| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
9. குடிகாஸுத்தவண்ணனா
9. Kuṭikāsuttavaṇṇanā
19. நவமே கச்சி தே குடிகாதி அயங் தே³வதா த³ஸ மாஸே அந்தோவஸனட்டா²னட்டே²ன மாதரங் குடிகங் கத்வா, யதா² ஸகுணா தி³வஸங் கோ³சரபஸுதா ரத்திங் குலாவகங் அல்லீயந்தி, ஏவமேவங் ஸத்தா தத்த² தத்த² க³ந்த்வாபி மாதுகா³மஸ்ஸ ஸந்திகங் ஆக³ச்ச²ந்தி, ஆலயவஸேன ப⁴ரியங் குலாவகங் கத்வா. குலபவேணிங் ஸந்தானகட்டே²ன புத்தே ஸந்தானகே கத்வா, தண்ஹங் ப³ந்த⁴னங் கத்வா, கா³தா²ப³ந்த⁴னேன இமே பஞ்ஹே ஸமோதா⁴னெத்வா ப⁴க³வந்தங் புச்சி², ப⁴க³வாபிஸ்ஸா விஸ்ஸஜ்ஜெந்தோ தக்³கா⁴திஆதி³மாஹ. தத்த² தக்³கா⁴தி ஏகங்ஸவசனே நிபாதோ. நத்தீ²தி பஹாய பப்³ப³ஜிதத்தா வட்டஸ்மிங் வா புன மாதுகுச்சி²வாஸஸ்ஸ தா³ரப⁴ரணஸ்ஸ புத்தனிப்³ப³த்தியா வா அபா⁴வதோ நத்தி².
19. Navame kacci te kuṭikāti ayaṃ devatā dasa māse antovasanaṭṭhānaṭṭhena mātaraṃ kuṭikaṃ katvā, yathā sakuṇā divasaṃ gocarapasutā rattiṃ kulāvakaṃ allīyanti, evamevaṃ sattā tattha tattha gantvāpi mātugāmassa santikaṃ āgacchanti, ālayavasena bhariyaṃ kulāvakaṃ katvā. Kulapaveṇiṃ santānakaṭṭhena putte santānake katvā, taṇhaṃ bandhanaṃ katvā, gāthābandhanena ime pañhe samodhānetvā bhagavantaṃ pucchi, bhagavāpissā vissajjento tagghātiādimāha. Tattha tagghāti ekaṃsavacane nipāto. Natthīti pahāya pabbajitattā vaṭṭasmiṃ vā puna mātukucchivāsassa dārabharaṇassa puttanibbattiyā vā abhāvato natthi.
தே³வதா ‘‘மயா ஸன்னாஹங் ப³ந்தி⁴த்வா கு³ள்ஹா பஞ்ஹா புச்சி²தா, அயஞ்ச ஸமணோ புச்சி²தமத்தேயேவ விஸ்ஸஜ்ஜேஸி, ஜானங் நு கோ² மே அஜ்ஜா²ஸயங் கதே²ஸி, உதா³ஹு அஜானங் யங் வா தங் வா முகா²ருள்ஹங் கதே²ஸீ’’தி சிந்தெத்வா புன கிந்தாஹந்திஆதி³மாஹ. தத்த² கிந்தாஹந்தி கிங் தே அஹங். அத²ஸ்ஸா ப⁴க³வா ஆசிக்க²ந்தோ மாதரந்திஆதி³மாஹ. ஸாஹு தேதி கா³தா²ய அனுமோதி³த்வா ஸம்பஹங்ஸித்வா ப⁴க³வந்தங் வந்தி³த்வா க³ந்த⁴மாலாதீ³ஹி பூஜெத்வா அத்தனோ தே³வட்டா²னமேவ க³தாதி.
Devatā ‘‘mayā sannāhaṃ bandhitvā guḷhā pañhā pucchitā, ayañca samaṇo pucchitamatteyeva vissajjesi, jānaṃ nu kho me ajjhāsayaṃ kathesi, udāhu ajānaṃ yaṃ vā taṃ vā mukhāruḷhaṃ kathesī’’ti cintetvā puna kintāhantiādimāha. Tattha kintāhanti kiṃ te ahaṃ. Athassā bhagavā ācikkhanto mātarantiādimāha. Sāhu teti gāthāya anumoditvā sampahaṃsitvā bhagavantaṃ vanditvā gandhamālādīhi pūjetvā attano devaṭṭhānameva gatāti.
குடிகாஸுத்தவண்ணனா நிட்டி²தா.
Kuṭikāsuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 9. குடிகாஸுத்தங் • 9. Kuṭikāsuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 9. குடிகாஸுத்தவண்ணனா • 9. Kuṭikāsuttavaṇṇanā
