| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
9. කුටිකාසුත්‌තවණ්‌ණනා
9. Kuṭikāsuttavaṇṇanā
19. නවමෙ කච්‌චි තෙ කුටිකාති අයං දෙවතා දස මාසෙ අන්‌තොවසනට්‌ඨානට්‌ඨෙන මාතරං කුටිකං කත්‌වා, යථා සකුණා දිවසං ගොචරපසුතා රත්‌තිං කුලාවකං අල්‌ලීයන්‌ති, එවමෙවං සත්‌තා තත්‌ථ තත්‌ථ ගන්‌ත්‌වාපි මාතුගාමස්‌ස සන්‌තිකං ආගච්‌ඡන්‌ති, ආලයවසෙන භරියං කුලාවකං කත්‌වා. කුලපවෙණිං සන්‌තානකට්‌ඨෙන පුත්‌තෙ සන්‌තානකෙ කත්‌වා, තණ්‌හං බන්‌ධනං කත්‌වා, ගාථාබන්‌ධනෙන ඉමෙ පඤ්‌හෙ සමොධානෙත්‌වා භගවන්‌තං පුච්‌ඡි, භගවාපිස්‌සා විස්‌සජ්‌ජෙන්‌තො තග්‌ඝාතිආදිමාහ. තත්‌ථ තග්‌ඝාති එකංසවචනෙ නිපාතො. නත්‌ථීති පහාය පබ්‌බජිතත්‌තා වට්‌ටස්‌මිං වා පුන මාතුකුච්‌ඡිවාසස්‌ස දාරභරණස්‌ස පුත්‌තනිබ්‌බත්‌තියා වා අභාවතො නත්‌ථි.
19. Navame kacci te kuṭikāti ayaṃ devatā dasa māse antovasanaṭṭhānaṭṭhena mātaraṃ kuṭikaṃ katvā, yathā sakuṇā divasaṃ gocarapasutā rattiṃ kulāvakaṃ allīyanti, evamevaṃ sattā tattha tattha gantvāpi mātugāmassa santikaṃ āgacchanti, ālayavasena bhariyaṃ kulāvakaṃ katvā. Kulapaveṇiṃ santānakaṭṭhena putte santānake katvā, taṇhaṃ bandhanaṃ katvā, gāthābandhanena ime pañhe samodhānetvā bhagavantaṃ pucchi, bhagavāpissā vissajjento tagghātiādimāha. Tattha tagghāti ekaṃsavacane nipāto. Natthīti pahāya pabbajitattā vaṭṭasmiṃ vā puna mātukucchivāsassa dārabharaṇassa puttanibbattiyā vā abhāvato natthi.
දෙවතා ‘‘මයා සන්‌නාහං බන්‌ධිත්‌වා ගුළ්‌හා පඤ්‌හා පුච්‌ඡිතා, අයඤ්‌ච සමණො පුච්‌ඡිතමත්‌තෙයෙව විස්‌සජ්‌ජෙසි, ජානං නු ඛො මෙ අජ්‌ඣාසයං කථෙසි, උදාහු අජානං යං වා තං වා මුඛාරුළ්‌හං කථෙසී’’ති චින්‌තෙත්‌වා පුන කින්‌තාහන්‌තිආදිමාහ. තත්‌ථ කින්‌තාහන්‌ති කිං තෙ අහං. අථස්‌සා භගවා ආචික්‌ඛන්‌තො මාතරන්‌තිආදිමාහ. සාහු තෙති ගාථාය අනුමොදිත්‌වා සම්‌පහංසිත්‌වා භගවන්‌තං වන්‌දිත්‌වා ගන්‌ධමාලාදීහි පූජෙත්‌වා අත්‌තනො දෙවට්‌ඨානමෙව ගතාති.
Devatā ‘‘mayā sannāhaṃ bandhitvā guḷhā pañhā pucchitā, ayañca samaṇo pucchitamatteyeva vissajjesi, jānaṃ nu kho me ajjhāsayaṃ kathesi, udāhu ajānaṃ yaṃ vā taṃ vā mukhāruḷhaṃ kathesī’’ti cintetvā puna kintāhantiādimāha. Tattha kintāhanti kiṃ te ahaṃ. Athassā bhagavā ācikkhanto mātarantiādimāha. Sāhu teti gāthāya anumoditvā sampahaṃsitvā bhagavantaṃ vanditvā gandhamālādīhi pūjetvā attano devaṭṭhānameva gatāti.
කුටිකාසුත්‌තවණ්‌ණනා නිට්‌ඨිතා.
Kuṭikāsuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 9. කුටිකාසුත්‌තං • 9. Kuṭikāsuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 9. කුටිකාසුත්‌තවණ්‌ණනා • 9. Kuṭikāsuttavaṇṇanā
