| Library / Tipiṭaka / д̇ибидага • Tipiṭaka / саарад̇т̇ад̣̇ийбаний-дийгаа • Sāratthadīpanī-ṭīkā |
6. гудигаарасигкаабад̣̇аван̣н̣анаа
6. Kuṭikārasikkhāpadavaṇṇanā
342. чадтз зд̇д̇агзнаад̇и зд̇д̇агзна д̣̇ааруаад̣̇инаа. абарижчиннаббамаан̣ааяод̇и абарижчиннад̣̇ааруаад̣̇иббамаан̣ааяо. муулажчзж̇ж̇ааяа бурисам̣ яаажид̇ум̣ на ваддад̇ийд̇и барасанд̇агабхаавад̇о можзд̇ваа ад̇д̇аноязва санд̇агам̣ гад̇ваа яаажид̇ум̣ на ваддад̇и. звам̣ муулажчзж̇ж̇ааяа ан̃н̃аад̇агааббаваарид̇адтаанад̇о яаажанд̇асса ан̃н̃аад̇агавин̃н̃ад̇д̇ияаа д̣̇уггадам̣. д̣̇аасам̣ ад̇д̇ано ад̇т̇ааяа саад̣̇ияанд̇ассаби д̣̇уггадамзва ‘‘д̣̇аасид̣̇аасабадиг̇г̇ахан̣аа бадивирад̇о ход̇ий’’д̇и (д̣̇ий. ни. 1.10, 194) важанад̇о. н̃аад̇агабаваарид̇адтаанад̇о бана д̣̇аасам̣ муулажчзж̇ж̇ааяа яаажанд̇асса саад̣̇ияанавасзна д̣̇уггадам̣. сагагаммам̣ на яаажид̇аб̣б̣аад̇и баан̣аад̇ибаад̇асигкаабад̣̇арагкан̣ад̇т̇ам̣ вуд̇д̇ам̣. анияамзд̇вааби на яаажид̇аб̣б̣аад̇и мануссаанам̣ ан̃н̃ат̇аа г̇аахассаби самбхавад̇о вуд̇д̇ам̣, суд̣̇д̇хажид̇д̇зна бана хад̇т̇агаммам̣ яаажанд̇асса аабад̇д̇и наама над̇т̇и.
342. Chaṭṭhe ettakenāti ettakena dāruādinā. Aparicchinnappamāṇāyoti aparicchinnadāruādippamāṇāyo. Mūlacchejjāya purisaṃ yācituṃ na vaṭṭatīti parasantakabhāvato mocetvā attanoyeva santakaṃ katvā yācituṃ na vaṭṭati. Evaṃ mūlacchejjāya aññātakaappavāritaṭṭhānato yācantassa aññātakaviññattiyā dukkaṭaṃ. Dāsaṃ attano atthāya sādiyantassapi dukkaṭameva ‘‘dāsidāsapaṭiggahaṇā paṭivirato hotī’’ti (dī. ni. 1.10, 194) vacanato. Ñātakapavāritaṭṭhānato pana dāsaṃ mūlacchejjāya yācantassa sādiyanavasena dukkaṭaṃ. Sakakammaṃ na yācitabbāti pāṇātipātasikkhāpadarakkhaṇatthaṃ vuttaṃ. Aniyametvāpi na yācitabbāti manussānaṃ aññathā gāhassapi sambhavato vuttaṃ, suddhacittena pana hatthakammaṃ yācantassa āpatti nāma natthi.
саб̣б̣агаббияабхаавад̣̇ийбанад̇т̇анд̇и саб̣б̣асо габбияабхаавад̣̇ийбанад̇т̇ам̣. муулам̣ д̣̇зт̇аад̇и вад̇д̇ум̣ ваддад̇ийд̇и яасмаа муулам̣ д̣̇ассаамаад̇и д̇зхи батамам̣ вуд̇д̇ад̇д̇аа вин̃н̃ад̇д̇и на ход̇и, яасмаа жа мууланд̇и бхан̣ид̇ам̣ сааман̃н̃аважанад̇о агаббияаважанам̣ на ход̇и, д̇асмаа муулам̣ д̣̇зт̇аад̇и вад̇д̇ум̣ ваддад̇и. анаж̇жхаавуд̇т̇аганд̇и абариг̇г̇ахид̇ам̣. агаббияагахаабан̣аад̣̇и на д̣̇аад̇аб̣б̣анд̇и гин̃жааби агаббияагахаабан̣аад̣̇им̣ асаад̣̇ияанд̇зна габбияавохаарад̇о д̣̇аад̇ум̣ ваддад̇и, д̇ат̇ааби сааруббам̣ на ход̇и. мануссаа жа зд̇асса санд̇агам̣ гин̃жи ад̇т̇ийд̇и вихзтзд̇аб̣б̣ам̣ ман̃н̃анд̇ийд̇и агаббияагахаабан̣аад̣̇ид̣̇аанам̣ бадигкид̇д̇ам̣. д̇ат̇зва баажзд̇ваад̇и хад̇т̇агаммавасзнзва баажзд̇ваа. ‘‘гим̣, бханд̇з’’д̇и зд̇д̇агзби бужчид̇з яад̣̇ад̇т̇ааяа бавидто, д̇ам̣ гат̇зд̇ум̣ ваддад̇и бужчид̇абан̃хад̇д̇аа.
Sabbakappiyabhāvadīpanatthanti sabbaso kappiyabhāvadīpanatthaṃ. Mūlaṃ dethāti vattuṃ vaṭṭatīti yasmā mūlaṃ dassāmāti tehi paṭhamaṃ vuttattā viññatti na hoti, yasmā ca mūlanti bhaṇitaṃ sāmaññavacanato akappiyavacanaṃ na hoti, tasmā mūlaṃ dethāti vattuṃ vaṭṭati. Anajjhāvutthakanti apariggahitaṃ. Akappiyakahāpaṇādi na dātabbanti kiñcāpi akappiyakahāpaṇādiṃ asādiyantena kappiyavohārato dātuṃ vaṭṭati, tathāpi sāruppaṃ na hoti. Manussā ca etassa santakaṃ kiñci atthīti viheṭhetabbaṃ maññantīti akappiyakahāpaṇādidānaṃ paṭikkhittaṃ. Tatheva pācetvāti hatthakammavaseneva pācetvā. ‘‘Kiṃ, bhante’’ti ettakepi pucchite yadatthāya paviṭṭho, taṃ kathetuṃ vaṭṭati pucchitapañhattā.
вад̇д̇анд̇и жаарид̇д̇ам̣, аабад̇д̇и бана на ход̇ийд̇и ад̇хиббааяо. габбияам̣ гаараабзд̇ваа бадиг̇г̇ахзд̇аб̣б̣аанийд̇и саакааяа лаг̇г̇араж̇асмим̣ бад̇д̇з бад̇ид̇зби саакам̣ чинд̣̇ид̇ваа каад̣̇ид̇угаамад̇ааяаби сад̇и сукабарибхог̇ад̇т̇ам̣ вуд̇д̇ам̣. ‘‘над̣̇им̣ ваа…бз… аахараа’’д̇и вад̇т̇ум̣ ваддад̇ийд̇и абариг̇г̇ахид̇ад̇д̇аа вуд̇д̇ам̣. г̇зхад̇о…бз… барибхун̃ж̇ид̇аб̣б̣анд̇и бариг̇г̇ахид̇ауд̣̇агад̇д̇аа вин̃н̃ад̇д̇ияаа д̣̇уггадам̣ ход̇ийд̇и ад̇хиббааяо. алаж̇ж̇ийхи…бз… на гаарзд̇аб̣б̣анд̇и ид̣̇ам̣ уд̇д̇арибхан̇г̇аад̇хигаарад̇д̇аа аж̇жхохаран̣ийяам̣ санд̇хааяа вуд̇д̇ам̣. б̣аахирабарибхог̇зсу бана алаж̇ж̇ийхиби хад̇т̇агаммам̣ гаарзд̇ум̣ ваддад̇ийд̇и.
Vattanti cārittaṃ, āpatti pana na hotīti adhippāyo. Kappiyaṃ kārāpetvā paṭiggahetabbānīti sākhāya laggarajasmiṃ patte patitepi sākhaṃ chinditvā khāditukāmatāyapi sati sukhaparibhogatthaṃ vuttaṃ. ‘‘Nadiṃ vā…pe… āharā’’ti vatthuṃ vaṭṭatīti apariggahitattā vuttaṃ. Gehato…pe… paribhuñjitabbanti pariggahitaudakattā viññattiyā dukkaṭaṃ hotīti adhippāyo. Alajjīhi…pe… na kāretabbanti idaṃ uttaribhaṅgādhikārattā ajjhoharaṇīyaṃ sandhāya vuttaṃ. Bāhiraparibhogesu pana alajjīhipi hatthakammaṃ kāretuṃ vaṭṭatīti.
г̇он̣ам̣ бана…бз… аахараабзд̇ум̣ на ваддад̇ийд̇и ад̇д̇ано ад̇т̇ааяа муулажчзж̇ж̇авасзна аахараабзд̇ум̣ на ваддад̇и. аахараабзнд̇асса д̣̇уггаданд̇и ан̃н̃аад̇агавин̃н̃ад̇д̇ияаа д̣̇уггадам̣. ад̇д̇ано ад̇т̇ааяа саад̣̇ияанзби д̣̇уггадамзва ‘‘хад̇т̇иг̇аваассавал̣авабадиг̇г̇ахан̣аа бадивирад̇о ход̇ий’’д̇и (д̣̇ий. ни. 1.10, 194) вуд̇д̇ад̇д̇аа. д̇знзвааха ‘‘н̃аад̇агабаваарид̇адтаанад̇оби муулажчзж̇ж̇ааяа яаажид̇ум̣ на ваддад̇ий’’д̇и. рагкид̇ваад̇и яат̇аа жораа на харанд̇и, звам̣ рагкид̇ваа. ж̇аг̇г̇ид̇ваад̇и д̇ин̣ад̣̇аанаад̣̇ийхи ж̇аг̇г̇ид̇ваа. на самбадижчид̇аб̣б̣анд̇и ад̇д̇ано ад̇т̇ааяа г̇он̣з саад̣̇ияанасса бадигкид̇д̇ад̇д̇аа вуд̇д̇ам̣.
Goṇaṃ pana…pe… āharāpetuṃ na vaṭṭatīti attano atthāya mūlacchejjavasena āharāpetuṃ na vaṭṭati. Āharāpentassa dukkaṭanti aññātakaviññattiyā dukkaṭaṃ. Attano atthāya sādiyanepi dukkaṭameva ‘‘hatthigavāssavaḷavapaṭiggahaṇā paṭivirato hotī’’ti (dī. ni. 1.10, 194) vuttattā. Tenevāha ‘‘ñātakapavāritaṭṭhānatopi mūlacchejjāya yācituṃ na vaṭṭatī’’ti. Rakkhitvāti yathā corā na haranti, evaṃ rakkhitvā. Jaggitvāti tiṇadānādīhi jaggitvā. Na sampaṭicchitabbanti attano atthāya goṇe sādiyanassa paṭikkhittattā vuttaṃ.
сагадам̣ д̣̇зт̇аад̇и…бз… ваддад̇ийд̇и муулажчзж̇ж̇авасзна сагадам̣ д̣̇зт̇аад̇и вад̇д̇ум̣ на ваддад̇и. д̇аавагаалигам̣ ваддад̇ийд̇и д̇аавагаалигам̣ гад̇ваа саб̣б̣ад̇т̇а яаажид̇ум̣ ваддад̇и. валлиаад̣̇ийсу жа барабариг̇г̇ахид̇зсу зсзва наяод̇и яож̇зд̇аб̣б̣ам̣ . г̇арубхан̣д̣аббахонагзсуязва жа валлиаад̣̇ийсууд̇и зд̇т̇а аад̣̇и-сад̣̇д̣̇зна взл̣умун̃ж̇абаб̣б̣аж̇ад̇ин̣амад̇д̇игаанам̣ сан̇г̇ахо д̣̇адтаб̣б̣о. яам̣ бана вад̇т̇увасзна аббам̣ худ̇ваа аг̇гхавасзна маханд̇ам̣ харид̇аалахин̇г̇улагаад̣̇и, д̇ам̣ г̇арубхан̣д̣ам̣ аббахонд̇амби яаажид̇ум̣ на ваддад̇ийд̇и вад̣̇анд̇и.
Sakaṭaṃ dethāti…pe… vaṭṭatīti mūlacchejjavasena sakaṭaṃ dethāti vattuṃ na vaṭṭati. Tāvakālikaṃ vaṭṭatīti tāvakālikaṃ katvā sabbattha yācituṃ vaṭṭati. Valliādīsu ca parapariggahitesu eseva nayoti yojetabbaṃ . Garubhaṇḍappahonakesuyeva ca valliādīsūti ettha ādi-saddena veḷumuñjapabbajatiṇamattikānaṃ saṅgaho daṭṭhabbo. Yaṃ pana vatthuvasena appaṃ hutvā agghavasena mahantaṃ haritālahiṅgulakādi, taṃ garubhaṇḍaṃ appahontampi yācituṃ na vaṭṭatīti vadanti.
саад̇и вин̃н̃ад̇д̇им̣ бараамасад̇и. саа жа ид̇ха баригат̇аад̣̇инаа язна гзнажи ад̇хиббааяавин̃н̃аабанам̣ вин̃н̃ад̇д̇ийд̇и г̇ахзд̇аб̣б̣аа. д̇знааха ‘‘саб̣б̣зна саб̣б̣а’’нд̇и, саб̣б̣аббагаарзнаад̇и ад̇т̇о. д̇зна ‘‘баригат̇аад̣̇ивасзнаби вин̃н̃аабанам̣ на ваддад̇ий’’д̇и д̣̇ийбзд̇и. баригат̇обхаасанимид̇д̇агаммамби хи жийварабин̣д̣абаад̇зсу д̣̇вийсу бажжаязсу на ваддад̇и. ид̣̇аани сзнаасанабажжаяз ад̇хиббзд̇ам̣ вин̃н̃ад̇д̇им̣ баригат̇аад̣̇ийхи висзсзд̇ваа д̣̇ассзнд̇о ‘‘аахара д̣̇зхийд̇и вин̃н̃ад̇д̇имад̇д̇амзва на ваддад̇ий’’д̇и ааха. баригат̇обхаасанимид̇д̇агаммаани вадданд̇ийд̇и зд̇т̇а баригат̇аа наама барияааязна гат̇анам̣ бхигкусан̇гхасса сзнаасанам̣ самб̣аад̇ханд̇иаад̣̇иважанам̣. обхаасо наама уж̇угамзва агат̇зд̇ваа яат̇аа ад̇хиббааяо вибхууд̇о ход̇и, звам̣ обхаасанам̣, убаасагаа, д̇умхз гухим̣ васат̇аад̇и? баасаад̣̇з, бханд̇зд̇и. бхигкуунам̣ бана, убаасагаа, баасаад̣̇о на ваддад̇ийд̇иаад̣̇иважанам̣. нимид̇д̇агаммам̣ наама бажжаяз уд̣̇д̣̇исса яат̇аа ад̇хиббааяо вин̃н̃ааяад̇и, звам̣ нимид̇д̇агаммам̣, сзнаасанад̇т̇ам̣ бхуумибаригаммаад̣̇ийни гаронд̇асса ‘‘гим̣, бханд̇з, гароси, го гаараабзд̇ий’’д̇и вуд̇д̇з ‘‘на гожий’’д̇иаад̣̇иважанам̣.
Sāti viññattiṃ parāmasati. Sā ca idha parikathādinā yena kenaci adhippāyaviññāpanaṃ viññattīti gahetabbā. Tenāha ‘‘sabbena sabba’’nti, sabbappakārenāti attho. Tena ‘‘parikathādivasenapi viññāpanaṃ na vaṭṭatī’’ti dīpeti. Parikathobhāsanimittakammampi hi cīvarapiṇḍapātesu dvīsu paccayesu na vaṭṭati. Idāni senāsanapaccaye adhippetaṃ viññattiṃ parikathādīhi visesetvā dassento ‘‘āhara dehīti viññattimattameva na vaṭṭatī’’ti āha. Parikathobhāsanimittakammāni vaṭṭantīti ettha parikathā nāma pariyāyena kathanaṃ bhikkhusaṅghassa senāsanaṃ sambādhantiādivacanaṃ. Obhāso nāma ujukameva akathetvā yathā adhippāyo vibhūto hoti, evaṃ obhāsanaṃ, upāsakā, tumhe kuhiṃ vasathāti? Pāsāde, bhanteti. Bhikkhūnaṃ pana, upāsakā, pāsādo na vaṭṭatītiādivacanaṃ. Nimittakammaṃ nāma paccaye uddissa yathā adhippāyo viññāyati, evaṃ nimittakammaṃ, senāsanatthaṃ bhūmiparikammādīni karontassa ‘‘kiṃ, bhante, karosi, ko kārāpetī’’ti vutte ‘‘na kocī’’tiādivacanaṃ.
ид̣̇аани г̇илаанабажжаяз вин̃н̃ад̇д̇иаад̣̇игам̣ саб̣б̣амби ваддад̇ийд̇и д̣̇ассзнд̇о ааха ‘‘г̇илаанабажжаяз банаа’’д̇иаад̣̇и. д̇ат̇аа уббаннам̣ бана бхзсаж̇ж̇ам̣ рог̇з вуубасанд̇з барибхун̃ж̇ид̇ум̣ ваддад̇и, на ваддад̇ийд̇и? д̇ад̇т̇а винаяад̇хараа ‘‘бхаг̇авад̇аа рог̇асийсзна барибхог̇асса д̣̇ваарам̣ д̣̇иннам̣, д̇асмаа арог̇агаалзби барибхун̃ж̇ид̇ум̣ ваддад̇и, аабад̇д̇и на ход̇ий’’д̇и вад̣̇анд̇и. суд̇д̇анд̇игаа бана ‘‘гин̃жааби аабад̇д̇и на ход̇и, ааж̇ийвам̣ бана гобзд̇и, д̇асмаа саллзкаббадибад̇д̇ияам̣ тид̇асса на ваддад̇и, саллзкам̣ гобзд̇ий’’д̇и вад̣̇анд̇и. уггаманд̇ийд̇и абаг̇ажчанд̇и.
Idāni gilānapaccaye viññattiādikaṃ sabbampi vaṭṭatīti dassento āha ‘‘gilānapaccaye panā’’tiādi. Tathā uppannaṃ pana bhesajjaṃ roge vūpasante paribhuñjituṃ vaṭṭati, na vaṭṭatīti? Tattha vinayadharā ‘‘bhagavatā rogasīsena paribhogassa dvāraṃ dinnaṃ, tasmā arogakālepi paribhuñjituṃ vaṭṭati, āpatti na hotī’’ti vadanti. Suttantikā pana ‘‘kiñcāpi āpatti na hoti, ājīvaṃ pana kopeti, tasmā sallekhappaṭipattiyaṃ ṭhitassa na vaṭṭati, sallekhaṃ kopetī’’ti vadanti. Ukkamantīti apagacchanti.
344. ман̣и ган̣тз ассаад̇и ман̣иган̣то, ман̣инаа убалагкид̇о ваа ган̣то ассаад̇и ман̣иган̣тод̇и маж̇жхабад̣̇алобийсамаасо д̣̇адтаб̣б̣о. д̣̇зваван̣н̣анд̇и д̣̇звад̇д̇абхаавам̣. басаннаагааранд̇и басаннзхи гаад̇аб̣б̣агижжам̣, гааяавзяяааважжасан̇каад̇ам̣ убадтаананд̇и вуд̇д̇ам̣ ход̇и. ман̣ияаажанааяа д̇асса анааг̇аманзна ад̇д̇ано вад̣дхи ход̇ийд̇и вуд̇д̇ам̣ ‘‘ман̣инаа мз ад̇т̇о’’д̇и, манд̇абад̣̇анийхаарзна ваа д̇ат̇аа вуд̇д̇анд̇и д̣̇адтаб̣б̣ам̣.
344. Maṇi kaṇṭhe assāti maṇikaṇṭho, maṇinā upalakkhito vā kaṇṭho assāti maṇikaṇṭhoti majjhapadalopīsamāso daṭṭhabbo. Devavaṇṇanti devattabhāvaṃ. Pasannākāranti pasannehi kātabbakiccaṃ, kāyaveyyāvaccasaṅkhātaṃ upaṭṭhānanti vuttaṃ hoti. Maṇiyācanāya tassa anāgamanena attano vaḍḍhi hotīti vuttaṃ ‘‘maṇinā me attho’’ti, mantapadanīhārena vā tathā vuttanti daṭṭhabbaṃ.
345. вад̇д̇амаанасамийбзд̇и вад̇д̇амаанасса самийбз ад̇ийд̇з. звам̣ вад̇д̇ум̣ лаб̣бхад̇ийд̇и ‘‘ааг̇ад̇осий’’д̇и вад̇д̇аб̣б̣з вад̇д̇амаанасамийбад̇д̇аа ‘‘ааг̇ажчасий’’д̇и звам̣ вад̇д̇амаанавохаарзна вад̇д̇ум̣ лаб̣бхад̇и. лагкан̣ам̣ банзд̇т̇а сад̣̇д̣̇асад̇т̇аанусаарад̇о взд̣̇ид̇аб̣б̣ам̣. со зва наяод̇и ‘‘ааг̇ад̇омхий’’д̇и вад̇д̇аб̣б̣з ‘‘ааг̇ажчаамий’’д̇и аяамби вад̇д̇амаанасамийбз вад̇д̇амаанавохаарод̇и д̣̇ассзд̇и.
345.Vattamānasamīpeti vattamānassa samīpe atīte. Evaṃ vattuṃ labbhatīti ‘‘āgatosī’’ti vattabbe vattamānasamīpattā ‘‘āgacchasī’’ti evaṃ vattamānavohārena vattuṃ labbhati. Lakkhaṇaṃ panettha saddasatthānusārato veditabbaṃ. So eva nayoti ‘‘āgatomhī’’ti vattabbe ‘‘āgacchāmī’’ti ayampi vattamānasamīpe vattamānavohāroti dasseti.
348-349. яасмаа бана на саггаа гзвалам̣ яаажанааяа гин̃жи гаад̇ум̣, д̇асмаа ‘‘саяам̣ яаажид̇агзхи убагаран̣зхий’’д̇и ад̇хиббааяад̇т̇о вуд̇д̇о. уд̣̇д̇хам̣мукам̣ лид̇д̇аа уллид̇д̇аа, ад̇хомукам̣ лид̇д̇аа авалид̇д̇аа. яасмаа бана уд̣̇д̇хам̣мукам̣ лимбанд̇аа язбхуяязна анд̇о лимбанд̇и, ад̇хомукам̣ лимбанд̇аа жа б̣ахи, д̇асмаа вуд̇д̇ам̣ ‘‘уллид̇д̇аад̇и анд̇олид̇д̇аа, авалид̇д̇аад̇и б̣ахилид̇д̇аа’’д̇и. д̇ад̇т̇а уллид̇д̇аа наама табзд̇ваа д̇улаабидтасан̇гхаад̇аваад̇абаанад̇хуумачид̣̇д̣̇аад̣̇ибхзд̣̇ам̣ алзбогаасам̣ авасзсз лзбогаасз гуддзхи сад̣̇д̇хим̣ гхадзд̇ваа чад̣̇анасса анд̇о суд̇хааяа ваа мад̇д̇игааяа ваа лид̇д̇аа. авалид̇д̇аа наама вуд̇д̇анаязнзва чад̣̇анасса б̣ахи лид̇д̇аа. уллид̇д̇аавалид̇д̇аа наама д̇ат̇зва чад̣̇анасса анд̇о жа б̣ахи жа лид̇д̇аа.
348-349. Yasmā pana na sakkā kevalaṃ yācanāya kiñci kātuṃ, tasmā ‘‘sayaṃ yācitakehi upakaraṇehī’’ti adhippāyattho vutto. Uddhaṃmukhaṃ littā ullittā, adhomukhaṃ littā avalittā. Yasmā pana uddhaṃmukhaṃ limpantā yebhuyyena anto limpanti, adhomukhaṃ limpantā ca bahi, tasmā vuttaṃ ‘‘ullittāti antolittā, avalittāti bahilittā’’ti. Tattha ullittā nāma ṭhapetvā tulāpiṭṭhasaṅghātavātapānadhūmachiddādibhedaṃ alepokāsaṃ avasese lepokāse kuṭṭehi saddhiṃ ghaṭetvā chadanassa anto sudhāya vā mattikāya vā littā. Avalittā nāma vuttanayeneva chadanassa bahi littā. Ullittāvalittā nāma tatheva chadanassa anto ca bahi ca littā.
б̣яан̃ж̇анам̣ самзд̇ийд̇и ‘‘гаараяамаанзнаа’’д̇и хзд̇угад̇д̇увасзна уд̣̇д̣̇идтабад̣̇асса ‘‘гаараабзнд̇знаа’’д̇и хзд̇угад̇д̇увасзнзва нид̣̇д̣̇зсасса гад̇ад̇д̇аа б̣яан̃ж̇анам̣ самзд̇и. яад̣̇и звам̣ ‘‘гаронд̇о ваа гаараабзнд̇о ваа’’д̇и гасмаа д̇асса бад̣̇абхааж̇анам̣ вуд̇д̇анд̇и ааха ‘‘яасмаа банаа’’д̇иаад̣̇и. ‘‘ад̇д̇анаа виббагад̇ам̣ барзхи барияосаабзд̇ий’’д̇иаад̣̇иважанад̇о ‘‘гаронд̇знаби ид̇ха вуд̇д̇анаязнзва бадибаж̇ж̇ид̇аб̣б̣а’’нд̇и вуд̇д̇ам̣. д̇ад̇т̇а ид̇ха вуд̇д̇анаязнзваад̇и имасмим̣ сигкаабад̣̇з вуд̇д̇анаязнзва. убхобзд̇зд̇и гаарагагаараабагаа. гаараяамаанзнаад̇и иминаава бад̣̇зна сан̇г̇ахид̇аад̇и гат̇ам̣ сан̇г̇ахид̇аа. на хи гаараяамаано гаронд̇о наама ход̇и, звам̣ банзд̇т̇а ад̇хиббааяо взд̣̇ид̇аб̣б̣о – яасмаа гаронд̇знаби гаараяамаанзнаби ид̇ха вуд̇д̇анаязнзва бадибаж̇ж̇ид̇аб̣б̣ам̣, д̇асмаа гаараяамаанзна звам̣ бадибаж̇ж̇ид̇аб̣б̣анд̇и вуд̇д̇з баг̇зва гаронд̇знаад̇и ид̣̇ам̣ ад̇т̇ад̇о ааг̇ад̇амзваад̇и ‘‘гаараяамаанзнаа’’д̇и бхаг̇авад̇аа вуд̇д̇ам̣. д̇ад̇о ‘‘гаараяамаанзнаа’’д̇и вуд̇д̇з саамад̇т̇ияад̇о лаб̣бхамааноби ад̇т̇о д̇знзва сан̇г̇ахид̇о наама ход̇ийд̇и. б̣яан̃ж̇анам̣ виломид̇ам̣ бхавзяяаад̇и яасмаа ‘‘гаараяамаанзнаа’’д̇и имасса ‘‘гаронд̇знаа’’д̇и ид̣̇ам̣ барияааяаважанам̣ на ход̇и, д̇асмаа гаронд̇зна ваа гаараабзнд̇зна ваад̇и бад̣̇ад̇т̇авасзна нид̣̇д̣̇зсз гад̇з б̣яан̃ж̇анам̣ вируд̣̇д̇хам̣ бхавзяяаад̇и ад̇хиббааяо. ад̇т̇амад̇д̇амзваад̇и бад̣̇ад̇т̇ад̇о саамад̇т̇ияад̇о жа лаб̣бхамаанам̣ ад̇т̇амад̇д̇амзва.
Byañjanaṃ sametīti ‘‘kārayamānenā’’ti hetukattuvasena uddiṭṭhapadassa ‘‘kārāpentenā’’ti hetukattuvaseneva niddesassa katattā byañjanaṃ sameti. Yadi evaṃ ‘‘karonto vā kārāpento vā’’ti kasmā tassa padabhājanaṃ vuttanti āha ‘‘yasmā panā’’tiādi. ‘‘Attanā vippakataṃ parehi pariyosāpetī’’tiādivacanato ‘‘karontenapi idha vuttanayeneva paṭipajjitabba’’nti vuttaṃ. Tattha idha vuttanayenevāti imasmiṃ sikkhāpade vuttanayeneva. Ubhopeteti kārakakārāpakā. Kārayamānenāti imināva padena saṅgahitāti kathaṃ saṅgahitā. Na hi kārayamāno karonto nāma hoti, evaṃ panettha adhippāyo veditabbo – yasmā karontenapi kārayamānenapi idha vuttanayeneva paṭipajjitabbaṃ, tasmā kārayamānena evaṃ paṭipajjitabbanti vutte pageva karontenāti idaṃ atthato āgatamevāti ‘‘kārayamānenā’’ti bhagavatā vuttaṃ. Tato ‘‘kārayamānenā’’ti vutte sāmatthiyato labbhamānopi attho teneva saṅgahito nāma hotīti. Byañjanaṃvilomitaṃ bhaveyyāti yasmā ‘‘kārayamānenā’’ti imassa ‘‘karontenā’’ti idaṃ pariyāyavacanaṃ na hoti, tasmā karontena vā kārāpentena vāti padatthavasena niddese kate byañjanaṃ viruddhaṃ bhaveyyāti adhippāyo. Atthamattamevāti padatthato sāmatthiyato ca labbhamānaṃ atthamattameva.
уд̣̇д̣̇зсод̇и уд̣̇д̣̇исид̇аб̣б̣о. аб̣б̣охаариганд̇и аббамаан̣ам̣. ‘‘ааяаамад̇о жа вид̇т̇аарад̇о жаа’’д̇и авад̇ваа вигаббад̇т̇асса ваа-сад̣̇д̣̇асса вуд̇д̇ад̇д̇аа згад̇обхааг̇зна вад̣дхид̇зби аабад̇д̇иязваад̇и д̣̇ассзнд̇о ‘‘яо банаа’’д̇иаад̣̇имааха. д̇ихад̇т̇аад̇и вад̣дхагийхад̇т̇зна д̇ихад̇т̇аа. бамаан̣аяуд̇д̇о ман̃жод̇и багад̇ивид̣̇ад̇т̇ияаа нававид̣̇ад̇т̇иббамаан̣о ман̃жо. бамаан̣игаа гаарзд̇аб̣б̣аад̇и уггадтаббамаан̣ам̣ санд̇хааяа вуд̇д̇ад̇д̇аа уггадтаббамаан̣аяуд̇д̇аава гуди ад̣̇зсид̇авад̇т̇угаа на ваддад̇и, бамаан̣ад̇о бана уунад̇араа ад̣̇зсид̇авад̇т̇угааби ваддад̇ийд̇и гассажи санд̣̇зхо сияаад̇и д̇ам̣нивад̇д̇анад̇т̇ам̣ ‘‘бамаан̣ад̇о уунад̇арамбий’’д̇иаад̣̇и вуд̇д̇ам̣. д̇ад̇т̇а бамаан̣ад̇о уунад̇аранд̇и баал̣ияам̣ вуд̇д̇аббамаан̣ад̇о уунад̇арам̣. бажчимзна бамаан̣зна жад̇ухад̇т̇ад̇о уунад̇араа гуди наама на ход̇ийд̇и жад̇ухад̇т̇ад̇о бадтааяа гудилагкан̣аббад̇д̇ам̣ гудим̣ д̣̇ассзд̇ум̣ ‘‘жад̇ухад̇т̇ам̣ бан̃жахад̇т̇амбий’’д̇и вуд̇д̇ам̣. галалалзбод̇и гзнажи силзсзна гад̇алзбо, д̇амб̣амад̇д̇игаад̣̇игалалалзбо ваа. алзбо зваад̇и аб̣б̣охааригааязваад̇и ад̇хиббааяо. бидтасан̇гхаадо д̣̇ваараб̣аахаа. ологзд̇ваабийд̇и абалогзд̇вааби, абалоганагаммавасзнаби гаад̇ум̣ ваддад̇ийд̇и ад̇хиббааяо.
Uddesoti uddisitabbo. Abbohārikanti appamāṇaṃ. ‘‘Āyāmato ca vitthārato cā’’ti avatvā vikappatthassa vā-saddassa vuttattā ekatobhāgena vaḍḍhitepi āpattiyevāti dassento ‘‘yo panā’’tiādimāha. Tihatthāti vaḍḍhakīhatthena tihatthā. Pamāṇayutto mañcoti pakatividatthiyā navavidatthippamāṇo mañco. Pamāṇikā kāretabbāti ukkaṭṭhappamāṇaṃ sandhāya vuttattā ukkaṭṭhappamāṇayuttāva kuṭi adesitavatthukā na vaṭṭati, pamāṇato pana ūnatarā adesitavatthukāpi vaṭṭatīti kassaci sandeho siyāti taṃnivattanatthaṃ ‘‘pamāṇato ūnatarampī’’tiādi vuttaṃ. Tattha pamāṇato ūnataranti pāḷiyaṃ vuttappamāṇato ūnataraṃ. Pacchimena pamāṇena catuhatthato ūnatarā kuṭi nāma na hotīti catuhatthato paṭṭhāya kuṭilakkhaṇappattaṃ kuṭiṃ dassetuṃ ‘‘catuhatthaṃ pañcahatthampī’’ti vuttaṃ. Kalalalepoti kenaci silesena katalepo, tambamattikādikalalalepo vā. Alepo evāti abbohārikāyevāti adhippāyo. Piṭṭhasaṅghāṭo dvārabāhā. Oloketvāpīti apaloketvāpi, apalokanakammavasenapi kātuṃ vaṭṭatīti adhippāyo.
353. яат̇аа сийхаад̣̇ийнам̣ г̇ожарааяа баггаманд̇аанам̣ ниб̣ад̣̇д̇хаг̇аманамаг̇г̇о на ваддад̇и, звам̣ хад̇т̇ийнамби ниб̣ад̣̇д̇хаг̇аманамаг̇г̇о на ваддад̇и. зд̇зсанд̇и сийхаад̣̇ийнам̣. жаарибхуумийд̇и г̇ожарабхууми. на г̇ахид̇аад̇и на ваарид̇аад̇и ад̇хиббааяо. аарог̇яад̇т̇ааяаад̇и нирубад̣̇д̣̇авад̇т̇ааяа. сзсаанийд̇и буб̣б̣ан̣н̣аниссид̇аад̣̇ийни. буб̣б̣ан̣н̣аниссид̇анд̇и зд̇т̇а буб̣б̣ан̣н̣авируханадтаанам̣ буб̣б̣ан̣н̣а-сад̣̇д̣̇зна г̇ахид̇ам̣. д̇знааха – ‘‘сад̇д̇аннам̣ д̇хан̃н̃аанам̣…бз… тид̇а’’нд̇и. абхихананд̇и зд̇т̇аад̇и аб̣бхаагхаад̇ам̣. ‘‘взригхара’’нд̇и вуд̇д̇амзвад̇т̇ам̣ вибхаавзд̇ум̣ ‘‘жораанам̣ мааран̣ад̇т̇ааяа гад̇а’’нд̇и вуд̇д̇ам̣. д̇хаммаг̇анд̇хигаад̇и хад̇т̇абаад̣̇аад̣̇ичинд̣̇анаг̇анд̇хигаа.
353. Yathā sīhādīnaṃ gocarāya pakkamantānaṃ nibaddhagamanamaggo na vaṭṭati, evaṃ hatthīnampi nibaddhagamanamaggo na vaṭṭati. Etesanti sīhādīnaṃ. Cāribhūmīti gocarabhūmi. Na gahitāti na vāritāti adhippāyo. Ārogyatthāyāti nirupaddavatthāya. Sesānīti pubbaṇṇanissitādīni. Pubbaṇṇanissitanti ettha pubbaṇṇaviruhanaṭṭhānaṃ pubbaṇṇa-saddena gahitaṃ. Tenāha – ‘‘sattannaṃ dhaññānaṃ…pe… ṭhita’’nti. Abhihananti etthāti abbhāghātaṃ. ‘‘Verighara’’nti vuttamevatthaṃ vibhāvetuṃ ‘‘corānaṃ māraṇatthāya kata’’nti vuttaṃ. Dhammagandhikāti hatthapādādichindanagandhikā.
аавиж̇ж̇ид̇ум̣ на саггаа ход̇ийд̇и чинд̣̇ад̇адаад̣̇исамбхавад̇о на саггаа ход̇и аавиж̇ж̇ид̇ум̣. баажинанд̇и гудивад̇т̇усааманд̇аа жинид̇аб̣б̣аад̇хидтаанам̣. гин̃жааби ид̇ха буб̣б̣абаяог̇асахабаяог̇аанам̣ ад̣̇иннаад̣̇аанз вияа висзсо над̇т̇и, д̇ат̇ааби д̇зсам̣ вибхааг̇зна д̣̇ассанам̣ чинд̣̇ид̇ваа буна гаад̇аб̣б̣аад̇и зд̇т̇а гудияаа бхзд̣̇анабарижчзд̣̇ад̣̇ассанад̇т̇ам̣ гад̇ам̣. д̇ад̣̇ад̇т̇ааяаад̇и д̇ажчанад̇т̇ааяа. звам̣ гад̇анд̇и ад̣̇зсид̇авад̇т̇ум̣ бамаан̣аад̇игганд̇ам̣ ваа гад̇ам̣. д̣̇аарунаа гад̇ам̣ гуддам̣ зд̇т̇аад̇и д̣̇ааругуддигаа, гуди. силаагуддиганд̇иаад̣̇ийсуби зсзва наяо. бан̣н̣асааланд̇и б̣ахи бан̣н̣зхи чаад̣̇зд̇аб̣б̣ам̣ уллид̇д̇аавалид̇д̇ам̣ гудимзва вад̣̇ад̇и. д̇знзвааха ‘‘сабхид̇д̇ижчад̣̇анам̣ лимбиссаамий’’д̇и.
Āvijjituṃna sakkā hotīti chindataṭādisambhavato na sakkā hoti āvijjituṃ. Pācinanti kuṭivatthusāmantā cinitabbaadhiṭṭhānaṃ. Kiñcāpi idha pubbapayogasahapayogānaṃ adinnādāne viya viseso natthi, tathāpi tesaṃ vibhāgena dassanaṃ chinditvā puna kātabbāti ettha kuṭiyā bhedanaparicchedadassanatthaṃ kataṃ. Tadatthāyāti tacchanatthāya. Evaṃ katanti adesitavatthuṃ pamāṇātikkantaṃ vā kataṃ. Dārunā kataṃ kuṭṭaṃ etthāti dārukuṭṭikā, kuṭi. Silākuṭṭikantiādīsupi eseva nayo. Paṇṇasālanti bahi paṇṇehi chādetabbaṃ ullittāvalittaṃ kuṭimeva vadati. Tenevāha ‘‘sabhitticchadanaṃ limpissāmī’’ti.
анд̇олзбзнзва нидтаабзд̇угаамам̣ санд̇хааяа ‘‘анд̇олзбз ваа’’д̇иаад̣̇и вуд̇д̇ам̣. б̣ахилзбз ваад̇и зд̇т̇ааби зсзва наяо. д̇асмим̣ д̣̇ваараб̣ад̣̇д̇хз ваа ваад̇абаанз ваа табид̇зд̇и яож̇зд̇аб̣б̣ам̣. д̇ассогаасанд̇и д̇асса д̣̇ваараб̣ад̣̇д̇хасса ваа ваад̇абаанасса ваа огаасам̣. буна вад̣дхзд̇ваа ваад̇и буб̣б̣зва табид̇огаасам̣ куд̣̇д̣̇агам̣ жз, бхзд̣̇анзна буна вад̣дхзд̇ваа. лзбо на гхадияад̇ийд̇и буб̣б̣з д̣̇инналзбо д̣̇ваараб̣ад̣̇д̇хзна ваа ваад̇абаанзна ваа сад̣̇д̇хим̣ на гхадияад̇и, згааб̣ад̣̇д̇хам̣ худ̇ваа на д̇идтад̇ийд̇и вуд̇д̇ам̣ ход̇и. д̇анд̇и д̣̇ваараб̣ад̣̇д̇хам̣ ваа ваад̇абаанам̣ ваа. батамамзва сан̇гхаад̣̇исзсод̇и лзбагижжасса нидтид̇ад̇д̇аа д̣̇ваараб̣ад̣̇д̇хам̣ ваа ваад̇абаанам̣ ваа табанад̇о буб̣б̣зязва сан̇гхаад̣̇исзсо. адтан̇г̇уламад̇д̇зна аббад̇д̇ажчад̣̇анам̣ гад̇ваад̇и зд̇т̇а звам̣ мз аабад̇д̇и на сияаад̇и бхид̇д̇ияам̣ ваа чад̣̇анз ваа зган̇г̇уламад̇д̇амби огаасам̣ лзбзна агхадзд̇ваа табзд̇и, ваддад̇ийд̇и вад̣̇анд̇и. мад̇д̇игаагуддамзва мад̇д̇игаалзбасан̇кяам̣ г̇ажчад̇ийд̇и ааха – ‘‘сажз мад̇д̇игааяа гуддам̣ гарод̇и, чад̣̇аналзбзна сад̣̇д̇хим̣ гхаданз аабад̇д̇ий’’д̇и. убхиннам̣ анаабад̇д̇ийд̇и буримасса лзбасса агхадид̇ад̇д̇аа д̣̇уд̇ияасса ад̇д̇уд̣̇д̣̇зсигад̇аасамбхавад̇о убхиннам̣ анаабад̇д̇и, д̇асмаа винааби вад̇д̇асийсзна д̇зна анаан̣ад̇д̇о д̇асса гаромийд̇и гарод̇и, убхиннам̣ анаабад̇д̇иязва. сажз д̇зна аан̣ад̇д̇о гарод̇и, мууладтассзва аабад̇д̇и.
Antolepeneva niṭṭhāpetukāmaṃ sandhāya ‘‘antolepe vā’’tiādi vuttaṃ. Bahilepe vāti etthāpi eseva nayo. Tasmiṃ dvārabaddhe vā vātapāne vā ṭhapiteti yojetabbaṃ. Tassokāsanti tassa dvārabaddhassa vā vātapānassa vā okāsaṃ. Puna vaḍḍhetvā vāti pubbeva ṭhapitokāsaṃ khuddakaṃ ce, bhedanena puna vaḍḍhetvā. Lepo na ghaṭiyatīti pubbe dinnalepo dvārabaddhena vā vātapānena vā saddhiṃ na ghaṭiyati, ekābaddhaṃ hutvā na tiṭṭhatīti vuttaṃ hoti. Tanti dvārabaddhaṃ vā vātapānaṃ vā. Paṭhamameva saṅghādisesoti lepakiccassa niṭṭhitattā dvārabaddhaṃ vā vātapānaṃ vā ṭhapanato pubbeyeva saṅghādiseso. Aṭṭhaṅgulamattena appattacchadanaṃ katvāti ettha evaṃ me āpatti na siyāti bhittiyaṃ vā chadane vā ekaṅgulamattampi okāsaṃ lepena aghaṭetvā ṭhapeti, vaṭṭatīti vadanti. Mattikākuṭṭameva mattikālepasaṅkhyaṃ gacchatīti āha – ‘‘sace mattikāya kuṭṭaṃ karoti, chadanalepena saddhiṃ ghaṭane āpattī’’ti. Ubhinnaṃ anāpattīti purimassa lepassa aghaṭitattā dutiyassa attuddesikatāsambhavato ubhinnaṃ anāpatti, tasmā vināpi vattasīsena tena anāṇatto tassa karomīti karoti, ubhinnaṃ anāpattiyeva. Sace tena āṇatto karoti, mūlaṭṭhasseva āpatti.
354. чад̇д̇им̣са жад̇уггаани наама ‘‘бхигку гудим̣ гарод̇ий’’д̇иаад̣̇имхи батамаваарз ад̣̇зсид̇авад̇т̇угажад̇уггам̣ д̣̇зсид̇авад̇т̇угажад̇уггам̣ бамаан̣аад̇игганд̇ажад̇уггам̣ бамаан̣игажад̇уггам̣ ад̣̇зсид̇авад̇т̇угаббамаан̣аад̇игганд̇ажад̇уггам̣ д̣̇зсид̇авад̇т̇угаббамаан̣игажад̇угганд̇и ча жад̇уггаани, звам̣ самаад̣̇исад̇иваараад̣̇ийсуби бан̃жасууд̇и чад̇д̇им̣са. аабад̇д̇ибхзд̣̇ад̣̇ассанад̇т̇ам̣ вуд̇д̇аанийд̇и ‘‘саарамбхз жз бхигку вад̇т̇усмим̣ абариггаманз’’д̇и ависзсзна маад̇игааяа вуд̇д̇ад̇д̇аа саарамбхаабариггаманзсуби сан̇гхаад̣̇исзсова сияаад̇и мижчааг̇ааханивад̇д̇анад̇т̇ам̣ саарамбхз абариггаманз жа д̣̇уггадам̣, ад̣̇зсид̇авад̇т̇угад̇ааяа бамаан̣аад̇игганд̇ад̇ааяа жа сан̇гхаад̣̇исзсод̇и звам̣ аабад̇д̇ибхзд̣̇ад̣̇ассанад̇т̇ам̣ вуд̇д̇аани.
354.Chattiṃsa catukkāni nāma ‘‘bhikkhu kuṭiṃ karotī’’tiādimhi paṭhamavāre adesitavatthukacatukkaṃ desitavatthukacatukkaṃ pamāṇātikkantacatukkaṃ pamāṇikacatukkaṃ adesitavatthukappamāṇātikkantacatukkaṃ desitavatthukappamāṇikacatukkanti cha catukkāni, evaṃ samādisativārādīsupi pañcasūti chattiṃsa. Āpattibhedadassanatthaṃ vuttānīti ‘‘sārambhe ce bhikkhu vatthusmiṃ aparikkamane’’ti avisesena mātikāya vuttattā sārambhaaparikkamanesupi saṅghādisesova siyāti micchāgāhanivattanatthaṃ sārambhe aparikkamane ca dukkaṭaṃ, adesitavatthukatāya pamāṇātikkantatāya ca saṅghādisesoti evaṃ āpattibhedadassanatthaṃ vuttāni.
355-361. ‘‘д̣̇вийхи сан̇гхаад̣̇исзсзхий’’д̇и вад̇д̇аб̣б̣з вибхад̇д̇иб̣яад̇д̇аязна жа важанаб̣яад̇д̇аязна жа д̣̇виннам̣ сан̇гхаад̣̇исзсзнаад̇и вуд̇д̇анд̇и ааха ‘‘д̣̇вийхи сан̇гхаад̣̇исзсзхи…бз… ад̇т̇о взд̣̇ид̇аб̣б̣о’’д̇и. ‘‘ан̃н̃асса ваа д̣̇аад̇аб̣б̣аа’’д̇и вуд̇д̇ад̇д̇аа виббагад̇ам̣ гудим̣ лабхид̇ваа ад̇д̇ано ад̇т̇ааяа гаронд̇ассаби аад̣̇ид̇о бадтааяа агад̇ад̇д̇аа анаабад̇д̇иязваад̇и вад̣̇анд̇и. абажинид̇аб̣б̣аад̇и вид̣̇д̇хам̣сзд̇аб̣б̣аа. бхуумисамам̣ гад̇ваад̇и гудивад̇т̇усамам̣ гад̇ваа.
355-361. ‘‘Dvīhi saṅghādisesehī’’ti vattabbe vibhattibyattayena ca vacanabyattayena ca dvinnaṃ saṅghādisesenāti vuttanti āha ‘‘dvīhi saṅghādisesehi…pe… attho veditabbo’’ti. ‘‘Aññassa vā dātabbā’’ti vuttattā vippakataṃ kuṭiṃ labhitvā attano atthāya karontassapi ādito paṭṭhāya akatattā anāpattiyevāti vadanti. Apacinitabbāti viddhaṃsetabbā. Bhūmisamaṃ katvāti kuṭivatthusamaṃ katvā.
364. на хзд̇т̇а лзбо гхадияад̇ийд̇и чад̣̇аналзбасса абхаавад̇о вуд̇д̇ам̣, висум̣язва анун̃н̃аад̇ад̇д̇аа бана сажзби лзн̣асса анд̇о убарибхааг̇з жид̇д̇агаммаад̣̇игаран̣ад̇т̇ам̣ лзбам̣ д̣̇знд̇и, ваддад̇иязва. лзбад̣̇аанавасзна агад̇аа идтагаад̣̇иг̇ухаа г̇ухаа наамаад̇и г̇ан̣тибад̣̇зсу вуд̇д̇ам̣. д̇ин̣зхи ваа бан̣н̣зхи ваа чаад̣̇ид̇агудигаава вуд̇д̇аад̇и ‘‘гуггудажчигаг̇зхам̣ ваддад̇ий’’д̇и вад̇ваа ‘‘чад̣̇анам̣ д̣̇ан̣д̣агзхий’’д̇иаад̣̇инаа буна д̇ам̣ д̣̇ассзнд̇зхи д̇ин̣абан̣н̣ажчад̣̇анаа гудигаава вуд̇д̇аа. чад̣̇анам̣ д̣̇ан̣д̣агзхи ж̇аалаб̣анд̇хам̣ гад̇ваад̇и чад̣̇анам̣ д̣̇ийгхад̇о д̇ирияад̇о жа табид̇ад̣̇ан̣д̣агзхи ж̇аалам̣ вияа б̣анд̇хид̇ваа. ог̇умпзд̇ваад̇и д̇ин̣аад̣̇им̣ вид̣̇д̇хам̣сзд̇ваа. бхид̇д̇илзбзна сад̣̇д̇хим̣ лзбз гхадид̇зд̇и зд̇т̇а уллид̇д̇аавалид̇д̇абхаавасса чад̣̇анам̣ санд̇хааяа вуд̇д̇ад̇д̇аа сажзби бхид̇д̇илзбзна анад̇т̇иго ход̇и, чад̣̇аналзбз саманд̇ад̇о бхид̇д̇ияаа аббамад̇д̇агзнаби гхадид̇з бхид̇д̇илзбзна винааби аабад̇д̇иязваад̇и вад̣̇анд̇и. убажигааможанад̇т̇амзва хздтаа баасаан̣агуддам̣ гад̇ваа д̇ам̣ алимбид̇ваа убари лимбад̇и, лзбо на гхадияад̇и наама, анаабад̇д̇иязваад̇и иминаа адтагат̇ааважанзна д̇ам̣ на самзд̇и. д̇ад̇т̇а гзжи вад̣̇анд̇и ‘‘бхид̇д̇им̣ алимбид̇угаамад̇ааяа абхаавад̇о чад̣̇аналзбз баасаан̣агуддзна сад̣̇д̇хим̣ гхадид̇зби д̇ад̇т̇а анаабад̇д̇и вуд̇д̇аа’’д̇и, д̇амби на яуд̇д̇ам̣. ‘‘убажигааможанад̇т̇амзваа’’д̇и хи вуд̇д̇ад̇д̇аа баасаан̣агуддз буна лимбид̇угаамад̇ааяа абхаавоязва вин̃н̃ааяад̇и, д̇знзва ‘‘д̇ам̣ алимбид̇ваа’’д̇и вуд̇д̇ам̣. д̇асмаа ‘‘уллид̇д̇аад̣̇ибхааво…бз… чад̣̇анамзва санд̇хааяа вуд̇д̇о’’д̇и ид̣̇ам̣ сад̇иби бхид̇д̇илзбз чад̣̇аналзбзна винаа аабад̇д̇и на ход̇ийд̇и чад̣̇аналзбасса бад̇хаанабхаавад̣̇ассанад̇т̇ам̣ вуд̇д̇ам̣, на бана бхид̇д̇илзбзна винааби аабад̇д̇и ход̇ийд̇и д̣̇ассанад̇т̇анд̇и вад̣̇анд̇и, ид̣̇амзва жзд̇т̇а яуд̇д̇ад̇аранд̇и амхаагам̣ канд̇и. зд̇т̇аад̇и д̇ин̣агудигааяа.
364.Na hettha lepo ghaṭiyatīti chadanalepassa abhāvato vuttaṃ, visuṃyeva anuññātattā pana sacepi leṇassa anto uparibhāge cittakammādikaraṇatthaṃ lepaṃ denti, vaṭṭatiyeva. Lepadānavasena akatā iṭṭhakādiguhā guhā nāmāti gaṇṭhipadesu vuttaṃ. Tiṇehi vā paṇṇehi vā chāditakuṭikāva vuttāti ‘‘kukkuṭacchikagehaṃ vaṭṭatī’’ti vatvā ‘‘chadanaṃ daṇḍakehī’’tiādinā puna taṃ dassentehi tiṇapaṇṇacchadanā kuṭikāva vuttā. Chadanaṃ daṇḍakehi jālabandhaṃ katvāti chadanaṃ dīghato tiriyato ca ṭhapitadaṇḍakehi jālaṃ viya bandhitvā. Ogumphetvāti tiṇādiṃ viddhaṃsetvā. Bhittilepena saddhiṃ lepe ghaṭiteti ettha ullittāvalittabhāvassa chadanaṃ sandhāya vuttattā sacepi bhittilepena anatthiko hoti, chadanalepe samantato bhittiyā appamattakenapi ghaṭite bhittilepena vināpi āpattiyevāti vadanti. Upacikāmocanatthameva heṭṭhā pāsāṇakuṭṭaṃ katvā taṃ alimpitvā upari limpati, lepo na ghaṭiyati nāma, anāpattiyevāti iminā aṭṭhakathāvacanena taṃ na sameti. Tattha keci vadanti ‘‘bhittiṃ alimpitukāmatāya abhāvato chadanalepe pāsāṇakuṭṭena saddhiṃ ghaṭitepi tattha anāpatti vuttā’’ti, tampi na yuttaṃ. ‘‘Upacikāmocanatthamevā’’ti hi vuttattā pāsāṇakuṭṭe puna limpitukāmatāya abhāvoyeva viññāyati, teneva ‘‘taṃ alimpitvā’’ti vuttaṃ. Tasmā ‘‘ullittādibhāvo…pe… chadanameva sandhāya vutto’’ti idaṃ satipi bhittilepe chadanalepena vinā āpatti na hotīti chadanalepassa padhānabhāvadassanatthaṃ vuttaṃ, na pana bhittilepena vināpi āpatti hotīti dassanatthanti vadanti, idameva cettha yuttataranti amhākaṃ khanti. Etthāti tiṇakuṭikāya.
зд̇т̇а жа д̇ин̣агудигааяа зва саб̣б̣ат̇аа анаабад̇д̇ибхаавасса д̣̇ассанам̣ бариваарабаал̣им̣ аанзд̇ваа д̇ин̣агудигааяа саарамбхаад̣̇ибажжаяааби анаабад̇д̇ибхааво сукзна саггаа саад̇хзд̇унд̇и гад̇ам̣. д̇ин̣агудигааяа жа саб̣б̣ат̇аа анаабад̇д̇ибхаавз саад̇хид̇з д̇знзва наязна лзн̣аг̇ухаад̣̇ийсуби саарамбхаад̣̇ибажжаяааби анаабад̇д̇ибхааво саггаа вин̃н̃аад̇унд̇и. д̇знзва ‘‘яам̣ банаа’’д̇иаад̣̇и вуд̇д̇ам̣. д̇ат̇аа хи д̇ин̣агудигааяа саарамбхаад̣̇ибажжаяааби анаабад̇д̇ибхаавз саад̇хид̇з д̇знзва наязна ан̃н̃ассад̇т̇ааяа гаронд̇ассаби саарамбхаад̣̇ибажжаяааби анаабад̇д̇ибхааво ад̇т̇ад̇о д̣̇ассид̇оязва ход̇и. зван̃жа сад̇и бхигку самаад̣̇исид̇ваа баггамад̇и ‘‘гудим̣ мз гарот̇аа’’д̇и, самаад̣̇исад̇и жа д̣̇зсид̇авад̇т̇угаа жа ход̇у анаарамбхаа жа сабариггаманаа жаад̇и, д̇асса гудим̣ гаронд̇и ад̣̇зсид̇авад̇т̇угам̣ саарамбхам̣ абариггаманам̣. ‘‘аабад̇д̇и гааругаанам̣ д̇ин̣н̣ам̣ д̣̇уггадаана’’нд̇и баал̣ияам̣ ан̃н̃ассад̇т̇ааяа гаронд̇ассаби саарамбхаад̣̇ибажжаяааби д̣̇уггадам̣ гасмаа вуд̇д̇анд̇и имам̣ жод̣̇анам̣ манаси нид̇хааяа ‘‘яам̣ бана…бз… агаран̣абажжаяаа вуд̇д̇а’’нд̇и ид̣̇ам̣ вуд̇д̇ам̣. аяан̃хзд̇т̇а ад̇хиббааяо – ан̃н̃ассад̇т̇ааяа гаронд̇ассаби саарамбхаад̣̇ибажжаяааби анаабад̇д̇иязва. ‘‘аабад̇д̇и гааругаанам̣ д̇ин̣н̣ам̣ д̣̇уггадаана’’нд̇и ид̣̇ам̣ бана ан̃н̃ассад̇т̇ааяа гаронд̇асса на саарамбхаад̣̇ибажжаяаа аабад̇д̇ид̣̇ассанад̇т̇ам̣ вуд̇д̇ам̣, гин̃жарахи яат̇аасамаад̣̇идтааяа агаран̣абажжаяаа аабад̇д̇ид̣̇ассанад̇т̇анд̇и. яасмаа б̣ахуусу бод̇т̇агзсу сад̇асод̇хид̇асаммад̇з жа бураан̣абод̇т̇агз аяамзва баатаггамо д̣̇иссад̇и, д̇асмаа яат̇аад̣̇идтабаатаануггамзнзвзд̇т̇а ад̇т̇о багаасид̇о. гад̇т̇ажи бод̇т̇агз бана ‘‘гудилагкан̣аббад̇д̇амби гудим̣…бз… анаабад̇д̇ий’’д̇и имассаананд̇арам̣ ‘‘яам̣ банаа’’д̇иаад̣̇ибаатам̣ ликанд̇и, зван̃жа сад̇и д̇ад̇т̇а ад̇хиббааяо баагадоязва. анаабад̇д̇ийд̇и вад̇ваад̇и убосат̇ааг̇ааран̃жа бхависсад̇и, ахан̃жа васиссаамийд̇иаад̣̇ийсу ваасааг̇аарад̇т̇ааяа зва анияамид̇ад̇д̇аа анаабад̇д̇ийд̇и вад̇ваа.
Ettha ca tiṇakuṭikāya eva sabbathā anāpattibhāvassa dassanaṃ parivārapāḷiṃ ānetvā tiṇakuṭikāya sārambhādipaccayāpi anāpattibhāvo sukhena sakkā sādhetunti kataṃ. Tiṇakuṭikāya ca sabbathā anāpattibhāve sādhite teneva nayena leṇaguhādīsupi sārambhādipaccayāpi anāpattibhāvo sakkā viññātunti. Teneva ‘‘yaṃ panā’’tiādi vuttaṃ. Tathā hi tiṇakuṭikāya sārambhādipaccayāpi anāpattibhāve sādhite teneva nayena aññassatthāya karontassapi sārambhādipaccayāpi anāpattibhāvo atthato dassitoyeva hoti. Evañca sati bhikkhu samādisitvā pakkamati ‘‘kuṭiṃ me karothā’’ti, samādisati ca desitavatthukā ca hotu anārambhā ca saparikkamanā cāti, tassa kuṭiṃ karonti adesitavatthukaṃ sārambhaṃ aparikkamanaṃ. ‘‘Āpatti kārukānaṃ tiṇṇaṃ dukkaṭāna’’nti pāḷiyaṃ aññassatthāya karontassapi sārambhādipaccayāpi dukkaṭaṃ kasmā vuttanti imaṃ codanaṃ manasi nidhāya ‘‘yaṃ pana…pe… akaraṇapaccayā vutta’’nti idaṃ vuttaṃ. Ayañhettha adhippāyo – aññassatthāya karontassapi sārambhādipaccayāpi anāpattiyeva. ‘‘Āpatti kārukānaṃ tiṇṇaṃ dukkaṭāna’’nti idaṃ pana aññassatthāya karontassa na sārambhādipaccayā āpattidassanatthaṃ vuttaṃ, kiñcarahi yathāsamādiṭṭhāya akaraṇapaccayā āpattidassanatthanti. Yasmā bahūsu potthakesu satasodhitasammate ca purāṇapotthake ayameva pāṭhakkamo dissati, tasmā yathādiṭṭhapāṭhānukkamenevettha attho pakāsito. Katthaci potthake pana ‘‘kuṭilakkhaṇappattampi kuṭiṃ…pe… anāpattī’’ti imassānantaraṃ ‘‘yaṃ panā’’tiādipāṭhaṃ likhanti, evañca sati tattha adhippāyo pākaṭoyeva. Anāpattīti vatvāti uposathāgārañca bhavissati, ahañca vasissāmītiādīsu vāsāgāratthāya eva aniyamitattā anāpattīti vatvā.
бамаан̣аад̇игганд̇агудигаран̣алагкан̣аа гирияааязва, ад̣̇зсид̇авад̇т̇умуулигааяаби аабад̇д̇ияаа ан̇г̇ам̣ ход̇и бамаан̣аад̇игганд̇амуулигааяаби, д̇ад̣̇убхаяам̣ згад̇о гад̇ваа ‘‘гирияаагирияад̇о’’д̇и вуд̇д̇ам̣. вад̇т̇ум̣ ад̣̇зсаабзд̇ваа бамаан̣аяуд̇д̇ам̣ гудим̣ гаронд̇ассаби вад̇т̇ум̣ д̣̇зсаабзд̇ваа агирияааяа гудигаран̣агирияааяа жа самудтаанад̇о гирияаагирияад̇ова самудтаад̇ийд̇и взд̣̇ид̇аб̣б̣ам̣. ажид̇д̇аганд̇и бан̣н̣ад̇д̇иаж̇аананажид̇д̇зна ажид̇д̇агам̣. уллид̇д̇аад̣̇ийнам̣ ан̃н̃ад̇арад̇аа, хздтимаббамаан̣асамбхаво, ад̣̇зсид̇авад̇т̇уд̇аа, бамаан̣аад̇игганд̇ад̇аа, ад̇д̇уд̣̇д̣̇зсигад̇аа, ваасааг̇аарад̇аа, лзбагхадданаад̇и имаанзд̇т̇а ча ваа сад̇д̇а ваа ан̇г̇аани.
Pamāṇātikkantakuṭikaraṇalakkhaṇā kiriyāyeva, adesitavatthumūlikāyapi āpattiyā aṅgaṃ hoti pamāṇātikkantamūlikāyapi, tadubhayaṃ ekato katvā ‘‘kiriyākiriyato’’ti vuttaṃ. Vatthuṃ adesāpetvā pamāṇayuttaṃ kuṭiṃ karontassapi vatthuṃ desāpetvā akiriyāya kuṭikaraṇakiriyāya ca samuṭṭhānato kiriyākiriyatova samuṭṭhātīti veditabbaṃ. Acittakanti paṇṇattiajānanacittena acittakaṃ. Ullittādīnaṃ aññataratā, heṭṭhimappamāṇasambhavo, adesitavatthutā, pamāṇātikkantatā, attuddesikatā, vāsāgāratā, lepaghaṭṭanāti imānettha cha vā satta vā aṅgāni.
гудигаарасигкаабад̣̇аван̣н̣анаа нидтид̇аа.
Kuṭikārasikkhāpadavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / винаяабидага • Vinayapiṭaka / махаавибхан̇г̇а • Mahāvibhaṅga / 6. гудигаарасигкаабад̣̇ам̣ • 6. Kuṭikārasikkhāpadaṃ
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махаавибхан̇г̇а-адтагат̇аа • Mahāvibhaṅga-aṭṭhakathā / 6. гудигаарасигкаабад̣̇аван̣н̣анаа • 6. Kuṭikārasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / 6. гудигаарасигкаабад̣̇аван̣н̣анаа • 6. Kuṭikārasikkhāpadavaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / 6. гудигаарасигкаабад̣̇аван̣н̣анаа • 6. Kuṭikārasikkhāpadavaṇṇanā
