| Library / Tipiṭaka / तिपिटक • Tipiṭaka / मिलिन्दपञ्हपाळि • Milindapañhapāḷi |
२. समुद्दवग्गो
2. Samuddavaggo
१. लाबुलतङ्गपञ्हो
1. Lābulataṅgapañho
१. ‘‘भन्ते नागसेन, ‘लाबुलताय एकं अङ्गं गहेतब्ब’न्ति यं वदेसि, कतमं तं एकं अङ्गं गहेतब्ब’’न्ति? ‘‘यथा, महाराज, लाबुलता तिणे वा कट्ठे वा लताय वा सोण्डिकाहि आलम्बित्वा तस्सूपरि वड्ढति, एवमेव खो, महाराज, योगिना योगावचरेन अरहत्ते अभिवड्ढितुकामेन मनसा आरम्मणं आलम्बित्वा अरहत्ते अभिवड्ढितब्बं। इदं, महाराज, लाबुलताय एकं अङ्गं गहेतब्बं। भासितम्पेतं, महाराज, थेरेन सारिपुत्तेन धम्मसेनापतिना –
1. ‘‘Bhante nāgasena, ‘lābulatāya ekaṃ aṅgaṃ gahetabba’nti yaṃ vadesi, katamaṃ taṃ ekaṃ aṅgaṃ gahetabba’’nti? ‘‘Yathā, mahārāja, lābulatā tiṇe vā kaṭṭhe vā latāya vā soṇḍikāhi ālambitvā tassūpari vaḍḍhati, evameva kho, mahārāja, yoginā yogāvacarena arahatte abhivaḍḍhitukāmena manasā ārammaṇaṃ ālambitvā arahatte abhivaḍḍhitabbaṃ. Idaṃ, mahārāja, lābulatāya ekaṃ aṅgaṃ gahetabbaṃ. Bhāsitampetaṃ, mahārāja, therena sāriputtena dhammasenāpatinā –
‘‘‘यथा लाबुलता नाम, तिणे कट्ठे लताय वा।
‘‘‘Yathā lābulatā nāma, tiṇe kaṭṭhe latāya vā;
आलम्बित्वा सोण्डिकाहि, ततो वड्ढति उप्परि॥
Ālambitvā soṇḍikāhi, tato vaḍḍhati uppari.
‘‘‘तथेव बुद्धपुत्तेन, अरहत्तफलकामिना।
‘‘‘Tatheva buddhaputtena, arahattaphalakāminā;
आरम्मणं आलम्बित्वा, वड्ढितब्बं असेक्खफले’’’ति॥
Ārammaṇaṃ ālambitvā, vaḍḍhitabbaṃ asekkhaphale’’’ti.
लाबुलतङ्गपञ्हो पठमो।
Lābulataṅgapañho paṭhamo.
