| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
6. குடிகாரஸிக்கா²பத³வண்ணனா
6. Kuṭikārasikkhāpadavaṇṇanā
342. ச²ட்டே² எத்தகேனாதி எத்தகேன தா³ருஆதி³னா. அபரிச்சி²ன்னப்பமாணாயோதி அபரிச்சி²ன்னதா³ருஆதி³பமாணாயோ. மூலச்சே²ஜ்ஜாயாதி பரஸந்தகபா⁴வதோ மோசெத்வா அத்தனோ ஏவ ஸந்தககரணவஸேனாதி அத்தோ². ஏவங் யாசதோ அஞ்ஞாதகவிஞ்ஞத்திது³க்கடஞ்சேவ தா³ஸபடிக்³க³ஹணது³க்கடஞ்ச ஹோதி ‘‘தா³ஸிதா³ஸபடிக்³க³ஹணா படிவிரதோ ஹோதீ’’தி (தீ³॰ நி॰ 1.10, 194) வசனங் நிஸ்ஸாய அட்ட²கதா²ஸு படிக்கி²த்தத்தா. ஸககம்மந்தி பாணவத⁴கம்மங். இத³ஞ்ச பாணாதிபாததோ³ஸபரிஹாராய து³க்கடங் வுத்தங், ந விஞ்ஞத்திபரிஹாராய. அனியமெத்வாபி ந யாசிதப்³பா³தி ஸாமீசித³ஸ்ஸனத்த²ங் வுத்தங், ஸுத்³த⁴சித்தேன பன ஹத்த²கம்மங் யாசந்தஸ்ஸ ஆபத்தி நாம நத்தி². யதி³ச்ச²கங் காராபேதுங் வட்டதீதி ‘‘ஹத்த²கம்மங் யாசாமி, தே³தா²’’திஆதி³னா அயாசித்வாபி வட்டதி. ஸகிச்சபஸுதம்பி ஏவங் காராபெந்தஸ்ஸ விஞ்ஞத்தி நத்தி² ஏவ, ஸாமீசித³ஸ்ஸனத்த²ங் பன விப⁴ஜித்வா வுத்தங்.
342. Chaṭṭhe ettakenāti ettakena dāruādinā. Aparicchinnappamāṇāyoti aparicchinnadāruādipamāṇāyo. Mūlacchejjāyāti parasantakabhāvato mocetvā attano eva santakakaraṇavasenāti attho. Evaṃ yācato aññātakaviññattidukkaṭañceva dāsapaṭiggahaṇadukkaṭañca hoti ‘‘dāsidāsapaṭiggahaṇā paṭivirato hotī’’ti (dī. ni. 1.10, 194) vacanaṃ nissāya aṭṭhakathāsu paṭikkhittattā. Sakakammanti pāṇavadhakammaṃ. Idañca pāṇātipātadosaparihārāya dukkaṭaṃ vuttaṃ, na viññattiparihārāya. Aniyametvāpi na yācitabbāti sāmīcidassanatthaṃ vuttaṃ, suddhacittena pana hatthakammaṃ yācantassa āpatti nāma natthi. Yadicchakaṃ kārāpetuṃ vaṭṭatīti ‘‘hatthakammaṃ yācāmi, dethā’’tiādinā ayācitvāpi vaṭṭati. Sakiccapasutampi evaṃ kārāpentassa viññatti natthi eva, sāmīcidassanatthaṃ pana vibhajitvā vuttaṃ.
ஸப்³ப³கப்பியபா⁴வதீ³பனத்த²ந்தி ஸப்³ப³ஸோ கப்பியபா⁴வதீ³பனத்த²ங். மூலங் தே³தா²தி வத்துங் வட்டதீதி ‘‘மூலங் த³ஸ்ஸாமா’’தி பட²மங் வுத்தத்தா விஞ்ஞத்தி வா மூலந்தி வசனஸ்ஸ கப்பியாகப்பியவத்து²ஸாமஞ்ஞவசனத்தேபி நிட்டி²தப⁴திகிச்சானங் தா³பனதோ அகப்பியவத்து²ஸாதி³யனங் வா ந ஹோதீதி கத்வா வுத்தங். அனஜ்ஜா²வுத்த²கந்தி அபரிக்³க³ஹிதங்.
Sabbakappiyabhāvadīpanatthanti sabbaso kappiyabhāvadīpanatthaṃ. Mūlaṃ dethāti vattuṃ vaṭṭatīti ‘‘mūlaṃ dassāmā’’ti paṭhamaṃ vuttattā viññatti vā mūlanti vacanassa kappiyākappiyavatthusāmaññavacanattepi niṭṭhitabhatikiccānaṃ dāpanato akappiyavatthusādiyanaṃ vā na hotīti katvā vuttaṃ. Anajjhāvutthakanti apariggahitaṃ.
மஞ்ச…பே॰… சீவராதீ³னி காராபேதுகாமேனாபீதிஆதீ³ஸு சீவரங் காராபேதுகாமஸ்ஸ அஞ்ஞாதகஅப்பவாரிததந்தவாயேஹி ஹத்த²கம்மயாசனவஸேன வாயாபனே விஞ்ஞத்திபச்சயா து³க்கடாபா⁴வேபி சீவரவாயாபனஸிக்கா²பதே³ன யதா²ரஹங் பாசித்தியது³க்கடானி ஹொந்தீதி வேதி³தப்³ப³ங். அகப்பியகஹாபணாதி³ ந தா³தப்³ப³ந்தி கப்பியமுகே²ன லத்³த⁴ம்பி ஹத்த²கம்மகரணத்தா²ய இமஸ்ஸ கஹாபணங் தே³ஹீதி வத்வா தா³னங் ந வட்டதீதி வுத்தங். புப்³பே³ கதகம்மஸ்ஸ தா³பனே கிஞ்சாபி தோ³ஸோ ந தி³ஸ்ஸதி, ததா²பி அஸாருப்பமேவாதி வத³ந்தி. கதகம்மத்தா²யபி காதப்³ப³கம்மத்தா²யபி கப்பியவோஹாரேன பரியாயதோ ப⁴திங் தா³பெந்தஸ்ஸ நத்தி² தோ³ஸோ. வத்தந்தி சாரித்தங், ஆபத்தி ந ஹோதீதி அதி⁴ப்பாயோ.
Mañca…pe… cīvarādīni kārāpetukāmenāpītiādīsu cīvaraṃ kārāpetukāmassa aññātakaappavāritatantavāyehi hatthakammayācanavasena vāyāpane viññattipaccayā dukkaṭābhāvepi cīvaravāyāpanasikkhāpadena yathārahaṃ pācittiyadukkaṭāni hontīti veditabbaṃ. Akappiyakahāpaṇādi na dātabbanti kappiyamukhena laddhampi hatthakammakaraṇatthāya imassa kahāpaṇaṃ dehīti vatvā dānaṃ na vaṭṭatīti vuttaṃ. Pubbe katakammassa dāpane kiñcāpi doso na dissati, tathāpi asāruppamevāti vadanti. Katakammatthāyapi kātabbakammatthāyapi kappiyavohārena pariyāyato bhatiṃ dāpentassa natthi doso. Vattanti cārittaṃ, āpatti na hotīti adhippāyo.
கப்பியங் காராபெத்வா படிக்³க³ஹேதப்³பா³னீதி ஸாகா²ய மக்கி²கபீ³ஜனேன பண்ணாதி³ச்சே²தே³ பீ³ஜகா³மகோபனஸ்ஸ சேவ தத்த² லக்³க³ரஜாதி³அப்படிக்³க³ஹிதஸ்ஸ ச பரிஹாரத்தா²ய வுத்தங். தது³ப⁴யாஸங்காய அஸதி ததா² அகரணே தோ³ஸோ நத்தி². நதீ³யாதீ³ஸு உத³கஸ்ஸ அபரிக்³க³ஹிததாய ‘‘ஆஹராதி வத்துங் வட்டதீ’’தி வுத்தங். ‘‘ந ஆஹடங் பரிபு⁴ஞ்ஜிது’’ந்தி வசனதோ விஞ்ஞத்தியா ஆபன்னங் து³க்கடங் தே³ஸெத்வாபி தங் வத்து²ங் பரிபு⁴ஞ்ஜந்தஸ்ஸ புன பரிபோ⁴கே³ து³க்கடமேவ, பஞ்சன்னம்பி ஸஹத⁴ம்மிகானங் ந வட்டதி. ‘‘அலஜ்ஜீஹி பன பி⁴க்கூ²ஹி வா ஸாமணேரேஹி வா ஹத்த²கம்மங் ந காரேதப்³ப³’’ந்தி ஸாமஞ்ஞதோ வுத்தத்தா அத்தனோ அத்தா²ய யங்கிஞ்சி ஹத்த²கம்மங் காரேதுங் ந வட்டதி. யங் பன அலஜ்ஜீ நிவாரியமானோபி பீ³ஜனாதி³ங் கரோதி, தத்த² தோ³ஸோ நத்தி². சேதியகம்மாதீ³னி பன தேஹி காராபேதுங் வட்டதி. எத்த² ச ‘‘அலஜ்ஜீஹி ஸாமணேரேஹீ’’தி வுத்தத்தா ‘‘ஸஞ்சிச்ச ஆபத்திங் ஆபஜ்ஜதீ’’திஆதி³ (பரி॰ 359) அலஜ்ஜீலக்க²ணங் உக்கட்ட²வஸேன உபஸம்பன்னே படிச்ச உபலக்க²ணதோ வுத்தந்தி தங்லக்க²ணவிரஹிதானங் ஸாமணேராதீ³னங் லிங்க³த்தே²னககொ³த்ரபு⁴பரியோஸானானங் பி⁴க்கு²படிஞ்ஞானங் து³ஸ்ஸீலானம்பி ஸாதா⁴ரணவஸேன அலஜ்ஜிதாலக்க²ணங் யதா²விஹிதபடிபத்தியங் ஸஞ்சிச்ச அதிட்ட²னமேவாதி க³ஹேதப்³ப³ங்.
Kappiyaṃ kārāpetvā paṭiggahetabbānīti sākhāya makkhikabījanena paṇṇādicchede bījagāmakopanassa ceva tattha laggarajādiappaṭiggahitassa ca parihāratthāya vuttaṃ. Tadubhayāsaṅkāya asati tathā akaraṇe doso natthi. Nadīyādīsu udakassa apariggahitatāya ‘‘āharāti vattuṃ vaṭṭatī’’ti vuttaṃ. ‘‘Na āhaṭaṃ paribhuñjitu’’nti vacanato viññattiyā āpannaṃ dukkaṭaṃ desetvāpi taṃ vatthuṃ paribhuñjantassa puna paribhoge dukkaṭameva, pañcannampi sahadhammikānaṃ na vaṭṭati. ‘‘Alajjīhi pana bhikkhūhi vā sāmaṇerehi vā hatthakammaṃ na kāretabba’’nti sāmaññato vuttattā attano atthāya yaṃkiñci hatthakammaṃ kāretuṃ na vaṭṭati. Yaṃ pana alajjī nivāriyamānopi bījanādiṃ karoti, tattha doso natthi. Cetiyakammādīni pana tehi kārāpetuṃ vaṭṭati. Ettha ca ‘‘alajjīhi sāmaṇerehī’’ti vuttattā ‘‘sañcicca āpattiṃ āpajjatī’’tiādi (pari. 359) alajjīlakkhaṇaṃ ukkaṭṭhavasena upasampanne paṭicca upalakkhaṇato vuttanti taṃlakkhaṇavirahitānaṃ sāmaṇerādīnaṃ liṅgatthenakagotrabhupariyosānānaṃ bhikkhupaṭiññānaṃ dussīlānampi sādhāraṇavasena alajjitālakkhaṇaṃ yathāvihitapaṭipattiyaṃ sañcicca atiṭṭhanamevāti gahetabbaṃ.
ஆஹராபெந்தஸ்ஸ து³க்கடந்தி விஞ்ஞத்திக்க²ணே விஞ்ஞத்திபச்சயா, படிலாப⁴க்க²ணே கோ³ணானங் ஸாதி³யனபச்சயா ச து³க்கடங். கோ³ணஞ்ஹி அத்தனோ அத்தா²ய அவிஞ்ஞத்தியா லத்³த⁴ம்பி ஸாதி³துங் ந வட்டதி ‘‘ஹத்தி²க³வஸ்ஸவளவபடிக்³க³ஹணா படிவிரதோ ஹோதீ’’தி (தீ³॰ நி॰ 1.10, 194) வுத்தத்தா. தேனேவாஹ ‘‘ஞாதிபவாரிதட்டா²னதோபி மூலச்சே²ஜ்ஜாய யாசிதுங் ந வட்டதீ’’தி. எத்த² ச விஞ்ஞத்திது³க்கடாபா⁴வேபி அகப்பியவத்து²யாசனேபி படிக்³க³ஹணேபி து³க்கடமேவ. ரக்கி²த்வாதி சோராதி³உபத்³த³வதோ ரக்கி²த்வா. ஜக்³கி³த்வாதி திணதா³னாதீ³ஹி போஸெத்வா.
Āharāpentassa dukkaṭanti viññattikkhaṇe viññattipaccayā, paṭilābhakkhaṇe goṇānaṃ sādiyanapaccayā ca dukkaṭaṃ. Goṇañhi attano atthāya aviññattiyā laddhampi sādituṃ na vaṭṭati ‘‘hatthigavassavaḷavapaṭiggahaṇā paṭivirato hotī’’ti (dī. ni. 1.10, 194) vuttattā. Tenevāha ‘‘ñātipavāritaṭṭhānatopi mūlacchejjāya yācituṃ na vaṭṭatī’’ti. Ettha ca viññattidukkaṭābhāvepi akappiyavatthuyācanepi paṭiggahaṇepi dukkaṭameva. Rakkhitvāti corādiupaddavato rakkhitvā. Jaggitvāti tiṇadānādīhi posetvā.
ஞாதிபவாரிதட்டா²னே பன வட்டதீதி ஸகடஸ்ஸ ஸம்படிச்சி²தப்³ப³த்தா மூலச்சே²ஜ்ஜவஸேன யாசிதுங் வட்டதி. தாவகாலிகங் வட்டதீதி உப⁴யத்தா²பி வட்டதீதி அத்தோ² . வாஸிஆதீ³னி புக்³க³லிகானிபி வட்டந்தீதி ஆஹ ‘‘ஏஸ நயோ வாஸீ’’திஆதி³. வல்லிஆதீ³ஸு ச பரபரிக்³க³ஹிதேஸு ச ஏஸேவ நயோதி யோஜேதப்³ப³ங். ‘‘க³ருப⁴ண்ட³ப்பஹோனகேஸுயேவா’’தி இத³ங் விஞ்ஞத்திங் ஸந்தா⁴ய வுத்தங். அதி³ன்னாதா³னே பன திணஸலாகங் உபாதா³ய பரபரிக்³க³ஹிதங் தெ²ய்யசித்தேன க³ண்ஹதோ அவஹாரோ ஏவ, ப⁴ண்ட³க்³கே⁴ன காரேதப்³போ³. வல்லிஆதீ³ஸூதி எத்த² ஆதி³-ஸத்³தே³ன பாளிஆக³தானங் (பாரா॰ 349) வேளுஆதீ³னங் ஸங்க³ஹோ. தத்த² யஸ்மிங் பதே³ஸே ஹரிதாலஜாதிஹிங்கு³லாதி³ அப்பகம்பி மஹக்³க⁴ங் ஹோதி, தத்த² தங் தாலபக்கபமாணதோ ஊனம்பி க³ருப⁴ண்ட³மேவ, விஞ்ஞாபேதுஞ்ச ந வட்டதி.
Ñātipavāritaṭṭhāne pana vaṭṭatīti sakaṭassa sampaṭicchitabbattā mūlacchejjavasena yācituṃ vaṭṭati. Tāvakālikaṃ vaṭṭatīti ubhayatthāpi vaṭṭatīti attho . Vāsiādīni puggalikānipi vaṭṭantīti āha ‘‘esa nayo vāsī’’tiādi. Valliādīsu ca parapariggahitesu ca eseva nayoti yojetabbaṃ. ‘‘Garubhaṇḍappahonakesuyevā’’ti idaṃ viññattiṃ sandhāya vuttaṃ. Adinnādāne pana tiṇasalākaṃ upādāya parapariggahitaṃ theyyacittena gaṇhato avahāro eva, bhaṇḍagghena kāretabbo. Valliādīsūti ettha ādi-saddena pāḷiāgatānaṃ (pārā. 349) veḷuādīnaṃ saṅgaho. Tattha yasmiṃ padese haritālajātihiṅgulādi appakampi mahagghaṃ hoti, tattha taṃ tālapakkapamāṇato ūnampi garubhaṇḍameva, viññāpetuñca na vaṭṭati.
ஸாதி விஞ்ஞத்தி. பரிகதா²தீ³ஸு ‘‘ஸேனாஸனங் ஸம்பா³த⁴’’ந்திஆதி³னா (விஸுத்³தி⁴॰ 1.19) பரியாயேன கத²னங் பரிகதா² நாம. உஜுகமேவ அகதெ²த்வா ‘‘பி⁴க்கூ²னங் கிங் பாஸாதோ³ ந வட்டதீ’’திஆதி³னா (விஸுத்³தி⁴॰ 1.19) அதி⁴ப்பாயோ யதா²விபூ⁴தோ ஹோதி, ஏவங் பா⁴ஸனங் ஓபா⁴ஸோ நாம. ஸேனாஸனாதி³அத்த²ங் பூ⁴மிபரிகம்மாதி³கரணவஸேன பச்சயுப்பாதா³ய நிமித்தகரணங் நிமித்தகம்மங் நாம. உக்கமந்தீதி அபக³ச்ச²ந்தி.
Sāti viññatti. Parikathādīsu ‘‘senāsanaṃ sambādha’’ntiādinā (visuddhi. 1.19) pariyāyena kathanaṃ parikathā nāma. Ujukameva akathetvā ‘‘bhikkhūnaṃ kiṃ pāsādo na vaṭṭatī’’tiādinā (visuddhi. 1.19) adhippāyo yathāvibhūto hoti, evaṃ bhāsanaṃ obhāso nāma. Senāsanādiatthaṃ bhūmiparikammādikaraṇavasena paccayuppādāya nimittakaraṇaṃ nimittakammaṃ nāma. Ukkamantīti apagacchanti.
344. மணி கண்டே² அஸ்ஸாதி மணிகண்டோ². தே³வவண்ணந்தி தே³வத்தபா⁴வங்.
344. Maṇi kaṇṭhe assāti maṇikaṇṭho. Devavaṇṇanti devattabhāvaṃ.
345. பாளியங் பத்தேன மே அத்தோ²தி (பாரா॰ 345) அனத்தி²கம்பி பத்தேன பி⁴க்கு²ங் ஏவங் வதா³பெந்தோ ப⁴க³வா ஸொத்தி²யா மந்தபத³வஸேன வதா³பேஸி. ஸோபி பி⁴க்கு² ப⁴க³வதா ஆணத்தவசனங் வதே³மீதி அவோச, தேனஸ்ஸ முஸா ந ஹோதி. அத² வா ‘‘பத்தேன மே அத்தோ²’’தி இத³ங் ‘‘பத்தங் த³த³ந்தூ’’தி இமினா ஸமானத்த²ந்தி த³ட்ட²ப்³ப³ங். ஏஸ நயோ மணினா மே அத்தோ²தி எத்தா²பி. தஸ்மா அஞ்ஞேஸம்பி ஏவரூபங் கதெ²ந்தஸ்ஸ, கதா²பெந்தஸ்ஸ ச வசனதோ³ஸோ நத்தீ²தி க³ஹேதப்³ப³ங்.
345. Pāḷiyaṃ pattena me atthoti (pārā. 345) anatthikampi pattena bhikkhuṃ evaṃ vadāpento bhagavā sotthiyā mantapadavasena vadāpesi. Sopi bhikkhu bhagavatā āṇattavacanaṃ vademīti avoca, tenassa musā na hoti. Atha vā ‘‘pattena me attho’’ti idaṃ ‘‘pattaṃ dadantū’’ti iminā samānatthanti daṭṭhabbaṃ. Esa nayo maṇinā me atthoti etthāpi. Tasmā aññesampi evarūpaṃ kathentassa, kathāpentassa ca vacanadoso natthīti gahetabbaṃ.
349. உத்³த⁴ங்முக²ங் லித்தா உல்லித்தா, ச²த³னஸ்ஸ அந்தோ லிம்பந்தா ஹி யேபு⁴ய்யேன உத்³த⁴ங்முகா² லிம்பந்தி. தேனாஹ ‘‘அந்தோலித்தா’’தி. அதோ⁴முக²ங் லித்தா அவலித்தா. ப³ஹி லிம்பந்தா ஹி யேபு⁴ய்யேன அதோ⁴முகா² லிம்பந்தி. தேனாஹ ‘‘ப³ஹிலித்தா’’தி.
349. Uddhaṃmukhaṃ littā ullittā, chadanassa anto limpantā hi yebhuyyena uddhaṃmukhā limpanti. Tenāha ‘‘antolittā’’ti. Adhomukhaṃ littā avalittā. Bahi limpantā hi yebhuyyena adhomukhā limpanti. Tenāha ‘‘bahilittā’’ti.
ப்³யஞ்ஜனங் விலோமிதங் ப⁴வெய்யாதி யஸ்மா ‘‘காரயமானேனா’’தி இமஸ்ஸ ஹேதுகத்துவசனஸ்ஸ ‘‘கரொந்தேனா’’தி இத³ங் ஸுத்³த⁴கத்துவசனங் பரியாயவசனங் ந ஹோதி, தஸ்மா ‘‘கரொந்தேன வா காராபெந்தேன வா’’தி காரயமானேனாதி ப³ஹுஉத்³தே³ஸபதா³னுகு³ணங் கரணவசனேனேவ பத³த்த²ங் கத்வா நித்³தே³ஸே கதே ப்³யஞ்ஜனங் விருத்³த⁴ங் ப⁴வெய்ய, ததா² பன பத³த்த²வஸேன அத³ஸ்ஸெத்வா ஸாமத்தி²யதோ ஸித்³த⁴மேவத்த²ங் த³ஸ்ஸேதுங் பச்சத்தவஸேன ‘‘கரொந்தோ வா காராபெந்தோ வா’’தி பத³பா⁴ஜனங் வுத்தந்தி அதி⁴ப்பாயோ. தேனாஹ ‘‘அத்த²மத்தமேவா’’திஆதி³. பத³த்த²தோ, ஸாமத்தி²யதோ ச லப்³ப⁴மானங் அத்த²மத்தமேவாதி அத்தோ². யஞ்ஹி காரயமானேன படிபஜ்ஜிதப்³ப³ங், தங் கரொந்தேனாபி படிபஜ்ஜிதப்³ப³மேவாதி இத³மெத்த² ஸாமத்தி²யங் த³ட்ட²ப்³ப³ங்.
Byañjanaṃ vilomitaṃ bhaveyyāti yasmā ‘‘kārayamānenā’’ti imassa hetukattuvacanassa ‘‘karontenā’’ti idaṃ suddhakattuvacanaṃ pariyāyavacanaṃ na hoti, tasmā ‘‘karontena vā kārāpentena vā’’ti kārayamānenāti bahuuddesapadānuguṇaṃ karaṇavacaneneva padatthaṃ katvā niddese kate byañjanaṃ viruddhaṃ bhaveyya, tathā pana padatthavasena adassetvā sāmatthiyato siddhamevatthaṃ dassetuṃ paccattavasena ‘‘karonto vā kārāpento vā’’ti padabhājanaṃ vuttanti adhippāyo. Tenāha ‘‘atthamattamevā’’tiādi. Padatthato, sāmatthiyato ca labbhamānaṃ atthamattamevāti attho. Yañhi kārayamānena paṭipajjitabbaṃ, taṃ karontenāpi paṭipajjitabbamevāti idamettha sāmatthiyaṃ daṭṭhabbaṃ.
உத்³தே³ஸோதி ஸாமிபா⁴வேன உத்³தி³ஸிதப்³போ³. ஸேதகம்மந்தி ஸேதவண்ணகரணத்த²ங் ஸேதவண்ணமத்திகாய வா ஸுதா⁴ய வா கததனுகலேபோ, தேன பன ஸஹ மினியமானே பமாணாதிக்கந்தங் ஹோதீதி ஸங்கானிவாரணத்த²ங் ஆஹ ‘‘அப்³போ³ஹாரிக’’ந்தி. தேன பமாணாதிக்கந்தவோஹாரங் ந க³ச்ச²தி குடியா அனங்க³த்தாதி அதி⁴ப்பாயோ.
Uddesoti sāmibhāvena uddisitabbo. Setakammanti setavaṇṇakaraṇatthaṃ setavaṇṇamattikāya vā sudhāya vā katatanukalepo, tena pana saha miniyamāne pamāṇātikkantaṃ hotīti saṅkānivāraṇatthaṃ āha ‘‘abbohārika’’nti. Tena pamāṇātikkantavohāraṃ na gacchati kuṭiyā anaṅgattāti adhippāyo.
யதா²வுத்தஸ்ஸ அத்த²ஸ்ஸ வுத்தனயங் த³ஸ்ஸெந்தேன ‘‘வுத்தஞ்ஹேத’’ந்திஆதி³ வுத்தங். தத்த² ‘‘ஆயாமதோ ச வித்தா²ரதோ சா’’தி அவத்வா ‘‘ஆயாமதோ வா வித்தா²ரதோ வா’’தி விகப்பத்த²ஸ்ஸ வா-ஸத்³த³ஸ்ஸ வுத்தத்தா ஏகதோபா⁴கே³ வட்³டி⁴தேபி ஆபத்தீதி பகாஸிதந்தி அதி⁴ப்பாயோ. திஹத்தா²தி பகதிஹத்தே²ன திஹத்தா², ‘‘வட்³ட⁴கீஹத்தே²னா’’திபி (ஸாரத்த²॰ டீ॰ 2.348-349) வத³ந்தி, தங் ‘‘யத்த²…பே॰… அயங் குடீதி ஸங்க்²யங் ந க³ச்ச²தீ’’தி இமினா விருஜ்ஜ²தி வட்³ட⁴கீஹத்தே²ன திஹத்தா²யபி குடியா பமாணயுத்தஸ்ஸ மஞ்சஸ்ஸ ஸுகே²ன பரிவத்தனதோ. ‘‘ஊனகசதுஹத்தா² வா’’தி இத³ஞ்ச பச்சி²மப்பமாணயுத்தஸ்ஸ மஞ்சஸ்ஸ அபரிவத்தனாரஹங் ஸந்தா⁴ய வுத்தங். யதி³ ஹி பகதிஹத்தே²ன சதுஹத்தா²யபி குடியா பமாணயுத்தோ மஞ்சோ ந பரிவத்ததி, ஸா அகுடீயேவ, தஸ்மா மஞ்சபரிவத்தனமத்தேனேவ பமாணந்தி க³ஹேதப்³ப³ங். பமாணயுத்தோ மஞ்சோதி ஸப்³ப³பச்சி²மப்பமாணயுத்தோ மஞ்சோ. ஸோ ஹி பகதிவித³த்தி²யா நவவித³த்தி²கோ, அட்ட²வித³த்தி²கோ வா ஹோதி, ததோ கு²த்³த³கோ மஞ்சோ ஸீஸூபதா⁴னங் ட²பெத்வா பாத³ங் பஸாரெத்வா நிபஜ்ஜிதுங் ந பஹோதி. பமாணதோ ஊனதரம்பீதி உக்கட்ட²ப்பமாணதோ ஊனதரம்பி, இத³ஞ்ச ஹெட்டி²மப்பமாணயுத்தாயபி வத்து²தே³ஸனா காதப்³பா³, ந வாதி ஸந்தே³ஹனிவத்தனத்த²ங் வுத்தங்.
Yathāvuttassa atthassa vuttanayaṃ dassentena ‘‘vuttañheta’’ntiādi vuttaṃ. Tattha ‘‘āyāmato ca vitthārato cā’’ti avatvā ‘‘āyāmato vā vitthārato vā’’ti vikappatthassa vā-saddassa vuttattā ekatobhāge vaḍḍhitepi āpattīti pakāsitanti adhippāyo. Tihatthāti pakatihatthena tihatthā, ‘‘vaḍḍhakīhatthenā’’tipi (sārattha. ṭī. 2.348-349) vadanti, taṃ ‘‘yattha…pe… ayaṃ kuṭīti saṅkhyaṃ na gacchatī’’ti iminā virujjhati vaḍḍhakīhatthena tihatthāyapi kuṭiyā pamāṇayuttassa mañcassa sukhena parivattanato. ‘‘Ūnakacatuhatthā vā’’ti idañca pacchimappamāṇayuttassa mañcassa aparivattanārahaṃ sandhāya vuttaṃ. Yadi hi pakatihatthena catuhatthāyapi kuṭiyā pamāṇayutto mañco na parivattati, sā akuṭīyeva, tasmā mañcaparivattanamatteneva pamāṇanti gahetabbaṃ. Pamāṇayutto mañcoti sabbapacchimappamāṇayutto mañco. So hi pakatividatthiyā navavidatthiko, aṭṭhavidatthiko vā hoti, tato khuddako mañco sīsūpadhānaṃ ṭhapetvā pādaṃ pasāretvā nipajjituṃ na pahoti. Pamāṇato ūnatarampīti ukkaṭṭhappamāṇato ūnatarampi, idañca heṭṭhimappamāṇayuttāyapi vatthudesanā kātabbā, na vāti sandehanivattanatthaṃ vuttaṃ.
கலலலேபோதி கேனசி ஸிலேஸேன கதலேபோ, ஸேதரத்தாதி³வண்ணகரணத்த²ங் கததம்ப³மத்திகாதி³கலலலேபோ வா. தேனாஹ ‘‘அலேபோ ஏவா’’தி. தேன தளாகாதீ³ஸு க⁴னேன கலலேன கதப³ஹலலேபோ மத்திகாலேபனே ஏவ பவிஸதி லேபவோஹாரக³மனதோதி த³ஸ்ஸேதி. பிட்ட²ஸங்கா⁴டோ நாம த்³வாரபா³ஹஸங்கா²தோ சதுரஸ்ஸதா³ருஸங்கா⁴டோ, யத்த² ஸஉத்தரபாஸங் கவாடங் அபஸ்ஸாய த்³வாரங் பித³ஹந்தி.
Kalalalepoti kenaci silesena katalepo, setarattādivaṇṇakaraṇatthaṃ katatambamattikādikalalalepo vā. Tenāha ‘‘alepo evā’’ti. Tena taḷākādīsu ghanena kalalena katabahalalepo mattikālepane eva pavisati lepavohāragamanatoti dasseti. Piṭṭhasaṅghāṭo nāma dvārabāhasaṅkhāto caturassadārusaṅghāṭo, yattha sauttarapāsaṃ kavāṭaṃ apassāya dvāraṃ pidahanti.
ஓலோகெத்வாபீதி அபலோகெத்வாபி, அபலோகனகம்மவஸேனாபீதி அத்தோ², அபஸத்³த³ஸ்ஸாபி ஓஆதே³ஸோ கதோதி த³ட்ட²ப்³போ³.
Oloketvāpīti apaloketvāpi, apalokanakammavasenāpīti attho, apasaddassāpi oādeso katoti daṭṭhabbo.
353. நிப³த்³த⁴கோ³சரட்டா²னம்பீதி எத்த² கோ³சராய பக்கமந்தானங் ஹத்தீ²னங் நிப³த்³த⁴க³மனமக்³கோ³பி ஸங்க³ய்ஹதி. ஏதேஸந்தி ஸீஹாதீ³னங். கோ³சரபூ⁴மீதி ஆமிஸக்³க³ஹணட்டா²னங். ந க³ஹிதாதி படிக்கி²பிதப்³ப³பா⁴வேன ந க³ஹிதா, ந வாரிதாதி அத்தோ². ஸீஹாதீ³னஞ்ஹி கோ³சரக்³க³ஹணட்டா²னங் ஹத்தீ²னங் விய நிப³த்³த⁴ங் ந ஹோதி, யத்த² பன கோ³மஹிங்ஸாதி³பாணகா ஸந்தி, தூ³ரம்பி தங் டா²னங் ஸீக⁴ங் க³ந்த்வா கோ³சரங் க³ண்ஹந்தி. தஸ்மா தேஸங் தங் ந வாரிதங், நிப³த்³த⁴க³மனமக்³கோ³வ வாரிதோ ஆஸயதோ க³மனமக்³க³ஸ்ஸ நிப³த்³த⁴த்தா. அஞ்ஞேஸம்பி வாளானந்தி அரஞ்ஞமஹிங்ஸாதீ³னங். ஆரொக்³யத்தா²யாதி நிருபத்³த³வாய. ஸேஸானீதி புப்³ப³ண்ணனிஸ்ஸிதாதீ³னி ஸோளஸ. தானி ச ஜனஸம்மத்³த³மஹாஸம்மத்³த³குடிவிலோபஸரீரபீளாதி³உபத்³த³வேஹி ஸஉபத்³த³வானீதி வேதி³தப்³பா³னி. அபி⁴ஹனந்தி எத்தா²தி அப்³பா⁴கா⁴தங். ‘‘வேரிக⁴ர’’ந்தி வுத்தமேவத்த²ங் விபா⁴வேதுங் ‘‘சோரானங் மாரணத்தா²ய கத’’ந்தி வுத்தங்.
353.Nibaddhagocaraṭṭhānampīti ettha gocarāya pakkamantānaṃ hatthīnaṃ nibaddhagamanamaggopi saṅgayhati. Etesanti sīhādīnaṃ. Gocarabhūmīti āmisaggahaṇaṭṭhānaṃ. Na gahitāti paṭikkhipitabbabhāvena na gahitā, na vāritāti attho. Sīhādīnañhi gocaraggahaṇaṭṭhānaṃ hatthīnaṃ viya nibaddhaṃ na hoti, yattha pana gomahiṃsādipāṇakā santi, dūrampi taṃ ṭhānaṃ sīghaṃ gantvā gocaraṃ gaṇhanti. Tasmā tesaṃ taṃ na vāritaṃ, nibaddhagamanamaggova vārito āsayato gamanamaggassa nibaddhattā. Aññesampi vāḷānanti araññamahiṃsādīnaṃ. Ārogyatthāyāti nirupaddavāya. Sesānīti pubbaṇṇanissitādīni soḷasa. Tāni ca janasammaddamahāsammaddakuṭivilopasarīrapīḷādiupaddavehi saupaddavānīti veditabbāni. Abhihananti etthāti abbhāghātaṃ. ‘‘Verighara’’nti vuttamevatthaṃ vibhāvetuṃ ‘‘corānaṃ māraṇatthāya kata’’nti vuttaṃ.
த⁴ம்மக³ந்தி⁴காதி த⁴ம்மேன த³ண்ட³னீதியா ஹத்த²பாதா³தி³ச்சி²ந்த³னக³ந்தி⁴கா. க³ந்தி⁴காதி ச யஸ்ஸ உபரி ஹத்தா²தி³ங் ட²பெத்வா சி²ந்த³ந்தி, தாதி³ஸங் தா³ருக²ண்ட³ப²லகாதி வுச்சதி, தேன ச உபலக்கி²தங் டா²னங். பாளியங் ரச்சா²னிஸ்ஸிதந்தி ரதி²கானிஸ்ஸிதங். சச்சரனிஸ்ஸிதந்தி சதுன்னங் ரதி²கானங் ஸந்தி⁴னிஸ்ஸிதங். ஸகடேனாதி இட்ட²கஸுதா⁴தி³ப⁴ண்டா³ஹரணஸகடேன.
Dhammagandhikāti dhammena daṇḍanītiyā hatthapādādicchindanagandhikā. Gandhikāti ca yassa upari hatthādiṃ ṭhapetvā chindanti, tādisaṃ dārukhaṇḍaphalakāti vuccati, tena ca upalakkhitaṃ ṭhānaṃ. Pāḷiyaṃ racchānissitanti rathikānissitaṃ. Caccaranissitanti catunnaṃ rathikānaṃ sandhinissitaṃ. Sakaṭenāti iṭṭhakasudhādibhaṇḍāharaṇasakaṭena.
பாசினந்தி ஸேனாஸனஸ்ஸ பூ⁴மிதோ பட்டா²ய யாவ தலாவஸானங் சினிதப்³ப³வத்து²கங் அதி⁴ட்டா²னங், யஸ்ஸ உபரி பி⁴த்தித²ம்பா⁴தீ³னி ச பதிட்ட²பெந்தி. தேனாஹ ‘‘ததோ பட்டா²யா’’திஆதி³. கிஞ்சாபி இத⁴ புப்³ப³பயோக³ஸஹபயோகா³னங் அதி³ன்னாதா³னே விய விஸேஸோ நத்தி², ததா²பி தேஸங் விபா⁴கே³ன த³ஸ்ஸனங் பி⁴ந்தி³த்வா வா புன காதப்³பா³தி எத்த² குடியா பே⁴தே³ன பரிச்சே²த³த³ஸ்ஸனத்த²ங் கதங். தத³த்தா²யாதி தச்ச²னத்தா²ய. ஏவங் கதந்தி அதே³ஸிதவத்து²கங் பமாணாதிக்கந்தங் வா கதங். பண்ணஸாலந்தி பண்ணகுடியா திணபண்ணசுண்ணஸ்ஸ அபரிபதனத்தா²ய அந்தோ ச ப³ஹி ச லிம்பந்தி, தங் ஸந்தா⁴யேதங் வுத்தங். தேனேவ வக்க²தி ‘‘பண்ணஸாலங் லிம்பதீ’’தி.
Pācinanti senāsanassa bhūmito paṭṭhāya yāva talāvasānaṃ cinitabbavatthukaṃ adhiṭṭhānaṃ, yassa upari bhittithambhādīni ca patiṭṭhapenti. Tenāha ‘‘tato paṭṭhāyā’’tiādi. Kiñcāpi idha pubbapayogasahapayogānaṃ adinnādāne viya viseso natthi, tathāpi tesaṃ vibhāgena dassanaṃ bhinditvā vā puna kātabbāti ettha kuṭiyā bhedena paricchedadassanatthaṃ kataṃ. Tadatthāyāti tacchanatthāya. Evaṃ katanti adesitavatthukaṃ pamāṇātikkantaṃ vā kataṃ. Paṇṇasālanti paṇṇakuṭiyā tiṇapaṇṇacuṇṇassa aparipatanatthāya anto ca bahi ca limpanti, taṃ sandhāyetaṃ vuttaṃ. Teneva vakkhati ‘‘paṇṇasālaṃ limpatī’’ti.
அந்தோலேபேனேவ நிட்டா²பேதுகாமங் ஸந்தா⁴ய ‘‘அந்தோலேபே வா’’திஆதி³ வுத்தங். ப³ஹிலேபே வாதி எத்தா²பி ஏஸேவ நயோ. தஸ்மிந்தி த்³வாரப³ந்தே⁴ வா வாதபானே வா ட²பிதேதி யோஜேதப்³ப³ங். தஸ்ஸோகாஸந்தி தஸ்ஸ த்³வாரப³ந்தா⁴தி³ஸ்ஸ ஓகாஸபூ⁴தங் சி²த்³த³ங். புன வட்³டெ⁴த்வாதி புப்³பே³ ட²பிதோகாஸங் கு²த்³த³கங் சே, தங் த்³வாரவாதபானச்சி²த்³த³பே⁴த³னேன புன வட்³டெ⁴த்வா. ட²பிதேதி த்³வாரப³ந்தே⁴ வா க³வக்க²ஸங்கா⁴டே வா ஆனெத்வா தஸ்மிங் வட்³டி⁴தே வா அவட்³டி⁴தே வா சி²த்³தே³ பதிட்டா²பிதே. லேபோ ந க⁴டீயதீதி ஸமந்ததோ தி³ன்னோ லேபோ ததா² ட²பிதேன த்³வாரப³ந்த⁴னேன வா வாதபானேன வா ஸத்³தி⁴ங் ந க⁴டீயதி, ஏகாப³த்³த⁴ங் ந ஹோதீதி வுத்தங் ஹோதி. தந்தி த்³வாரப³ந்த⁴ங் வா வாதபானங் வா. பட²மமேவ ஸங்கா⁴தி³ஸேஸோதி தேஸங் ஸமந்ததோ புப்³பே³வ லேபஸ்ஸ க⁴டெத்வா நிட்டா²பிதத்தா த்³வாரப³ந்த⁴வாதபானானங் ட²பனதோ புப்³பே³ ஏவ ஸங்கா⁴தி³ஸேஸோ.
Antolepeneva niṭṭhāpetukāmaṃ sandhāya ‘‘antolepe vā’’tiādi vuttaṃ. Bahilepe vāti etthāpi eseva nayo. Tasminti dvārabandhe vā vātapāne vā ṭhapiteti yojetabbaṃ. Tassokāsanti tassa dvārabandhādissa okāsabhūtaṃ chiddaṃ. Puna vaḍḍhetvāti pubbe ṭhapitokāsaṃ khuddakaṃ ce, taṃ dvāravātapānacchiddabhedanena puna vaḍḍhetvā. Ṭhapiteti dvārabandhe vā gavakkhasaṅghāṭe vā ānetvā tasmiṃ vaḍḍhite vā avaḍḍhite vā chidde patiṭṭhāpite. Lepo na ghaṭīyatīti samantato dinno lepo tathā ṭhapitena dvārabandhanena vā vātapānena vā saddhiṃ na ghaṭīyati, ekābaddhaṃ na hotīti vuttaṃ hoti. Tanti dvārabandhaṃ vā vātapānaṃ vā. Paṭhamameva saṅghādisesoti tesaṃ samantato pubbeva lepassa ghaṭetvā niṭṭhāpitattā dvārabandhavātapānānaṃ ṭhapanato pubbe eva saṅghādiseso.
லேபக⁴டனேனேவாதி இட்ட²காஹி கதவாதபானாதீ³னி வினா ஸமந்தா லேபக⁴டனேனேவ ஆபத்தி வாதபானாதீ³னங் அலேபோகாஸத்தா, இட்ட²காஹி கதத்தா வா, வாதபானாதீ³ஸுபி லேபஸ்ஸ பி⁴த்திலேபேன ஸத்³தி⁴ங் க⁴டனேனேவாதிபி அத்த²ங் வத³ந்தி. தத்தா²தி பண்ணஸாலாயங். ஆலோகத்தா²ய அட்ட²ங்கு³லமத்தங் ட²பெத்வா லிம்பதீதி தா³ருகுட்டஸ்ஸ தா³ரூனமந்தரா அட்ட²ங்கு³லமத்தங் விவரங் யாவ லிம்பதி, தாவ ஆலோகத்தா²ய ட²பெத்வா அவஸேஸங் ஸகுட்டச்ச²த³னங் லிம்பதி, பச்சா² ஏதங் விவரங் லிம்பிஸ்ஸாமீதி ஏவங் ட²பனே அனாபத்தீதி அதி⁴ப்பாயோ. ஸசே பன ஏவங் அகத்வா ஸப்³ப³தா³பி ஆலோகத்தா²ய வாதபானவஸேன ட²பேதி, வாதபானத்³வாரஸங்கா⁴டே க⁴டிதே லேபோ ச க⁴டீயதி, பட²மமேவ ஸங்கா⁴தி³ஸேஸோதி த³ஸ்ஸெந்தோ ஆஹ ‘‘ஸசே’’திஆதி³. மத்திகாகுட்டமேவ மத்திகாலேபஸங்க்²யங் க³ச்ச²தீதி ஆஹ ‘‘ஸசே மத்திகாய குட்டங் கரோதி, ச²த³னலேபேன ஸத்³தி⁴ங் க⁴டனே ஆபத்தீ’’தி. உபி⁴ன்னங் அனாபத்தீதி புரிமஸ்ஸ லேபஸ்ஸ அக⁴டிதத்தா து³தியஸ்ஸ அத்துத்³தே³ஸிகதாய அஸம்ப⁴வதோ.
Lepaghaṭanenevāti iṭṭhakāhi katavātapānādīni vinā samantā lepaghaṭaneneva āpatti vātapānādīnaṃ alepokāsattā, iṭṭhakāhi katattā vā, vātapānādīsupi lepassa bhittilepena saddhiṃ ghaṭanenevātipi atthaṃ vadanti. Tatthāti paṇṇasālāyaṃ. Ālokatthāya aṭṭhaṅgulamattaṃ ṭhapetvā limpatīti dārukuṭṭassa dārūnamantarā aṭṭhaṅgulamattaṃ vivaraṃ yāva limpati, tāva ālokatthāya ṭhapetvā avasesaṃ sakuṭṭacchadanaṃ limpati, pacchā etaṃ vivaraṃ limpissāmīti evaṃ ṭhapane anāpattīti adhippāyo. Sace pana evaṃ akatvā sabbadāpi ālokatthāya vātapānavasena ṭhapeti, vātapānadvārasaṅghāṭe ghaṭite lepo ca ghaṭīyati, paṭhamameva saṅghādisesoti dassento āha ‘‘sace’’tiādi. Mattikākuṭṭameva mattikālepasaṅkhyaṃ gacchatīti āha ‘‘sace mattikāya kuṭṭaṃ karoti, chadanalepena saddhiṃ ghaṭane āpattī’’ti. Ubhinnaṃ anāpattīti purimassa lepassa aghaṭitattā dutiyassa attuddesikatāya asambhavato.
354. ஆபத்திபே⁴த³த³ஸ்ஸனத்த²ந்தி தத்த² ‘‘ஸாரம்பே⁴ ச அபரிக்கமனே ச து³க்கடங் அதே³ஸிதவத்து²கதாய , பமாணாதிக்கந்ததாய ச ஸங்கா⁴தி³ஸேஸோ’’தி ஏவங் ஆபத்தியேவ விபா⁴க³த³ஸ்ஸனத்த²ங்.
354.Āpattibhedadassanatthanti tattha ‘‘sārambhe ca aparikkamane ca dukkaṭaṃ adesitavatthukatāya , pamāṇātikkantatāya ca saṅghādiseso’’ti evaṃ āpattiyeva vibhāgadassanatthaṃ.
361. அனிட்டி²தே குடிகம்மேதி லேபபரியோஸானே குடிகம்மே ஏகபிண்ட³மத்தேனபி அனிட்டி²தே. ‘‘அஞ்ஞஸ்ஸ புக்³க³லஸ்ஸ வா’’தி இத³ங் மூலட்ட²ஸ்ஸ அனாபத்தித³ஸ்ஸனத்த²ங் வுத்தங். யேன பன லத்³த⁴ங், தஸ்ஸாபி தங் நிட்டா²பெந்தஸ்ஸ ‘‘பரேஹி விப்பகதங் அத்தனா பரியோஸாபேதி, ஆபத்தி ஸங்கா⁴தி³ஸேஸஸ்ஸா’’திஆதி³வசனதோ (பாரா॰ 363) ஆபத்தியேவ. புப்³பே³ கதகம்மம்பி லத்³த⁴காலதோ பட்டா²ய அத்தனோ அத்தா²யேவ கதங் நாம ஹோதி, தஸ்மா தேனாபி ஸங்க⁴ஸ்ஸ வா ஸாமணேராதீ³னங் வா த³த்வா நிட்டா²பேதப்³ப³ங். ‘‘அஞ்ஞஸ்ஸ வா’’தி இத³ங் அனுபஸம்பன்னங்யேவ ஸந்தா⁴ய வுத்தந்தி க³ஹேதப்³ப³ங், கேசி பன ‘‘பரதோ லத்³தா⁴ய குடியா நிட்டா²பனே அனாபத்திஆதி³தோ பட்டா²ய அத்தனோ அத்தா²ய அகதத்தா’’தி வத³ந்தி. அபசினிதப்³பா³தி யாவ பாசினா வித்³த⁴ங்ஸேதப்³பா³. பூ⁴மிஸமங் கத்வாதி பாசினதலாவஸானங் கத்வா.
361.Aniṭṭhite kuṭikammeti lepapariyosāne kuṭikamme ekapiṇḍamattenapi aniṭṭhite. ‘‘Aññassa puggalassa vā’’ti idaṃ mūlaṭṭhassa anāpattidassanatthaṃ vuttaṃ. Yena pana laddhaṃ, tassāpi taṃ niṭṭhāpentassa ‘‘parehi vippakataṃ attanā pariyosāpeti, āpatti saṅghādisesassā’’tiādivacanato (pārā. 363) āpattiyeva. Pubbe katakammampi laddhakālato paṭṭhāya attano atthāyeva kataṃ nāma hoti, tasmā tenāpi saṅghassa vā sāmaṇerādīnaṃ vā datvā niṭṭhāpetabbaṃ. ‘‘Aññassa vā’’ti idaṃ anupasampannaṃyeva sandhāya vuttanti gahetabbaṃ, keci pana ‘‘parato laddhāya kuṭiyā niṭṭhāpane anāpattiādito paṭṭhāya attano atthāya akatattā’’ti vadanti. Apacinitabbāti yāva pācinā viddhaṃsetabbā. Bhūmisamaṃ katvāti pācinatalāvasānaṃ katvā.
364. லேணந்தி பப்³ப³தலேணங். ந ஹெத்த² லேபோ க⁴டீயதீதி ச²த³னலேபஸ்ஸ அபா⁴வதோ வுத்தங், விஸுங் ஏவ வா அனுஞ்ஞாதத்தா. ஸசே லேணஸ்ஸ அந்தோ உபரிபா⁴கே³ சித்தகம்மாதி³கரணத்த²ங் லேபங் தெ³ந்தி, உல்லித்தகுடிஸங்க்²யங் ந க³ச்ச²தி, வட்டதி ஏவ. இட்ட²காதீ³ஹி கதங் சதுரஸ்ஸகூடாகா³ரஸண்டா²னங் ஏககண்ணிகாப³த்³த⁴ங் நாதிஉச்சங் படிஸ்ஸயவிஸேஸங் ‘‘கு³ஹா’’தி வத³ந்தி, தாதி³ஸங் மஹந்தம்பி உல்லித்தாவலித்தங் கரொந்தஸ்ஸ அனாபத்தி. பூ⁴மிகு³ஹந்தி உமங்க³கு³ஹங்.
364.Leṇanti pabbataleṇaṃ. Na hettha lepo ghaṭīyatīti chadanalepassa abhāvato vuttaṃ, visuṃ eva vā anuññātattā. Sace leṇassa anto uparibhāge cittakammādikaraṇatthaṃ lepaṃ denti, ullittakuṭisaṅkhyaṃ na gacchati, vaṭṭati eva. Iṭṭhakādīhi kataṃ caturassakūṭāgārasaṇṭhānaṃ ekakaṇṇikābaddhaṃ nātiuccaṃ paṭissayavisesaṃ ‘‘guhā’’ti vadanti, tādisaṃ mahantampi ullittāvalittaṃ karontassa anāpatti. Bhūmiguhanti umaṅgaguhaṃ.
அட்ட²கதா²ஸூதி குக்குடச்சி²ககே³ஹந்திஆதீ³ஸு அட்ட²கதா²ஸு திணகுடிகா குக்குடச்சி²ககே³ஹந்தி வத்வா புன தங் விவரந்தேஹி அட்ட²கதா²சரியேஹி ச²த³னங் த³ண்ட³கேஹி…பே॰… வுத்தாதி யோஜனா த³ட்ட²ப்³பா³. தத்த² த³ண்ட³கேஹி ஜாலப³த்³த⁴ங் கத்வாதி தீ³க⁴தோ, திரியதோ ச ட²பெத்வா வல்லியாதீ³ஹி ப³த்³த⁴த³ண்ட³கேஹி ஜாலங் விய கத்வா. ஸோ சாதி உல்லித்தாதி³பா⁴வோ. ச²த³னமேவ ஸந்தா⁴ய வுத்தோதி ச²த³னஸ்ஸ அந்தோ ச ப³ஹி ச லிம்பனமேவ ஸந்தா⁴ய வுத்தோ. மத்திகாகுட்டே பி⁴த்திலேபங் வினாபி பி⁴த்தியா ஸத்³தி⁴ங் ச²த³னலேபஸ்ஸ க⁴டனமத்தேனாபி ஆபத்திஸம்ப⁴வதோ ச²த³னலேபோவ பதா⁴னந்தி வேதி³தப்³ப³ங். கிஞ்சாபி ஏவங், அத² கோ² ‘‘உபசிகாமோசனத்த²மேவ ஹெட்டா² பாஸாணகுட்டங் கத்வா தங் அலிம்பித்வா உபரி லிம்பதி, லேபோ ந க⁴டீயதி நாம, அனாபத்தியேவா’’திஆதி³வசனதோ பன ச²த³னலேபக⁴டனத்த²ங் ஸகலாயபி பி⁴த்தியா லேபோ அவஸ்ஸங் இச்சி²தப்³போ³வ தஸ்ஸா ஏகதே³ஸஸ்ஸ அலேபேபி ச²த³னலேபஸ்ஸ அக⁴டனதோ. தேனாஹ ‘‘லேபோ ந க⁴டீயதீ’’தி. எத்தா²தி திணகுடிகாயங். ந கேவலஞ்ச திணகுடிகாயங் ஏவ, லேணகு³ஹாதீ³ஸுபி ஸாரம்பா⁴பரிக்கமனபச்சயாபி அனாபத்தி ஏவ, இமினா பன நயேன அஞ்ஞஸ்ஸத்தா²ய குடிங் கரொந்தஸ்ஸாபி ஸாரம்பா⁴தி³பச்சயாபி அனாபத்திபா⁴வோ அத்த²தோ த³ஸ்ஸிதோ ஏவ ஹோதீதி.
Aṭṭhakathāsūti kukkuṭacchikagehantiādīsu aṭṭhakathāsu tiṇakuṭikā kukkuṭacchikagehanti vatvā puna taṃ vivarantehi aṭṭhakathācariyehi chadanaṃ daṇḍakehi…pe… vuttāti yojanā daṭṭhabbā. Tattha daṇḍakehi jālabaddhaṃ katvāti dīghato, tiriyato ca ṭhapetvā valliyādīhi baddhadaṇḍakehi jālaṃ viya katvā. So cāti ullittādibhāvo. Chadanameva sandhāya vuttoti chadanassa anto ca bahi ca limpanameva sandhāya vutto. Mattikākuṭṭe bhittilepaṃ vināpi bhittiyā saddhiṃ chadanalepassa ghaṭanamattenāpi āpattisambhavato chadanalepova padhānanti veditabbaṃ. Kiñcāpi evaṃ, atha kho ‘‘upacikāmocanatthameva heṭṭhā pāsāṇakuṭṭaṃ katvā taṃ alimpitvā upari limpati, lepo na ghaṭīyati nāma, anāpattiyevā’’tiādivacanato pana chadanalepaghaṭanatthaṃ sakalāyapi bhittiyā lepo avassaṃ icchitabbova tassā ekadesassa alepepi chadanalepassa aghaṭanato. Tenāha ‘‘lepo na ghaṭīyatī’’ti. Etthāti tiṇakuṭikāyaṃ. Na kevalañca tiṇakuṭikāyaṃ eva, leṇaguhādīsupi sārambhāparikkamanapaccayāpi anāpatti eva, iminā pana nayena aññassatthāya kuṭiṃ karontassāpi sārambhādipaccayāpi anāpattibhāvo atthato dassito eva hotīti.
தத்த² பாளிவிரோத⁴ங் பரிஹரிதுங் ‘‘யங் பனா’’திஆதி³ வுத்தங். அயஞ்ஹெத்த² அதி⁴ப்பாயோ – அஞ்ஞஸ்ஸ உபஜ்ஜா²யாதி³னோ அத்தா²ய கரொந்தஸ்ஸ ஸாரம்பா⁴தி³பச்சயாபி அனாபத்தி ஏவ, யங் பன பாளியங் ‘‘ஆபத்திகாருகானங் திண்ணங் து³க்கடான’’ந்திஆதி³வசனங், தங் அஞ்ஞஸ்ஸத்தா²ய கரொந்தஸ்ஸ, ந ஸாரம்பா⁴தி³பச்சயா ஆபத்தித³ஸ்ஸனத்த²ங் வுத்தங், கிஞ்சரஹி யதா²ஸமாதி³ட்டா²ய குடியா அகரணபச்சயா ஆபத்தித³ஸ்ஸனத்த²ந்தி. தத்த² யதா²ஸமாதி³ட்டா²யாதி ‘‘பி⁴க்கு² ஸமாதி³ஸித்வா பக்கமதி, ‘குடிங் மே கரோதா²’தி ஸமாதி³ஸதி ச, தே³ஸிதவத்து²கா ச ஹோது அனாரம்பா⁴ ச ஸபரிக்கமனா சா’’தி ஏவங் காராபகேன ஆணத்திக்கமங் முஞ்சித்வா கரணபச்சயாதி அதி⁴ப்பாயோ. கத்த²சி பன பொத்த²கே ‘‘குடிலக்க²ணப்பத்தம்பி குடிங் அஞ்ஞஸ்ஸ…பே॰… கரொந்தஸ்ஸ அனாபத்தீ’’தி இமஸ்ஸ பாட²ஸ்ஸ அனந்தரங் ‘‘யங் பன ஆபத்தி காருகான’’ந்திஆதி³பாடோ² தி³ஸ்ஸதி, ஸோவ யுத்ததரோ. ஏவஞ்ஹி ஸதி தத்த² அதி⁴ப்பாயோ பாகடோ ஹோதி.
Tattha pāḷivirodhaṃ pariharituṃ ‘‘yaṃ panā’’tiādi vuttaṃ. Ayañhettha adhippāyo – aññassa upajjhāyādino atthāya karontassa sārambhādipaccayāpi anāpatti eva, yaṃ pana pāḷiyaṃ ‘‘āpattikārukānaṃ tiṇṇaṃ dukkaṭāna’’ntiādivacanaṃ, taṃ aññassatthāya karontassa, na sārambhādipaccayā āpattidassanatthaṃ vuttaṃ, kiñcarahi yathāsamādiṭṭhāya kuṭiyā akaraṇapaccayā āpattidassanatthanti. Tattha yathāsamādiṭṭhāyāti ‘‘bhikkhu samādisitvā pakkamati, ‘kuṭiṃ me karothā’ti samādisati ca, desitavatthukā ca hotu anārambhā ca saparikkamanā cā’’ti evaṃ kārāpakena āṇattikkamaṃ muñcitvā karaṇapaccayāti adhippāyo. Katthaci pana potthake ‘‘kuṭilakkhaṇappattampi kuṭiṃ aññassa…pe… karontassa anāpattī’’ti imassa pāṭhassa anantaraṃ ‘‘yaṃ pana āpatti kārukāna’’ntiādipāṭho dissati, sova yuttataro. Evañhi sati tattha adhippāyo pākaṭo hoti.
அனாபத்தீதி வத்வாதி வாஸாகா³ரத்தா²ய ஏவ அனியமிதத்தா அனாபத்தீதி வத்வா. அதே³ஸாபெத்வா கரோதோதி பமாணயுத்தம்பி கரோதோ. அசித்தகந்தி பண்ணத்திஅஜானநசித்தேன அசித்தகங். உல்லித்தாதீ³னங் அஞ்ஞதரதா, ஹெட்டி²மப்பமாணஸம்ப⁴வோ, அதே³ஸிதவத்து²கதா, பமாணாதிக்கந்ததா, அத்துத்³தே³ஸிகதா, வாஸாகா³ரதா, லேபக⁴டனாதி ஸத்த வா பமாணயுத்தங்கா³தீ³ஸு ச² வா அங்கா³னி.
Anāpattīti vatvāti vāsāgāratthāya eva aniyamitattā anāpattīti vatvā. Adesāpetvā karototi pamāṇayuttampi karoto. Acittakanti paṇṇattiajānanacittena acittakaṃ. Ullittādīnaṃ aññataratā, heṭṭhimappamāṇasambhavo, adesitavatthukatā, pamāṇātikkantatā, attuddesikatā, vāsāgāratā, lepaghaṭanāti satta vā pamāṇayuttaṅgādīsu cha vā aṅgāni.
குடிகாரஸிக்கா²பத³வண்ணனா நிட்டி²தா.
Kuṭikārasikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 6. குடிகாரஸிக்கா²பத³ங் • 6. Kuṭikārasikkhāpadaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 6. குடிகாரஸிக்கா²பத³வண்ணனா • 6. Kuṭikārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / 6. குடிகாரஸிக்கா²பத³வண்ணனா • 6. Kuṭikārasikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 6. குடிகாரஸிக்கா²பத³வண்ணனா • 6. Kuṭikārasikkhāpadavaṇṇanā
