| Library / Tipiṭaka / திபிடக • Tipiṭaka / வஜிரபு³த்³தி⁴-டீகா • Vajirabuddhi-ṭīkā |
6. குடிகாரஸிக்கா²பத³வண்ணனா
6. Kuṭikārasikkhāpadavaṇṇanā
342. யாசனாதி ‘‘தே³த² தே³தா²’’தி சோத³னா. விஞ்ஞத்தீதி இமினா நோ அத்தோ²தி விஞ்ஞாபனா. ‘‘ஹத்த²கம்மங் யாசிதோ உபகரணங், மூலங் வா த³ஸ்ஸதீ’’தி யாசதி, ந வட்டதீதி. வட்டதி ஸேனாஸனே ஓபா⁴ஸபரிகதா²தீ³னங் லத்³த⁴த்தாதி ஏகே. அனஜ்ஜா²வுத்த²கந்தி அஸ்ஸாமிகங். ந ஆஹடங் பரிபு⁴ஞ்ஜிதப்³ப³ந்தி ‘‘ஸூபோத³னவிஞ்ஞத்திது³க்கடங் ஹோதீ’’தி வுத்தங். ‘‘கிஞ்சாபி க³ருப⁴ண்ட³ப்பஹோனகேஸூதி வுத்தங், ததா²பி யங் வத்து²வஸேன அப்பங் ஹுத்வா அக்³க⁴வஸேன மஹா ஹரிதாலஹிங்கு³லிகாதி³, தங் யாசிதுங் ந வட்டதீ’’தி வத³ந்தி.
342.Yācanāti ‘‘detha dethā’’ti codanā. Viññattīti iminā no atthoti viññāpanā. ‘‘Hatthakammaṃ yācito upakaraṇaṃ, mūlaṃ vā dassatī’’ti yācati, na vaṭṭatīti. Vaṭṭati senāsane obhāsaparikathādīnaṃ laddhattāti eke. Anajjhāvutthakanti assāmikaṃ. Na āhaṭaṃparibhuñjitabbanti ‘‘sūpodanaviññattidukkaṭaṃ hotī’’ti vuttaṃ. ‘‘Kiñcāpi garubhaṇḍappahonakesūti vuttaṃ, tathāpi yaṃ vatthuvasena appaṃ hutvā agghavasena mahā haritālahiṅgulikādi, taṃ yācituṃ na vaṭṭatī’’ti vadanti.
344. ஸோ கிராதி இஸி. ததா³ அஜ்ஜ²க³மா தத³ஜ்ஜ²க³மா.
344.So kirāti isi. Tadā ajjhagamā tadajjhagamā.
348-9. ந ஹி ஸக்கா யாசனாய காதுங், தஸ்மா ஸயங் யாசிதகேஹி உபகரணேஹீதி அதி⁴ப்பாயோ. ப்³யஞ்ஜனங் ஸமேதி, ந அத்தோ². கஸ்மா? இத⁴ உப⁴யேஸங் அதி⁴ப்பேதத்தா, தங் த³ஸ்ஸெந்தோ ‘‘யஸ்மா பனா’’திஆதி³மாஹ. இத⁴ வுத்தனயேனாதி இமஸ்மிங் ஸிக்கா²பத³விப⁴ங்கே³ வுத்தனயேன. ‘‘ஸஞ்ஞாசிகாயா’’தி வசனதோ கரொந்தேனாபி, ‘‘பரேஹி பரியோஸாபேதீ’’தி வசனதோ காராபெந்தேனாபி படிபஜ்ஜிதப்³ப³ங். உபோ⁴பேதே காரககாராபகா. ப்³யஞ்ஜனங் விலோமிதங் ப⁴வெய்ய, ‘‘காரயமானேனா’’தி ஹி ப்³யஞ்ஜனங் ‘‘கரொந்தேனா’’தி வுத்தே விலோமிதங் ஹோதி அதத³த்த²த்தா. ந ஹி காராபெந்தோ நாம ஹோதி. ‘‘இத⁴ வுத்தனயேனாதி தே³ஸிதவத்து²கபமாணிகனயேன. ஏவங் ஸந்தே ‘கரொந்தேன வா காராபெந்தேன வா’தி வசனதோ கரொந்தேனாபி பரேஹி விப்பகதங் வத்தப்³ப³ந்தி சே, தத³த்த²விஸ்ஸஜ்ஜனத்த²ங் ‘யதி³ பனாதிஆதி³மாஹா’’’தி அனுக³ண்டி²பதே³ வுத்தங். ‘‘ஸஞ்ஞாசிகாய குடிங் கரொந்தோ’’தி வசனவஸேன வுத்தங். ‘‘ஆயாமதோ ச வித்தா²ரதோ சா’’தி அவத்வா விகப்பத்த²ஸ்ஸ வா-ஸத்³த³ஸ்ஸ க³ஹிதத்தா ஏகதோபா⁴கே³பி வட்³டி⁴தே ஆபத்தி ஏவ. பமாணயுத்தமஞ்சோ கிர நவவித³த்தி². ‘‘‘சதுஹத்த²வித்தா²ரா’தி வசனேன ‘திரியங் திஹத்தா² வா’தி வசனம்பி ஸமேதி ‘யத்த² பமாணயுத்தோ’திஆதி³ஸன்னிட்டா²னவசனாஸம்ப⁴வதோ’’தி வுத்தங். பமாணதோ ஊனதரம்பீதி வித்தா²ரதோ சதுபஞ்சஹத்த²ம்பி தீ³க⁴தோ அனதிக்கமித்வா வுத்தபமாணமேவ தே³ஸிதவத்து². அதே³ஸிதவத்து²ஞ்ஹி கரோதோ ஆபத்தி. பமாணாதிக்கந்தா குடி ஏவ பமாணாதிக்கந்தங் குடிங் கரெய்யாதி வுத்தத்தா. ‘‘த²ம்ப⁴துலா’’தி பாடோ². அனுஸ்ஸாவனானயேனாதி எத்த² ‘‘த³மிளபா⁴ஸாயபி வட்டதீ’’தி வத³ந்தி.
348-9. Na hi sakkā yācanāya kātuṃ, tasmā sayaṃ yācitakehi upakaraṇehīti adhippāyo. Byañjanaṃ sameti, na attho. Kasmā? Idha ubhayesaṃ adhippetattā, taṃ dassento ‘‘yasmā panā’’tiādimāha. Idha vuttanayenāti imasmiṃ sikkhāpadavibhaṅge vuttanayena. ‘‘Saññācikāyā’’ti vacanato karontenāpi, ‘‘parehi pariyosāpetī’’ti vacanato kārāpentenāpi paṭipajjitabbaṃ. Ubhopete kārakakārāpakā. Byañjanaṃ vilomitaṃ bhaveyya, ‘‘kārayamānenā’’ti hi byañjanaṃ ‘‘karontenā’’ti vutte vilomitaṃ hoti atadatthattā. Na hi kārāpento nāma hoti. ‘‘Idha vuttanayenāti desitavatthukapamāṇikanayena. Evaṃ sante ‘karontena vā kārāpentena vā’ti vacanato karontenāpi parehi vippakataṃ vattabbanti ce, tadatthavissajjanatthaṃ ‘yadi panātiādimāhā’’’ti anugaṇṭhipade vuttaṃ. ‘‘Saññācikāya kuṭiṃ karonto’’ti vacanavasena vuttaṃ. ‘‘Āyāmato ca vitthārato cā’’ti avatvā vikappatthassa vā-saddassa gahitattā ekatobhāgepi vaḍḍhite āpatti eva. Pamāṇayuttamañco kira navavidatthi. ‘‘‘Catuhatthavitthārā’ti vacanena ‘tiriyaṃ tihatthā vā’ti vacanampi sameti ‘yattha pamāṇayutto’tiādisanniṭṭhānavacanāsambhavato’’ti vuttaṃ. Pamāṇato ūnatarampīti vitthārato catupañcahatthampi dīghato anatikkamitvā vuttapamāṇameva desitavatthu. Adesitavatthuñhi karoto āpatti. Pamāṇātikkantā kuṭi eva pamāṇātikkantaṃ kuṭiṃ kareyyāti vuttattā. ‘‘Thambhatulā’’ti pāṭho. Anussāvanānayenāti ettha ‘‘damiḷabhāsāyapi vaṭṭatī’’ti vadanti.
353. சாரபூ⁴மி கோ³சரபூ⁴மி. ந க³ஹிதாதி ந வாரிதா. அட்ட²கதா²யங் ‘‘காரணாய கு³த்திப³ந்த⁴னாகா³ரங், அகரணட்டா²னங் வா த⁴ம்மக³ந்தி⁴கா ஹத்த²பாத³ச்சி²ந்த³னகா க³ந்தி⁴கா’’தி லிகி²தங். த்³வீஹி ப³லிப³த்³தே³ஹீதி ஹெட்டி²மகோடியா கிர வுத்ததோ ஆவிஜ்ஜிதுங் ந ஸக்கா சி²ன்னாவடத்தா, நிக³மனஸ்ஸாபி அத்த²ப்பகாஸனத்த²ங் வுத்தந்தி வேதி³தப்³ப³ங். பாசினந்தி வத்து² அதி⁴ட்டா²னங். தத³த்தா²யாதி தச்ச²னத்தா²ய. பண்ணஸாலம்பீதி உல்லித்தாவலித்தகுடிமேவ பண்ணச்ச²த³னங். தேனேவ ‘‘ஸபி⁴த்திச்ச²த³ன’’ந்தி வுத்தங், அலித்தங் கிர ஸப்³ப³ங் வட்டதி. புப்³பே³ தோ²கங் ட²பிதங் புன வட்³டெ⁴த்வா. தஸ்மிந்தி த்³வாரப³ந்த⁴னே வா வாதபானே வா ட²பிதே. பட²மமேவாதி எத்த² பத்தகாலே ஏவாதி கிர த⁴ம்மஸிரித்தே²ரோ. உபதிஸ்ஸத்தே²ரோ ட²பிதகாலேவாதி கிர. புரிமேன லேபஸ்ஸ அக⁴டிதத்தா து³தியேன வத்தஸீஸேன கதத்தா உபி⁴ன்னம்பி அனாபத்தி. ஸசே ஆணத்தேன கதங், ‘‘கரோதி வா காராபேதி வா’’தி வசனதோ ஆபத்தி உபி⁴ன்னங் ஸதி அத்துத்³தே³ஸிகதாய, அஸதி மூலட்ட²ஸ்ஸேவ. ஹெட்டி²மப்பமாணஸம்ப⁴வே ஸதி ஸப்³ப³மத்திகாமயங் குடிங் கரோதோ ஆபத்தி து³க்கடேன ஸங்கா⁴தி³ஸேஸோதி ஆசரியஸ்ஸ தக்கோ.
353.Cārabhūmi gocarabhūmi. Na gahitāti na vāritā. Aṭṭhakathāyaṃ ‘‘kāraṇāya guttibandhanāgāraṃ, akaraṇaṭṭhānaṃ vā dhammagandhikā hatthapādacchindanakā gandhikā’’ti likhitaṃ. Dvīhi balibaddehīti heṭṭhimakoṭiyā kira vuttato āvijjituṃ na sakkā chinnāvaṭattā, nigamanassāpi atthappakāsanatthaṃ vuttanti veditabbaṃ. Pācinanti vatthu adhiṭṭhānaṃ. Tadatthāyāti tacchanatthāya. Paṇṇasālampīti ullittāvalittakuṭimeva paṇṇacchadanaṃ. Teneva ‘‘sabhitticchadana’’nti vuttaṃ, alittaṃ kira sabbaṃ vaṭṭati. Pubbe thokaṃ ṭhapitaṃ puna vaḍḍhetvā. Tasminti dvārabandhane vā vātapāne vā ṭhapite. Paṭhamamevāti ettha pattakāle evāti kira dhammasiritthero. Upatissatthero ṭhapitakālevāti kira. Purimena lepassa aghaṭitattā dutiyena vattasīsena katattā ubhinnampi anāpatti. Sace āṇattena kataṃ, ‘‘karoti vā kārāpeti vā’’ti vacanato āpatti ubhinnaṃ sati attuddesikatāya, asati mūlaṭṭhasseva. Heṭṭhimappamāṇasambhave sati sabbamattikāmayaṃ kuṭiṃ karoto āpatti dukkaṭena saṅghādisesoti ācariyassa takko.
354. ச²த்திங்ஸ சதுக்கானி நாம அதே³ஸிதவத்து²கசதுக்கங் தே³ஸிதவத்து²கசதுக்கங் பமாணாதிக்கந்தசதுக்கங் பமாணிகசதுக்கங் அதே³ஸிதவத்து²கபமாணாதிக்கந்தசதுக்கங் தே³ஸிதவத்து²கபமாணிகசதுக்கந்தி ச² சதுக்கானி, ஏவங் ஸமாதி³ஸதிவாராதீ³ஸுபி பஞ்சஸூதி ச²த்திங்ஸ. ஆபத்திபே⁴த³த³ஸ்ஸனத்த²ந்தி எத்த² யஸ்மா ‘‘ஸாரம்பே⁴ சே, பி⁴க்கு², வத்து²ஸ்மிங் அபரிக்கமனே…பே॰… ஸங்கா⁴தி³ஸேஸோ’’தி மாதிகாயங் அவிஸேஸேன வுத்தத்தா ஸாரம்ப⁴அபரிக்கமனேபி ஸங்கா⁴தி³ஸேஸோவாதி மிச்சா²கா³ஹவிவஜ்ஜனத்த²ங் ஆபத்திபே⁴தோ³ த³ஸ்ஸிதோ, தஸ்மா வுத்தானீதி அதி⁴ப்பாயோ. விப⁴ங்கே³ ஏவங் அவத்வா கிமத்த²ங் மாதிகாயங் து³க்கடவத்து² வுத்தந்தி சே? பி⁴க்கூ² அபி⁴னேதப்³பா³ வத்து²தே³ஸனாய, தேஹி பி⁴க்கூ²ஹி வத்து² தே³ஸேதப்³ப³ங். கீதி³ஸங்? அனாரம்ப⁴ங் ஸபரிக்கமனங், நேதரங், இதரஸ்மிங் ‘‘ஸாரம்பே⁴ சே பி⁴க்கு² வத்து²ஸ்மிங் அபரிக்கமனே’’தி ஏவங் ஆனிஸங்ஸவஸேன ஆக³தத்தா வுத்தங். யஸ்மா வத்து² நாம அத்தி² ஸாரம்ப⁴ங், அத்தி² அனாரம்ப⁴ங், அத்தி² ஸபரிக்கமனங், அத்தி² அபரிக்கமனங், அத்தி² ஸாரம்ப⁴ங் ஸபரிக்கமனங், அத்தி² ஸாரம்ப⁴ங் அபரிக்கமனங், அத்தி² அனாரம்ப⁴ங் ஸபரிக்கமனங், அத்தி² அனாரம்ப⁴ங் அபரிக்கமனந்தி ப³ஹுவித⁴த்தா வத்து² தே³ஸேதப்³ப³ங் அனாரம்ப⁴ங் ஸபரிக்கமனங், நேதரந்தி வுத்தங் ஹோதி. கிமத்தி²கா பனேஸா தே³ஸனாதி சே? க³ருகாபத்திபஞ்ஞாபனஹேதுபரிவஜ்ஜனுபாயத்தா². வத்து²தே³ஸனாய ஹி க³ருகாபத்திபஞ்ஞாபனஹேதுத்தா அகதவிஞ்ஞத்தி கி³ஹீனங் பீளாஜனநேன அத்தது³க்க²பரது³க்க²ஹேதுபூ⁴தோ ச ஸாரம்ப⁴பா⁴வோதி ஏதே வத்து²தே³ஸனாபதே³ஸேன உபாயேன பரிவஜ்ஜிதா ஹொந்தி. ந ஹி பி⁴க்கு² அகப்பியகுடிகரணத்த²ங் கி³ஹீனங் வா பீளானிமித்தங் ஸாரம்ப⁴வத்து². குடிகரணத்த²ங் வா வத்து²ங் தே³ஸெந்தீதி பட²மமேவ ஸாதி⁴தமேதங். வோமிஸ்ஸகாபத்தியோதி து³க்கடஸங்கா⁴தி³ஸேஸமிஸ்ஸகாபத்தியோ.
354. Chattiṃsa catukkāni nāma adesitavatthukacatukkaṃ desitavatthukacatukkaṃ pamāṇātikkantacatukkaṃ pamāṇikacatukkaṃ adesitavatthukapamāṇātikkantacatukkaṃ desitavatthukapamāṇikacatukkanti cha catukkāni, evaṃ samādisativārādīsupi pañcasūti chattiṃsa. Āpattibhedadassanatthanti ettha yasmā ‘‘sārambhe ce, bhikkhu, vatthusmiṃ aparikkamane…pe… saṅghādiseso’’ti mātikāyaṃ avisesena vuttattā sārambhaaparikkamanepi saṅghādisesovāti micchāgāhavivajjanatthaṃ āpattibhedo dassito, tasmā vuttānīti adhippāyo. Vibhaṅge evaṃ avatvā kimatthaṃ mātikāyaṃ dukkaṭavatthu vuttanti ce? Bhikkhū abhinetabbā vatthudesanāya, tehi bhikkhūhi vatthu desetabbaṃ. Kīdisaṃ? Anārambhaṃ saparikkamanaṃ, netaraṃ, itarasmiṃ ‘‘sārambhe ce bhikkhu vatthusmiṃ aparikkamane’’ti evaṃ ānisaṃsavasena āgatattā vuttaṃ. Yasmā vatthu nāma atthi sārambhaṃ, atthi anārambhaṃ, atthi saparikkamanaṃ, atthi aparikkamanaṃ, atthi sārambhaṃ saparikkamanaṃ, atthi sārambhaṃ aparikkamanaṃ, atthi anārambhaṃ saparikkamanaṃ, atthi anārambhaṃ aparikkamananti bahuvidhattā vatthu desetabbaṃ anārambhaṃ saparikkamanaṃ, netaranti vuttaṃ hoti. Kimatthikā panesā desanāti ce? Garukāpattipaññāpanahetuparivajjanupāyatthā. Vatthudesanāya hi garukāpattipaññāpanahetuttā akataviññatti gihīnaṃ pīḷājananena attadukkhaparadukkhahetubhūto ca sārambhabhāvoti ete vatthudesanāpadesena upāyena parivajjitā honti. Na hi bhikkhu akappiyakuṭikaraṇatthaṃ gihīnaṃ vā pīḷānimittaṃ sārambhavatthu. Kuṭikaraṇatthaṃ vā vatthuṃ desentīti paṭhamameva sādhitametaṃ. Vomissakāpattiyoti dukkaṭasaṅghādisesamissakāpattiyo.
355. தத்த² ‘‘த்³வீஹி ஸங்கா⁴தி³ஸேஸேஹீ’’தி வத்தப்³பே³ ‘‘த்³வின்னங் ஸங்கா⁴தி³ஸேஸேனா’’தி விப⁴த்திப்³யத்தயேன, வசனப்³யத்தயேன ச வுத்தங். ‘‘ஆபத்தி த்³வின்னங் ஸங்கா⁴தி³ஸேஸான’’ந்திபி பாடோ².
355. Tattha ‘‘dvīhi saṅghādisesehī’’ti vattabbe ‘‘dvinnaṃ saṅghādisesenā’’ti vibhattibyattayena, vacanabyattayena ca vuttaṃ. ‘‘Āpatti dvinnaṃ saṅghādisesāna’’ntipi pāṭho.
364. ந க⁴டயதி ச²த³னலேபாபா⁴வதோ, அனாபத்தி, தங் பரதோ ஸாதி⁴யதி. ச²த³னமேவ ஸந்தா⁴ய உல்லித்தாவலித்ததா வுத்தாதி. ‘‘குக்குடச்சி²ககே³ஹங் வட்டதீதி வத்வா புன ச²த³னங் த³ண்ட³கேஹீதிஆதி³னா நயேன தங் த³ஸ்ஸெந்தேஹி திணபண்ணச்ச²த³னாகுடிகாவ வுத்தா. தத்த² ச²த³னங் த³ண்ட³கேஹி தீ³க⁴தோ திரியஞ்ச ஜாலங் விய ப³ந்தி⁴த்வா திணேஹி வா பண்ணேஹி வா சா²தே³துங் உல்லித்தாதி³பா⁴வோ ச²த³னமேவ ஸந்தா⁴ய வுத்தோதி யுத்தமித³ங். தஸ்மா மத்திகாமயங் பி⁴த்திங் வட்³டா⁴பெத்வா உபரி உல்லித்தங் வா அவலித்தங் வா உப⁴யங் வா பி⁴த்தியா க⁴டிதங் கரொந்தஸ்ஸ ஆபத்தி ஏவ வினாபி பி⁴த்திலேபேனா’’தி லிகி²தங். ‘‘‘ஸோ ச ச²த³னமேவ ஸந்தா⁴யா’தி பதா⁴னவஸேன வுத்தங், ந ஹெட்டா²பா⁴க³ங் படிக்கி²த்த’’ந்தி வத³ந்தி, வீமங்ஸிதப்³ப³ங். எத்தா²தி திணகுடிகாய. யதா²ஸமாதி³ட்டா²யாதி யதா²வுத்தப்பகாரந்தி அதி⁴ப்பாயோ. ‘‘ஆபத்தி காருகானங் திண்ணங் து³க்கடான’’ந்திஆதி³ம்ஹி ஸோ ஸுணாதிச²க்கம்பி லப்³ப⁴தி. உப⁴யத்த² ஸமாதி³ட்ட²த்தா ஆணாபகஸ்ஸ அனாபத்தி. ஆணத்தஸ்ஸ யதா² ஸமாதி³ட்ட²ங் ஆணாபகேன, ததா² அகரணபச்சயா து³க்கடங். ஸசே ‘‘அஹம்பெத்த² வஸாமீ’’தி அத்துத்³தே³ஸம்பி கரோதி, ஸங்கா⁴தி³ஸேஸோவ. ‘‘குடிங் கரோதா²’’தி அவிஸேஸேன வுத்தட்டா²னே பன ஆணாபகஸ்ஸாபி ஸங்கா⁴தி³ஸேஸோ அசித்தகத்தா ஸிக்கா²பத³ஸ்ஸ.
364.Na ghaṭayati chadanalepābhāvato, anāpatti, taṃ parato sādhiyati. Chadanameva sandhāya ullittāvalittatā vuttāti. ‘‘Kukkuṭacchikagehaṃ vaṭṭatīti vatvā puna chadanaṃ daṇḍakehītiādinā nayena taṃ dassentehi tiṇapaṇṇacchadanākuṭikāva vuttā. Tattha chadanaṃ daṇḍakehi dīghato tiriyañca jālaṃ viya bandhitvā tiṇehi vā paṇṇehi vā chādetuṃ ullittādibhāvo chadanameva sandhāya vuttoti yuttamidaṃ. Tasmā mattikāmayaṃ bhittiṃ vaḍḍhāpetvā upari ullittaṃ vā avalittaṃ vā ubhayaṃ vā bhittiyā ghaṭitaṃ karontassa āpatti eva vināpi bhittilepenā’’ti likhitaṃ. ‘‘‘So ca chadanameva sandhāyā’ti padhānavasena vuttaṃ, na heṭṭhābhāgaṃ paṭikkhitta’’nti vadanti, vīmaṃsitabbaṃ. Etthāti tiṇakuṭikāya. Yathāsamādiṭṭhāyāti yathāvuttappakāranti adhippāyo. ‘‘Āpatti kārukānaṃ tiṇṇaṃ dukkaṭāna’’ntiādimhi so suṇātichakkampi labbhati. Ubhayattha samādiṭṭhattā āṇāpakassa anāpatti. Āṇattassa yathā samādiṭṭhaṃ āṇāpakena, tathā akaraṇapaccayā dukkaṭaṃ. Sace ‘‘ahampettha vasāmī’’ti attuddesampi karoti, saṅghādisesova. ‘‘Kuṭiṃ karothā’’ti avisesena vuttaṭṭhāne pana āṇāpakassāpi saṅghādiseso acittakattā sikkhāpadassa.
அஹஞ்ச வஸிஸ்ஸாமீதி எத்த² பரஸ்ஸ யஸ்ஸ கஸ்ஸசி உத்³தி³ட்ட²ஸ்ஸ அபா⁴வா ஆபத்தி ஏவ ‘‘கரொந்தஸ்ஸ வா’’தி நியமிதத்தா, அனாபத்தி அவிப⁴த்தத்தா. ‘‘இத⁴ பஞ்ஞத்திஜானநமத்தமேவ சித்த’’ந்தி ச லிகி²தங். அனுக³ண்டி²பதே³ பன அஹஞ்ச வஸிஸ்ஸாமீதி எத்த² யோ ‘‘மய்ஹங் வாஸாகா³ரஞ்ச ப⁴விஸ்ஸதீ’’தி இச்ச²தி, தஸ்ஸாபத்தி. யோ பன உபோஸதா²கா³ரங் இச்ச²தி, தஸ்ஸ அனாபத்தி, தஸ்மா ‘‘உப⁴யங் ஸமேதீ’’தி வத்வா ச ‘‘வினயவினிச்ச²யே ஆக³தே க³ருகே டா²தப்³ப³’’ந்தி வசனதோ மஹாபச்சரிவாத³தோ இதரோ பச்சா² வத்தப்³போ³தி சே? ந, ப³லவத்தா . ‘‘வாஸாகா³ரங் ட²பெத்வா ஸப்³ப³த்த², அனாபத்தீ’’தி வசனதோ, போ⁴ஜனஸாலாதீ³னம்பி அத்தா²ய இமினா கதத்தா ஸங்கரா ஜாதா. யதா² – த்³வே தயோ ‘‘ஏகதோ வஸிஸ்ஸாமா’’தி கரொந்தி, ரக்க²தி தாவாதி எத்த² விய. ‘‘இத³ங் டா²னங் வாஸாகா³ரங் ப⁴விஸ்ஸதி, இத³ங் உபோஸதா²கா³ர’’ந்தி விப⁴ஜித்வா கதேபி ஆபத்தி ஏவ. த்³வீஸு மஹாபச்சரிவாதோ³ ப³லவா, தஸ்மா ‘‘பச்சா² வுத்தோ’’திஆதி³னா அதீவ பபஞ்சிதங். கிங் தேன. ‘‘அத்தனா விப்பகதங் அத்தனா ச பரேஹி ச பரியோஸாபேதீ’’திஆதி³னா நயேன அபரானிபி சதுக்கானி யதா²ஸம்ப⁴வங் யோஜெத்வா த³ஸ்ஸேதப்³பா³னி, லேணாதீ³ஸு கிஞ்சாபி ஸங்கா⁴தி³ஸேஸேன அனாபத்தி, அகதவிஞ்ஞத்தியா ஸதி தப்பச்சயா ஆபத்தி ஏவ.
Ahañca vasissāmīti ettha parassa yassa kassaci uddiṭṭhassa abhāvā āpatti eva ‘‘karontassa vā’’ti niyamitattā, anāpatti avibhattattā. ‘‘Idha paññattijānanamattameva citta’’nti ca likhitaṃ. Anugaṇṭhipade pana ahañca vasissāmīti ettha yo ‘‘mayhaṃ vāsāgārañca bhavissatī’’ti icchati, tassāpatti. Yo pana uposathāgāraṃ icchati, tassa anāpatti, tasmā ‘‘ubhayaṃ sametī’’ti vatvā ca ‘‘vinayavinicchaye āgate garuke ṭhātabba’’nti vacanato mahāpaccarivādato itaro pacchā vattabboti ce? Na, balavattā . ‘‘Vāsāgāraṃ ṭhapetvā sabbattha, anāpattī’’ti vacanato, bhojanasālādīnampi atthāya iminā katattā saṅkarā jātā. Yathā – dve tayo ‘‘ekato vasissāmā’’ti karonti, rakkhati tāvāti ettha viya. ‘‘Idaṃ ṭhānaṃ vāsāgāraṃ bhavissati, idaṃ uposathāgāra’’nti vibhajitvā katepi āpatti eva. Dvīsu mahāpaccarivādo balavā, tasmā ‘‘pacchā vutto’’tiādinā atīva papañcitaṃ. Kiṃ tena. ‘‘Attanā vippakataṃ attanā ca parehi ca pariyosāpetī’’tiādinā nayena aparānipi catukkāni yathāsambhavaṃ yojetvā dassetabbāni, leṇādīsu kiñcāpi saṅghādisesena anāpatti, akataviññattiyā sati tappaccayā āpatti eva.
குடிகாரஸிக்கா²பத³வண்ணனா நிட்டி²தா.
Kuṭikārasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 6. குடிகாரஸிக்கா²பத³ங் • 6. Kuṭikārasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 6. குடிகாரஸிக்கா²பத³வண்ணனா • 6. Kuṭikārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 6. குடிகாரஸிக்கா²பத³வண்ணனா • 6. Kuṭikārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 6. குடிகாரஸிக்கா²பத³வண்ணனா • 6. Kuṭikārasikkhāpadavaṇṇanā
