்யதாயாதி சி²ன்னதடாதீ³னமபா⁴வதோ அனுபரியாயிதுங் ஸக்குணெய்யதாய. தேன பி⁴க்கு²னாதி குடிகாரகேன பி⁴க்கு²னா. யாசிதேஹீதி ‘‘ஏகங்ஸங் உத்தராஸங்க³ங் கரித்வா வுட்³டா⁴னங் பி⁴க்கூ²னங் பாதே³ வந்தி³த்வா உக்குடிகங் நிஸீதி³த்வா அஞ்ஜலிங் பக்³க³ஹெத்வா ஏவமஸ்ஸ வசனீயோ ‘அஹங், ப⁴ந்தே, ஸஞ்ஞாசிகாய குடிங் கத்துகாமோ அஸாமிகங் அத்துத்³தே³ஸங், ஸோஹங், ப⁴ந்தே, ஸங்க⁴ங் குடிவத்து²தே³ஸனங் யாசாமீ’’’தி (பாரா॰ 351) திக்க²த்துங் யாசிதேஹி. ஞத்திது³தியேன கம்மேனாதி –
Āvijjhituṃ sakkuṇeyyatāyāti chinnataṭādīnamabhāvato anupariyāyituṃ sakkuṇeyyatāya. Tena bhikkhunāti kuṭikārakena bhikkhunā. Yācitehīti ‘‘ekaṃsaṃ uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ nisīditvā añjaliṃ paggahetvā evamassa vacanīyo ‘ahaṃ, bhante, saññācikāya kuṭiṃ kattukāmo asāmikaṃ attuddesaṃ, sohaṃ, bhante, saṅghaṃ kuṭivatthudesanaṃ yācāmī’’’ti (pārā. 351) tikkhattuṃ yācitehi. Ñattidutiyena kammenāti –
‘‘ஸுணாது மே, ப⁴ந்தே, ஸங்கோ⁴, அயங் இத்த²ன்னாமோ பி⁴க்கு² ஸஞ்ஞாசிகாய குடிங் கத்துகாமோ அஸாமிகங் அத்துத்³தே³ஸங், ஸோ ஸங்க⁴ங் குடிவத்து²தே³ஸனங் யாசதி. யதி³ ஸங்க⁴ஸ்ஸ பத்தகல்லங், ஸங்கோ⁴ இத்த²ன்னாமஸ்ஸ பி⁴க்கு²னோ குடிவத்து²ங் தே³ஸெய்ய. ஏஸா ஞத்தி. ஸுணாது மே, ப⁴ந்தே, ஸங்கோ⁴, அயங் இத்த²ன்னாமோ பி⁴க்கு² ஸஞ்ஞாசிகாய குடிங் கத்துகாமோ அஸாமிகங் அத்துத்³தே³ஸங், ஸோ ஸங்க⁴ங் குடிவத்து²தே³ஸனங் யாசதி. ஸங்கோ⁴ இத்த²ன்னாமஸ்ஸ பி⁴க்கு²னோ குடிவத்து²ங் தே³ஸேதி, யஸ்ஸாயஸ்மதோ க²மதி இத்த²ன்னாமஸ்ஸ பி⁴க்கு²னோ குடிவத்து²ஸ்ஸ தே³ஸனா, ஸோ துண்ஹஸ்ஸ. யஸ்ஸ நக்க²மதி, ஸோ பா⁴ஸெய்ய. தே³ஸிதங் ஸங்கே⁴ன இத்த²ன்னாமஸ்ஸ பி⁴க்கு²னோ குடிவத்து², க²மதி ஸங்க⁴ஸ்ஸ, தஸ்மா துண்ஹீ, ஏவமேதங் தா⁴ரயாமீ’’தி –
‘‘Suṇātu me, bhante, saṅgho, ayaṃ itthannāmo bhikkhu saññācikāya kuṭiṃ kattukāmo asāmikaṃ attuddesaṃ, so saṅghaṃ kuṭivatthudesanaṃ yācati. Yadi saṅghassa pattakallaṃ, saṅgho itthannāmassa bhikkhuno kuṭivatthuṃ deseyya. Esā ñatti. Suṇātu me, bhante, saṅgho, ayaṃ itthannāmo bhikkhu saññācikāya kuṭiṃ kattukāmo asāmikaṃ attuddesaṃ, so saṅghaṃ kuṭivatthudesanaṃ yācati. Saṅgho itthannāmassa bhikkhuno kuṭivatthuṃ deseti, yassāyasmato khamati itthannāmassa bhikkhuno kuṭivatthussa desanā, so tuṇhassa. Yassa nakkhamati, so bhāseyya. Desitaṃ saṅghena itthannāmassa bhikkhuno kuṭivatthu, khamati saṅghassa, tasmā tuṇhī, evametaṃ dhārayāmī’’ti –
ஏவங் பத³பா⁴ஜனே வுத்தேன ஞத்திது³தியேன கம்மேன. ஆளவிகா நாம ஆளவிரட்டே² ஜாதா தா³ரகா, தே பப்³ப³ஜிதகாலேபி ‘‘ஆளவிகா’’த்வேவ பஞ்ஞாயிங்ஸு. தே ஸந்தா⁴ய வுத்தங் ஆளவிகே பி⁴க்கூ²’’தி. லேபே க⁴டிதேதி (பாரா॰ அட்ட²॰ 2.353) அந்தோலேபே வா அந்தோலேபேன ஸத்³தி⁴ங் பி⁴த்திஞ்ச ச²த³னஞ்ச ஏகாப³த்³த⁴ங் கத்வா க⁴டிதே, ப³ஹிலேபே வா ப³ஹிலேபேன ஸத்³தி⁴ங் க⁴டிதே. த்³வே ச து³க்கடானி ஸாரம்ப⁴அபரிக்கமனவஸேன. உப⁴யவிபன்னாதி உப⁴யேஹி தே³ஸனாபமாணேஹி விபன்னா விரஹிதா உப⁴யவிபன்னா, அதே³ஸிதவத்து²கா பமாணாதிக்கந்தாதி அத்தோ². தஸ்மிந்தி த்³வாரப³ந்தே⁴ வா வாதபானே வா. லேபோ ந க⁴டியதீதி புப்³பே³ தி³ன்னலேபோ த்³வாரப³ந்தே⁴ன வா வாதபானேன வா ஸத்³தி⁴ங் ந க⁴டியதி, ஏகாப³த்³த⁴ங் ஹுத்வா ந திட்ட²தீதி வுத்தங் ஹோதி. தந்தி த்³வாரப³ந்த⁴ங் வா வாதபானங் வா பராமஸதி. பட²மமேவாதி லேபகிச்சஸ்ஸ நிட்டி²தத்தா த்³வாரப³ந்த⁴வாதபானானங் ட²பனதோ புப்³பே³யேவ, லேபஸ்ஸ நிட்டி²தக்க²ணேயேவாதி அதி⁴ப்பாயோ. ‘‘பி⁴க்கு² குடிங் கரோதி தே³ஸிதவத்து²கங் பமாணிகங் ஸாரம்ப⁴ங் ஸபரிக்கமனங், ஆபத்தி து³க்கடஸ்ஸ. பி⁴க்கு² குடிங் கரோதி தே³ஸிதவத்து²கங் பமாணிகங் அனாரம்ப⁴ங் அபரிக்கமனங், ஆபத்தி து³க்கடஸ்ஸா’’தி (பாரா॰ 355) பத³பா⁴ஜனியங் வுத்தத்தா ‘‘கேவலங் ஸாரம்பா⁴யா’’திஆதி³ வுத்தங். விப்பகதந்தி அனிட்டி²தங். அஞ்ஞஸ்ஸ த³த³தோ சாதி அஞ்ஞஸ்ஸ புக்³க³லஸ்ஸ வா ஸங்க⁴ஸ்ஸ வா த³த³தோ ச. கு³ஹா நாம இட்ட²ககு³ஹா வா ஸிலாகு³ஹா வா தா³ருகு³ஹா வா பூ⁴மிகு³ஹா வா. திணகுடி நாம ஸத்தபூ⁴மிகோபி பாஸாதோ³ திணச்ச²த³னோ ‘‘திணகுடிகா’’தி வுச்சதி. அஞ்ஞஸ்ஸாதி ஆசரியஸ்ஸ வா உபஜ்ஜா²யஸ்ஸ வா ஸங்க⁴ஸ்ஸ வா. வாஸாகா³ரங் ட²பெத்வாதி (பாரா॰ அட்ட²॰ 2.364) அத்தனோ வஸனத்தா²ய வாஸாகா³ரங் ட²பெத்வா. உபோஸதா²கா³ராதீ³ஸூதி எத்த² ஆதி³ஸத்³தே³ன ஜந்தாக⁴ரபோ⁴ஜனஸாலாஅக்³கி³ஸாலானங் க³ஹணங். ஹெட்டி²மபமாணஸம்ப⁴வோதி சதுஹத்த²வித்தி²ண்ணதா. அதே³ஸாபெத்வா கரோதோதி வத்து²ங் அதே³ஸாபெத்வா பமாணாதிக்கந்தங், பமாணயுத்தங் வா கரோதோ. எத்த² ச வத்து²னோ அதே³ஸாபனங் அகிரியா. குடிகரணங் கிரியா.
Evaṃ padabhājane vuttena ñattidutiyena kammena. Āḷavikā nāma āḷaviraṭṭhe jātā dārakā, te pabbajitakālepi ‘‘āḷavikā’’tveva paññāyiṃsu. Te sandhāya vuttaṃ āḷavike bhikkhū’’ti. Lepe ghaṭiteti (pārā. aṭṭha. 2.353) antolepe vā antolepena saddhiṃ bhittiñca chadanañca ekābaddhaṃ katvā ghaṭite, bahilepe vā bahilepena saddhiṃ ghaṭite. Dve ca dukkaṭāni sārambhaaparikkamanavasena. Ubhayavipannāti ubhayehi desanāpamāṇehi vipannā virahitā ubhayavipannā, adesitavatthukā pamāṇātikkantāti attho. Tasminti dvārabandhe vā vātapāne vā. Lepo na ghaṭiyatīti pubbe dinnalepo dvārabandhena vā vātapānena vā saddhiṃ na ghaṭiyati, ekābaddhaṃ hutvā na tiṭṭhatīti vuttaṃ hoti. Tanti dvārabandhaṃ vā vātapānaṃ vā parāmasati. Paṭhamamevāti lepakiccassa niṭṭhitattā dvārabandhavātapānānaṃ ṭhapanato pubbeyeva, lepassa niṭṭhitakkhaṇeyevāti adhippāyo. ‘‘Bhikkhu kuṭiṃ karoti desitavatthukaṃ pamāṇikaṃ sārambhaṃ saparikkamanaṃ, āpatti dukkaṭassa. Bhikkhu kuṭiṃ karoti desitavatthukaṃ pamāṇikaṃ anārambhaṃ aparikkamanaṃ, āpatti dukkaṭassā’’ti (pārā. 355) padabhājaniyaṃ vuttattā ‘‘kevalaṃ sārambhāyā’’tiādi vuttaṃ. Vippakatanti aniṭṭhitaṃ. Aññassa dadato cāti aññassa puggalassa vā saṅghassa vā dadato ca. Guhā nāma iṭṭhakaguhā vā silāguhā vā dāruguhā vā bhūmiguhā vā. Tiṇakuṭi nāma sattabhūmikopi pāsādo tiṇacchadano ‘‘tiṇakuṭikā’’ti vuccati. Aññassāti ācariyassa vā upajjhāyassa vā saṅghassa vā. Vāsāgāraṃ ṭhapetvāti (pārā. aṭṭha. 2.364) attano vasanatthāya vāsāgāraṃ ṭhapetvā. Uposathāgārādīsūti ettha ādisaddena jantāgharabhojanasālāaggisālānaṃ gahaṇaṃ. Heṭṭhimapamāṇasambhavoti catuhatthavitthiṇṇatā. Adesāpetvā karototi vatthuṃ adesāpetvā pamāṇātikkantaṃ, pamāṇayuttaṃ vā karoto. Ettha ca vatthuno adesāpanaṃ akiriyā. Kuṭikaraṇaṃ kiriyā.
குடிகாரஸிக்கா²பத³வண்ணனா நிட்டி²தா.
Kuṭikārasikkhāpadavaṇṇanā niṭṭhitā.
