| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৯. কুতূহলসালাসুত্তং
9. Kutūhalasālāsuttaṃ
৪১৮. অথ খো ৰচ্ছগোত্তো পরিব্বাজকো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো ৰচ্ছগোত্তো পরিব্বাজকো ভগৰন্তং এতদৰোচ –
418. Atha kho vacchagotto paribbājako yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho vacchagotto paribbājako bhagavantaṃ etadavoca –
‘‘পুরিমানি , ভো গোতম , দিৰসানি পুরিমতরানি সম্বহুলানং নানাতিত্থিযানং সমণব্রাহ্মণানং পরিব্বাজকানং কুতূহলসালাযং সন্নিসিন্নানং সন্নিপতিতানং অযমন্তরাকথা উদপাদি – ‘অযং খো পূরণো কস্সপো সঙ্ঘী চেৰ গণী চ গণাচরিযো চ ঞাতো যসস্সী তিত্থকরো সাধুসম্মতো বহুজনস্স। সোপি সাৰকং অব্ভতীতং কালঙ্কতং উপপত্তীসু ব্যাকরোতি – ‘অসু অমুত্র উপপন্নো, অসু অমুত্র উপপন্নো’তি। যোপিস্স সাৰকো উত্তমপুরিসো পরমপুরিসো পরমপত্তিপত্তো তম্পি সাৰকং অব্ভতীতং কালঙ্কতং উপপত্তীসু ব্যাকরোতি – ‘অসু অমুত্র উপপন্নো, অসু অমুত্র উপপন্নো’’’তি।
‘‘Purimāni , bho gotama , divasāni purimatarāni sambahulānaṃ nānātitthiyānaṃ samaṇabrāhmaṇānaṃ paribbājakānaṃ kutūhalasālāyaṃ sannisinnānaṃ sannipatitānaṃ ayamantarākathā udapādi – ‘ayaṃ kho pūraṇo kassapo saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa. Sopi sāvakaṃ abbhatītaṃ kālaṅkataṃ upapattīsu byākaroti – ‘asu amutra upapanno, asu amutra upapanno’ti. Yopissa sāvako uttamapuriso paramapuriso paramapattipatto tampi sāvakaṃ abbhatītaṃ kālaṅkataṃ upapattīsu byākaroti – ‘asu amutra upapanno, asu amutra upapanno’’’ti.
‘‘অযম্পি খো মক্খলি গোসালো…পে॰… অযম্পি খো নিগণ্ঠো নাটপুত্তো…পে॰… অযম্পি খো সঞ্চযো 1 বেলট্ঠপুত্তো…পে॰… অযম্পি খো পকুধো 2 কচ্চানো…পে॰… অযম্পি খো অজিতো কেসকম্বলো সঙ্ঘী চেৰ গণী চ গণাচরিযো চ ঞাতো যসস্সী তিত্থকরো সাধুসম্মতো বহুজনস্স। সোপি সাৰকং অব্ভতীতং কালঙ্কতং উপপত্তীসু ব্যাকরোতি – ‘অসু অমুত্র উপপন্নো, অসু অমুত্র উপপন্নো’তি। যোপিস্স সাৰকো উত্তমপুরিসো পরমপুরিসো পরমপত্তিপত্তো তম্পি সাৰকং অব্ভতীতং কালঙ্কতং উপপত্তীসু ব্যাকরোতি – ‘অসু অমুত্র উপপন্নো, অসু অমুত্র উপপন্নো’’’তি।
‘‘Ayampi kho makkhali gosālo…pe… ayampi kho nigaṇṭho nāṭaputto…pe… ayampi kho sañcayo 3 belaṭṭhaputto…pe… ayampi kho pakudho 4 kaccāno…pe… ayampi kho ajito kesakambalo saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa. Sopi sāvakaṃ abbhatītaṃ kālaṅkataṃ upapattīsu byākaroti – ‘asu amutra upapanno, asu amutra upapanno’ti. Yopissa sāvako uttamapuriso paramapuriso paramapattipatto tampi sāvakaṃ abbhatītaṃ kālaṅkataṃ upapattīsu byākaroti – ‘asu amutra upapanno, asu amutra upapanno’’’ti.
‘‘অযম্পি খো সমণো গোতমো সঙ্ঘী চেৰ গণী চ গণাচরিযো চ ঞাতো যসস্সী তিত্থকরো সাধুসম্মতো বহুজনস্স। সোপি সাৰকং অব্ভতীতং কালঙ্কতং উপপত্তীসু ব্যাকরোতি – ‘অসু অমুত্র উপপন্নো, অসু অমুত্র উপপন্নো’তি। যোপিস্স 5 সাৰকো উত্তমপুরিসো পরমপুরিসো পরমপত্তিপত্তো তঞ্চ সাৰকং অব্ভতীতং কালঙ্কতং উপপত্তীসু ন ব্যাকরোতি – ‘অসু অমুত্র উপপন্নো, অসু অমুত্র উপপন্নো’তি। অপি চ খো নং এৰং ব্যাকরোতি – ‘অচ্ছেচ্ছি তণ্হং, ৰিৰত্তযি সংযোজনং, সম্মা মানাভিসমযা অন্তমকাসি দুক্খস্সা’তি। তস্স ময্হং, ভো গোতম, অহু দেৰ কঙ্খা, অহু ৰিচিকিচ্ছা – ‘কথং নাম 6 সমণস্স গোতমস্স ধম্মো অভিঞ্ঞেয্যো’’’তি 7?
‘‘Ayampi kho samaṇo gotamo saṅghī ceva gaṇī ca gaṇācariyo ca ñāto yasassī titthakaro sādhusammato bahujanassa. Sopi sāvakaṃ abbhatītaṃ kālaṅkataṃ upapattīsu byākaroti – ‘asu amutra upapanno, asu amutra upapanno’ti. Yopissa 8 sāvako uttamapuriso paramapuriso paramapattipatto tañca sāvakaṃ abbhatītaṃ kālaṅkataṃ upapattīsu na byākaroti – ‘asu amutra upapanno, asu amutra upapanno’ti. Api ca kho naṃ evaṃ byākaroti – ‘acchecchi taṇhaṃ, vivattayi saṃyojanaṃ, sammā mānābhisamayā antamakāsi dukkhassā’ti. Tassa mayhaṃ, bho gotama, ahu deva kaṅkhā, ahu vicikicchā – ‘kathaṃ nāma 9 samaṇassa gotamassa dhammo abhiññeyyo’’’ti 10?
‘‘অলঞ্হি তে, ৰচ্ছ, কঙ্খিতুং, অলং ৰিচিকিচ্ছিতুং। কঙ্খনীযে চ পন তে ঠানে ৰিচিকিচ্ছা উপ্পন্না। সউপাদানস্স খ্ৰাহং, ৰচ্ছ, উপপত্তিং পঞ্ঞাপেমি নো অনুপাদানস্স। সেয্যথাপি , ৰচ্ছ, অগ্গি সউপাদানো জলতি, নো অনুপাদানো; এৰমেৰ খ্ৰাহং, ৰচ্ছ, সউপাদানস্স উপপত্তিং পঞ্ঞাপেমি, নো অনুপাদানস্সা’’তি।
‘‘Alañhi te, vaccha, kaṅkhituṃ, alaṃ vicikicchituṃ. Kaṅkhanīye ca pana te ṭhāne vicikicchā uppannā. Saupādānassa khvāhaṃ, vaccha, upapattiṃ paññāpemi no anupādānassa. Seyyathāpi , vaccha, aggi saupādāno jalati, no anupādāno; evameva khvāhaṃ, vaccha, saupādānassa upapattiṃ paññāpemi, no anupādānassā’’ti.
‘‘যস্মিং , ভো গোতম, সমযে অচ্চি ৰাতেন খিত্তা দূরম্পি গচ্ছতি, ইমস্স পন ভৰং গোতমো কিং উপাদানস্মিং পঞ্ঞাপেতী’’তি? ‘‘যস্মিং খো, ৰচ্ছ, সমযে অচ্চি ৰাতেন খিত্তা দূরম্পি গচ্ছতি, তমহং ৰাতূপাদানং পঞ্ঞাপেমি। ৰাতো হিস্স, ৰচ্ছ, তস্মিং সমযে উপাদানং হোতী’’তি। ‘‘যস্মিঞ্চ পন, ভো গোতম, সমযে ইমঞ্চ কাযং নিক্খিপতি, সত্তো চ অঞ্ঞতরং কাযং অনুপপন্নো হোতি, ইমস্স পন ভৰং গোতমো কিং উপাদানস্মিং পঞ্ঞাপেতী’’তি? ‘‘যস্মিং খো, ৰচ্ছ, সমযে ইমঞ্চ কাযং নিক্খিপতি, সত্তো চ অঞ্ঞতরং কাযং অনুপপন্নো হোতি, তমহং তণ্হূপাদানং ৰদামি। তণ্হা হিস্স, ৰচ্ছ, তস্মিং সমযে উপাদানং হোতী’’তি 11। নৰমং।
‘‘Yasmiṃ , bho gotama, samaye acci vātena khittā dūrampi gacchati, imassa pana bhavaṃ gotamo kiṃ upādānasmiṃ paññāpetī’’ti? ‘‘Yasmiṃ kho, vaccha, samaye acci vātena khittā dūrampi gacchati, tamahaṃ vātūpādānaṃ paññāpemi. Vāto hissa, vaccha, tasmiṃ samaye upādānaṃ hotī’’ti. ‘‘Yasmiñca pana, bho gotama, samaye imañca kāyaṃ nikkhipati, satto ca aññataraṃ kāyaṃ anupapanno hoti, imassa pana bhavaṃ gotamo kiṃ upādānasmiṃ paññāpetī’’ti? ‘‘Yasmiṃ kho, vaccha, samaye imañca kāyaṃ nikkhipati, satto ca aññataraṃ kāyaṃ anupapanno hoti, tamahaṃ taṇhūpādānaṃ vadāmi. Taṇhā hissa, vaccha, tasmiṃ samaye upādānaṃ hotī’’ti 12. Navamaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৯. কুতূহলসালাসুত্তৰণ্ণনা • 9. Kutūhalasālāsuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৯. কুতূহলসালাসুত্তৰণ্ণনা • 9. Kutūhalasālāsuttavaṇṇanā
